ಆನೇಕಲ್​​ನಲ್ಲಿ ಹತ್ತಾರು ಎಕರೆ ಕೃಷಿ ಇಲಾಖೆ ಭೂಮಿ ಒತ್ತುವರಿ: ಸಚಿವ ಬಿಸಿ ಪಾಟೀಲ್​​ ಭೇಟಿ, ಪರಿಶೀಲನೆ

ಆನೇಕಲ್(ಜು.05): ಅದು ಸಾವಿರ ಕೋಟಿ ಮೌಲ್ಯದ ಸರ್ಕಾರದ ಸ್ವತ್ತು. ಅದನ್ನು ದಶಕಗಳ‌ ಹಿಂದೆ ಶ್ಯಾನುಭೋಗ ಕುಟುಂಬ ರೈತರಿಗೆ ಅನುಕೂಲವಾಗಲೆಂದು ಸುಮಾರು 200 ಎಕರೆ ಪ್ರದೇಶವನ್ನು ಸರ್ಕಾರಕ್ಕೆ ದಾನವಾಗಿ ನೀಡಿದ್ದರು.‌ ಸರ್ಕಾರ ಅದನ್ನು ಕೃಷಿ ಇಲಾಖೆಗೆ ನೀಡಿ ರೈತರ ಉಪಯೋಗಕ್ಕಾಗಿ ಜಿಲ್ಲಾ ಮಟ್ಟದ ರೈತ ತರಬೇತಿ ಕೇಂದ್ರವನ್ನು ಸ್ಥಾಪಿಸಿದೆ. 

ಆದರೆ, ಇತ್ತೀಚಿನ ದಿನಗಳಲ್ಲಿ 200 ಎಕರೆ ಜಾಗದಲ್ಲಿ ಹತ್ತಾರು ಎಕರೆ ಒತ್ತುವರಿಯಾಗಿದ್ದು, ತೆರವುಗೊಳಿಸುವಂತೆ ಸರ್ಕಾರವನ್ನು ರೈತ ಸಮುದಾಯ ಒತ್ತಾಯಿಸಿತ್ತು. ರೈತರ ದೂರಿಗೆ ಸ್ಪಂದಿಸಿದ ಕೃಷಿ ಸಚಿವ ಬಿ ಸಿ ಪಾಟೀಲ್ ಬೆಂಗಳೂರು ಹೊರವಲಯ ಆನೇಕಲ್ ತಾಲ್ಲೂಕಿನ ರಾಮಕೃಷ್ಣಪುರದ ಬಳಿ ಇರುವ ಜಿಲ್ಲಾ ಕೃಷಿ ತರಬೇತಿ ಕೇಂದ್ರಕ್ಕೆ ಅಧಿಕಾರಿಗಳೊಂದಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಅಲ್ಲದೆ ಅಧಿಕಾರಿಗಳು ಮತ್ತು ರೈತ ನಾಯಕರೊಂದಿಗೆ ಚರ್ಚೆ ನಡೆಸಿದ ಸಚಿವರು ಇಡೀ ತರಬೇತಿ ಕೇಂದ್ರವನ್ನು ಪ್ರದಕ್ಷಿಣೆ ಹಾಕಿದ್ದಾರೆ. ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಸಚಿವರು ದಶಕಗಳ ಹಿಂದೆ ವೆಂಕಟರಮಣಯ್ಯ ಶಾಸ್ತ್ರಿ ಎಂಬುವವರು ಸರ್ಕಾರಕ್ಕೆ ಸುಮಾರು 200 ಎಕರೆಗೂ ಅಧಿಕ ಜಮೀನನ್ನು ದಾನವಾಗಿ ನೀಡಿದ್ದಾರೆ. ಇದರಲ್ಲಿನ 70 ಎಕರೆ ಜಾಗವನ್ನು ಎಸ್ಕಾರ್ಟ್ ಕಂಪನಿಗೆ ಈ ಹಿಂದೆ ಸರ್ಕಾರ ಲೀಜ್​​ಗೆ​​ ನೀಡಿದೆ ಎಂಬ ಮಾಹಿತಿ ಲಭ್ಯವಾಗಿದೆ ಎಂದಿದ್ದಾರೆ.

ಇದನ್ನೂ ಓದಿ: Sunday lockdown: ಇಂದು ಸಂಪೂರ್ಣ ಲಾಕ್​ಡೌನ್​; ಏನಿರುತ್ತೆ, ಏನಿರಲ್ಲ? ಇಲ್ಲಿದೆ ಮಾಹಿತಿ

ಜೊತೆಗೆ ಈ ಕಂಪನಿ ಲೀಜ್ ಉದ್ದೇಶವನ್ನು ದುರುಪಯೋಗಪಡಿಸಿಕೊಂಡಿದಲ್ಲದೆ ಕೃಷಿ ಇಲಾಖೆ ಜಾಗವನ್ನು ಒತ್ತುವರಿ ಸಹ ಮಾಡಿಕೊಂಡಿದೆ ಎಂಬ ದೂರು ಇದ್ದು, ಪರಿಶೀಲನೆ ನಡೆಸಿ ಅಗತ್ಯ ಕ್ರಮಕೈಗೊಳ್ಳಲಾಗುವುದು. ಇನ್ನೂ ಲಾಕ್​​ಡೌನ್ ಸಮಯದಲ್ಲಿ ರೈತರಿಗೆ ನೆರವಾಗಲೆಂದು ಸರ್ಕಾರ ಪ್ಯಾಕೇಜ್ ಘೋಷಣೆ ಮಾಡಿದೆ. ಇನ್ನೂ ಸಾಕಷ್ಟು ಸಮಸ್ಯೆಗಳು ರೈತ ಸಮುದಾಯದಿಂದ ಕೇಳಿ ಬರುತ್ತಿದೆ. ಈ ಬಗ್ಗೆ ಮುಖ್ಯಮಂತ್ರಿಗಳು ಮುಂದಿನ ದಿನಗಳಲ್ಲಿ ಆರ್ಥಿಕ ಸ್ಥಿತಿ ಅವಲೋಕಿಸಿ ಸರ್ಕಾರ ಮತ್ತಷ್ಟು ನೆರವು ನೀಡಲಿದೆ ಎಂದು ಸಚಿವ ಬಿ ಸಿ ಪಾಟೀಲ್ ತಿಳಿಸಿದ್ದಾರೆ.