Karnataka Election: ಚುನಾವಣೆ ಬಂತಂದ್ರೆ ಸಾಕು, ಆಟೋ ಚಾಲಕರಿಗೆ ಹೈ ಡಿಮ್ಯಾಂಡ್!

ಚುನಾವಣೆಗೂ ಆಟೋ ರಿಕ್ಷಾಗಳಿಗೂ ಅವಿನಾಭ ಸಂಬಂಧ. 'ಮರೆಯದಿರಿ ನಮ್ಮ ಮತಬಾಂಧವರೇ' ಎನ್ನುತ್ತಲೇ ಆಟೋಗಳು ಎಲ್ಲರ ಚಿತ್ತ (Karnataka Assembly Elections 2023) ಸೆಳೆಯುತ್ತವೆ. ಅಲ್ಲದೇ ಚುನಾವಣೆಯ ಸಮಯದಲ್ಲಿ ಬ್ಯಾನರ್​ ಕಟ್ಟಿ, ಮೈಕ್​ ಹಿಡಿದು ಪ್ರಚಾರ ಮಾಡಲು ಆಟೋಗಳೇ ಬೇಕು. ಆದ್ರೆ ಈ ಬಾರಿ ಸ್ವಲ್ಪ ಅಪ್​ಡೇಟೆಡ್​ ಪ್ರಚಾರ ಶುರುವಾಗಿದೆ. ಆಟೋಗಳಲ್ಲಿ ಸ್ವಯಂ ರಾಜಕಾರಣಿಗಳೇ ರೈಡ್​ (Auto Ride) ಶುರು ಮಾಡಿದ್ದಾರೆ. ಆ ಮೂಲಕ ಆಟೋ ಚಾಲಕರನ್ನು ಮತಬ್ಯಾಂಕ್​ಗಳನ್ನಾಗಿ ಮಾಡುವ ರಾಜಕೀಯ ಸ್ಟ್ರಾಟರ್ಜಿ ನಡೆಸುತ್ತಿದ್ದಾರೆ ಎನ್ನುತ್ತಾರೆ ರಾಜಕೀಯ ವಿಶ್ಲೇಷಕರು.

ಬಿಜೆಪಿ ಭರವಸೆ
ಈಗಾಗಲೇ 3 ಪ್ರಬಲ ಪಕ್ಷಗಳು ಭರವಸೆಯ ಮಹಾಪೂರವನ್ನೇ ಹರಿಸಿವೆ. ಆಡಳಿತರೂಢ ಬಿಜೆಪಿ ಮತ್ತೆ ಅಧಿಕಾರಕ್ಕೆ ಬಂದರೆ ರೈತ ವಿದ್ಯಾ ನಿಧಿ ಯೋಜನೆಯಲ್ಲಿ ಆಟೋ ಚಾಲಕರ ಮಕ್ಕಳನ್ನು ಸೇರಿಸುವುದಾಗಿ ಭರವಸೆ ನೀಡಿದೆ. ಜೊತೆಗೆ ಆಟೋಚಾಲಕರ ಮಕ್ಕಳಿಗೆ ಶೈಕ್ಷಣಿಕ ಸಹಾಯ ಮಾಡುವುದಾಗಿಯೂ ಘೋಷಿಸಿದೆ.

ಜೆಡಿಎಸ್​ ಆಶ್ವಾಸನೆ
ಜೆಡಿಎಸ್​​ ಪಕ್ಷ ಅಧಿಕಾರಕ್ಕೆ ಬಂದರೆ ಆಟೋ ಚಾಲಕರಿಗೆ ತಿಂಗಳಿಗೆ 2 ಸಾವಿರ ರೂ ಸಹಾಯಧನ ನೀಡುತ್ತೇವೆ ಎಂದು ಘೋಷಿಸಿದೆ.

ಕಾಂಗ್ರೆಸ್​​​ ಆಟೋ ರೈಡ್​
ಕೆಪಿಸಿಸಿ ಅಧ್ಯಕ್ಷರಾಗಿರುವ ಡಿ.ಕೆ ಶಿವಕುಮಾರ್​​​ ಅವರು ಆಟೋ ಚಾಲಕರ ಸಮವಸ್ತ್ರ ತೊಟ್ಟು ಆಟೋ ಚಲಾಯಿಸಿ ಚಾಲಕರಾಗಿದ್ದರು. ಅಲ್ಲದೇ, ಆಟೋ ಚಾಲಕರ ಜೊತೆಗೆ ಮಾತನಾಡಿ ಅವರ ಕಷ್ಟ- ಸುಖಗಳನ್ನು ಆಲಿಸಿದ್ದಾರೆ. ಆಟೋ ಚಾಲಕರು ಪ್ರಯಾಣಿಕರ ಸಾರಥಿ ಎಂದರು. ಆ ಮೂಲಕ ಭಾವನಾತ್ಮಕವಾಗಿ ಕಾಂಗ್ರೆಸ್​ ಆಟೋಚಾಲಕರ ಮನಸ್ಸು ಗೆಲ್ಲುವ ಪ್ರಯತ್ನ ನಡೆಸಿದೆ.

ಆಟೋ ಚಾಲಕರ ಕುರಿತು ರಾಜಕೀಯ ನಾಯಕರು ಹೇಳೋದು ಹೀಗೆ
ಆಟೋ ಚಾಲಕರಿಗೆ ಸಾಕಷ್ಟು ಸಮಸ್ಯೆಗಳಿವೆ. ಪೊಲೀಸ್​, ಸಾರಿಗೆ ಇಲಾಖೆ ಅಧಿಕಾರಿಗಳ ಕಾಟ, ಪೆಟ್ರೋಲ್, ಡೀಸೆಲ್​ ದರ ಏರಿಕೆಯ ನಡುವೆ ಅವರ ಬದುಕೇ ಕಷ್ಟವಾಗಿದೆ ಎನ್ನುತ್ತಾರೆ ಎಚ್​.ಡಿ ಕುಮಾರಸ್ವಾಮಿ.

ಆಟೋಚಾಲರಿಗೆ ಜಾತಿ, ಧರ್ಮದ ಹಂಗಿಲ್ಲ. ಜನರ ಸುರಕ್ಷತೆ , ಜನರ ಸೇವೆಯಲ್ಲಿ ತೊಡಗಿಕೊಂಡಿದ್ದಾರೆ. ಇಂಧನ ಏರಿಕೆಯ ಹೊಡೆತದ ನಡುವೆಯೂ ಅವರು ತಮ್ಮ ಕೆಲಸವನ್ನು ಬಹಳ ಪ್ರೀತಿಸುತ್ತಾರೆ ಎಂದರು ಡಿ.ಕೆ ಶಿವಕುಮಾರ್​.

ಆಟೋಚಾಲಕರ ಸಮಸ್ಯೆ ಬಗೆಹರಿಯಬೇಕು. ಜೊತೆಗೆ ಅವರಿಗೆ ಭರವಸೆಗಳನ್ನು ನೀಡುವುದು ನಾಯಕರ ಕರ್ತವ್ಯ. ಆದರೆ ಅದನ್ನು ಪಕ್ಷಗಳು ಈಡೇರಿಸಬೇಕು ಎನ್ನುವುದು ಕರ್ನಾಟಕ ಆಟೋ ಚಾಲಕರ ಸಂಘ ಒಕ್ಕೂಟಗಳ ಮುಖ್ಯಸ್ಥ ರಾಘವೇಂದ್ರ ಅವರ ಮಾತಾಗಿದೆ.

ರಾಜಕೀಯ ವಿಶ್ಲೇಷಕರು ಏನಂತಾರೆ?
ಫೆಬ್ರವರಿಯಲ್ಲಿ 2023 ರ ಅಂಕಿ ಅಂಶಗಳ ಪ್ರಕಾರ ರಾಜ್ಯದಲ್ಲಿ 7 ಲಕ್ಷ 70 ಸಾವಿರ ಆಟೋಗಳಿವೆ. ಇದರಲ್ಲಿ 6 ಲಕ್ಷ ಕಾರ್ಯನಿರತ ಆಟೋಗಳಿವೆ. ಇನ್ನೂ ಬೆಂಗಳೂರಿನಲ್ಲಿ 3 ಲಕ್ಷ ಆಟೋಗಳು ಇದ್ದು, 2 ಲಕ್ಷದ 20 ಸಾವಿರ ಆಟೋಗಳು ಚಲಾವಣೆಯಲ್ಲಿವೆ. ಈ ಆಟೋಗಳಿಗೆ ಬೆಂಗಳೂರಿನಲ್ಲಿ 8 ಲಕ್ಷ ಚಾಲಕರಿದ್ದಾರೆ.

ಇದನ್ನೂ ಓದಿ: AB Malaka Reddy: ತನಗೂ ಇಲ್ಲ, ಮಗಳಿಗೂ ಕಾಂಗ್ರೆಸ್‌ ಟಿಕೆಟ್‌ ಇಲ್ಲ; ಕಮಲ ಬಿಟ್ಟು ಕಂಗಾಲಾದ ಮಾಲಕರೆಡ್ಡಿ!

ಕೆಲವರು ವಿಭಿನ್ನ ಶಿಫ್ಟ್​​ನಲ್ಲಿ ಕೆಲಸ ಮಾಡುವುದರಿಂದ ಇದರ ಸಂಖ್ಯೆ ಇನ್ನೂ ಹೆಚ್ಚಿದೆ. ಇವರೆಲ್ಲರೂ ಈ ಚುನಾವಣೆಯಲ್ಲಿ ಮತ ಬ್ಯಾಂಕ್​ಗಳು ಎನ್ನುವುದು ರಾಜಕೀಯ ವಿಶ್ಲೇಷಕರ ಅನಿಸಿಕೆ. ಇನ್ನೂ ಈ ಚಾಲಕರ ಕುಟುಂಬಸ್ಥರು ಸೇರಿದರೆ ಮತಬ್ಯಾಂಕ್​ ಸಂಖ್ಯೆ ಏರುತ್ತದೆ.

ಮೌತ್​ ಪಬ್ಲಿಸಿಟಿ
ಅಲ್ಲದೇ, ಆಟೋ ಚಾಲಕರು ಮಾತಿನಲ್ಲಿ ಚತುರರು. ಪ್ರಯಾಣಿಕರೊಟ್ಟಿಗೆ ರಾಜಕೀಯ ವಿಷಯವನ್ನು ಚರ್ಚಿಸುತ್ತಾರೆ. ಇದು ಅದ್ಭುತ ಪ್ರಚಾರವಾಗುತ್ತದೆ ಎನ್ನುವ ಸ್ಟ್ರಾಟರ್ಜಿಯೂ ಇದೆ. ಇದಿಷ್ಟೇ ಅಲ್ಲದೇ, ಆಟೋಗೆ ಸಂಬಂಧಿಸಿದ ಇನ್ನಿತರ ಕೆಲಸಗಳನ್ನು ಮಾಡುವ ಪೇಂಟರ್, ಮೆಕ್ಯಾನಿಕ್, ಟಿಂಕರಿಂಗ್​ ಮಾಡುವವರ ಸಂಖ್ಯೆ ಸೇರಿದರೆ ವೋಟ್​ಬ್ಯಾಂಕ್​ ಇನ್ನೂ ಹೆಚ್ಚಾಗುತ್ತದೆ.

ಇದನ್ನೂ ಓದಿ: Kichcha Sudeep: ಕಿಚ್ಚನ ಪ್ರಚಾರಕ್ಕೆ ಬಿಜೆಪಿ ಬಿಗ್ ಪ್ಲಾನ್​, ಇತ್ತ ನಟ ಸುದೀಪ್​ಗೆ ಶಾಕ್ ಕೊಟ್ಟ ಜೆಡಿಎಸ್!

ಆಟೋ ಚಾಲಕರ ಸಮಸ್ಯೆ, ಹೋರಾಟ, ಪ್ರತಿಭಟನೆಗೆ ಬಾರದ ನಾಯಕರು ಈಗ ಕೊಂಚ ಹೆಚ್ಚೇ ಪ್ರೀತಿ ತೋರುತ್ತಿರುವಂತೆ ಕಾಣುತ್ತಿದೆ. ಆದರೆ ಆಟೋ ಚಾಲಕರು ಹೃದಯವಂತರೂ ಹೌದು, ಅಷ್ಟೇ ಬುದ್ಧಿವಂತರೂ ಹೌದು. ಅವರನ್ನು ಏಮಾರಿಸುವುದು ಸಾಧ್ಯವೇ? ಎನ್ನುವುದು ಶ್ರೀಸಾಮಾನ್ಯನ ಅನಿಸಿಕೆ.