Sea Erosion: ಕಡಲು‌ ಕೊರೆತ ತಡೆ‌ಗೆ ಸರ್ಕಾರದ ನಿರ್ಲಕ್ಷ್ಯ, ಮರೀಚಿಕೆಯಾದ ಶಾಶ್ವತ ಪರಿಹಾರದ ಯೋಜನೆ

ಕಡಲು ಕೊರೆತ ಸಮಸ್ಯೆಯನ್ನ ಕಳೆದ ಸುಮಾರು ಹತ್ತು ವರ್ಷಗಳಿಂದ ಪರಿಹಾರ ಎನ್ನುವ ಕಾರಣದಡಿ ಜನಪ್ರತಿನಿಧಿಗಳು, ಅಧಿಕಾರಿಗಳು ನುಂಗಿ ನೀರು ಕುಡಿದ ಹಣಕ್ಕೆ ಲೆಕ್ಕವೇ ಇಲ್ಲ.

ಕಡಲ ತೀರ

ಕಡಲ ತೀರ

  • Share this:
ಮಂಗಳೂರು : ಚಿನ್ನದ ಮೊಟ್ಟೆ ಇಡುವ ಕೋಳಿಯನ್ನು ಕೊಲ್ಲುತ್ತಾರೆ ಅನ್ನೋದನ್ನು ನಂಬಲು ಹೇಗೆ ಸಾಧ್ಯವಿಲ್ಲವೋ, ಅದೇ ಚಿನ್ನದ ಮೊಟ್ಟೆ ಇಡುವ ಕೋಳಿಯಂತಿರುವ ಕೆಲವು ಸಮಸ್ಯೆಗಳಿಗೆ (Problems) ಶಾಶ್ವತ ಪರಿಹಾರವನ್ನು (Permanent Solution) ಜನಪ್ರತಿನಿಧಿಗಳು, ಅಧಿಕಾರಿಗಳು ಪರಿಹಾರ ಕಲ್ಪಿಸುತ್ತಾರೆ ಅನ್ನೋದನ್ನೂ ನಂಬಲು ಸಾಧ್ಯವಿಲ್ಲ. ಹೌದು ನಾವಿಲ್ಲಿ ಹೇಳ ಹೊರಟಿರೋದು ಕರಾವಳಿ ತೀರದಲ್ಲಿ ಮಳೆಗಾಲದ ಸಂದರ್ಭದಲ್ಲಿ ಉಂಟಾಗುವ ಕಡಲು ಕೊರೆತ ಸಮಸ್ಯೆಯನ್ನ ಕಳೆದ ಸುಮಾರು ಹತ್ತು ವರ್ಷಗಳಿಂದ ಪರಿಹಾರ ಎನ್ನುವ ಕಾರಣದಡಿ ಜನಪ್ರತಿನಿಧಿಗಳು, ಅಧಿಕಾರಿಗಳು ನುಂಗಿ ನೀರು ಕುಡಿದ ಹಣಕ್ಕೆ ಲೆಕ್ಕವೇ ಇಲ್ಲ. ನೀರಿನ ಮೇಲೆ ಹೋಮ ಇಟ್ಟಂತೆ ಎನ್ನುವ ಗಾದೆ ಮಾತು ಮಾತ್ರ ಈ ಕಡಲುಕೊರೆತ ಸಮಸ್ಯೆಗೆ ಸೂಕ್ತವಾಗಿ ಅನ್ವಯ ಆಗುತ್ತೆ.

ಹೆಚ್ಚಾದ ಕಡಲ್ಕೊರೆತದ ತೀವ್ರತೆ

7516 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಚಾಚಿಕೊಂಡಿರುವ ಭಾರತದ ಕರಾವಳಿ ತೀರದಲ್ಲಿ 33 ಶೇಕಡಾದಷ್ಟು ಕರಾವಳಿಯಲ್ಲಿ ಕಡಲು ಕೊರೆತದ ಸಮಸ್ಯೆಯಿದೆ.  ಪಶ್ಚಿಮ ಕರಾವಳಿಯಲ್ಲಿ ಈ ಸಮಸ್ಯೆ ಅತೀ ಹೆಚ್ಚಾಗಿದ್ದು,  ಕಡಲು ಕೊರೆತ ಸಮಸ್ಯೆಯು ಕರ್ನಾಟಕದ ಕರಾವಳಿ ತೀರವನ್ನೂ ಬಿಟ್ಟಿಲ್ಲ. ಉಡುಪಿ, ದಕ್ಷಿಣಕನ್ನಡ ಜಿಲ್ಲೆಯಲ್ಲಿ ಈ ಸಮಸ್ಯೆಯ ತೀವೃತೆ ಬೆಳಕಿಗೆ ಬಂದಿರೋದು ಮಾತ್ರ ಇತ್ತೀಚಿನ ಕೆಲ ವರ್ಷಗಳಲ್ಲಿ. ಕರ್ನಾಟಕದಲ್ಲಿ ಸುಮಾರು 320 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಕರಾವಳಿ ತೀರವಿದ್ದು, ಉಡುಪಿ ಹಾಗೂ ದಕ್ಷಿಣಕನ್ನಡ ಜಿಲ್ಲೆಯಲ್ಲಿ ಕಡಲ್ಕೊರೆತದ ತೀವ್ರತೆ ಮಾತ್ರ ಹೆಚ್ಚಾಗಿದೆ.

ಸಿ.ಆರ್.ಝಡ್ ಪ್ರದೇಶದಲ್ಲಿ ಅಕ್ರಮ ಕಟ್ಟಡಗಳ ನಿರ್ಮಾಣ, ನದಿ ಹಾಗೂ ಸಮುದ್ರ ತೀರದ ಅತಿಕ್ರಮಣ ಹೆಚ್ಚಾದಂತೆ ಕಡಲ್ಕೊರೆತದ ಪರಿಣಾಮದ ಹಾನಿಯೂ ಹೆಚ್ಚಾಗಿರುವುದು ಕಳೆದ 10 ವರ್ಷಗಳ ವರದಿಗಳನ್ನು ಅವಲೋಕಿಸಿದಲ್ಲಿ ತಿಳುವಳಿಕೆಗೆ ಬರುತ್ತೆ.  ದಕ್ಷಿಣಕನ್ನಡ ಜಿಲ್ಲೆಯ ಮಂಗಳೂರು ವಿಧಾನಸಭಾ ಕ್ಷೇತ್ರದ ಉಳ್ಳಾಲ, ಸೋಮೇಶ್ವರ, ಉಚ್ಚಿಲ ಪ್ರದೇಶದಲ್ಲಿ ಪ್ರತಿ ಮಳೆಗಾಲದ ಸಂದರ್ಭದಲ್ಲೂ ಭಾರೀ ಕಡಲ್ಕೊರೆತ ಸಂಭವಿಸುತ್ತಿದ್ದು, ಪ್ರತೀ ಸಂದರ್ಭದಲ್ಲೂ ಸರಾಸರಿ ಇಪ್ಪತ್ತಕ್ಕೂ ಮಿಕ್ಕಿದ ಮನೆಗಳು ಸಮುದ್ರ ಪಾಲಾಗುತ್ತಿದೆ.

ಇದನ್ನೂ ಓದಿ: Uttara Kannada: ಸಹಸ್ರಲಿಂಗ ಕ್ಷೇತ್ರದಲ್ಲಿ ಕಣ್ಮರೆಯಾಗ್ತಿವೆ ಲಿಂಗಗಳು; ಐತಿಹಾಸಿಕ ಕ್ಷೇತ್ರದಲ್ಲಿ ಏನಾಗ್ತಿದೆ?

ಸುಮಾರು 160 ಕೋಟಿ ರೂಪಾಯಿ ವ್ಯಯಿಸಲಾಗಿದೆ

ಸಮುದ್ರ ಕೊರೆತ ತಡೆಗಾಗಿ 2010 ರಿಂದ ಈವರೆಗೆ ಎಡಿಬಿ ಯೋಜನೆಯಡಿ ಸಮುದ್ರಕ್ಕೆ ಕಲ್ಲು ಹಾಕುವ ಕಾಮಗಾರಿಯು ನಡೆಯುತ್ತಲೇ ಇದೆ. ಮಂಗಳೂರು ಹೊರವಲಯದ ಉಚ್ಚಿಲದ ಬಟ್ಟಪ್ಪಾಡಿ ಕಡಲ ತೀರದಲ್ಲಿ ಕಳೆದ ನಾಲ್ಕೈದು ವರ್ಷಗಳಿಂದ ಕಡಲು ಕೊರತೆ ಸಮಸ್ಯೆ ತೀವೃಗೊಂಡಿದ್ದು, ಎಡಿಬಿ ಮೂಲಕ ಈಗಾಗಲೇ ಸುಮಾರು 160 ಕೋಟಿ ರೂಪಾಯಿ ವ್ಯಯಿಸಲಾಗಿದ್ದು, ಇದರಲ್ಲಿ ಸುಮಾರು 110 ಕೋಟಿ ವೆಚ್ಚದಲ್ಲಿ ಸಮುದ್ರಕ್ಕೆ 200 ಮೀಟರ್ ವ್ಯಾಪ್ತಿಯಲ್ಲಿ 2 ರೀಫ್, ಸುಮಾರು 30 ಕೋಟಿ ರೂಪಾಯಿ ವೆಚ್ಚದಲ್ಲಿ 10 ಬರ್ನ್ ಗಳನ್ನು ನ್ಯೂ ಉಚ್ಚಿಲ-ಬಟ್ಟಪ್ಪಾಡಿ ವ್ಯಾಪ್ತಿಯಲ್ಲಿ ಹಾಕಲಾಗಿದೆ. ಅಲ್ಲದೆ ಈ ಭಾಗದಲ್ಲಿ ಕಡಲು ಕೊರೆತ ಆರಂಭವಾದ ಬಳಿಕ ಕಡಲ ಕಿನಾರೆಯಲ್ಲಿರುವ ಮನೆಗಳನ್ನು ರಕ್ಷಿಸುವುದಕ್ಕೋಸ್ಕರ ಬಂದರು ಇಲಾಖೆ ಕಡಲ ಕಿನಾರೆಗೆ ಬೃಹತ್ ಗಾತ್ರದ ಕಪ್ಪು ಕಲ್ಲುಗಳನ್ನು ಹಾಕುವ ಕೆಲಸವನ್ನೂ ಮಾಡಿದೆ. ಆದರೆ ಈ ಕಲ್ಲು ಹಾಕುವ ವ್ಯವಸ್ಥೆಗೆ ಸರಿಯಾದ ಯೋಜನೆಯನ್ನೇ ಈವರೆಗೂ ಮಾಡಲಾಗಿಲ್ಲ.

ಕಲ್ಲು ಹಾಸುವುದು ಕೊರೆತ ತಡೆಗೆ ಶಾಶ್ವತ ಪರಿಹಾರವಲ್ಲ

ಅಧಿಕಾರಿಗಳು ಗುತ್ತಿಗೆದಾರರ ಜೊತೆಗಿನ ಸಂಬಂಧದಿಂದಾಗಿ ಈಗಾಗಲೇ ಸುಮಾರು ಹತ್ತಾರು ಕೋಟಿ ಮೌಲ್ಯದ ಕಲ್ಲುಗಳನ್ನು ಸಮುದ್ರ ಕಿನಾರೆಗೆ ಹಾಕಿದ್ದು, ಈ ಹಣವನ್ನು ಈವರೆಗೂ ಗುತ್ತಿಗೆದಾರರಿಗೆ ನೀಡಿಲ್ಲ. ಅಲ್ಲದೆ ಕಡಲು ಕೊರೆತ ತಡೆಗೆ ಈವರೆಗೆ ಶಾಶ್ವತ ಪರಿಹಾರಕ್ಕೆ ಸರಕಾರದಿಂದ ಮಾರ್ಗಸೂಚಿಯೂ ರಚನೆಯಾಗಿಲ್ಲ. ಕಿನಾರೆಗೆ ಕಲ್ಲು ಹಾಸುವುದು ಕೊರೆತ ತಡೆಗೆ ಶಾಶ್ವತ ಪರಿಹಾರವಲ್ಲ ಎನ್ನುವುದು ಸ್ಥಳೀಯರ ವಾದವಾಗಿದ್ದು, ಈ ಭಾಗದಲ್ಲಿ ಸಮುದ್ರದಲ್ಲಿ ಸುಮಾರು 30 ರಿಂದ 40 ಅಡಿ ಆಳದಿಂದಲೇ ಕೊರೆತ ಆರಂಭಗೊಳ್ಳುತ್ತಿದ್ದು,  ಕಡಲಿನ ಅಲೆಗಳನ್ನು ಆಧಾರಿಸಿ ಪರಿಹಾರ ಯೋಜನೆಗಳನ್ನು ಮಾಡಬೇಕಾದ ಅನಿವಾರ್ಯತೆಯೂ ಇದೆ ಎನ್ನುತ್ತಾರೆ ಬಟ್ಟಪ್ಪಾಡಿ ನಿವಾಸಿಯಾದ ರಂಜಿತ್​.

ಬಟ್ಟಪ್ಪಾಡಿಯಲ್ಲಿ ಇದ್ದಂತೆ ಸೋಮೇಶ್ವರದಿಂದ ಪೆರಿಬೈಲು ಭಾಗದಲ್ಲಿ ಕಡಲು ಕೊರೆತೆ ಉಂಟಾಗಿದ್ದು, ಆದರೆ ಆ ಭಾಗಕ್ಕೆ ಬಂದರು ಇಲಾಖೆ ಸಮುದ್ರದ ಅಲೆಗಳನ್ನು ತಡೆಯುವ ಎರಡು ಯೋಜನೆಗಳನ್ನು ಸುಮಾರು 5 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಿದ್ದು, ಯೋಜನೆಯ ಬಳಿಕ ಆ ಭಾಗದಲ್ಲಿ ಕಡಲು ಕೊರೆತ ಸಂಪೂರ್ಣ ನಿಂತಿದ್ದು, ಅಂತಹುದೇ ಯೋಜನೆಯನ್ನು ಉಚ್ಚಿಲ , ಬಟ್ಟಪ್ಪಾಡಿ ಭಾಗಕ್ಕೂ ಅಳವಡಿಸುವ ಅಗತ್ಯವಿದೆ ಎನ್ನುವುದು ಸ್ಥಳೀಯರ ವಾದವಾಗಿದೆ.
Published by:Kavya V
First published: