ಹಿಂದೂ ಧರ್ಮದ ಬಗ್ಗೆ ಅವಹೇಳನ: ನ್ಯಾಯಾಲಯದ ಆವರಣದಲ್ಲಿ ಪ್ರೋ ಭಗವಾನ್​ ಮುಖಕ್ಕೆ ಮಸಿ ಬಳಿದ ವಕೀಲೆ

ಬೆಂಗಳೂರು (ಫೆ. 4): ಹಿಂದೂ ಧರ್ಮದ ಬಗ್ಗೆ ಅವಹೇಳನಕಾರಿ ಹೇಳಿಕೆ ಪ್ರಕರಣದಲ್ಲಿ ಜಾಮೀನು ಪಡೆದ ಸಾಹಿತಿ  ಕೆ ಎಸ್​ ಭಗವಾನ್​ ಅವರ ಮುಖಕ್ಕೆ ನ್ಯಾಯಾಲಯದ ಆವರಣದಲ್ಲೇ ವಕೀಲೆಯೊಬ್ಬರು ಮಸಿ ಬಳಿದಿದ್ದಾರೆ. ಮೀರಾ ರಾಘವೇಂದ್ರ ಮಸಿ ಬಳಿದ ವಕೀಲೆ. ಎರಡನೇ ಎಸಿಎಂಎಂ ಕೋರ್ಟ್​ ಆವರಣದಲ್ಲಿ ಈ ಘಟನೆ ನಡೆದಿದೆ. ಹಿಂದೂ ಧರ್ಮದ ಬಗ್ಗೆ ಅವಹೇಳನಕಾರಿ ಹೇಳಿಕೆ ನೀಡಿದ ಹಿನ್ನಲೆ ಸಾಹಿತಿ ಭಗವಾನ್​ ವಿರುದ್ಧ ವಕೀಲೆ ಮೀರಾ ರಾಘವೇಂದ್ರ ಖಾಸಗಿ ದೂರು ದಾಖಲಿಸಿದ್ದರು. ಈ ಪ್ರಕರಣದ ವಿಚಾರಣೆಯನ್ನು ಇಂದು ನ್ಯಾಯಾಲಯ ನಡೆಸಿ, ಸಾಹಿತಿಗಳಿಗೆ ಜಾಮೀನು ನೀಡಿತು. ಈ ವೇಳೆ ಪ್ರಕರಣ ಮುಗಿಸಿ ಹೊರ ಬಂದ ಸಾಹಿತಿ ಭಗವಾನ್​ ಅವರಿಗೆ ವಕೀಲೆ ಮೀರಾ ಮಸಿ ಬಳೆದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಅಲ್ಲದೇ ಈ ಕುರಿತು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಕೂಡ ಬರೆದು ಕೊಂಡಿರುವ ವಕೀಲೆ. ಧರ್ಮವಿರೋಧಿ ಪ್ರೋ ಭಗವಾನ್​ ಇಂದು ಕೋರ್ಟ್​ ಕಟಕಟೆಗೆ ಹಾಜರಾಗಿ ಜಾಮೀನು ಪಡೆದುಕೊಂಡರು. ಅವರಿಗೆ ಮಸಿ ಬಳಿದು ತಕ್ಕ ಶಾಸ್ತಿ ಮಾಡಿದ್ದೇನೆ ಎಂದು ಫೇಸ್​ಬುಕ್​ನಲ್ಲಿ ತಿಳಿಸಿದ್ದಾರೆ. ಅಲ್ಲದೇ, ತಾವು ಮಸಿ ಬಳಿದಿರುವ ವಿಡಿಯೋವನ್ನು ಕೂಡ ಹಾಕಿಕೊಂಡಿದ್ದಾರೆ.

ಸದಾ ನಮ್ಮ ಹಿಂದು ಧರ್ಮವನ್ನು ಭವಾನ್​ ಗುರಿಯಾಗಿಸಿಕೊಂಡು ಅವಹೇಳನಕಾರಿ ಹೇಳಿಕೆ ನೀಡುತ್ತಾರೆ. ಇದೇ ರೀತಿ ಕಳೆದ ಅಕ್ಟೋಬರ್​ 11 ರಂದು ನೀಡಿದ ಹೇಳಿಕೆ ಸಾಕ್ಷ್ಯಾಧಾರಗಳ ಮೇಲೆ ಅವರ ವಿರುದ್ಧ ವಕೀಲೆ ಮೀರಾ ಕ್ರಿಮಿನಲ್​ ಮೊಕದ್ಧಮೆ ದಾಖಲಿಸಿದ್ದಾಗಿ ತಿಳಿಸಿದ್ದಾರೆ

ವಕೀಲೆ ಈ  ಕಾರ್ಯ ಖಂಡಿಸಿ ಮಾತನಾಡಿರುವ ಭಗವಾನ್​ ಪರ ವಕೀಲ  ಸೂರ್ಯ ಮುಕುಂದರಾಜ್, ನ್ಯಾಯಾಲಯದ ಆವರಣದಲ್ಲಿ ಈ ರೀತಿಯ ಘಟನೆ ನಡೆಯಬಾರದಿತ್ತು. ಭಗವಾನ್ ರವರು ಕಾನೂನಿಗೆ ಬೆಲೆ ಕೊಟ್ಟು ಮೈಸೂರಿಂದ ಬೆಂಗಳೂರಿಗೆ ಹಾಜರಾಗಿದ್ದಾರೆ. ಕರಿ ಕೋಟ್ ಹಾಕಿರುವ ವಕೀಲೆ ಈ ರೀತಿ ಮಾಡುವುದು ಸರಿಯಲ್ಲ. ನ್ಯಾಯ ಕೊಡಿಸುವ ವಕೀಲರು ಈ ರೀತಿ ಸಮಾಜಕ್ಕೆ ಕೆಟ್ಟ ಉದ್ದೇಶ ಕೊಡಬಾರದು. ಇವತ್ತಿನ ದಿನಾಂಕ ನಿಗದಿ ಯಂತೆ ನ್ಯಾಯಾಲಯಕ್ಕೆ ಹಾಜರಾಗಬೇಕಿತ್ತು. ನ್ಯಾಯಾಲಯಕ್ಕೆ ಹಾಜರಾಗಿ ವಾಪಸ್ ಬರಬೇಕಾದರೆ ಈ ರೀತಿಯ ಕೃತ್ಯ ಜರುಗಿದೆ. ಅವಾಚ್ಯ ಶಬ್ದಗಳಿಂದ ಬೈದು ಮುಖಕ್ಕೆ ಮಸಿ ಬಳಿದು ಹಲ್ಲೆ ಮಾಡಿದ್ದಾರೆ. ಇದು ನ್ಯಾಯಲಯ ಮತ್ತು ವಕೀಲ ಸಮುದಾಯಕ್ಕೆ ಮಾಡಿದ ಅಪಮಾನ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಅವರು ಪ್ರತಿಭಟನೆ ಮಾಡುವುದಿದ್ದರೆ, ಹೊರಗಡೆ ಮಾಡಲಿ. ಈ ಕೃತ್ಯ ಎಸಗಿದ ವಕೀಲೆಗೆ  ನ್ಯಾಯಾಲಯದಿಂದ ನಿರ್ಬಂಧ ಹೇರಬೇಕು. ಹಲ್ಲೆ ಅವಾಚ್ಯ ಶಬ್ದದಿಂದ ನಿಂದಿಸಿ ಕೊಲೆ ಬೆದರಿಕೆ ಹಾಕಿದ್ದಾರೆ. ಅಂಗರಕ್ಷಕ ಇರಬೇಕಾದರೆ ಹಲ್ಲೆ ಮಾಡಿದರೆಂದರೆ ಇಲ್ಲದಿದ್ದಾಗ ಕೊಲೆ ಮಾಡಲು ಹೆದರುವುದಿಲ್ಲ . ಈ ಸಂಬಂಧ ವಕೀಲರ ಸಂಘಕ್ಕೆ ದೂರು ನೀಡಲಾಗುವುದು. ಅವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲು ಮನವಿ ಮಾಡುವೆ ಎಂದರು.