ಒಮ್ಮೆ ಕಣ್ತುಂಬಿಕೊಳ್ಳಿ ಕೆಮ್ಮಣ್ಣುಗುಂಡಿಯ ಪ್ರಕೃತಿ ಸೊಬಗು

news18
Updated:August 7, 2018, 9:46 AM IST
ಒಮ್ಮೆ ಕಣ್ತುಂಬಿಕೊಳ್ಳಿ ಕೆಮ್ಮಣ್ಣುಗುಂಡಿಯ ಪ್ರಕೃತಿ ಸೊಬಗು
news18
Updated: August 7, 2018, 9:46 AM IST
ವಿರೇಶ್​ ಜಿ ಹೊಸೂರ್​, ನ್ಯೂಸ್​ 18 ಕನ್ನಡ

ಚಿಕ್ಕಮಗಳೂರು (ಆ.7): ಸುತ್ತಲು ಗಿರಿಶಿಖರ, ಹರಿವ ಝರಿಗಳು, ಕಣ್ಣಿಗೆ ಮುದ ನೀಡುವ ಅಚ್ಚ ಹಸಿರು, ಕಾಫಿಯ ಘಮ ಇದುವೆ ನಿಸರ್ಗ ಪ್ರಿಯರ ಸ್ವರ್ಗ ಕೆಮ್ಮಣ್ಣುಗುಂಡಿ.



ಕರ್ನಾಟಕದ ಊಟಿ ಎಂದೇ ಖ್ಯಾತಿಯಾಗಿರುವ ಚಿಕ್ಕಮಗಳೂರಿನ ಕೆಮ್ಮಣ್ಣು ಗುಂಡಿಯ ಪ್ರಕೃತಿ ಸೌಂದರ್ಯಕ್ಕೆ ಸಾಟಿ ಇಲ್ಲ. ನಿಸರ್ಗ ಪ್ರಿಯರ ಅಚ್ಚುಮೆಚ್ಚಿನ ತಾಣವಾಗಿರುವ ಈ ಸ್ಥಳ ಜನರನ್ನು ಸೂಜಿಗಲ್ಲಿನಂತೆ ಆಕರ್ಷಿಸುವುದು ಸುಳ್ಳಲ್ಲ.



ಆಕಾಶವನ್ನೇ ಚುಂಬಿಸುವಷ್ಟು ಎತ್ತರಕ್ಕೆ ಚಾಚಿಕೊಂಡಿರುವ ಪರ್ವತ ಶ್ರೇಣಿಗಳು. ಎತ್ತ ನೋಡಿದ್ರು ಹಚ್ಚ ಹಸಿರಿನ ವನರಾಶಿ. ಶುದ್ದ ಗಾಳಿಯ ಈ ಪಶ್ಚಿಮ ಘಟ್ಟಕ್ಕೆ ಮನಸೋಲದವರು ಇಲ್ಲ. ಅದರಲ್ಲಿಯೂ ಮಳೆಗಾಲ ಬಂತೆಂದರೆ ಇದು ಸಾಹಸಿತಾಣಗಳ ಸ್ವರ್ಗವಾಗುತ್ತದೆ.



ಸಮುದ್ರಮಟ್ಟದಿಂದ ಸುಮಾರು 4,200 ಅಡಿ ಎತ್ತರದಲ್ಲಿರೋ ಕೆಮ್ಮಣ್ಣು ಗುಂಡಿ ಪ್ರಕೃತಿಯ ಹಾಸು ಹೊದ್ದಿರುವ ರಮಣೀಯ ಸ್ಥಳ.  ಅಂಕುಡೊಂಕಿನ ಹಾದಿಯಲ್ಲಿ ಈ ಪ್ರದೇಶಕ್ಕೆ ಸಾಗುವ ಮಜವೇ ಬೇರೆ. ಜನರ ಅಚ್ಚುಮೆಚ್ಚಿನ ಪ್ರವಾಸಿತಾಣವಾದ ಈ ಕೆಮ್ಮಣ್ಣಗುಂಡಿಗೆ ಬಂದರೆ ಅಲ್ಲಿಯೇ ಬಾಬಬುಡನ್​ಗಿರಿ, ಮುಳಯ್ಯನಗಿರಿ, ಕಲ್ಹತ್ತಗಿರಿಯ ಸೌಂದರ್ಯವನ್ನು ಕೂಡ ಸವಿಯಬಹುದು.



ನಿಸರ್ಗ ಪ್ರೇಮಿಗಳ ಸ್ವರ್ಗವಾಗಿರುವ ಈ ತಾಣದಲ್ಲಿ ಪ್ರತಿನಿತ್ಯವೂ ಅದೆಷ್ಟೋ ಪ್ರವಾಸಿಗರ ಬಂದು ಭೇಟಿ ನೀಡುತ್ತಾರೆ. ಆದರೆ ಇತ್ತೀಚಿನ ದಿನಗಳಲ್ಲಿ ಇಲ್ಲಿ ಮೂಲಸೌಲಭ್ಯವಿಲ್ಲ ಎಂಬ ಮಾತು ಪ್ರವಾಸಿಗರಿಂದ ಕೇಳಿ ಬರುತ್ತಿದೆ. ಜನರ ಅಚ್ಚುಮೆಚ್ಚಿನ ತಾಣವಾದ ಈ ಪ್ರದೇಶಕ್ಕೆ ಇನ್ನು ಹೆಚ್ಚಿನ ಮೂಲಸೌಕರ್ಯವನ್ನು ಒದಗಿಸಿ ಪ್ರವಾಸೋದ್ಯಮವನ್ನು ಈ ಮೂಲಕ ಅಭಿವೃದ್ಧಿ ಪಡಿಸಬೇಕು ಎಂಬುದು ಇಲ್ಲಿಗೆ ಬಂದ ಪ್ರವಾಸಿಗರ ಅಂಬೋಣ ಆಗಿದೆ.



ನೈಸರ್ಗಿಕ ಸೊಬಗನ್ನು ತನ್ನ ಮೈಯೆಲ್ಲಾ ತುಂಬಿಕೊಂಡಿರುವ ಕೆಮ್ಮಣ್ಣುಗುಂಡಿ ಪ್ರವಾಸಿಗರನ್ನು ಎಲ್ಲ ಸಮಯದಲ್ಲಿಯೂ ತನ್ನತ್ತ ಕೈ ಬೀಸಿಕರೆಯುತ್ತದೆ. ಅದರಲ್ಲಿಯೂ ಮಳೆಗಾಲದಲ್ಲಿಯಂತೂ ನಿಜಕ್ಕೂ ಅದ್ಭುತ ಅನುಭವ ನೀಡುವ ಈ ತಾಣವನ್ನು ಪ್ರತಿಯೊಬ್ಬರು ಆಹ್ಲಾದಿಸದೇ ಇರಲು ಅಸಾಧ್ಯ. ಅಂತಹ ತಾಣ ನಮ್ಮ ಕೆಮ್ಮಣ್ಣುಗುಂಡಿ ಎಂಬುದು ಸುಳ್ಳಲ್ಲ.
First published:August 7, 2018
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ