ಲಾರಿ ಚಾಲಕನ ಯಡವಟ್ಟು; ಕಳೆದ ಮೂರೂವರೆ ಗಂಟೆಯಿಂದ ನಿಂತಲ್ಲಿಯೇ ನಿಂತಿರುವ ಮೂರು ರೈಲುಗಳು

ವಿಜಯಪುರ, (ಡಿ. 11): ಲಾರಿ ಚಾಲಕ ಮಾಡಿದ ಯಡವಟ್ಟಿನಿಂದ ಮೂರು ರೈಲುಗಳಲ್ಲಿರುವ ಪ್ರಯಾಣಿಕರು ಪರದಾಡುಂತಾಗಿದೆ. ನಗರದ ಹೊರವಲಯದಲ್ಲಿ.  ಲಾರಿಯೊಂದು ಹೈ ಟೆನ್ಷನ್​ ವಿದ್ಯುತ್ ಕಂಬಕ್ಕೆ ಡಿಕ್ಕಿ ಹೊಡೆದಿದ್ದಾನೆ.  ಪರಿಣಾಮ ವಿದ್ಯುತ್​ ಕಂಬ  ರೈಲು ಹಳಿಯ ಮೇಲೆ ಉರುಳಿ ಬಿದ್ದಿದೆ. ಇದರಿಂದ ರೈಲು ಸಂಚಾರ ಸ್ಥಗಿತಗೊಂಡಿದ್ದು, ಪ್ರಯಾಣಿಕರು ತೊಂದರೆ ಅನುಭವಿಸುವಂತೆ ಆಗಿದೆ.  ಇಂದು ಮಧ್ಯಾಹ್ನ 3.45ಕ್ಕೆ ಈ ಅವಘಡ ಸಂಭವಿಸಿದ್ದು, ವಿದ್ಯುತ್ ಕಂಬದಲ್ಲಿ ವಿದ್ಯುತ್ ಸರಬರಾಜು ಇಲ್ಲದ ಕಾರಣ ಭಾರಿ ಅನಾಹುತ ತಪ್ಪಿದೆ.  ಈ ವಿದ್ಯುತ್ ಕಂಬವನ್ನು ದುರಸ್ಥಿಗೊಳಿಸುವ ಕಾರ್ಯ ಭರದಿಂದ ಸಾಗಿದೆ.  ಈ ಅವಘಡದಿಂದಾಗಿ ಮೂರು ರೈಲುಗಳ ಸಂಚಾರವನ್ನು ತಾತ್ಕಾಲಿಕವಾಗಿ ತಡೆ ಹಿಡಿಯಲಾಗಿದೆ.  ಈ ರೈಲು ಮಾರ್ಗಕ್ಕೆ ಈವರೆಗೂ ವಿದ್ಯುತ್ ಸಂಪರ್ಕ ಕಲ್ಪಿಸಿಲ್ಲ. 

ಈ ಅವಘಡದಿಂದಾಗಿ ಮೂರು ರೈಲುಗಳು ಮೂರು ಪ್ರತ್ಯೇಕ ನಿಲ್ದಾಣಗಳಲ್ಲಿ ನಿಂತಿವೆ.  ಸಂಜೆ. 4.35ಕ್ಕೆ ಹೊರಡಬೇಕಿದ್ದ ಬಾಗಲಕೋಟೆ- ಮೈಸೂರು ಬಸವ ಎಕ್ಸಪ್ರೆಸ್ ರೈಲು ವಿಜಯಪುರದಲ್ಲಿ ನಿಂತಿದೆ.  ಸಂಜೆ. 4.55ಕ್ಕೆ ವಿಜಯಪುರದಿಂದ ಹೊರಡಬೇಕಿರುವ ಮಹಾರಾಷ್ಟ್ರದ ಸೋಲಾಪುರ-ಮೈಸೂರು ಗೋಲಗುಂಬಜ ರೈಲು ವಿಜಯಪುರ ಜಿಲ್ಲೆಯ ಮಿಂಚನಾಳ ರೈಲು ನಿಲ್ದಾಣದಲ್ಲಿ ನಿಂತಿದೆ.  ಸಂ. 5.30ಕ್ಕೆ ವಿಜಯಪುರದಿಂದ ಹೊರಡಬೇಕಿದ್ದ ಗದಗ-ಮುಂಬೈ ರೈಲು ವಿಜಯಪುರ ಜಿಲ್ಲೆಯ ಜುಮನಾಳ ರೈಲು ನಿಲ್ದಾಣದಲ್ಲಿಯೇ ನಿಂತಿದೆ.

ಇದರಿಂದಾಗಿ ರೈಲಿನಲ್ಲಿರುವ ಪ್ರಯಾಣಿಕರು ಪರದಾಡುವಂತಾಗಿದೆ.  ನೈರುತ್ಯ ರೇಲ್ವೆ ಇಲಾಖೆ ಮೂಲಗಳ ಪ್ರಕಾರ ವಿದ್ಯುತ್ ಕಂಬದ ದುರಸ್ಥಿ ಕಾರ್ಯ ಸಮರೋಪಾದಿಯಲ್ಲಿ ಸಾಗಿದ್ದು, ಇನ್ನೋಂದು ಗಂಟೆಯಲ್ಲಿ ರೈಲು ಸಂಚಾರ ಪುನಾರಂಭವಾಗಲಿದೆ ಎಂದು ಹೇಳಲಾಗುತ್ತಿದೆ.