ಖಾತೆ ಬದಲಾವಣೆ ಮುನ್ಸೂಚನೆ; ಯಡಿಯೂರಪ್ಪ ಭೇಟಿ ಮಾಡಿದ ಆರ್​ ಅಶೋಕ್​

ಬೆಂಗಳೂರು (ಫೆ.08): ಸಂಪುಟ ವಿಸ್ತರಣೆ ಮುಗಿಯುತ್ತಿದ್ದಂತೆ ಖಾತೆ ಹಂಚಿಕೆ ಗೊಂದಲದಲ್ಲಿ ಸಿಎಂ ಮುಳುಗಿದ್ದು, ಯಾರಿಗೆ ಯಾವ ಖಾತೆ ನೀಡಬೇಕು ಎಂಬ ಸಂಕಷ್ಟಕ್ಕೆ ಒಳಗಾಗಿದ್ದಾರೆ. ಇದರ ಜೊತೆಗೆ ನೂತನ ಸಚಿವರುಗಳು ಪ್ರಬಲ ಖಾತೆಗಳಿಗಾಗಿ ಬೇಡಿಕೆ ಇಟ್ಟಿರುವುದು ಇನ್ನಷ್ಟು ಬಿಕ್ಕಟ್ಟು ಮೂಡಿದೆ. 

ಸರ್ಕಾರದಲ್ಲಿ ಈಗಾಗಲೇ ಸಿಎಂ ಸೇರಿದಂತೆ ಅನೇಕ ಸಚಿವರು ಎರಡು ಮೂರು ಖಾತೆಗಳನ್ನು ಹೊಂದಿದ್ದಾರೆ. ಈ ಖಾತೆಗಳನ್ನು ನೂತನ ಸಚಿವರಿಗೆ ನೀಡಲು ಸಿಎಂ ಮುಂದಾಗಿದ್ದಾರೆ. ಇದೇ ಹಿನ್ನೆಲೆ ಖಾತೆ ಅದಲು ಬದಲಾಗುವ ಸಾಧ್ಯತೆ ಇದೆ.

ಇನ್ನು ಖಾತೆ ಬದಲಾವಣೆಯಾಗುವ ಹಿನ್ನೆಲೆ  ಸಿಎಂ ಬಿಎಸ್​ವೈರನ್ನ ಸಚಿವ ಆರ್​​ ಅಶೋಕ್ ಭೇಟಿ ಮಾಡಿ ಚರ್ಚಿಸಿದ್ದಾರೆ.  ಅಶೋಕ್ ಬಳಿ ಕಂದಾಯ, ಪೌರಾಡಳಿತ ಖಾತೆ ಇವೆ. ಇವುಗಳಲ್ಲಿ ಒಂದು ಖಾತೆ ಪಡೆದು ನೂತನ ಸಚಿವರಿಗೆ ನೀಡಲಿದ್ದಾರೆ ಎನ್ನಲಾಗಿದೆ. ಇದೇ ಕಾರಣಕ್ಕೆ ಅವರು ಇಂದು ಮುಖ್ಯಮಂತ್ರಿ ಅವರನ್ನು ಭೇಟಿಯಾಗಿ ಚರ್ಚೆ ನಡೆಸಿದ್ದಾರೆ.

ಪ್ರಬಲ ಖಾತೆಗೆ ನೂತನ ಸಚಿವರ ಲಾಬಿ

ಕಾಂಗ್ರೆಸ್​-ಜೆಡಿಎಸ್​ಗೆ ರಾಜೀನಾಮೆ ನೀಡಿ ಸರ್ಕಾರ ರಚನೆಗೆ ಸಹಾಯ ಮಾಡಿದ ಹಿನ್ನೆಲೆ ತಮಗೆ ಸರ್ಕಾರದಲ್ಲಿ ಪ್ರಬಲ ಖಾತೆಗಾಗಿ ನೂತನ ಸಚಿವರು ಪಟ್ಟು ಹಿಡಿದಿದ್ದಾರೆ. ಇದೇ ಹಿನ್ನೆಲೆಯಲ್ಲಿ ಕೆ.ಗೋಪಾಲಯ್ಯ, ಹಾಗೂ ನಾರಾಯಣಗೌಡ ಅವರು ಸಿಎಂ ಭೇಟಿಯಾಗಿ ಪ್ರಬಲ ಖಾತೆ ನೀಡುವಂತೆ ಮನವಿ ಸಲ್ಲಿಸಿದ್ದಾರೆ.

ಇದನ್ನು ಓದಿ: ಯಡಿಯೂರಪ್ಪ ಸ್ವತಂತ್ರವಾಗಿ ಖಾತೆ ಹಂಚಿಕೆ ಮಾಡಲಾರದಷ್ಟು ಅಸಮರ್ಥ ಸಿಎಂ: ಸಿದ್ಧರಾಮಯ್ಯ ಲೇವಡಿ

ಖಾತೆ ಬಗ್ಗೆ ಮಾತನಾಡಿರುವ ಭೈರತಿ ಬಸವರಾಜ್​, ಎಸ್​ಟಿ ಸೋಮಶೇಖರ್​, ನಾವು ಕಾಂಗ್ರೆಸ್​ ಬಿಟ್ಟು ಬಂದಿರುವವರು. ಈಗ ಸರ್ಕಾರದಲ್ಲಿ ಪ್ರಬಲ ಖಾತೆ ನೀಡಬೇಕು ಇದು ನಮಗೆ ಮಾರ್ಯದೆ ಪ್ರಶ್ನೆ ಎಂದಿದ್ದಾರೆ.