ಸಿಎಂ ಯಡಿಯೂರಪ್ಪಗೆ ಇಂದೂ ಕೂಡ ಕಾಯುವುದೇ ಕಾಯಕ; ಅಮಿತ್ ಶಾ ಭೇಟಿ ಅನುಮಾನ

ನವದೆಹಲಿ (ಜ.31): ಸಚಿವ ಸಂಪುಟ ವಿಸ್ತರಣೆ ಸಂಬಂಧ ಮುಖ್ಯಮಂತ್ರಿ ಬಿ.ಎಸ್.​ ಯಡಿಯೂರಪ್ಪ ಗುರುವಾರ ದೆಹಲಿಗೆ ತೆರಳಿದ್ದರು. ಸಂಜೆ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ. ನಡ್ಡಾ ಮತ್ತು ಕೇಂದ್ರ ಗೃಹ ಸಚಿವ ಅಮಿತ್​ ಶಾರನ್ನುಭೇಟಿಯಾಗಿ ಮಾತುಕತೆ ಕೂಡ ನಡೆಸಿದ್ದರು. ಆದರೆ, ಸಂಪುಟ ವಿಸ್ತರಣೆ ವಿಚಾರವಾಗಿ ಚರ್ಚೆ ನಡೆಸಲು ಸಾಧ್ಯವಾಗಿರಲಿಲ್ಲ. ಅಂತೆಯೇ, ಇಂದು ಕೂಡ ಅಮಿತ್​ ಶಾ ಭೇಟಿ ಅನುಮಾನ ಎನ್ನಲಾಗುತ್ತಿದೆ.  

ಭೇಟಿ ಸಮಯವನ್ನು ಅಮಿತ್ ಶಾ​ ಪದೇ ಪದೇ ಬದಲಾಯಿಸುತ್ತಿದ್ದಾರೆ ಎನ್ನಲಾಗಿದೆ. ಮೊದಲಿಗೆ ಬೆಳಿಗ್ಗೆ 9.30-10ಗಂಟೆ ಒಳಗೆ ಭೇಟಿ ಆಗುವುದಾಗಿ ಅವರು ತಿಳಿಸಿದ್ದರು. ನಂತರ ಭೇಟಿ ಸಮಯ ಮಧ್ಯಾಹ್ನ 2 ಗಂಟೆಗೆ ಮುಂದೂಡಲ್ಪಟ್ಟಿತ್ತು. ಆದರೆ, 2 ಗಂಟೆಗೂ ಅಮಿತ್​ ಶಾ ಸಿಗುವುದು ಅನುಮಾನ ಎನ್ನಲಾಗುತ್ತಿದೆ.

ಅಮಿತ್​ ಶಾ ಬೆಳಿಗ್ಗೆ 11ಕ್ಕೆ ಸಂಸತ್ ಜಂಟಿ‌ ಅಧಿವೇಶನದಲ್ಲಿ ಭಾಗಿಯಾಗುತ್ತಿದ್ದಾರೆ. ಮಧ್ಯಾಹ್ನ 2ಕ್ಕೆ ಬಿಜೆಪಿ ಕಾರ್ಯಕಾರಿ ಸಮಿತಿ ಸಭೆಯಲ್ಲಿ ಅವರು ಪಾಲ್ಗೊಳ್ಳಬೇಕಿದೆ. ಇನ್ನು, ಮಧ್ಯಾಹ್ನ 3:30ಕ್ಕೆ ಎನ್ ಡಿ ಎ ಮೈತ್ರಿ ಕೂಟದ ಸಭೆ ಇದೆ. ಬಳಿಕ‌ ವಿಧಾನಸಭಾ ಚುನಾವಣಾ ಪ್ರಚಾರದಲ್ಲಿ ಶಾ ಭಾಗಿಯಾಗುತ್ತಿದ್ದಾರೆ. ಈ ಟೈಟ್ ಷೆಡ್ಯೂಲ್ ನಡುವೆ ಬಿಎಎಸ್​ವೈರನ್ನು ಅಮಿತ್​ ಶಾ ಭೇಟಿ ಮಾಡುವುದು ಅನುಮಾನ. ಹೀಗಾಗಿ, ಇಂದು ಕೂಡ ಭೇಟಿ ಅನುಮಾನ ಎಂದೇ ಹೇಳಲಾಗುತ್ತಿದೆ.

ಇದನ್ನೂ ಓದಿ: ಸಂಪುಟ ವಿಸ್ತರಣೆ: ಬಿಎಸ್​ವೈ-ಜೆಪಿ ನಡ್ಡಾ ಭೇಟಿ ಅಂತ್ಯ: ನಾಳೆ ಬನ್ನಿ ಎಂದ ಅಮಿತ್ ಶಾ​​

ಇತ್ತ, ಪಕ್ಷಾಂತರ ಮಾಡಿರುವ ಶಾಸಕರು ಸಚಿವ ಸ್ಥಾನಕ್ಕಾಗಿ ಒಂದೇ ಸಮನೆ ಬಿಎಸ್​ವೈ ಮೇಲೆ ಒತ್ತಡ ಹೇರುತ್ತಿದ್ದಾರೆ. ಎಲ್ಲರೂ ಸಚಿವ ಸ್ಥಾನ ನೀಡಲೇಬೇಕು ಎಂದು ಒತ್ತಡ ಹೇರುತ್ತಿದ್ದಾರೆ. ಅತ್ತ, ಬಿಜೆಪಿ ಹೈಕಮಾಂಡ್​ ಭೇಟಿಗೆ ಸಿಗುತ್ತಿಲ್ಲ. ಇವರ ಮಧ್ಯೆ ಬಿಎಸ್​ವೈ ಸದ್ಯ ಸಂಕಟಕ್ಕೆ ಸಿಲುಕಿದ್ದಾರೆ.