HD Kumaraswamy: ಇದೇ ಕಾರ್ಡ್‌ನಿಂದ ರಾಮನಗರದಲ್ಲಿ ನಿಖಿಲ್ ಸೋತಿದ್ದಂತೆ! ಎಚ್‌ಡಿಕೆ ಗಂಭೀರ ಆರೋಪ

ಬೆಂಗಳೂರು; ಕಾಂಗ್ರೆಸ್ (Congress) ಗಿಫ್ಟ್ ಕೂಪನ್ (Gift Coupon) ವಿತರಣೆ ಮಾಡಿ ಗೆದ್ದಿದೆ. ನಿಖಿಲ್‌ ಕುಮಾರಸ್ವಾಮಿಯನ್ನ (Nikhil Kumaraswamy) ನ್ಯಾಯಯುತವಾಗಿ ಸೋಲಿಸಿಲ್ಲ ಅಂತ ಮಾಜಿ ಸಿಎಂ ಎಚ್​ಡಿ ಕುಮಾರಸ್ವಾಮಿ (HD Kumaraswamy) ಆರೋಪಿಸಿದ್ದಾರೆ. 5 ಸಾವಿರ ಮೊತ್ತದ ಗಿಫ್ಟ್ ಕೂಪನ್‌‌ ಹಂಚಿ ನಿಖಿಲ್ ಅವರನ್ನು ರಾಮನಗರದಲ್ಲಿ (Ramanagara) ಸೋಲಿಸಿದ್ದಾರೆ. 45 ಕ್ಷೇತ್ರಗಳಲ್ಲಿ ಈ ರೀತಿ ಗಿಫ್ಟ್ ಕೂಪನ್‌ ಹಂಚಿದ್ದಾರೆ. ಒಟ್ಟಾರೆ ₹30 ಕೋಟಿ ಗಿಫ್ಟ್‌ಗಳನ್ನ ಹಂಚಿಕೆ ಮಾಡಿದ್ದಾರೆ. ಕುಣಿಗಲ್ ರಂಗನಾಥ್, ರಾಮನಗರ ಇಕ್ಬಾಲ್ ಹುಸೇನ್, ಆರ್‌ಆರ್ ನಗರ (RR Nagar) ಕುಸುಮಾ ಹಂಚಿದ ಕೂಪನ್‌ಗಳು ಸಿಕ್ಕಿವೆ ಅಂತ ಕುಮಾರಸ್ವಾಮಿ ಆರೋಪಿಸಿದ್ದಾರೆ.

ಜೆಡಿಎಸ್‌ನ ಅಂತಿಮ ಸಂಸ್ಕಾರ ಯಾವಾಗ ಎಂಬ ಕಾಂಗ್ರೆಸ್ ಟ್ವೀಟ್ ವಿಚಾರವಾಗಿ ತಿರುಗೇಟು ಕೊಟ್ಟ ಎಚ್​ಡಿಕೆ, ಮುಂದೆ ಅಂತಿಮ ಸಂಸ್ಕಾರ ಯಾರದ್ದಾಗುತ್ತೆ ಅಂತ ಜ‌ನ ತೀರ್ಮಾನ ಮಾಡ್ತಾರೆ. ಲೋಕಸಭೆಯಲ್ಲಿ 180 ರಿಂದ 38ಕ್ಕೆ ಇಳಿದರಲ್ಲ, ಯಾಕೆ ಕಾಂಗ್ರೆಸ್ ವಿಸರ್ಜನೆ ಮಾಡಲಿಲ್ಲ. ಈ ದುರಹಂಕಾರ ಬಹಳ ದಿನ ನಡೆಯಲ್ಲ. ಕಾಲ‌ ಚಕ್ರ ಹೀಗೆ ಇರಲ್ಲ, ಮೇಲಿದ್ದವನು ಕೆಳಗೆ ಇಳಿಯಬೇಕು. ನಿಮ್ಮ ದುರಂಕಾರದ ನಡೆಯನ್ನೇ ಸವಾಲಾಗಿ ಸ್ವೀಕಾರ ಮಾಡುತ್ತೇನೆ ಎಚ್ಚರಿಕೆ ನೀಡಿದ್ದಾರೆ.

ಇದನ್ನೂ ಓದಿ: Congress Guarantee: 2 ಸಾವಿರ ಪಡೆಯಲು 'ಗೃಹಲಕ್ಷ್ಮಿ'ಯರ ಸಾಹಸ, ಆಧಾರ್ ಜೋಡಣೆಗೆ ಸೈಬರ್ ಸೆಂಟರ್ ಮುಂದೆ ಮಹಿಳೆಯರ ಕ್ಯೂ!

ಪಕ್ಷದ ಸೋಲಿನ ನೈತಿಕ ಹೊಣೆ ಹೊತ್ತು ಇಬ್ರಾಹಿಂ ರಾಜೀನಾಮೆ ನೀಡಿದ್ದರು. ಆದರೆ ನಿನ್ನೆಯ ವಿಮರ್ಶಾತ್ಮಕ ಸಭೆ, ಕಾರ್ಯಕಾರಿಣಿ ಸಭೆಯಲ್ಲಿ ಇವರನ್ನೇ ಮುಂದುವರೆಸಲು ತೀರ್ಮಾನಿಸಲಾಗಿದೆ. ಇಬ್ರಾಹಿಂ ಅವರೇ ರಾಜ್ಯಾಧ್ಯಕ್ಷರಾಗಿ ಮುಂದುವರೆಯುತ್ತಾರೆ.

ಒಪ್ಪತ್ತಿನಿ ಕೂಳಿಗಾಗಿ ನಿಮ್ಮ ಮುಂದಿನ ಪೀಳಿಗೆ ಜೀವನ ಹಾಳು ಮಾಡಬೇಡಿ. ಮೂರು ಪಕ್ಷಗಳು ಹಣ ಹಂಚಿವೆ, ಇವತ್ತಿನ ವ್ಯವಸ್ಥೆಯಲ್ಲಿ ನಾವೂ ಪಾಲುದಾರರಾಗಿದ್ದೇವೆ. ಹೀಗಾಗಿಯೇ ಇನ್ನ ಐದು ವರ್ಷಗಳಲ್ಲಿ ವಿಷಯಾಧರಿತ ಹೋರಾಟ ಮಾಡಿ, ಹಣ ಹಂಚಬೇಡಿ ಎಂದು ಹೇಳಿದ್ದೇನೆ. ಈ ಚುನಾವಣೆ ಸಾಕಷ್ಟು ಅನುಭವ ಪಾಠ ಕಲಿಸಿದೆ. ಹೇಗೆ ಲೆಕ್ಕಾಚಾರ ಹಾಕಿದರೂ 200 ಯೂನಿಟ್‌ ಕರೆಂಟ್ ಕೊಡಲು 24 ಸಾವಿರ ಕೋಟಿ ಬೇಕು, ನಾನಂತೂ ಈ ವಿಷಯದಲ್ಲಿ ತಾರ್ಕಿಕ ಅಂತ್ಯಕ್ಕೆ ಕೊಂಡೊಯ್ಯುತ್ತೇನೆ ಎಂದು ಸ್ಪಷ್ಟಪಡಿಸಿದರು.