ಸಿಪಿ ಯೋಗೇಶ್ವರ್​ಗೆ ಸಚಿವ ಸ್ಥಾನ: ಅಸಮಾಧಾನಗೊಂಡ ಮೂಲ ಬಿಜೆಪಿ ಶಾಸಕರಿಂದ ರಹಸ್ಯ ಸಭೆ

ಬೆಂಗಳೂರು(ಫೆ. 04): ಸಚಿವ ಸಂಪುಟ ವಿಸ್ತರಣೆಗೆ ಇನ್ನೇನು ಎರಡು ದಿನ ಬಾಕಿ ಉಳಿದಿದ್ದು, ಮೂಲ ಬಿಜೆಪಿಗರಲ್ಲಿ ಅಸಮಾಧಾನ ಸ್ಪೋಟವಾಗಿದೆ. ಇದಕ್ಕೆ ಕಾರಣ ಸೋತವರಿಗೆ ಮಣೆಹಾಕುತ್ತಿರುವುದು.  ಸಿಪಿ ಯೋಗೇಶ್ವರ್​ಗೆ ಸಚಿವ ಸ್ಥಾನ ನೀಡಲು ಸಿಎಂ ಮುಂದಾಗಿರುವುದು  ನಾಯಕರಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ. ಇದೇ ಹಿನ್ನೆಲೆಯಲ್ಲಿ ಮುಂದಿನ ನಡೆ ಕುರಿತು ಇಂದು ಮೂಲ ಬಿಜೆಪಿ ನಾಯಕರು ರಹಸ್ಯ ಸಭೆ ನಡೆಸಿದ್ದಾರೆ.

ಸೋತವರಿಗೆ ಸಚಿವ ಸ್ಥಾನ ನೀಡುತ್ತಿರುವ ಬಗ್ಗೆ ಆಕ್ರೋಶಕ್ಕೆ ಒಳಗಾಗಿರುವ ನಾಯಕರು ಈ ಬಗ್ಗೆ ಬಹಿರಂಗವಾಗಿಯೇ ಅಸಮಾಧಾನ ಹೊರಹಾಕಿದ್ದಾರೆ. ಈಗಾಗಲೇ 10:3 ಅನುಪಾತದಲ್ಲಿ ಸಂಪುಟ ವಿಸ್ತರಣೆ ವೇಳೆ ಯೋಗೇಶ್ವರ್​ ಸ್ಥಾನ ನೀಡಿದರೆ, ಮುಂದೇನು ಎಂಬ ಬಗ್ಗೆ ಚರ್ಚಿಸಲು ರಾಜುಗೌಡ ಹಾಗೂ ರೇಣುಕಾಚಾರ್ಯ ನೇತೃತ್ವದಲ್ಲಿ ಸಭೆ ನಡೆಸಿದ್ದಾರೆ.

ಚುನಾವಣೆಯಲ್ಲಿ ಗೆದ್ದಿರುವ ಹಲವಾರು ಆಕಾಂಕ್ಷಿಗಳು ಪಕ್ಷದಲ್ಲಿದ್ದಾರೆ. ಈ ನಡುವೆ ಸರ್ಕಾರ ರಚನೆಗೆ ಪ್ರಮುಖ ಪಾತ್ರವಹಿಸಿದ ನೂತನ ಬಿಜೆಪಿ ನಾಯಕರಿಗೆ ಮಣೆ ನೀಡಲಾಗಿದೆ. ಈ ನಡುವೆ ಆಪರೇಷನ್​ ಕಮಲ ನಡೆಸಿದ ಪರಾಜಿತ ಅಭ್ಯರ್ಥಿ ಸಿಪಿ ಯೋಗೇಶ್ವರ್​ಗೆ ಸ್ಥಾನ ನೀಡುವುದು ಎಷ್ಟರ ಮಟ್ಟಿಗೆ ಸರಿ ಎಂಬ ವಾದ ಮೂಲ ಬಿಜೆಪಿ ನಾಯಕರಿಂದ ಕೇಳಿ ಬಂದಿದೆ. ‘

ಈಗಾಗಲೇ ಸೋತ ಸವದಿಗೆ ಹೈ ಕಮಾಂಡ್​ ಡಿಸಿಎಂ ಪಟ್ಟ ಕರುಣಿಸಿದೆ. ಈಗ ಮತ್ತೊಮ್ಮೆ ಅದೇ ತಪ್ಪು ಬೇಡ. ಇದರಿಂದ ಪಕ್ಷದಲ್ಲಿ ಮತ್ತಷ್ಟು ಅಸಮಾಧಾನ ಸ್ಪೋಟಗೊಳ್ಳಲಿದೆ. ಇದರ ಬದಲು ಹೈದ್ರಾಬಾದ್​ ಕರ್ನಾಟಕಕ್ಕೆ ಆದ್ಯತೆ ನೀಡಿ. ಸಮತೋಲನ ಕಾಪಾಡಿಕೊಳ್ಳಬೇಕು ಎಂಬ ಮಾತು ಕೇಳಿಬಂದಿದೆ.

ಇದನ್ನು ಓದಿ: ಇಂಗ್ಲಿಷ್ ಸಂಕಷ್ಟ: ರಮೇಶ್​ ಜಾರಕಿಹೊಳಿಗೆ ಕೈ ತಪ್ಪಲಿದೆಯಾ ನೀರಾವರಿ ಖಾತೆ?

ಇನ್ನು ಪಕ್ಷದಲ್ಲಿ ಸಚಿವ ಸ್ಥಾನದ ಆಕಾಂಕ್ಷಿಗಳ ಪಟ್ಟಿ ಬೆಳೆಯುತ್ತಿದ್ದು, ಯಾರು ಸಂಪುಟ ಸೇರಲಿದ್ದಾರೆ, ಯಾರಿಲ್ಲ ಎಂಬ ಕುತೂಹಲ ದಿನೇ ದಿನೇ ಹೆಚ್ಚುತ್ತಿದೆ.