Bangalore Crime: ಎಕ್ಸ್ ರೇ ಯಂತ್ರಗಳ ನೆಪದಲ್ಲಿ ಬೆಂಗಳೂರಿಗೆ ಲಕ್ಷಾಂತರ ರೂ. ಮೌಲ್ಯದ ವಿದೇಶಿ ಸಿಗರೇಟ್ ಸಾಗಾಟ

ಬೆಂಗಳೂರು (ಅ. 14): ಎಕ್ಸ್ ರೇ ಯಂತ್ರಗಳು ಎಂದು ಹೇಳಿ ವಿದೇಶದಿಂದ ಅಕ್ರಮವಾಗಿ ಸಾಗಾಟ ಮಾಡುತ್ತಿದ್ದ ಸಿಗರೇಟ್ ಬಾಕ್ಸ್​ಗಳನ್ನು ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕಸ್ಟಮ್ಸ್ ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ. ಬೆಂಗಳೂರು ಏರ್​ಪೋರ್ಟ್​ನಲ್ಲಿ ಬಾಕ್ಸ್​ಗಟ್ಟಲೆ ವಿದೇಶಿ ಸಿಗರೇಟ್​ಗಳು ಪತ್ತೆಯಾಗಿದ್ದು, ಸಿಗರೇಟ್ ಸಾಗಾಟದ ಜಾಲದ ಬಗ್ಗೆ ಆಧಿಕಾರಿಗಳು ತನಿಖೆ ಕೈಗೊಂಡಿದ್ದಾರೆ. ಶಾರ್ಜಾದಿಂದ ಬೆಂಗಳೂರಿಗೆ ಬಂದ ವಿಮಾನದಲ್ಲಿ ಸುಮಾರು ಎಂಟು ಬೃಹತ್ ಗಾತ್ರದ ಬಾಕ್ಸ್​ಗಳು ಆಗಮಿಸಿದ್ದವು. ಮೊದಲಿಗೆ ಅವುಗಳನ್ನು ಎಕ್ಸ್ ರೇ ಮಾಡುವ ಯಂತ್ರಗಳು ಎಂದು ಹೇಳಲಾಗಿದ್ದು, ಈ ಬಗ್ಗೆ ಅನುಮಾನಗೊಂಡ ಕಸ್ಟಮ್ಸ್ ಅಧಿಕಾರಿಗಳು ಬಾಕ್ಸ್ ಗಳ ಪರಿಶೀಲನೆ ನಡೆಸಿದಾಗ ಅಸಲಿ ಸತ್ಯ ಬೆಳಕಿಗೆ ಬಂದಿದೆ.

ಶಾರ್ಜಾದಿಂದ ಎಂಟು ಬಾಕ್ಸ್ ಗಳಲ್ಲಿ ಅಕ್ರಮವಾಗಿ ವಿದೇಶಿ ಮೂಲದ ಸಿಗರೇಟ್ ಸರಬರಾಜು ಆಗುತ್ತಿರುವುದನ್ನು ಕಸ್ಟಮ್ಸ್​  ಅಧಿಕಾರಿಗಳು ಪರಿಶೀಲನೆ ನಡೆಸಿ ಜಪ್ತಿ ಮಾಡಿದ್ದಾರೆ. ಖಚಿತ ಮಾಹಿತಿ ಮೇರೆಗೆ ಏರ್ಪೋರ್ಟ್ ಕಸ್ಟಮ್ಸ್ ಅಧಿಕಾರಿಗಳು ದುಬಾರಿ ಬೆಲೆಯ ಲಕ್ಷಾಂತರ ಮೌಲ್ಯದ ಸಿಗರೇಟ್ ಗಳನ್ನ ವಶಕ್ಕೆ ಪಡೆದಿದ್ದಾರೆ. ಅಕ್ರಮವಾಗಿ ಸಾಗಿಸಲಾದ ಈ ಲಕ್ಷಾಂತರ ಮೌಲ್ಯದ ವಿದೇಶಿ ಸಿಗರೇಟುಗಳು ಯಾರಿಗೆ ಸೇರಬೇಕಿತ್ತು? ಎಲ್ಲಿಗೆ ರವಾನೆಯಾಗುತ್ತಿತ್ತು? ಎಂಬುದು ಇನ್ನೂ ನಿಗೂಢವಾಗಿದೆ. ಕಸ್ಟಮ್ಸ್​ ಅಧಿಕಾರಿಗಳು ಇದರ ಬಗ್ಗೆ ತನಿಖೆ ಆರಂಭಿಸಿದ್ದಾರೆ. ಶಾರ್ಜಾನಿಂದ ಬಂದ ವಿಮಾನದಲ್ಲೇ 8 ವಿದೇಶೀ ಸಿಗರೇಟ್​ಗಳ ಬೃಹತ್ ಬಾಕ್ಸ್ ಗಳು ಸಿಕ್ಕಿರುವುದು ಖಚಿತವಾಗಿದೆ.

ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ವಶಪಡಿಸಿಕೊಂಡಿರುವ ಈ ವಿದೇಶಿ ಸಿಗರೇಟ್ ನ ಮೌಲ್ಯ 23.97 ಲಕ್ಷ ಎನ್ನಲಾಗಿದ್ದು, 1,59,800 ಸಿಗರೇಟುಗಳು ಬಾಕ್ಸ್ ನಲ್ಲಿ ಇತ್ತು ಎನ್ನಲಾಗಿದೆ. ಸದ್ಯ ಬಾಕ್ಸ್​ಗಳನ್ನು ವಶಕ್ಕೆ ಪಡೆದ ಕಸ್ಟಮ್ಸ್ ಅಧಿಕಾರಿಗಳು ಅಕ್ರಮ ಸಿಗರೇಟ್ ಸಾಗಾಟ ಜಾಲದ ಪತ್ತೆಗಾಗಿ ತನಿಖೆ ಕೈಗೊಂಡಿದ್ದಾರೆ.