ಡಿಕೆಶಿ ತಂಗಿದ್ದ ರೆಸಾರ್ಟ್​ ಮೇಲೆ ಐಟಿ ದಾಳಿ; ಬಿಜೆಪಿ ನಾಯಕರ ರೂಮ್​ಗಳ ಮೇಲೆ ಯಾಕಿಲ್ಲ ದಾಳಿ ಎಂದ ಸಿದ್ದರಾಮಯ್ಯ

ಹುಬ್ಬಳ್ಳಿ (ಮೇ.14): ಕುಂದಗೋಳ ಉಪಚುನಾವಣೆ ಉಸ್ತುವಾರಿ ಹೊತ್ತಿರುವ ಸಚಿವ ಡಿಕೆ ಶಿವಕುಮಾರ್​, ತಂಗಿದ್ದ ರೆಸಾರ್ಟ್​ ಮೇಲೆ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ನಗರದ ಕಾಟನ್​ ಕೌಂಟಿ ರೆಸಾರ್ಟ್​ಗೆ ಸೋಮವಾರ ರಾತ್ರಿ ಸಚಿವರು, ಶಾಸಕರು ಹಾಗೂ ಕಾಂಗ್ರೆಸ್​ ಪಕ್ಷದ ಪದಾಧಿಕಾರಿಗಳೊಂದಿಗೆ ಡಿಕೆ ಶಿವಕುಮಾರ್​ ಸಭೆ ನಡೆಸುತ್ತಿದ್ದರು. ಈ ವೇಳೆ ದಾಳಿ ನಡೆಸಿದ ಅಧಿಕಾರಿಗಳು, ತಡರಾತ್ರಿವರೆಗೂ ಶೋಧ ನಡೆಸಿದ್ದಾರೆ. ಈ ವೇಳೆ ಹೊಟೇಲ್​ನಲ್ಲಿರಿಸಿದ ಕೆಲವು ದಾಖಲೆಗಳನ್ನು ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.

ಇದಾದ ಬಳಿಕ ಸಿಎಂ ಕುಮಾರಸ್ವಾಮಿ ತಂಗಿದ್ದ ಡೆನಿಸನ್ಸ್​ ಹೊಟೇಲ್​ ಮೇಲೆ ಕೂಡ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಅಲ್ಲದೇ ಸಚಿವ ಜಮೀರ್​ ಅಹ್ಮದ್​ಖಾನ್​, ಎಂಟಿಬಿ ನಾಗರಾಜ್​, ಆರ್​ ವಿ, ದೇಶಪಾಂಡೆ, ಸಂತೋಷ್​ ಲಾಡ್​, ಬಂಡೆಪ್ಪ ಖಾಶಂಪೂರ್​ ತಂಗಿದ್ದ ಕೊಠಡಿಗಳಲ್ಲಿಯೂ ಸಮಗ್ರ ಪರಿಶೀಲನೆ ನಡೆಸಿದ್ದಾರೆ. ನಿನ್ನೆ ಸಂಜೆ ಏಳು ಗಂಟೆಗೆ ಆರು ಜನರ ತಂಡದ ಅಧಿಕಾರಿಗಳು ಹೊಟೇಲ್​ ಮೇಲೆ ದಾಳಿ ನಡೆಸಿದ್ದು,  ಮಧ್ಯರಾತ್ರಿ ಎರಡುವರೆಗೂ ಅಧಿಕಾರಿಗಳು ತಪಾಸಣೆ ನಡೆಸಿದ್ದಾರೆ.

ಬಿಜೆಪಿ ರೂಮ್​ಗಳ ಮೇಲೆ ಯಾಕಿಲ್ಲ ದಾಳಿ?

ಡಿಕೆ ಶಿವಕುಮಾರ್​ ಹಾಗೂ ಕಾಂಗ್ರೆಸ್​ ನಾಯಕರ ರೂಮ್​ಗಳ ಮೇಲೆ ಐಟಿ ಅಧಿಕಾರಿಗಳ ದಾಳಿಯನ್ನು ಸಿದ್ದರಾಮಯ್ಯ ಖಂಡಿಸಿದ್ದಾರೆ. ಕಾಂಗ್ರೆಸ್​​ ನಾಯಕರ ರೂಮ್​ಗಳ ಮೇಲೆ ಮಾತ್ರ ಯಾಕೆ ದಾಳಿ ಆಗಿದೆ. ಬಿಜೆಪಿ ನಾಯಕರ ರೂಮ್​ಗಳ ಮೇಲೆ ಯಾಕಿಲ್ಲ ಎಂಬ ಪ್ರಶ್ನಿಸಿದ್ದಾರೆ.

ಕುಂದುಗೋಳ ಉಪಚುನಾವಣಾ ಪ್ರಚಾರ ನಡೆಸುತ್ತಿರುವ ಬಿಜೆಪಿ ರಾಜ್ಯಾಧ್ಯಕ್ಷ ಕೂಡ ಹುಬ್ಬಳ್ಳಿಯಲ್ಲಿ ತಂಗಿದ್ದಾರೆ. ಯಡಿಯೂರಪ್ಪ ಇದ್ದ ರೂಮ್ ಮೇಲೆ ದಾಳಿ ಮಾಡಿದ್ದಾರೆಯೇ ಎಂದು ಕೇಳಿದ್ದಾರೆ. ನಮ್ಮನ್ನು ಗುರಿಯಾಗಿಸಿಕೊಂಡು ಮಾತ್ರ ಈ ದಾಳಿ ನಡೆಸಲಾಗುತ್ತಿದೆ. ನಮ್ಮನ್ನು ಈ ದಾಳಿ ಮೂಲಕ ಕುಗ್ಗಿಸುವ ಪ್ರಯತ್ನ ನಡೆಯುತ್ತಿದೆ ಎಂದು ಬಿಜೆಪಿ ನಾಯಕರ ವಿರುದ್ಧ ಹರಿಹಾಯ್ದರು.