Karnataka ULB Polls – ಬೆಳಗಾವಿ, ಕಲಬುರ್ಗಿ, ಹು-ಧಾ ಪಾಲಿಕೆ ಸೇರಿ ವಿವಿಧ ನಗರ ಸಂಸ್ಥೆಗಳ 273 ವಾರ್ಡ್​ಗಳ ಫಲಿತಾಂಶ ಇಂದು

ಬೆಂಗಳೂರು (ಸೆ. 06): ಇಂದು ಮೂರು ಮಹಾನಗರ ಪಾಲಿಕೆ ಹಾಗೂ ವಿವಿಧ ನಗರ ಸಂಸ್ಥೆಗಳ ಚುನಾವಣೆ ಫಲಿತಾಂಶ ಪ್ರಕಟವಾಗಲಿದೆ. ಬೆಳಗ್ಗೆ 8 ಗಂಟೆಗೆ ಮತ ಎಣಿಕೆ ಪ್ರಾರಂಭವಾಗಲಿದ್ದು, ಕೆಲವೇ ಗಂಟೆಗಳಲ್ಲಿ ಫಲಿತಾಂಶ ಹೊರಬೀಳುವ ನಿರೀಕ್ಷೆ ಇದೆ. ಹುಬ್ಬಳ್ಳಿ ಧಾರವಾಡ ಮಹಾನಗರ ಪಾಲಿಕೆಯ 82 ವಾರ್ಡ್, ಬೆಳಗಾವಿ ಮಹಾನಗರ ಪಾಲಿಕೆಯ 58 ವಾರ್ಡ್, ಕಲಬುರ್ಗಿ ಮಹಾನಗರ ಪಾಲಿಕೆಯ 55 ವಾರ್ಡ್​ಗಳಿಗೆ ಶುಕ್ರವಾರ ಸಾರ್ವತ್ರಿಕ ಚುನಾವಣೆ ನಡೆದಿತ್ತು. ದೊಡ್ಡಬಳ್ಳಾಪುರ ನಗರಸಭೆಯ (Doddaballapura CMC) 31 ವಾರ್ಡ್, ತರೀಕೆರೆ ಪುರಸಭೆಯ 23 ವಾರ್ಡ್ ಹಾಗೂ ಭದ್ರಾವತಿ, ಬೀದರ್ ನಗರಸಭೆ ಎರಡು ಸೇರಿ 3 ವಾರ್ಡ್​ಗಳಿಗೆ ಚುನಾವಣೆಯಾಗಿತ್ತು. ಮೈಸೂರು ಮಹಾನಗರ ಪಾಲಿಕೆಯ 1 ವಾರ್ಡ್ ಹಾಗೂ ವಿವಿಧ ನಗರ ಸಂಸ್ಥೆಗಳಿಂದ ಒಟ್ಟು 21 ವಾರ್ಡ್​ಗಳಿಗೆ ಉಪಚುನಾವಣೆ ಕೂಡ ಆಗಿದೆ. ಇಂದು ಈ ಎಲ್ಲಾ ವಾರ್ಡ್​ಗಳ ಫಲಿತಾಂಶ ಹೊರಬೀಳುತ್ತಿದೆ.

ಮಹಾಲಿಂಗಪುರ ಪುರಸಭೆ, ಸವದತ್ತಿ ಪಟ್ಟಣ ಪಂಚಾಯಿತಿಯ ಎರಡು ವಾರ್ಡ್​ಗಳಲ್ಲಿ ಶೇ. 80ಕ್ಕಿಂತ ಹೆಚ್ಚು ಮತದಾನವಾಗಿದೆ. ದೊಡ್ಡಬಳ್ಳಾರಪುರ ನಗರಸಭೆಯ 31 ವಾರ್ಡ್​ಗಳಲ್ಲಿ ಶೇ. 75.80 ಮತದಾನವಾಗಿದೆ. ತರೀಕೆರೆ ಪುರಸಭೆಯ 23 ವಾರ್ಡ್​ಗಳಲ್ಲೂ ಉತ್ತಮ ಮತದಾನವಾಗಿತ್ತು. ಬಸವರಾಜ ಬೊಮ್ಮಾಯಿ (CM Basavaraja Bommai) ಮುಖ್ಯಮಂತ್ರಿ ಆದ ಬಳಿಕ ಅವರಿಗೆ ಈಗ ಮೊದಲ ಬಾರಿಗೆ ಚುನಾವಣೆಯ ಅಗ್ನಿಪರೀಕ್ಷೆ ಎದುರಾಗಿದೆ.

ಬೆಳಗಾವಿ ಪಾಲಿಕೆ: ಬೆಳಗಾವಿ ಮಹಾನಗರ ಪಾಲಿಕೆಯಲ್ಲಿರುವ 58 ವಾರ್ಡ್​ಗಳಿಂದ 385 ಅಭ್ಯರ್ಥಿಗಳು ಕಣದಲ್ಲಿದ್ಧಾರೆ. ಬಿಜೆಪಿ 55 ಮತ್ತು ಕಾಂಗ್ರೆಸ್ 45 ಅಭ್ಯರ್ಥಿಗಳನ್ನ ಕಣಕ್ಕಿಳಿಸಿವೆ. ಕರ್ನಾಟಕದಿಂದ ಬೆಳಗಾವಿಯನ್ನ ಪ್ರತ್ಯೇಕಿಸಲು ಪ್ರಯತ್ನಿಸುತ್ತಿರುವ ಎಂಇಎಸ್ ಪಕ್ಷದಿಂದ 21 ಅಭ್ಯರ್ಥಿಗಳಿದ್ದಾರೆ. ಆಮ್ ಆದ್ಮಿ ಪಕ್ಷ ಬರೋಬ್ಬರಿ 27 ವಾರ್ಡ್​ಗಳಲ್ಲಿ ಸ್ಪರ್ಧೆ ಮಾಡಿದೆ. ಪಾಲಿಕೆ ವ್ಯಾಪ್ತಿಯಲ್ಲಿ 4,28,364 ಮತದಾರರು ಇದ್ದು, ಕೇವಲ ಶೇ. 50.41ರಷ್ಟು ಮತದಾನವಾಗಿದೆ. ಬೆಳಗಾವಿ ಮಹಾನಗರ ಪಾಲಿಕೆಯಲ್ಲಿ ಇದೇ ಮೊದಲ ಬಾರಿಗೆ ಪಕ್ಷಗಳ ಚಿಹ್ನೆ ಗುರುತಿನ ಮೇಲೆ ಚುನಾವಣೆ ನಡೆದಿರುವುದು. ಈ ಮುಂಚೆ ಭಾಷೆ ಆಧಾರಿತವಾಗಿ ನಡೆಯುತ್ತಿದ್ದ ಚುನಾವಣೆಯಲ್ಲಿ ಈಗ ರಾಜಕೀಯ ರಂಗಿನಾಟ ಶುರುವಾಗಿದೆ. ಎಲ್ಲಾ ರಾಜಕೀಯ ಪಕ್ಷಗಳಿಗೂ ಇದು ಪ್ರತಿಷ್ಠೆಯ ವಿಚಾರವಾಗಿದೆ. ಬಂಡಾಯದ ಬಿಸಿಯಲ್ಲೂ ಹೆಚ್ಚಿನ ಸೀಟುಗಳನ್ನ ಗೆಲ್ಲಲು ಬಿಜೆಪಿ ಮತ್ತು ಕಾಂಗ್ರೆಸ್ ಹಾತೊರೆಯುತ್ತಿವೆ.

ಕಲಬುರ್ಗಿ ಪಾಲಿಕೆ: ಏಳು ವರ್ಷಗಳ ಬಳಿಕ ಚುನಾವಣೆ ಕಾಣುತ್ತಿರುವ ಕಲಬುರ್ಗಿ ಮಹಾನಗರ ಪಾಲಿಕೆಯಲ್ಲಿ 55 ವಾರ್ಡ್​ಗಳಿದ್ದು 305 ಅಭ್ಯರ್ಥಿಗಳು ಕಣದಲ್ಲಿದ್ದಾರೆ. 5,19,464 ಮತದಾರರಿಗೆ ವೋಟಿಂಗ್ ಅವಕಾಶ ಇತ್ತು. ಆದರೆ ಇಲ್ಲಿ ಶೇ. 50ಕ್ಕಿಂತ ಕಡಿಮೆ ಮತದಾನವಾಗಿದೆ. ಪಾಲಿಕೆಯ 55 ವಾರ್ಡ್​​ಗಳಲ್ಲಿ 27 ವಾರ್ಡ್​ಗಳು ಮಹಿಳೆಯರಿಗೆ ಮೀಸಲಾಗಿವೆ. ಹೀಗಾಗಿ ಅಧಿಕಾರ ಕೇಂದ್ರದಲ್ಲಿ ಮಹಿಳೆಯರದ್ದೇ ಪಾರುಪತ್ಯ ಇರುವ ಸಾಧ್ಯತೆ ಹೆಚ್ಚಿದೆ.

ಇದನ್ನೂ ಓದಿ: Rajasthan Panchayat Elections 2021| ರಾಜಸ್ಥಾನ ಸ್ಥಳೀಯ ಚುನಾವಣೆ: 670 ಸ್ಥಾನಗಳಲ್ಲಿ ಕಾಂಗ್ರೆಸ್ ಜಯಭೇರಿ, ಬಿಜೆಪಿಗೆ ಎರಡನೇ ಸ್ಥಾನ

ಹು-ಧಾ ಪಾಲಿಕೆ: ಹುಬ್ಬಳ್ಳಿ ಧಾರವಾಡ ಮಹಾನಗರ ಪಾಲಿಕೆಯ 82 ವಾರ್ಡ್​ಗಳಿಗೆ ಚುನಾವಣೆ ನಡೆದಿದೆ. ಬಿಜೆಪಿ ಮತ್ತು ಕಾಂಗ್ರೆಸ್ ಪಕ್ಷ ಎಲ್ಲಾ ವಾರ್ಡ್​ಗಳಲ್ಲೂ ಅಭ್ಯರ್ಥಿಗಳನ್ನ ನಿಲ್ಲಿಸಿವೆ. ಜೆಡಿಎಸ್ ಪಕ್ಷ 49 ಹಾಗೂ ಆಮ್ ಆದ್ಮಿ ಪಕ್ಷ 41 ವಾರ್ಡ್​ಗಳಲ್ಲಿ ಕಣದಲ್ಲಿವೆ. ಇಲ್ಲಿ ಶೇ. 53.81ರಷ್ಟು ಮತದಾನವಾಗಿದೆ. ಬೇರೆ ಎರಡು ಮಹಾನಗರ ಪಾಲಿಕೆಗೆ ಹೋಲಿಸಿದರೆ ಹುಬ್ಬಳ್ಳಿ ಧಾರವಾಡದಲ್ಲಿ ಮತದಾನದ ಪ್ರಮಾಣ ತುಸು ಉತ್ತಮವಾಗಿದೆ.

ಸೆ. 3, ಶುಕ್ರವಾರ ನಡೆದ ಮತದಾನದ ವಿವರ:

1) ಹು-ಧಾ ಮಹಾನಗರ ಪಾಲಿಕೆ: 82 ವಾರ್ಡ್ - ಶೇ. 53.81
2) ಬೆಳಗಾವಿ ಮಹಾನಗರ ಪಾಲಿಕೆ: 58 ವಾರ್ಡ್ – ಶೇ. 50.41
3) ಕಲಬುರ್ಗಿ ಮಹಾನಗರ ಪಾಲಿಕೆ: 55 ವಾರ್ಡ್ – 49.40
4) ದೊಡ್ಡಬಳ್ಳಾಪುರ ನಗರಸಭೆ: 31 ವಾರ್ಡ್ – ಶೇ. 75.80
5) ಬೀದರ್ ನಗರಸಭೆ: 2 ವಾರ್ಡ್ – ಶೇ. 68.13
6) ಭದ್ರಾವತಿ ನಗರಸಭೆ: 1 ವಾರ್ಡ್ – ಶೇ. 64.27
7) ತರೀಕೆರೆ ಪುರಸಭೆ: 23 ವಾರ್ಡ್ – ಶೇ. 74.22

ಉಪಚುನಾವಣೆ ವಿವರ: ಬಾಗಲಕೋಟೆ ಸೇರಿ 12 ಜಿಲ್ಲೆಗಳಲ್ಲಿನ 20 ಸ್ಥಳೀಯ ಸಂಸ್ಥೆಗಳಲ್ಲಿ 20 ವಾರ್ಡ್​ಗಳಿಗೆ ಉಪಚುನಾವಣೆ ನಡೆದಿದೆ. 7 ನಗರಸಭೆ ವಾರ್ಡ್​ಗಳು, 7 ಪುರಸಭೆ ವಾರ್ಡ್​ಗಳು ಮತ್ತು 6 ಪಟ್ಟಣ ಪಂಚಾಯತ್ ವಾರ್ಡ್​​ಗಳಿಗೂ ಚುನಾವಣೆ ನಡೆದಿದೆ.

ಸಾರ್ವತ್ರಿಕ ಚುನಾವಣೆ ಆಗಿರುವ ಒಟ್ಟು ವಾರ್ಡ್​ಗಳು:
ಮಹಾನಗರ ಪಾಲಿಕೆ: 195 ವಾರ್ಡ್​ಗಳು
ನಗರಸಭೆ: 34 ವಾರ್ಡ್​ಗಳು
ಪುರಸಭೆ: 23 ವಾರ್ಡ್​ಗಳು

ಉಪಚುನಾವಣೆ ಆಗಿರುವ ಒಟ್ಟು ವಾರ್ಡ್​ಗಳು:
ಮಹಾನಗರ ಪಾಲಿಕೆ: 1
ನಗರಸಭೆ: 7
ಪುರಸಭೆ: 6
ಪ.ಪಂ: 7 ವಾರ್ಡ್​ಗಳು