CP Yogeshwar: 'ಅಮಿತ್​ ಶಾ ಒಂಥರಾ ರೌಡಿ ಇದ್ದಂಗೆ; ಬಿಜೆಪಿ ಗೆಲ್ಲಲ್ಲ, ಆದ್ರೂ ಅಧಿಕಾರಕ್ಕೆ ಬರ್ತೀವಿ' -ಸಂಚಲನ ಸೃಷ್ಟಿಸಿದ ಆಡಿಯೋ ಬಾಂಬ್

ಬೆಂಗಳೂರು: ಬಿಜೆಪಿ ಆಪರೇಷನ್​ ಕಮಲಕ್ಕೆ (Operation Lotus) ರೆಡಿಯಾಗಿದೆ. ಮಂತ್ರಿಗಳಾಗಿರೋ ಅಶೋಕ್ (R Ashok)​, ಅಶ್ವತ್ಥ್​ ನಾರಾಯಣ್ (Dr Ashwath Narayan)​​ ಕ್ಷೇತ್ರ ಬದಲಿಸ್ತಾರೆ. ಅಮಿತ್​ ಶಾ (Amit Shah) ಒಂಥರಾ ರೌಡಿ ಇದ್ದಂಗೆ, ಜೆಡಿಎಸ್​​​ (JDS) ಮಖಾಡೆ ಮಲಗುತ್ತೆ. ಇದೆಲ್ಲಾ ನಾವ್​ ಹೇಳ್ತಿಲ್ಲ. ಬಿಜೆಪಿ ನಾಯಕ ಯೋಗೇಶ್ವರ್ (CP Yogeshwar)​ ಹೇಳಿದ್ದಾರೆ ಎನ್ನಲಾದ ಆಡಿಯೋದಲ್ಲಿರೋ ಅಂಶಗಳು. ಸಂಚಲನ ಸೃಷ್ಟಿಸಿರೋ ಆಡಿಯೋ ಬಾಂಬ್​ ಕಥೆ ಇಂತಿದೆ. ಸಿ.ಪಿ.ಯೋಗೇಶ್ವರ್, ಕುಮಾರಸ್ವಾಮಿ ವಿರುದ್ಧ ಸೋತ್ರೂ ಬಿಜೆಪಿಯಲ್ಲಿ ಎಂಎಲ್​ಸಿ ಮಾಡಿದ್ರು. ಮಂತ್ರಿನೂ ಮಾಡಿದ್ರು. ಇದಕ್ಕೆ ಕಾರಣ ಆಪರೇಷನ್​ ಕಮಲದಲ್ಲಿ ಪ್ರಮುಖ ಪಾತ್ರವಹಿಸಿದ್ದು. ಈ ಮಾತನ್ನ ಬಿಜೆಪಿಯವರಿಂದ ಹಿಡಿದು ಕಾಂಗ್ರೆಸ್​, ಜೆಡಿಎಸ್​ನವರು ಬಹಿರಂಗವಾಗೇ ಹೇಳಿದ್ದುಂಟು. ಈಗ ಇದೇ ಯೋಗೇಶ್ವರ್​​ ಮಾತಾಡಿರೋ ಆಡಿಯೋ ರಾಜಕೀಯದಲ್ಲಿ ತಲ್ಲಣ ಎಬ್ಬಿಸಿದೆ.

ಯೋಗೇಶ್ವರ್​ ಆಡಿಯೋ ಬಾಂಬ್​-01

• ಅಮಿತ್​ ಶಾ ರೌಡಿ ಥರ ಅಂದಿದ್ದು..

ಅಮಿತ್​​ ಶಾ ಹೇಳಿದ್ದಾರೆ ಹೊಂದಾಣಿಕೆ ಬೇಡ ಅಂತಾ. ಅಮಿತ್​ ಶಾ ಇದನ್ನ ಬಾರಿ ಕೆಟ್ಟದಾಗೇ ಹೇಳಿದರು. ಶಾ ಒಂಥರಾ ರೌಡಿ ಇದ್ದಂಗೆ ಕಣಯ್ಯಾ! ನೋಡೋಕೆ ಕಮ್ಮಿ ಮಾತಾಡಿದ್ರೂ ಕೆಟ್ಟದಾಗೇ ಮಾತಾಡೋದು. ಪಾರ್ಟಿ ವಿರುದ್ಧ ಅಂಡರ್​​ಸ್ಟ್ಯಾಂಡಿಂಗ್​ ಮಾಡ್ಕೊಂಡ್ರೆ ಅವರ ಬುಡ ತೆಗಿಸ್ತಾರೆ. ಒಂದ್​ 30 ಜನರನ್ನ ಕೂರಿಸ್ಕೊಂಡ್​ ನಮಗೆ ಹೇಳಿದ್ದರು. ನಂಗೆ ಗೊತ್ತು ಯಾಱರ್​ ಪಾರ್ಟಿಗೆ ದ್ರೋಹ ಮಾಡ್ತಿದ್ದೀರಾ ಅಂತ ನೀಟಾಗಿ 3 ಗಂಟೆ ಕ್ಲಾಸ್​ ತಗೊಂಡಿದ್ದರು.

ಯೋಗೇಶ್ವರ್​ ಆಡಿಯೋ ಬಾಂಬ್​-02

• ಬಿಜೆಪಿ ಗೆಲ್ಲಲ್ಲ, ಆದ್ರೂ ಅಧಿಕಾರಕ್ಕೆ ಬರ್ತೀವಿ ಅಂದಿದ್ದು

ನನ್ನ ಅಭಿಪ್ರಾಯದಲ್ಲಿ ಬಿಜೆಪಿ ಬರಲ್ಲ. ಜನಾಭಿಪ್ರಾಯದಲ್ಲಿ ಬಿಜೆಪಿ ಸರ್ಕಾರ ಬರಲ್ಲ. ಆದರೂ ಬಿಜೆಪಿ ಸರ್ಕಾರ ಮಾಡೇ ಮಾಡ್ತೀವಿ. ಮಾವಿನಕಾಯಿ ಹಾಗೇ ಹಣ್ಣಾಗಲ್ಲ. ಕೆಮಿಕಲ್ ಹಾಕ್ಬೇಕು ಹಾಕ್ತೀವಿ.

ಯೋಗೇಶ್ವರ್​ ಆಡಿಯೋ ಬಾಂಬ್​-03

• ಅಶೋಕ್​, ಅಶ್ವತ್ಥ ನಾರಾಯಣ ಕ್ಷೇತ್ರ ಬದಲಿಸ್ತಾರೆ ಅಂದಿದ್ದು

ನಾನು ಕುಮಾರಸ್ವಾಮಿ ವಿರುದ್ಧ ಸ್ಪರ್ಧೆ ಮಾಡ್ತೀನಿ. ಅಶೋಕ್​, ಡಿಕೆ ಶಿವಕುಮಾರ್​ ವಿರುದ್ಧ ನಿಲ್ಬೇಕು. ಅಶ್ವತ್ಥ್ ನಾರಾಯಣ ನಿಖಿಲ್​ ವಿರುದ್ಧ ನಿಲ್ಬೇಕು. ನಾನೇ ಪಟ್ಟಿ ಮಾಡ್ಕೊಂಡ್​ ಹೇಳಿಬಿಡ್ತೀನಿ. ಆಗ ಬಿಜೆಪಿ ಬಂದೇ ಬರುತ್ತೆ. ಫೆಬ್ರವರಿಯಲ್ಲಿ ಈ ಕೆಲಸ ಮಾಡ್ತೀನಿ ನೋಡ್ತಿರಿ.

​ಯೋಗೇಶ್ವರ್​ ಆಡಿಯೋ ಬಾಂಬ್​-03

• ಎಲೆಕ್ಷನ್​ಗೂ ಮೊದಲೇ ಆಪರೇಷನ್ ಕಮಲ

ಹಳೇ ಮೈಸೂರಲ್ಲಿ ಆಪರೇಷನ್​ ಮಾಡ್ತೀವಿ​. ಸಂಕ್ರಾಂತಿ ಆದ್ಮೇಲೆ ದೊಡ್ಡ ಡೆವಲಪ್​ಮೆಂಟ್​ ಆಗುತ್ತೆ. ಮೈಸೂರು ಭಾಗದ ದೊಡ್ಡ ಲೀಡರ್ಸ್ ಕಾಂಗ್ರೆಸ್​ ಬಿಟ್ಟು ಬಿಜೆಪಿಗೆ ಬರ್ತಾರೆ. ಅವ್ರಿಂದ 4-5 ಕ್ಷೇತ್ರದಲ್ಲಿ ಬಿಜೆಪಿಗೆ ಪ್ಲಸ್​ ಆಗುತ್ತೆ. ಮಂಡ್ಯದಲ್ಲೊಬ್ಬರು ಬರ್ತಾರೆ, ಕೋಲಾರದ ದಲಿತ ಲೀಡರ್​ ಬರ್ತಾರೆ. ಮುನಿಯಪ್ಪ ಬರೋಕೆ ರೆಡಿ. ನಮ್ಮವರೇ ಇನ್ನೂ ಕ್ಲಾರಿಟಿ ಕೊಟ್ಟಿಲ್ಲ. ನಾಳೆ ನಾಡಿದ್ದು ನಮ್ಮವರು ಕ್ಲಾರಿಟಿ ಕೊಡ್ತಾರೆ. ಈ ಸಲ ಚುನಾವಣೆ ಗೆದ್ಮೇಲೆ ಆಪರೇಷನ್​ ಕಮಲ ಮಾಡಲ್ಲ. ಎಲೆಕ್ಷನ್​ಗೂ ಮೊದಲೇ ಆಪರೇಷನ್​ ಕಮಲ ಮಾಡ್ತೀವಿ.

ಯೋಗೇಶ್ವರ್​ ಆಡಿಯೋ ಬಾಂಬ್​-04

• HDK ಗೆಲ್ತಾರೆ, JDS ಇರೋ ಸೀಟು ಹೋಗುತ್ತಂತೆ..

ರಾಮನಗರದಲ್ಲಿ 1 ಮೈನಸ್​ ಆಗುತ್ತೆ. ಚನ್ನಪಟ್ಟಣ ಹೆಚ್​ಡಿಕೆ ಗೆಲ್ತಾರೆ. ಅಲ್ಲಿಗೆ JDS 12 ಸೀಟು ಹೋಯ್ತು, ಉತ್ತರ ಕರ್ನಾಟಕದಲ್ಲಿ 5 ಸೀಟಿತ್ತು. 3 ಸೀಟು ಹೋಯ್ತು ಅಲ್ಲಿಗೆ 15 ಕಡೆ ಸೋಲ್ತಾರೆ. ಮಧುಗಿರಿ ವೀರಭದ್ರಯ್ಯ, ಲಿಂಗೇಶ್, ಚಿಂತಾಮಣಿ ರೆಡ್ಡಿ, ಸಕಲೇಶಪುರ ಕುಮಾರಸ್ವಾಮಿನೂ ಸೋಲ್ತಾರೆ. ಜೆಡಿಎಸ್​ 19 ಕಡೆ ಸೋಲುತ್ತೆ ನೋಡ್ತೀರಿ. K.R.ನಗರ ಸಾ.ರಾ.ಮಹೇಶ್​ ಈ ಸಲ ಸೋಲ್ತಾನೆ.

ಯೋಗೇಶ್ವರ್​ ಆಡಿಯೋ ಬಾಂಬ್​-05

• ಸಿದ್ದರಾಮಯ್ಯ ಗೆಲ್ತಾರಂತೆ, ಸಿಎಂ ಆಗೋಕೆ ಬಿಡಲ್ವಂತೆ

ಕಾಂಗ್ರೆಸ್​ ಸ್ಟ್ರಾಂಗ್​ ಇಲ್ಲ, ಸಿದ್ದರಾಮಯ್ಯಗೆ ಪಟ್ಟ ಕಟ್ಟೋಕೆ ದೊಡ್ಡವ್ರೇ ಸಹಿಸಿಕೊಳ್ಳಲ್ಲ. ಶಿವಕುಮಾರ್​ ಸ್ಟೇಟ್​ ಕಾಂಪಿಟೇಟರ್. ಕೋಲಾರದಲ್ಲಿ ಸಿದ್ದರಾಮಯ್ಯ ಗೆಲ್ಲಬಹುದು. ಸೋಲ್ತಾರೆ ಅಂತ ಹೇಳೋಕಾಗಲ್ಲ, ವರ್ತೂರು ಪ್ರಕಾಶ್​​ ಟೈಟ್​ ಇದ್ದಾರೆ. ಸಿದ್ದರಾಮಯ್ಯನಂಥವರು ರಾಜಕಾರಣದಲ್ಲಿ ಇರಬೇಕು. ಗೆದ್ಮೇಲೆ ಅವ್ರು ಮುಖ್ಯಮಂತ್ರಿ ಆಗ್ಬೇಕು. MLAಗಳ ಸಪೋರ್ಟ್​ ಜಾಸ್ತಿಯಿದೆ, ಅವರಿಗೂ ಕೊನೆ ಚಾನ್ಸ್​, ಬಟ್​ 120 ಸೀಟು ಗೆಲ್ಲೋದು ಡೌಟು ಎಂದು ಹೇಳಿದ್ದಾರೆ.

ವಾಯ್ಸ್​ ಇಷ್ಟೆಲ್ಲಾ ಮಾತಾಡಿದ್ದೀರಲ್ಲಾ ಇದು ನಿಜನಾ ಅಂದ್ರೆ ಆಡಿಯೋ ನಂದಲ್ಲ ಅಂದ್ರು. ಆಮೇಲೆ ವಿಡಿಯೋ ಬಿಟ್ಟು ಆಡಿಯೋ ಹಿಡ್ಕೊಂಡಿದ್ದೀರಾ ಎಂದು ಯೋಗೇಶ್ವರ್​ ಪ್ರತಿಕ್ರಿಯೆ ನೀಡಿದ್ದರು.

ಇದನ್ನೂ ಓದಿ: Panchamasali Reservation: ಬಿಜೆಪಿಯಲ್ಲಿ ಯತ್ನಾಳ್ Vs ನಿರಾಣಿ; 'ಪಿಂಪ್ ಸಚಿವ' ಎಂಬ ಯತ್ನಾಳ್ ಹೇಳಿಕೆಗೆ ಸಚಿವ ನಿರಾಣಿ ಕಣ್ಣೀರು

ಯೋಗೇಶ್ವರ್​ ಆಡಿಯೋ ಬಗ್ಗೆ ಸಚಿವ ಅಶ್ವತ್ಥ್ ನಾರಾಯಣ್ ಹೇಳಿದ್ದಿಷ್ಟು!

ಚನ್ನಪಟ್ಟಣದ ಕಮಲ ಕಲಿಯ ಆಡಿಯೋ ದೊಡ್ಡ ಸುದ್ದಿಯಾಗ್ತಿದ್ದಂತೆ ಕಾಂಗ್ರೆಸ್​ ಕಾಲೆಳೆದಿದೆ. ಜನಾದೇಶದಿಂದ ಬಿಜೆಪಿ ಅಧಿಕಾರಕ್ಕೆ ಬರಲ್ಲ ಅಂತ ಯೋಗೇಶ್ವರ್​ ಹೇಳಿದ್ದಾರೆ ಬೊಮ್ಮಾಯಿಯವರೇ ಜನರಿಗಷ್ಟೇ ಅಲ್ಲ, ನಿಮ್ಮದೇ ಪಕ್ಷದ ಶಾಸಕರಿಗೇ ನಂಬಿಕೆ ಕಳೆದುಹೋಗಿದ್ದು ಶೋಚನೀಯವಲ್ಲವೇ ಅಂತ ಒಂದು ಟ್ವೀಟ್​ ಅಮಿತ್ ಶಾ ಹೆಸರು ಉಲ್ಲೇಖಿಸಿ ರೌಡಿಗಳನ್ನು ಕರೆದು ರೌಡಿ ಮೋರ್ಚಾ ಕಟ್ಟುತ್ತಿದ್ದೀರಾ? ಬಿಜೆಪಿಯಲ್ಲಿ ಆಟಕ್ಕುಂಟು ಲೆಕ್ಕಕ್ಕಿಲ್ಲದ ಕಟೀಲ್​ ಯಾಕೆ ಮಾತಾಡ್ತಿಲ್ಲ ಅಂತ ಕಾಲೆಳೆದಿದೆ.

ಯೋಗೇಶ್ವರ್​ ಆಡಿಯೋ ಹಲ್​ಚಲ್​ ಎಬ್ಬಿಸಿದ್ದು ಸಂಕ್ರಾಂತಿ ಬಳಿಕ ರಾಜ್ಯ ರಾಜಕೀಯದಲ್ಲಿ ಜಂಪಿಂಗ್​ ರಾಜಕೀಯ ಹೇಗಿರುತ್ತೆ ಕಾದು ನೋಡಬೇಕಿದೆ.