Bengaluru: ಮಾರ್ಕೆಟ್​ನಲ್ಲಿ ನೋಟಿನ ಸುರಿಮಳೆಗೈದ ವ್ಯಕ್ತಿ ಮೇಲೆ FIR, ಪೊಲೀಸರ ಮುಂದೆ ಕಾರಣ ಬಯಲು!

ಬೆಂಗಳೂರು: ಕೆ.ಆರ್​ ಮಾರ್ಕೆಟ್​ನ ಫ್ಲೈಓವರ್ (KR Market​ ) ಮೇಲೆ ನಿಂತು ಹಣವನ್ನು ಎಸೆದು ಹುಚ್ಚಾಟ ಮೆರೆದಿದ್ದ ವ್ಯಕ್ತಿಯ ವಿರುದ್ಧ ದೂರು (Complaint) ದಾಖಲಾಗಿದೆ.  ನಗರದಲ್ಲಿ ಸದಾ ಜನಜಂಗುಳಿಯಿಂದಿರುವ ಪ್ರದೇಶದಲ್ಲಿ ಈ ರೀತಿ ಹಣವನ್ನು ಎಸೆದು ಜನರಿಗೆ ಅಪಾಯವನ್ನುಂಟು ಮಾಡುವ ಕೆಲಸ ಮಾಡಿದ್ದಕ್ಕೆ ಹಾಗೂ ಸಂಚಾರ ವ್ಯವಸ್ಥೆಗೆ (Traffic) ಅಡ್ಡಿ ಬಂದು ಸಾರ್ವಜನಿಕರಿಗೆ ತೊಂದರೆಯನ್ನುಂಟು ಮಾಡಿದ್ದರಿಂದ ಅಪರಿಚಿತ ವ್ಯಕ್ತಿ ವಿರುದ್ಧ ಸಿಟಿ ಮಾರ್ಕೆಟ್ (City Market)​ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಾಗಿದೆ. ವ್ಯಕ್ತಿಯೊಬ್ಬ ಬೆಳಗ್ಗೆ 10:50ರ ಸಂದರ್ಭದಲ್ಲಿ ಬ್ಯಾಗ್​ ಒಂದರಲ್ಲಿ 10 ರೂ ನೋಟುಗಳನ್ನು ಫ್ಲೈ ಓವರ್​ ಮೇಲಿಂದ ಎಸೆದಿದ್ದನು.

ನೋಟಿಗಾಗಿ ಮುಗಿಬಿದ್ದ ಜನ

ಬೈಕ್​ನಲ್ಲಿ ಬಂದಂತಹ ಅಪರಿಚಿತ ವ್ಯಕ್ತಿ ಫ್ಲೈಓವರ್​ನ ಮೇಲೆ ನಿಂತು ನೋಟುಗಳನ್ನು ಎಸೆದು,  ಆತ ಯಾರು ಅಂತಾ ನೋಡುವಷ್ಟರಲ್ಲಿ ಪರಾರಿಯಾಗಿದ್ದ. ಮೇಲಿಂದ ತೂರಿ ಬರುತ್ತಿರುವುದು  ನೋಟುಗಳು ಎಂದು ತಿಳಿದ ಕೂಡಲೇ ಸಾರ್ವಜನಿಕರು ನಾ ಮುಂದು, ತಾ ಮುಂದು ಎಂದು ಆಯ್ದುಕೊಳ್ಳಲು ಮುತ್ತಿಕೊಂಡಿದ್ದಾರೆ.  10 ರೂ ಮುಖಬೆಲೆಯ ಸುಮಾರು ಎರಡರಿಂದ ಮೂರು ಸಾವಿರ ರೂಪಾಯಿಗಳನ್ನು ಆತ ಎಸೆದಿದ್ದ. ಪೊಲೀಸರು ಹಿಂಬಾಲಿಸಿ ಹೋದರಾದರೂ ಟೌನ್​ ಹಾಲ್ ಕಡೆಗೆ ಹೋಗಿ ತಪ್ಪಿಸಿಕೊಂಡಿದ್ದ ಎಂದು ತಿಳಿದುಬಂದಿದೆ.

ವಂದೇ ಮಾತರಂ ಸಮಾಜಸೇವಾ ಸಂಸ್ಥೆಯಿಂದ ದೂರು

ಅರುಣ್ ಪ್ರಚಾರದ ಹುಚ್ಚಿಗಾಗಿ ಈ ರೀತಿ ಮಾಡಿದ್ದಾನೆ. ಸಾವಿರಾರು ಜನರು ಓಡಾಡುವ ರಸ್ತೆಯಲ್ಲಿ ಈ ರೀತಿ ಮಾಡಿದ್ದಾನೆ. ಆದರೆ ಪಾಪ ಜನರು ದುಡ್ಡನ್ನು ತೆಗೆದುಕೊಳ್ಳಲು ಅಪಾಯವನ್ನು ಲೆಕ್ಕಿಸದೇ ಮುಂದಾಗಿದ್ದಾರೆ. ಈ ವೇಳೆ ಏನಾದರೂ ಅನಾಹುತ ಆದರೆ ಯಾರು ಹೊಣೆ. ಆತನ ಮೇಲೆ ಕಠಿಣ ಕ್ರಮ ತೆಗೆದುಕೊಳ್ಳಬೇಕು. ಪ್ರಚಾರದ ಗಿಮಿಕ್​ಗಾಗಿ ಈ ರೀತಿ ಮಾಡಬಾರದು ಎಂದು ವಂದೇ ಮಾತರಂ ಸಮಾಜಸೇವಾ ಸಂಸ್ಥೆ, ಕೆಆರ್ ಮಾರುಕಟ್ಟೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದೆ.

ಇದನ್ನೂ ಓದಿ: Bengaluru: ಬೆಂಗಳೂರಿನಲ್ಲಿ ಹಣದ ಮಳೆ ಸುರಿಸಿದ ಅಸಾಮಿ; ಕೆ.ಆರ್ ಮಾರ್ಕೆಟ್ ಫ್ಲೈ ಓವರ್​ನಿಂದ ದುಡ್ಡು ಎಸೆದ ಭೂಪ!

ಇನ್ನು ಪೊಲೀಸ್​ ಕಾನ್ಸ್​ಟೇಬಲ್ ಸುನೀಲ್ ಕುಮಾರ್​ ಕೂಡ ಅರುಣ್​ ಮೇಲೆ ದೂರು ದಾಖಲಿಸಿದ್ದಾರೆ. ನಿರ್ಬಂಧಿತ ಸ್ಥಳದಲ್ಲಿ ವಾಹನ ನಿಲ್ಲಿಸಿ ಮತ್ತು ಪಾದಚಾರಿ ಮಾರ್ಗ ಅತಿಕ್ರಮಿಸಿಕೊಂಡು ಜನರಿಗೆ ಕಿರಿಕಿರಿ ಉಂಟು ಮಾಡಿದ್ದಕ್ಕಾಗಿ ಹಾಗೂ ನೋಟುಗಳನ್ನು ಎಸೆದು ಸಾರ್ವಜನಿಕರ ಸಂಚಾರಕ್ಕೆ ಅಡಚಣೆ ಉಂಟುಮಾಡಿದ್ದಕ್ಕಾಗಿ ಐಪಿಸಿ ಸೆಕ್ಸನ್ 283 ಹಾಗೂ ಕೆಪಿ ಆಕ್ಟ್​ 92(ಡಿ) ಅಡಿಯಲ್ಲಿ ದೂರು ದಾಖಲಾಗಿದೆ.

ಅರಣ್​ನನ್ನು ವಶಕ್ಕೆ ಪಡೆದು ವಿಚಾರಣೆ

ಕೆಆರ್ ಮಾರ್ಕೆಟ್​ ಫ್ಲೈ ಓವರ್​ ಮೇಲೆ ನಿಂತು ಹಣ ಎಸೆದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅರುಣ್​ನನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ. ಅರುಣ್​ನನ್ನು ವಶಕ್ಕೆ ಪಡೆದಿರುವ ಪೊಲೀಸರು ಚಾಮರಾಜಪೇಟೆ ಪೊಲೀಸ್​ ಠಾಣೆಯಲ್ಲಿರಿಸಿ ವಿಚಾರಣೆ ನಡೆಸುತ್ತಿದ್ದಾರೆ. ಚಿಕ್ಕಪೇಟೆ ಎಸಿಪಿ ಗಿರಿ ವಿಚಾರಣೆ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ.

ಮಾರ್ಕೆಟಿಂಗ್​ ಮಾಡಲು ಈ ಐಡಿಯಾ

ಅರುಣ್​ನನ್ನು ವಶಕ್ಕೆ ಪಡೆದಿರುವ ಪೊಲೀಸರು ಹಣವನ್ನು ಎಸೆದಿದ್ದೇಕೆ? ಎಷ್ಟು ಹಣವಿತ್ತು? ಉದ್ಧೇಶವೇನು? ಎಂದು ಪ್ರಶ್ನಿಸಿದ್ದಾರೆ. ಮೂಲತಃ ಬಸವೇಶ್ವರ ನಗರ ನಿವಾಸಿಯಾಗಿರುವ ಅರುಣ್ ಮಾರ್ಕೆಟಿಂಗ್ ಕಂಪನಿ ಪ್ರಚಾರಕ್ಕಾಗಿ ಈ ಸ್ಟಾಟರ್ಜಿ ಉಪಯೋಗಿಸಿರುವುದಾಗಿ ತಿಳಿಸಿದ್ದಾನೆ. ಈ ವಿಡಿಯೋವನ್ನು ರೀಲ್ಸ್​ ಮಾಡಲು ಮಾಡಿಲ್ಲ, ಬದಲಾಗಿ ತಮ್ಮ ಫೇಸ್​ಬುಕ್ ಪೇಜ್​ನಲ್ಲಿ ಹಾಕಿಕೊಳ್ಳುವುದಕ್ಕೆ ಮಾಡಿದ್ದೇನೆ. ಇದು ನನ್ನ ಮಾರ್ಕೆಟಿಂಗ್​ಗೆ ನೆರವಾಗಲಿ ಎಂದು ಮಾಡಿದೆ. ಇದರಿಂದ ನನ್ನ ಬಿಸಿನೆಸ್​ಗೆ ನೆರವಾಗಬಹುದು ಎಂಬ ಉದ್ದೇಶವಿತ್ತೆಂದು ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ಅರುಣ್ ಬಾಯಿ ಬಿಟ್ಟಿದ್ದಾನೆ.