ಟಿಕ್​ಟಾಕ್​ ಕಾರಣಕ್ಕೆ ಹೆಂಡತಿಗೆ ಚಾಕುವಿನಿಂದ ಇರಿದ ಗಂಡ; ಮೈಸೂರಿನಲ್ಲೊಂದು ವಿಚಿತ್ರ ಪ್ರಕರಣ

ಮೈಸೂರು (ಫೆ. 1): ಕೆಲವೊಮ್ಮೆ ಸಣ್ಣಪುಟ್ಟ ವಿಷಯಗಳಿಗೂ ಗಂಡ-ಹೆಂಡತಿ ನಡುವೆ ಮನಸ್ತಾಪಗಳು ಮೂಡುತ್ತವೆ. ಮೈಸೂರಿನಲ್ಲೂ ಇದೇ ರೀತಿಯ ಘಟನೆಯೊಂದು ನಡೆದಿದ್ದು, ಟಿಕ್​ಟಾಕ್ ಕಾರಣಕ್ಕೆ ಹೆಂಡತಿಯ ಹೊಟ್ಟೆಗೆ ಚಾಕುವಿನಿಂದ ಇರಿದ ಗಂಡನನ್ನು ಪೊಲೀಸರು ಬಂಧಿಸಿದ್ದಾರೆ. ಆ ಮಹಿಳೆಗೆ ತೀವ್ರ ಗಾಯವಾಗಿದ್ದು, ಆಸ್ಪತ್ರೆಗೆ ಸೇರಿಸಲಾಗಿದೆ.

ಗಂಡನನ್ನು ಬಿಟ್ಟು ಬೇರೊಬ್ಬನಿಂದಿಗೆ ಸಂಸಾರ ಮಾಡುತ್ತಿದ್ದ ಸವಿತಾ ಎಂಬ ಮೈಸೂರಿನ ಪಿರಿಯಾಪಟ್ಟಣದ ಮಹಿಳೆ ಗಾಯಗೊಂಡಾಕೆ. ಟಿಕ್​​ಟಾಕ್ ಮಾಡಿ ಗಂಡನನ್ನು ಅಣಕಿಸುತ್ತಿದ್ದ ಸವಿತಾ ಗಂಡನನ್ನು ಗೇಲಿ ಮಾಡುವ ವಿಡಿಯೋ ಮಾಡಿ ಬಿಡುತ್ತಿದ್ದಳು. ಇದರಿಂದ ಕೋಪಗೊಂಡಿದ್ದ ಗಂಡ ಶ್ರೀನಿವಾಸ್​ ಅಲಿಯಾಸ್​ ಆಟೋ ಸೀನ ಆಕೆಯ ಹೊಟ್ಟೆಗೆ ಚಾಕುವಿನಿಂದ ಇರಿದಿದ್ದಾನೆ.



ಇದನ್ನೂ ಓದಿ: ಬೆಂಗಳೂರಿನ ಪೆಟ್ರೋಲ್​ ಬಂಕ್​ನಲ್ಲಿ ನಡುರಾತ್ರಿ ಹೊತ್ತಿ ಉರಿದ ಬಸ್​; ತಪ್ಪಿದ ಭಾರೀ ಅನಾಹುತ

10 ವರ್ಷಗಳ ಹಿಂದೆ ಮದುವೆಯಾಗಿದ್ದ ಸವಿತಾ ಮತ್ತು ಶ್ರೀನಿವಾಸ್​ ನಡುವೆ ವೈಮನಸ್ಸು ಉಂಟಾಗಿತ್ತು. ಇದರಿಂದ ಗಂಡ ಮತ್ತು ಮಕ್ಕಳನ್ನು ಬಿಟ್ಟು ಸವಿತಾ ಬೇರೊಬ್ಬನೊಂದಿಗೆ ವಾಸವಾಗಿದ್ದಳು. ಟಿಕ್ ಟಾಕ್ ಮೂಲಕ ತನ್ನನ್ನು ಅಣಕಿಸುತ್ತಿದ್ದ ಹೆಂಡತಿಯ ಮೇಲೆ ಶ್ರೀನಿವಾಸ್ ಕೋಪಗೊಂಡಿದ್ದ.



ಮಕ್ಕಳ ಹುಟ್ಟುಹಬ್ಬಕ್ಕೆಂದು ಮನೆಗೆ ಬಂದಿದ್ದ ಸವಿತಾಳಿಗೆ ಚಾಕುವಿನಿಂದ ಇರಿದಿರುವ ಗಂಡ ಶ್ರೀನಿವಾಸ್​ ವಿರುದ್ಧ ಪಿರಿಯಾಪಟ್ಟಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆತ ಈಗ ಪೊಲೀಸರ ವಶದಲ್ಲಿದ್ದಾನೆ. ಸವಿತಾಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಇದನ್ನೂ ಓದಿ: ಬೆಂಗಳೂರಿನ ಜೈಲೊಳಗೇ ಕುಳಿತು ಟಿಕ್​ಟಾಕ್; ಪ್ರೇಯಸಿಯ ಫೋಟೋ ಹಾಕಿ ವಿಡಿಯೋ ಮಾಡಿದ ರೌಡಿ!