Ragini Dwivedi: ರಾಗಿಣಿ ದ್ವಿವೇದಿ ನಿವಾಸದ ಶೋಧ ಕಾರ್ಯ ಮುಕ್ತಾಯ; ಸಿಸಿಬಿ ಕಚೇರಿಗೆ ತೆರಳಿದ ನಟಿ

ಬೆಂಗಳೂರು (ಸೆಪ್ಟೆಂಬರ್​ 4): ಸ್ಯಾಂಡಲ್​ವುಡ್​ನಲ್ಲಿ ಡ್ರಗ್ಸ್ ವಿಚಾರ ಹೊತ್ತುರಿಯುತ್ತಿದೆ. ಸಾಕಷ್ಟು ನಟ-ನಟಿಯರ ಹೆಸರು ಕೇಳಿ ಬರುತ್ತಿದ್ದು, ಎಲ್ಲರಿಗೂ ಸಿಸಿಬಿ ಪೊಲೀಸರು ನೋಟಿಸ್ ನೀಡುತ್ತಿದ್ದಾರೆ. ಇನ್ನು, ಡ್ರಗ್ಸ್​ ಜಾಲದ ನಂಟು ಹೊಂದುರು ಆರೋಪ ಇರುವ ಹಿನ್ನೆಲೆಯಲ್ಲಿ ಸಿಸಿಬಿ ಪೊಲೀಸರು ನಟಿ ರಾಗಿಣಿ ದ್ವಿವೇಣಿಗೆ ನೋಟಿಸ್​ ನೀಡಿದ್ದರು. ಆದರೆ, ರಾಗಿಣಿ ವಿಚಾರಣೆಗೆ ಹಾಜರಾಗದ ಹಿನ್ನೆಲೆಯಲ್ಲಿ ಸಿಸಿಬಿ ಪೊಲೀಸ್​ ಇಲಾಖೆಯ ನಾರ್ಕೋಟಿಸ್​ ವಿಭಾಗದ ಅಧಿಕಾರಿಗಳು ಇಂದು ಮುಂಜಾನೆಯೇ ಅವರ ಮನೆಯ ಮೇಲೆ ದಾಳಿ ನಡೆಸಿದ್ದಾರೆ. 3 ಗಂಟೆಗೂ ಅಧಿಕ ಕಾಲ ಶೋಧ ಕಾರ್ಯ ನಡೆಸಿದ್ದು, ಈಗ ರಾಗಿಣಿಯನ್ನು ಸಿಸಿಬಿ ಕಚೇರಿಗೆ ಕರೆದೊಯ್ಯಲು ಮುಂದಾಗಿದ್ದಾರೆ. 

ನಟಿ ರಾಗಿಣಿ ಅನನ್ಯ ಅಪಾರ್ಟ್​ಮೆಂಟ್​ನಲ್ಲಿ  ಎರಡು ಫ್ಲ್ಯಾಟ್‌ ಹೊಂದಿದ್ದಾರೆ. ವಾಸಕ್ಕೆ ಒಂದು ಫ್ಲ್ಯಾಟ್‌  ಇದ್ದರೆ, ಅದಕ್ಕೆ ತಾಗಿಕೊಂಡು ಮತ್ತೊಂದು ಫ್ಲ್ಯಾಟ್‌ ಇದೆ.  ಎರಡು ಫ್ಲ್ಯಾಟ್​​ನಲ್ಲೂ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಇನ್ಸ್ಪೆಕ್ಟರ್​ ಅಂಜುಮಾಲ ಸೇರಿದಂತೆ ಇಬ್ಬರು ಮಹಿಳಾ ಇನ್ಸ್​ಪೆಕ್ಟರ್​ಗಳು ರಾಗಿಣಿ ವಾಸದ ಕೊಠಡಿಯಲ್ಲಿ ಪರಿಶೀಲನೆ ಮಾಡಿದ್ದಾರೆ. ಈಗಾಗಲೇ ಎರಡು ಬ್ಯಾಗ್​ಗಳಲ್ಲಿ ಕೆಲ ದಾಖಲೆಗಳನ್ನು ಅಧಿಕಾರಿಗಳು ಪಡೆದುಕೊಂಡಿದ್ದಾರೆ.

ಇನ್ನು, ರಾಗಿಣಿ ಇಂದಿರಾನಗರದ ಮನೆ ಮೇಲೂ ಸಿಸಿಬಿ ದಾಳಿ ನಡೆಸಿದೆ. ಅಲ್ಲಿಯೂ ಪರಿಶೀಲನೆ ನಡೆದಿದೆ. ಈಗ ವಿಚಾರಣೆ ಪೂರ್ಣಗೊಳ್ಳುವ ಹಂತಕ್ಕೆ ಬಂದು ನಿಂತಿದ್ದು, ಶೀಘ್ರವೇ ಅವರು ಸಿಸಿಬಿ ಕಚೇರಿಗೆ ತೆರಳಲಿದ್ದಾರೆ.

ವಶಕ್ಕೆ ಪಡೆಯುತ್ತಿಲ್ಲ:

ರಾಗಿಣಿಯ ನಾಲ್ಕು ಮೊಬೈಲ್ ಜಪ್ತಿ ಮಾಡಲಾಗಿದೆ. ಮನೆಯಲ್ಲಿ ಯಾವುದೆ ಡ್ರಗ್ ಪತ್ತೆ ಯಾಗಿಲ್ಲ. ಹೀಗಾಗಿ ರಾಗಿಣಿ ಅವರನ್ನು ವಶಕ್ಕೆ ಪಡೆಯುತ್ತಿಲ್ಲ ಎಂದು ಸಿಸಿಬಿ ಡಿಸಿಪಿ ರವಿಕುಮಾರ್ ಸ್ಟಷ್ಟನೆ ನೀಡಿದ್ದಾರೆ.

ಡ್ರಗ್​ ಜಾಲದಲ್ಲಿ  ಬಂಧಿತನಾಗಿರುವ ರವಿಶಂಕರ್‌ ಮೂಲತಃ ಆರ್‌ಟಿಓ ಅಧಿಕಾರಿ. ಈತನ ತಂದೆ ಕೆಲಸದಲ್ಲಿರುವಾಗಲೇ ಮೃತಪಟ್ಟ ಕಾರಣ ಈತನಿಗೆ ಆ ಕೆಲಸ ಸಿಕ್ಕಿತ್ತು. ಈತನ ತಿಂಗಳ ಸಂಬಳ 30 ರಿಂದ 35 ಸಾವಿರ ರೂಪಾಯಿ. ಆದರೆ, ಈತ ಪೊಲೀಸ್‌ ವಿಚಾರಣೆಯ ವೇಳೆ, "ನಾನು ರಾಗಿಣಿ ಜೊತೆ ಲಿವ್ ಇನ್‌ ಸಂಬಂಧದಲ್ಲಿದ್ದೇನೆ. ಆಕೆಗೆ ಒಂದು ದಿನಕ್ಕೆ 1 ಲಕ್ಷ ಖರ್ಚು ಮಾಡುತ್ತಿದ್ದೇನೆ" ಎಂದು ತಿಳಿಸಿದ್ದ.
ಈತ ನೀಡಿದ ಮಾಹಿತಿಗೇ ಇದೀಗ ಪೊಲೀಸರು ದಂಗಾಗಿದ್ದಾರೆ. ರವಿಶಂಕರ್ ಗೆ ಬರುವ ಸಂಬಳದಲ್ಲಿ ಇಷ್ಟು ಖರ್ಚನ್ನು ಹೇಗೆ ನಿಭಾಯಿಸುತ್ತಿದ್ದ? ಇದೆಲ್ಲಾ ಹೇಗೆ ಸಾಧ್ಯವಾಯಿತು? ಎಂಬ ಪ್ರಶ್ನೆಯೇ ಪೊಲೀಸರಿಗೆ ದೊಡ್ಡದಾಗಿ ಕಾಡತೊಡಗಿದೆ. ಹೀಗಾಗಿ ಈ ಎಲ್ಲಾ ಅಂಶಗಳನ್ನು ಇಟ್ಟುಕೊಂಡು ಸಿಸಿಬಿ ಅಧಿಕಾರಿಗಳು ನಟಿ ರಾಗಿಣಿಯನ್ನು ವಿಚಾರಣೆಗೆ ಕರೆದಿದ್ದಾರೆ ಎನ್ನಲಾಗುತ್ತಿದೆ.