ಖಾತೆ ಬದಲಾವಣೆ ಅಸಮಾಧಾನ; ಸಂಪುಟ ಸಭೆಗೆ ಗೈರಾದ ಎಂಟಿಬಿ, ಗೋಪಾಲಯ್ಯ,ಸುಧಾಕರ್​​

ಬೆಂಗಳೂರು (ಜ. 21): ಖಾತೆ ಹಂಚಿಕೆ ಬದಲಾವಣೆಯಿಂದ ಅಸಮಾಧಾನಿತಗೊಂಡಿರುವ ಸಚಿವರು ಸಂಪುಟ ಸಭೆಗೆ ಗೈರಾಗುವ ಮೂಲಕ ಮುಖ್ಯಮಂತ್ರಿ ಬಿಎಸ್​ ಯಡಿಯೂರಪ್ಪ ವಿರುದ್ಧದ ಮುನಿಸು ಮುಂದುವರೆಸಿದ್ದಾರೆ. ಸಂಪುಟ ವಿಸ್ತರಣೆ ಬಳಿಕ ಹಾಲಿ ಸಚಿವರ ಖಾತೆಯಲ್ಲೂ ಕೂಡ ಬದಲಾವಣೆ ಮಾಡಿರುವ ಹಿನ್ನಲೆ ಆಕ್ರೋಶ ವ್ಯಕ್ತವಾಗಿದೆ. ಮುಖ್ಯಮಂತ್ರಿ  ಬಿಎಸ್​ ಯಡಿಯೂರಪ್ಪ ಅವರ ಕ್ರಮಕ್ಕೆ ಸಚಿವ ಗೋಪಾಲಯ್ಯ ಹಾಗೂ ಸುಧಾಕರ್​, ಎಂಟಿಬಿ ನಾಗರಾಜ್, ಮಾಧುಸ್ವಾಮಿ ಬಹಿರಂಗವಾಗಿಯೇ ​ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಖಾತೆ ಬದಲಾವಣೆ ಹಿನ್ನಲೆ ಅಸಮಾಧಾನಿತದ ಸಚಿವರಾದ ಗೋಪಾಲಯ್ಯ ಹಾಗೂ ಎಂಟಿಬಿ ನಾಗರಾಜ್​ ಅವರನ್ನು ಒಂದೂವರೆ ಗಂಟೆಗಳ  ಮುಖ್ಯಮಂತ್ರಿ ಸಮಾಧಾನ ಮಾಡಿ, ಓಲೈಸಿದರು. ಆದರೂ ಕೂಡ ಮುನಿಸು ಶಮನವಾಗದ ಹಿನ್ನಲೆ ಅವರು ಸಂಪುಟ ಸಭೆಗೆ ಗೋಪಾಲಯ್ಯ, ಎಂಟಿಬಿ ನಾಗರಾಜ್​, ಕೆ ಸುಧಾಕರ್​​ ಗೈರಾಗುವ ಮೂಲಕ ಮತ್ತೆ ಸಿಎಂ ವಿರುದ್ಧ ಪರೋಕ್ಷ ಬಂಡಾಯ ನಡೆಸಿದ್ದಾರೆ. 

ಇಂದು ಸಂಜೆ4.30ಕ್ಕೆ ವಿಧಾನಸೌಧದಲ್ಲಿ ಸಿಎಂ ಬಿಎಸ್​ ಯಡಿಯೂರಪ್ಪ ನೇತೃತ್ವದಲ್ಲಿ ಸಂಪುಟ ಸಭೆ ನಡೆಸಲಾಗಿದೆ. ಸಭೆಯಲ್ಲಿ ನೂತನ ಸಚಿವರಾದ ಅರವಿಂದ್​ ಲಿಂಬಾವಳಿ, ಸಿಪಿ ಯೋಗೇಶ್ವರ್​ ಸೇರಿದಂತೆ ನೂತನ ಸಚಿವರು ಸಭೆಯಲ್ಲಿ ಹಾಜರಿದ್ದಾರೆ. ಆದರೆ ಎಂಟಿಬಿ ನಾಗರಾಜ್​, ಗೋಪಾಲಯ್ಯ, ಸುಧಾಕರ್​ ಗೈರಾಗುವ ಮೂಲಕ ಮತ್ತೆ ತಾವು ಕೇಳಿದ ಖಾತೆಯನ್ನೇ ಮತ್ತೆ ನೀಡಬೇಕು ಎಂದು ಪಟ್ಟು ಹಿಡಿದಿದ್ದಾರೆ.



ಈ ಹಿನ್ನಲೆ ಸಿಎಂ ಎಂಟಿಬಿ ನಾಗರಾಜ್ ಹಾಗೂ ಗೋಪಾಲಯ್ಯ ಗೆ ದೂರವಾಣಿ ಕರೆ ಮೂಲಕ ಸಚಿವ ಸಭೆಗೆ ಬರುವಂತೆ ಸೂಚನೆ ನೀಡಿದರು. ಈ ಹಿನ್ನಲೆ ಅಶೋಕ್​ ಸಂಪುಟ ಸಭೆಯಿಂದ ಹೊರಬಂದು ಫೋನ್ ಮೂಲಕ ಅಶೋಕ್ ಸಂಧಾನ ನಡೆಸಿದರು. ನನ್ನ ಮಾತಿಗೆ ಬೆಲೆ ಕೊಟ್ಟು ಸಭೆಗೆ ಬನ್ನಿ. ಮುಂದೆ ಕುಳಿತು ಎಲ್ಲವನ್ನೂ ಮಾತನಾಡೋಣ
ಸಭೆಯಲ್ಲಿ ಸಿಎಂ ನಿಮ್ಮನ್ನು ಕೇಳುತ್ತಿದ್ದಾರೆ. ಸಚಿವ ಸಂಪುಟ‌ ಸಭೆಗೆ ಗೈರಾದರೆ ಏನು ಸಂದೇಶ ಹೋಗುತ್ತದೆ . ನೀವು ಈಗ ಸಭೆಗೆ ಬನ್ನಿ, ಆಮೇಲೆ ಎಲ್ಲ ಮಾತಾಡುವ ಎಂದು ತಿಳಿಸಿದರು ಎಂದು ಮೂಲಗಳು ವರದಿ ಮಾಡಿವೆ.