BS Yediyurappa: ತಿರುಪತಿಗೆ ತೆರಳಿದ ಸಿಎಂ​ ಯಡಿಯೂರಪ್ಪ; ನಾಳೆ ಕರ್ನಾಟಕ ಭವನಕ್ಕೆ ಶಂಕು ಸ್ಥಾಪನೆ

ಬೆಂಗಳೂರು (ಸೆ.23): ತಿರುಪತಿಯಲ್ಲಿ ಕರ್ನಾಟಕ ಭವನ ನಿರ್ಮಾಣಕ್ಕೆ ಶಂಕು ಸ್ಥಾಪನೆಗಾಗಿ ಮುಖ್ಯಮಂತ್ರಿ ಬಿಎಸ್​ ಯಡಿಯೂರಪ್ಪ ಇಂದು ಸಂಜೆ ತಿರುಮಲಕ್ಕೆ ಪ್ರಯಾಣ ಬೆಳಸಿದರು. ವಿಶೇಷ ಹೆಲಿಕ್ಯಾಪ್ಟರ್​ ಮೂಲಕ ಅವರು ಪ್ರಯಾಣ ಬೆಳಸಿದ್ದಾರೆ. ಇಂದು ರಾತ್ರಿ ಆಂಧ್ರ ಪ್ರದೇಶ ಮುಖ್ಯಮಂತ್ರಿ ಜಗನ್​ ಮೋಹನ ರೆಡ್ಡಿ ಜೊತೆ ಅವರು ಭೋಜನ ಕೂಟದಲ್ಲಿ ಭಾಗಿಯಾಗಲಿದ್ದಾರೆ. ತಿರುಮಲದ ಪದ್ಮಾವತಿ ಗೆಸ್ಟ್ ಹೌಸ್ ನಲ್ಲಿ ಈ ವಿಶೇಷ ಭೋಜನ ಕೂಟಕ್ಕೆ ವ್ಯವಸ್ಥೆ ಮಾಡಲಾಗಿದೆ. ನಾಳೆ ಬೆಳಗ್ಗೆ ಅವರು, ಕರ್ನಾಟಕ ಭವನ ನಿರ್ಮಾಣ ಶಂಕು ಸ್ಥಾಪನೆ ಮಾಡಿ ಬೆಳಗ್ಗೆ 10 ಗಂಟೆಗೆ ಬೆಂಗಳೂರಿಗೆ ಮರಳಲಿದ್ದಾರೆ.  ಈ ಭೇಟಿ ವೇಳೆ ಅವರು ತಿಮ್ಮಪ್ಪನ ದರ್ಶನವನ್ನು ಪಡೆಯಲಿದ್ದಾರೆ. 

ತಿರುಪತಿಯಲ್ಲಿ ಕರ್ನಾಟಕದ ಭಕ್ತರಿಗೆ ವ್ಯವಸ್ಥೆ ಕಲ್ಪಿಸುವ ದೃಷ್ಟಿಯಿಂದಾಗಿ ಕರ್ನಾಟಕ ಭವನ ನಿರ್ಮಾಣಕ್ಕೆ ರಾಜ್ಯ ಸರ್ಕಾರ ಮುಂದಾಗಿದೆ. ತಿರುಪತಿಯಲ್ಲಿ ಹಾಲಿ ಇರುವ ಕರ್ನಾಟಕ ಭವನ ಜೊತೆ ವಸತಿ ನಿರ್ಮಾಣ ಮಾಡಲು ಮುಂದಾಗಿದೆ. 7.5ಎಕರೆ ಜಾಗದಲ್ಲಿ ಈ ವಸತಿ ಗೃಹ ನಿರ್ಮಾಣ ವಾಗುತ್ತಿದೆ. ತಿರುಮಲಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ   ಕರ್ನಾಟಕದಿಂದ ಭಕ್ತರು ತೆರಳುತ್ತಾರೆ. ಇವರಲ್ಲಿ ಅನೇಕರು ಕರ್ನಾಟಕ ಭವನದ ಸೌಲಭ್ಯ ಸಿಗದೆ ವಂಚಿತರಾಗಿದ್ದಾರೆ. ಈ ಕಾಮಗಾರಿಯಿಂದ ಅವರಿಗೆ ಲಾಭಾ ಸಿಗಲಿದೆ.



ಇಂದು ತಿರುಪತಿಯಲ್ಲಿ ಶ್ರೀವಾರಿ ಬ್ರಹ್ಮೋತ್ಸವ ಕಾರ್ಯಕ್ರಮ ಕೂಡ ಜರುಗುತ್ತಿದೆ. ಬ್ರಹ್ಮೋತ್ಸವದಲ್ಲಿ ಆಂಧ್ರ ಸಿಎಂ ಜಗನ್​ ಮೋಹನ್​ ರೆಡ್ಡಿ ಭಾಗಿಯಾಗಿದ್ದಾರೆ. ರೇಷ್ಮೆ ಪಂಚೆ, ಶಲ್ಯ ಉಟ್ಟ ಅವರು ತಿಮ್ಮಪ್ಪನಿಗೆ ಪಟ್ಟು ವಸ್ತ್ರ( ದೇವರಿಗೆ ನೀಡುವ ರೇಷ್ಮೆ ಬಟ್ಟೆ) ಕಾಣಿಕೆ ನೀಡಿದ್ದಾರೆ. ಮಂಗಳವಾದ್ಯಗಳೊಂದಿಗೆ ನಡೆದ  ಗರುಡಾ ಸೇವೆಯಲ್ಲಿ ಕೂಡ ಅವರು ಭಾಗಿಯಾಗಿದ್ದಾರೆ. ಇದೇ ವೇಳೆ ತಿರುಮಲ ತಿರುಪತಿಯ ಕ್ಯಾಲೆಂಡರ್​, ಡೈರಿ ಬಿಡುಗಡೆ ಮಾಡಿದರು.