Karnataka Election 2023: ಶೆಟ್ಟರ್​ಗೆ ನಾಗ್ಪುರದಿಂದ ಖೆಡ್ಡಾ! ಕರ್ನಾಟಕ ಗ್ರೌಂಡ್​ನಲ್ಲಿ ಅಮಿತ್​ ಶಾ ಗುಡುಗು ಶುರು​

ಬೆಂಗಳೂರು: ರಾಜ್ಯದಲ್ಲಿ ಬಿಜೆಪಿಗೆ (BJP) ಆಗಿರೋ ಡ್ಯಾಮೇಜ್​​​ ಕಂಟ್ರೋಲ್​ಗೆ ದೊಡ್ಡಮಟ್ಟದಲ್ಲೇ ಸಭೆಗಳು ನಡೆಯುತ್ತಿದೆ. ನಾಗ್ಪುರದಿಂದ (Nagpur) ಆರ್​ಎಸ್​​ಎಸ್​ ಟೀಂ ಎಂಟ್ರಿ ಕೊಟ್ಟಿದ್ದು, ಇತ್ತ ದೆಹಲಿಯಿಂದ (Delhi) ಅಮಿತ್​ ಶಾ ಆಗಮನವೂ ಆಗಿದೆ. ರಾಜ್ಯದ ಹತ್ತಾರು ಜಿಲ್ಲೆಗಳಲ್ಲಿ ಕೇಂದ್ರ ಸಚಿವರ ಟೀಂ ಲಗ್ಗೆ ಹಾಕಿದೆ. ಹೌದು, ದಕ್ಷಿಣ ಕರ್ನಾಟಕದ ಹೆಬ್ಬಾಗಿಲು ಬಿಜೆಪಿ ಪಾಲಿಗೆ ಮುಚ್ಚಿಬಿಡುತ್ತೆ ಅನ್ನುವ ಮಟ್ಟಿಗೆ ಚುನಾವಣೆ (Election) ಕಾವೇರಿದೆ. ಎಲೆಕ್ಷನ್​ಗೂ ಮುನ್ನ ಆಪರೇಷನ್​ ಕಮಲ (Operation Kamala) ಮಾಡುತ್ತಿದ್ದ ಬಿಜೆಪಿಗೆ ಜೆಡಿಎಸ್​​(JDS), ಕಾಂಗ್ರೆಸ್​ (Congress) ಎಲೆಕ್ಷನ್​​ ಟೈಂನಲ್ಲಿ ಸರಣಿ ಆಪರೇಷನ್ ಮಾಡುತ್ತಿವೆ. ಇದರ ನಡುವೆ ಹೊಸಬರಿಗೆ ಮನ್ನಣೆ ನೀಡಲು ಕೈ ಹಾಕಿದ ಬಿಜೆಪಿಗೆ ಹಿರಿಯ ನಾಯಕರು ಕೊಡುತ್ತಿರುವ ಶಾಕಿಂಗ್​ ನಡೆಗಳು ಬಿಜೆಪಿಯ ನಿದ್ದೆಗೆಡಿಸಿವೆ.

ಬೆಂಗಳೂರಲ್ಲಿ ಅಮಿತ್​​ ಶಾ ಸರಣಿ ಸಭೆ

ಬೆಂಗಳೂರಿಗೆ ಅಮಿತ್​ ಶಾ ಎಂಟ್ರಿ ಆಗಿದೆ. ಏರ್​ಪೋರ್ಟ್​ಗೆ ಬಂದಿಳಿದ ಅಮಿತ್​ ಶಾ ದೇವನಹಳ್ಳಿಯಲ್ಲಿ ಭರ್ಜರಿ ರೋಡ್​ಶೋಗೆ ಹೊರಟ್ಟಿದ್ದರು. ಸಾವಿರ ಸಾವಿರ ಬಿಜೆಪಿ ಕಾರ್ಯಕರ್ತರು ರೆಡಿಯಾಗಿದ್ದರು. ಅಭ್ಯರ್ಥಿ ಪಿಳ್ಳಮುನಿಶಾಮಪ್ಪರಂತೂ ಅಮಿತ್​ ಶಾ ಬರ್ತಾರೆ ಅಂತ ಹಿರಿಹಿರಿ ಹಿಗ್ಗಿದ್ದರು.

ಆದರೆ ಮಳೆರಾಯ ಅಡ್ಡಬಂದು ರೋಡ್​ಶೋ ರದ್ದಾಗಿದೆ. ದೇವನಹಳ್ಳಿ ರೋಡ್​ಶೋ ರದ್ದಾಗುತ್ತಿದ್ದಂತೆ ಅಮಿತ್​ ಶಾ ನೇರ ಬೆಂಗಳೂರಿನ ತಾಜ್​ವೆಸ್ಟ್​ಎಂಡ್​ಗೆ ಬಂದು ಸಭೆ ನಡೆಸಿದ್ದಾರೆ. ಮಾಜಿ ಸಿಎಂ ಯಡಿಯೂರಪ್ಪ, ಬಸವರಾಜ ಬೊಮ್ಮಾಯಿ ಸೇರಿ ಅನೇಕರ ಜೊತೆ ಸಭೆ ಮೇಲೆ ಸಭೆ ಮಾಡಿದ್ದಾರೆ.

ಇದನ್ನೂ ಓದಿ: Ramadan: ಶನಿವಾರ ಬೆಂಗಳೂರಲ್ಲಿ ರಂಜಾನ್ ಸಂಭ್ರಮ, ಮೈಸೂರು ರಸ್ತೆಯಲ್ಲಿ ಸಂಚಾರ ಬದಲಾವಣೆ

ಶೆಟ್ಟರ್​ ರಾಜೀನಾಮೆ ಲಿಂಗಾಯತ ಮತ ವಿಭಜನೆ!

ಹುಬ್ಬಳ್ಳಿ ಧಾರವಾಡ ಕ್ಷೇತ್ರದಲ್ಲಿ ಶೆಟ್ಟರ್​​ ಆರ್ಭಟವನ್ನ ಮಟ್ಟಹಾಕಲು ಚುನಾವಣಾ ಅಖಾಡಕ್ಕೆ ನಾಗಪುರದಿಂದ 50 ಆರ್​ಎಸ್​​ಎಸ್​ ಪ್ರಮುಖರ ತಂಡ ಎಂಟ್ರಿ ಕೊಟ್ಟಿದೆ. ಹುಬ್ಬಳ್ಳಿಯ ಖಾಸಗಿ ಹೋಟೆಲ್​ನಲ್ಲಿ ರಾಜ್ಯಾಧ್ಯಕ್ಷ ನಳಿನ್​ಕುಮಾರ್​ ಕಟೀಲ್​​ ಜೊತೆ ಸಂಪೂರ್ಣ ಮಾಹಿತಿ ಕಲೆಹಾಕಿದ್ದಾರೆ.

ಇತ್ತ ಹಳೇ ಮೈಸೂರು ಭಾಗದಲ್ಲಿ ಬಿಜೆಪಿ 40ಕ್ಕೂ ಹೆಚ್ಚು ಕ್ಷೇತ್ರ ಗೆಲ್ಲುವ ಹುಮ್ಮಸ್ಸಲ್ಲಿದೆ. ವರುಣಾದಲ್ಲಿ ಸಿದ್ದರಾಮಯ್ಯರನ್ನ ಸೋಲಿಸುವ ಹಠಕ್ಕೆ ಬಿದ್ದಿರುವ ಬಿಜೆಪಿ ವಿ.ಸೋಮಣ್ಣ ಅವರನ್ನು ಅಖಾಡಕ್ಕಿಳಿಸಿದೆ. ಆದರೆ ಟಿಕೆಟ್​ ಸಿಗದವರ ಸಿಟ್ಟು ಬಿಜೆಪಿಗೆ ದೊಡ್ಡ ಸಂಕಷ್ಟ ಎದುರಾಗಿದ್ದು ಬಿ.ಎಲ್​.ಸಂತೋಷ್​ ಖುದ್ದು ಅಖಾಡಕ್ಕಿಳಿದು ಸರಣಿ ಸಭೆ ಮಾಡಿದ್ದಾರೆ.

ಮಠ-ಮಂದಿರಗಳ ಭೇಟಿ ಜೊತೆ ನಡ್ಡಾ ಸಭೆ

ಬೀದರ್​​​ನ ಶಿವನಗರದಲ್ಲಿರುವ ರಾಮಕೃಷ್ಣ ಆಶ್ರಮಕ್ಕೆ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿನಡ್ಡಾ ಭೇಟಿಕೊಟ್ಟಿದ್ದಾರೆ. ಗೋಪೂಜೆ ಸಲ್ಲಿಸಿ ಬಳಿಕ ಆಶ್ರಮದಲ್ಲಿ ವಿವೇಕಾನಂದರ ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿದರು. ಆಮೇಲೆ ಬೀದರ್​​​ ಖಾಸಗಿ ಹೊಟೇಲ್‌ನಲ್ಲಿ ವ್ಯಾಪಾರಿಗಳು, ಸಮುದಾಯದ ಮುಖಂಡರುಗಳ ಜೊತೆ ಸಭೆ ಮಾಡಿ ಮತಬೇಟೆ ನಡೆಸಿದ್ದಾರೆ.

ಇನ್ನು ಕೊಪ್ಪಳದಲ್ಲಿ ಕೇಂದ್ರ ಆರೋಗ್ಯ ಸಚಿವ ಮನ್ಸೂಖ್​ ಮಾಂಡವಿಯಾ ಬಿಜೆಪಿ ಪರ ಪ್ರಚಾರ ಮಾಡಿದ್ದರು. ಬಳಿಕ ಬಳ್ಳಾರಿಯಲ್ಲೂ ಮಾಂಡವಿಯಾ ಬಿಜೆಪಿ ಪ್ರಮುಖರ ಜೊತೆ ಸಭೆ ಮಾಡಿದ್ದರು. ಅಮಿತ್​​ಷಾ, ಜೆ.ಪಿನಡ್ಡಾ, ಬಿ.ಎಲ್​.ಸಂತೋಷ್​​ ಜೊತೆ ಸಂಘ ಪರಿವಾರದ ಪ್ರಮುಖರು ಕರ್ನಾಟಕದಲ್ಲಿ ಠಿಕಾಣಿ ಹೂಡಿದ್ದಾರೆ. ಕರ್ನಾಟಕದಲ್ಲಿ ಬಿಜೆಪಿಯನ್ನ ಶತಾಯಗತಾಯ ಅಧಿಕಾರಕ್ಕೆ ತರಬೇಕು ಅನ್ನೋದಷ್ಟೇ ಬಿಜೆಪಿ ಗುರಿ ಇಟ್ಟುಕೊಂಡು ಸಭೆ ಮೇಲೆ ಸಭೆ ಮಾಡಿದ್ದಾರೆ. ಆದರೆ ಎಷ್ಟರ ಮಟ್ಟಿಗೆ ಸಫಲತೆ ಸಿಗುತ್ತೆ ಕಾದು ನೋಡಬೇಕಿದೆ.