ಕಾವೇರಿ ನದಿಯ ಹೂಳೆತ್ತಿದ ಬಳಿಕವೂ ಕೊಡಗಿನಲ್ಲಿ ಪ್ರವಾಹ; ಹೂಳೆತ್ತಲು ವ್ಯಯಿಸಿದ 88 ಲಕ್ಷ ಹಣ ವ್ಯರ್ಥವಾಯಿತೇ?

ಕಾವೇರಿ ನದಿಯಲ್ಲಿ ಹೂಳು ತೆಗೆಯುವುದೇ ಅವೈಜ್ಞಾನಿಕ. ಮಳೆ ಬಂದಾಗ ಬರೋಬ್ಬರಿ 40 ರಿಂದ 50 ಸಾವಿರ ಕ್ಯುಸೆಕ್ ನೀರು ನದಿಯಲ್ಲಿ ಹರಿಯುತ್ತದೆ. ಸದ್ಯ ಕಾಮಗಾರಿ ಮಾಡಿ 400 ರಿಂದ 500 ಲೋಡ್ ಮಣ್ಣು ತೆಗೆದಿರಬಹುದು. ಇದರಿಂದ ಈ ಬಾರಿ ಪ್ರವಾಹದ ಪ್ರಮಾಣ ತಗ್ಗಿದೆ ಎನ್ನೋದು ಮೂರ್ಖತನ.

news18-kannada
Updated:August 20, 2020, 11:08 AM IST
ಕಾವೇರಿ ನದಿಯ ಹೂಳೆತ್ತಿದ ಬಳಿಕವೂ ಕೊಡಗಿನಲ್ಲಿ ಪ್ರವಾಹ; ಹೂಳೆತ್ತಲು ವ್ಯಯಿಸಿದ 88 ಲಕ್ಷ ಹಣ ವ್ಯರ್ಥವಾಯಿತೇ?
ಸಾಂದರ್ಭಿಕ ಚಿತ್ರ
  • Share this:
ಕೊಡಗು(ಆ.20): ಎರಡು ವರ್ಷಗಳಿಂದ ನಿರಂತರವಾಗಿ ಪ್ರವಾಹ ಎದುರಿಸಿದ್ದ ಸಂತ್ರಸ್ತರು, ಕಾವೇರಿ ನದಿಯ ಹೂಳು ತೆಗೆದರೆ ಪ್ರವಾಹದಿಂದ ತಪ್ಪಿಸಿಕೊಳ್ಳಬಹುದೆಂದು ಭಾವಿಸಿ ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಿದ್ದರು. ಜನರ ಒತ್ತಾಸೆಯಂತೆ ಕೊಡಗು ಜಿಲ್ಲಾಡಳಿತ 88 ಲಕ್ಷ ವೆಚ್ಚದಲ್ಲಿ ಮೇ ತಿಂಗಳಲ್ಲಿ ಹೂಳು ತೆಗೆದಿತ್ತು. ಆದರೆ ಮೂರನೇ ವರ್ಷವೂ ಸಹ ಪ್ರವಾಹ ತಪ್ಪಲಿಲ್ಲ. ಹೀಗಾಗಿ ಹೂಳೆತ್ತುವುದಕ್ಕೆ ಬಳಸಿದ್ದ 88 ಲಕ್ಷ ಪ್ರವಾಹದಲ್ಲಿ ತೇಲಿಹೋಯ್ತಾ ಎನ್ನೋ ಅನುಮಾನ ಎದುರಾಗಿದೆ. 

ಕೊಡಗು ಜಿಲ್ಲೆ ಸತತ ಮೂರು ವರ್ಷಗಳಿಂದಲೂ ಪ್ರವಾಹ ಮತ್ತು ಭೂಕುಸಿತವನ್ನು ಎದುರಿಸಿದೆ. 2018 ಮತ್ತು 2019 ರಲ್ಲಿ ಪ್ರವಾಹದ ಭೀಕರತೆಯಿಂದ ನಲುಗಿದ್ದ ಕುಶಾಲನಗರದ ಹಲವು ಬಡಾವಣೆಗಳ ಜನರು ಕಾವೇರಿ ನದಿಯಲ್ಲಿ ತುಂಬಿರುವ ಹೂಳು ತೆಗೆದರೆ ಪ್ರವಾಹದಿಂದ ನಮ್ಮನೆಲ್ಲಾ ರಕ್ಷಿಸಬಹುದೆಂದು ಜಿಲ್ಲಾಡಳಿತಕ್ಕೆ ಸಂತ್ರಸ್ತರ ವೇದಿಕೆ ಹೆಸರಿನಲ್ಲಿ ಮನವಿ ಸಲ್ಲಿಸಿದ್ದರು. ಜಿಲ್ಲಾಡಳಿತ ಕಾವೇರಿ ನೀರಾವರಿ ನಿಗಮದಿಂದ 88 ಲಕ್ಷ ವೆಚ್ಚದಲ್ಲಿ ಕುಶಾಲನಗರ ಭಾಗದಲ್ಲಿ ಹೂಳು ತೆಗೆಯಲು ಅನುಮೋದನೆ ನೀಡಿತ್ತು. ಸರ್ವೇ ಮಾಡಿದ್ದ ಅಧಿಕಾರಿಗಳು ಮೇ ತಿಂಗಳ ಕೊನೆಯಲ್ಲಿ ಕಾವೇರಿ ನದಿಯಲ್ಲಿ ಹೂಳು ತೆಗೆಯಲು ಆರಂಭಿಸಿದ್ದರು.

ಜೂನ್ ತಿಂಗಳಲ್ಲಿ ಮಳೆ ಶುರುವಾಗಿದ್ದರಿಂದ ಕಾವೇರಿ ನದಿ ತುಂಬಿ ಹರಿಯಲು ಆರಂಭವಾಗಿತ್ತು. ಹೀಗಾಗಿ ಹೂಳೆತ್ತುವ ಕಾಮಗಾರಿ ಪೂರ್ಣಗೊಳ್ಳಲೇ ಇಲ್ಲ. ಹೀಗೆ ದಿನ ಕಳೆಯುತ್ತಲೇ ಆಗಸ್ಟ್ ತಿಂಗಳಲ್ಲಿ ಸುರಿದ ಭಾರೀ ಮಳೆಗೆ ಕಾವೇರಿ ನದಿ ಉಕ್ಕಿ ಹರಿದು, ಪ್ರವಾಹ ಸೃಷ್ಟಿಯಾಗಿತ್ತು. ಕುಶಾಲನಗರ ಭಾಗದ ರಸೂಲ್ ಲೇಔಟ್, ಸಾಯಿ, ಬಸಪ್ಪ ಮತ್ತು ಕುವೆಂಪು ಬಡಾವಣೆ ಸೇರಿದಂತೆ 10 ಕ್ಕೂ ಬಡಾವಣೆಗಳು ಜಲಾವೃತವಾಗಿದ್ದವು. ಆದರೆ ಕಳೆದ ಬಾರಿ ಬಡಾವಣೆಗಳಲ್ಲಿ ತುಂಬಿದ್ದ ನೀರಿಗಿಂತ 4 ಅಡಿ ನೀರು ಕಡಿಮೆಯಿತ್ತು. ಇದು ನದಿಯಲ್ಲಿ ತುಂಬಿದ್ದ ಹೂಳು ತೆಗೆದಿದ್ದರಿಂದ ಆಗಿರುವ ಅನುಕೂಲ. ಇಲ್ಲದಿದ್ದರೆ, ಕಳೆದ ಬಾರಿಯೇ ಆಗಿದ್ದಷ್ಟೇ ಸಮಸ್ಯೆ ಈ ಬಾರೀಯೂ ಆಗುತ್ತಿತ್ತು. ಆದರೆ ಸಹಿಸದ ಕೆಲವರು ನಮ್ಮ ವಿರುದ್ಧವೇ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು ಎನ್ನುತ್ತಾರೆ ಸಂತ್ರಸ್ತರ ವೇದಿಕೆ ಮುಖಂಡರು.

Petrol Price: ಮತ್ತೆ ಪೆಟ್ರೋಲ್ ಬೆಲೆಯಲ್ಲಿ ಏರಿಕೆ; ವಿವಿಧ ನಗರಗಳಲ್ಲಿನ ಬೆಲೆ ಎಷ್ಟು?

ಕಾವೇರಿ ನದಿಯಲ್ಲಿ ಹೂಳು ತೆಗೆಯುವುದೇ ಅವೈಜ್ಞಾನಿಕ. ಮಳೆ ಬಂದಾಗ ಬರೋಬ್ಬರಿ 40 ರಿಂದ 50 ಸಾವಿರ ಕ್ಯುಸೆಕ್ ನೀರು ನದಿಯಲ್ಲಿ ಹರಿಯುತ್ತದೆ. ಸದ್ಯ ಕಾಮಗಾರಿ ಮಾಡಿ 400 ರಿಂದ 500 ಲೋಡ್ ಮಣ್ಣು ತೆಗೆದಿರಬಹುದು. ಇದರಿಂದ ಈ ಬಾರಿ ಪ್ರವಾಹದ ಪ್ರಮಾಣ ತಗ್ಗಿದೆ ಎನ್ನೋದು ಮೂರ್ಖತನ. ಈ ಬಾರಿ ಮಳೆ ಕಡಿಮೆಯಾಗಿದ್ದು, ಕುಶಾಲನಗರ ಭಾಗದಲ್ಲಿ ಅಷ್ಟೇ ಅಲ್ಲ. ಸಿದ್ದಾಪುರ, ಬಲಮುರಿ ಎಲ್ಲೆಡೆಯೂ ಪ್ರವಾಹ ಕಡಿಮೆಯೇ ಇತ್ತು. ಇವರು ತೆಗೆದಿರುವ ಗಿಡಗಂಟಿಗಳಿಂದ ಯಾವುದೇ ಲಾಭವಾಗಿಲ್ಲ. ಕುಶಾಲನಗರ ಸುತ್ತಮುತ್ತಲಿನ 10 ಕ್ಕೂ ಹೆಚ್ಚು ನದಿ ಬಫರ್ ಝೋನ್ ಪ್ರದೇಶಗಳಿಗೆ ಮಣ್ಣು ಮುಚ್ಚಿ ಲೇಔಟ್ ನಿರ್ಮಿಸಲಾಗಿದೆ. ಮತ್ತೊಂದೆಡೆ ಎಲ್ಲಿಯೂ ಚೆಕ್ ಡ್ಯಾಂ ಅಥವಾ ಬ್ಲಡ್ ಡ್ಯಾಂ ಗಳನ್ನೇ ನಿರ್ಮಿಸದೇ ನದಿಯಲ್ಲಿ ಹೂಳು ತೆಗೆಯುತ್ತೇವೆ ಎಂದು 88 ಲಕ್ಷ ರೂಪಾಯಿ ಸಾರ್ವಜನಿಕರ ತೆರಿಗೆಯ ಹಣವನ್ನು ಪೋಲು ಮಾಡಲಾಗಿದೆ ಎಂದು ಸ್ಥಳೀಯರಾದ ವಿ ಪಿ ಶಶಿಧರ್ ಮತ್ತು ಕುಶಾಲನಗರ ಅಭಿವೃದ್ಧಿ ಪ್ರಾಧಿಕಾರದ ಕಾನೂನು ಸಲಹೆಗಾರ ನಾಗೇಂದ್ರ ಬಾಬು ಆರೋಪಿಸಿದ್ದಾರೆ.

ಒಟ್ಟಿನಲ್ಲಿ ಕಳೆದ ಮೂರು ವರ್ಷಗಳಿಂದಲೂ ಆಗಸ್ಟ್ ತಿಂಗಳಲ್ಲಿ ಸುರಿಯುತ್ತಿರುವ ಭಾರೀ ಮಳೆಯಿಂದ ಉಕ್ಕಿ ಹರಿಯುತ್ತಿರುವ ಪ್ರವಾಹವನ್ನು ತಡೆಯಲು ನದಿಯ ಹೂಳು ತೆಗೆಯುವ ಹೆಸರಿನಲ್ಲಿ 88 ಲಕ್ಷ ಹಣ ಪೋಲಾಯಿತೇ ಎನ್ನುವ ಅನುಮಾನ ಮೂಡಿದೆ.
Published by: Latha CG
First published: August 20, 2020, 11:08 AM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories

corona virus btn
corona virus btn
Loading