Tulu Nadu: ತುಳುನಾಡಲ್ಲಿ ಈಗ ಪತ್ತನಾಜೆ ಸಮಯ! ಸಮಾರಂಭಕ್ಕೆ ಬ್ರೇಕ್, ಕೃಷಿ ಕಾರ್ಯಕ್ಕೆ ಚಾಲನೆ

ತುಳು ಕ್ಯಾಲೆಂಡರ್ ಪ್ರಕಾರ ತುಳುನಾಡಿನ ಜನರಿಗೆ ಕೇವಲ ಎರಡೇ ಋತುಮಾನಗಳು. ಒಂದು ಬೇಸಿಗೆ ಕಾಲವಾದರೆ, ಇನ್ನೊಂದು ಮಳೆಗಾಲ. ಇಲ್ಲಿ ಚಳಿಗಾಲಕ್ಕೆ ಯಾವುದೇ ಮಹತ್ವವೂ ಇಲ್ಲ. ಈ ಎರಡು ಋತುಮಾನಗಳನ್ನು ವಿಂಗಡಿಸುವ ದಿನವೇ ಪತ್ತನಾಜೆ.

ತುಳುನಾಡಿನ ಸಾಂಪ್ರದಾಯಿಕ ಆಚರಣೆ

ತುಳುನಾಡಿನ ಸಾಂಪ್ರದಾಯಿಕ ಆಚರಣೆ

  • Share this:
ದಕ್ಷಿಣ ಕನ್ನಡ: ತನ್ನ ವಿಶಿಷ್ಟ ಆಚರಣೆಯ (Typical ritual) ಮೂಲಕ ಇಂದಿಗೂ ತನ್ನತನವನ್ನು ಉಳಿಸಿಕೊಂಡು ಬಂದವರು ತುಳುನಾಡಿನ (Tulu Nadu) ಜನ. ದೈವಗಳ ಬೀಡೆಂದೇ ಬಿಂಬಿತವಾಗಿರುವ ಕರಾವಳಿ (Coastal) ಜಿಲ್ಲೆಗಳ ಜನರ ಎಲ್ಲಾ ಆಚರಣೆಗಳೂ ಸಂಪ್ರದಾಯಗಳ (Tradition) ನೆಲೆಗಟ್ಟಿನಲ್ಲೇ ನಡೆಯುತ್ತದೆ. ಈ ಆಚರಣೆಗಳಲ್ಲಿ ಪತ್ತನಾಜೆ (Pattanaje) ಆಚರಣೆಯೂ ಒಂದು. ಈ ಆಚರಣೆಯ ಬಳಿಕ ತುಳುನಾಡಿನ ಎಲ್ಲೂ ಕೋಲ ತಂಬಿಲಗಳು ನಡೆಯುವುದಿಲ್ಲ, ಯಕ್ಷಗಾನ (Yakshagana) ಬಯಲಾಟಗಳ (Bayalata) ಕಲಾವಿದರು (Artists) ಗೆಜ್ಜೆ ಬಿಚ್ಚಿ ಇತರ ಕೆಲಸಗಳಿಗೆ ತೆರಳುತ್ತಾರೆ. ಪತ್ತನಾಜೆಯ ಬಳಿಕ ಎಲ್ಲಾ ತುಳುವ ತನ್ನ ಮನೋರಂಜನಾ ಹಾಗೂ ಆರಾಧನೆಗಳಿಗೆ ವಿಶ್ರಾಂತಿ ನೀಡಿ ಕೃಷಿ ಚಟುವಟಿಕೆಗಳಿಗೆ ತೊಡಗಿಸಿಕೊಳ್ಳುತ್ತಾನೆ.

ಕಾಲವನ್ನು ವಿಂಗಡಿಸುವ ಪತ್ತಿನಾಜೆ

ತುಳು ಕ್ಯಾಲೆಂಡರ್ ಪ್ರಕಾರ ತುಳುನಾಡಿನ ಜನರಿಗೆ ಕೇವಲ ಎರಡೇ ಋತುಮಾನಗಳು. ಒಂದು ಬೇಸಿಗೆ ಕಾಲವಾದರೆ, ಇನ್ನೊಂದು ಮಳೆಗಾಲ. ಇಲ್ಲಿ ಚಳಿಗಾಲಕ್ಕೆ  ಯಾವುದೇ ಮಹತ್ವವೂ ಇಲ್ಲ. ಈ ಎರಡು ಋತುಮಾನಗಳನ್ನು ವಿಂಗಡಿಸುವ ದಿನವೇ ಪತ್ತನಾಜೆ.

ಈ ಸಂದರ್ಭದಲ್ಲಿ ಎಲ್ಲಾ ಚಟುವಟಿಕೆಗಳಿಗೆ ಬ್ರೇಕ್

ಪ್ರತೀ ವರ್ಷದ ಮೇ ತಿಂಗಳ 24 ರಂದು ಈ ದಿನವನ್ನು ಆಚರಿಸಲಾಗುತ್ತಿದ್ದು, ಈ ದಿನದ ಬಳಿಕ ಮಳೆಗಾಲವು ಆರಂಭವಾಗುತ್ತದೆ ಎನ್ನುವ ಲೆಕ್ಕಾಚಾರ ತುಳುವರದು. ಪತ್ತನಾಜೆಯು ಕಳೆದು ಒಂದು ವಾರದ  ಬಳಿಕ ಮಳೆಗಾಲ ಕರಾವಳಿ ಜಿಲ್ಲೆಗಳಲ್ಲಿ ಆರಂಭಗೊಳ್ಳುವ ಹಿನ್ನಲೆಯಲ್ಲಿ ಈ ಭಾಗದ ಜನ ತನ್ನ ಎಲ್ಲಾ ಆಚರಣೆಗಳಿಗೆ , ಮನೋರಂಜನೆಗಳಿಗೆ ವಿಶ್ರಾಂತಿ ನೀಡುವ ದಿನವೂ ಇದಾಗಿದೆ

ಇದನ್ನೂ ಓದಿ: Viral Coconut Tree: ಒಂದೇ ಮರದಲ್ಲಿ ಭರ್ತಿ 2,000 ತೆಂಗಿನಕಾಯಿ! ವೈರಲ್ ಆಗ್ತಿದೆ ಕಾರವಾರದ ಕಲ್ಪವೃಕ್ಷ

ಯಾವುದೇ ದೈವಿಕ ಕಾರ್ಯ ನಡೆಯುವುದಿಲ್ಲ

ತುಳುನಾಡು ದೈವಗಳ ಬೀಡೆಂದೇ ಪ್ರಸಿದ್ಧಿ ಪಡೆದಿರುವುದರಿಂದ ಹಲವು ಪ್ರಕಾರದ ಭೂತಗಳ ಕೋಲಗಳು ಇಲ್ಲಿ ನಡೆಯುತ್ತದೆ. ಈ ಎಲ್ಲಾ ದೈವಗಳು ಪತ್ತನಾಜೆಯ ಬಳಿಕ ಘಟ್ಟಪ್ರದೇಶಕ್ಕೆ ತೆರಳುತ್ತದೆ ಎಂದು ನಂಬಿಕೊಂಡು ಬಂದಿರುವ ಇಲ್ಲಿನ ಜನ ಈ ದಿನದ ಬಳಿಕ ಯಾವುದೇ ದೈವಿಕ ಕಾರ್ಯಕ್ರಮಗಳನ್ನು ನಡೆಸುವುದಿಲ್ಲ.

ಮಳೆಗಾಲಕ್ಕೆ ಸಾಮಗ್ರಿ ಸಂಗ್ರಹಿಸುವ ಕಾರ್ಯ

ಅಲ್ಲದೆ ಈ ಸಮಯವನ್ನು ಕೃಷಿ ಚಟುವಟಿಕೆಗಳಿಗೆ ಮೀಸಲಿಡುವ ಈ ಜನ ಬರುವ ಮಳೆಗಾಲವನ್ನು ಯಾವುದೇ ತೊಂದರೆಯಿಲ್ಲದೆ ಎದುರಿಸುವ ನಿಟ್ಟಿನಲ್ಲಿ ಮಳೆಗಾಲಕ್ಕೆ ಬೇಕಾದ ತರಕಾರಿ, ಅಕ್ಕಿ ಸಾಮಾಗ್ರಿಗಳನ್ನು ಇದೇ ದಿನ ಮಾಳಿಗೆಯಲ್ಲಿ ಹಾಕಿ ಶೇಖರಿಸಿಡುವ ಕ್ರಮವೂ ಇಲ್ಲಿದೆ. ಅಲ್ಲದೆ ಮನೋರಂಜನೆಯನ್ನು ನೀಡುವ ಯಕ್ಷಗಾನ ಕಲಾವಿದರೂ ಈ ದಿನದ ಬಳಿಕ ತನ್ನ ಗೆಜ್ಜೆಯನ್ನು ಕಳಚಿಟ್ಟು ತಮ್ಮನ್ನೂ ಕೃಷಿ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳವುದು ಇಲ್ಲಿನ ಜನರ ವಾಡಿಕೆಯಾಗಿದೆ.

ಪತ್ತೆನಾಜೆ ದಿನದಂದು ವಿಶೇಷ ಪೂಜೆ

ಪತ್ತೆನಾಜೆ ದಿನದಂದು ಪ್ರತೀ ದೈವಸ್ಥಾನ ಹಾಗೂ ದೇವಸ್ಥಾನಗಳಲ್ಲಿ ವಿಶೇಷ ಪೂಜೆಯೂ ನಡೆಯುತ್ತದೆ. ಅಲ್ಲದೇ ದೈವಗಳನ್ನು ನಂಬಿಕೊಂಡು ಬರುವ ಎಲ್ಲಾ ಮನೆತನಗಳಲ್ಲೂ ಈ ದಿನ ತನ್ನ ಕುಲದೈವಗಳಿಗೆ ವಿಶೇಷ ಪ್ರಾರ್ಥನೆ ಸಲ್ಲಿಸಿದ ಬಳಿಕ ಈ ದೈವಗಳ ಗುಡಿಯನ್ನು ಮುಚ್ಚಲಾಗುವುದು . ಬಳಿಕ ಇದನ್ನು ಸಂಕ್ರಾತಿಯ ದಿನದಂದು ಮಾತ್ರ ತೆರೆದು, ದೀಪಾವಳಿಯಿಂದ ಮತ್ತೆ ಈ ದೈವಗಳನ್ನು ನಿರಂತರ ಆರಾಧಿಸುವ ಕ್ರಮವೂ ಇಲ್ಲಿದೆ.

ಇದನ್ನೂ ಓದಿ: Ramanagara: ತುಂಬಿ ಹರಿಯುತ್ತಿರುವ ಇಗ್ಗಲೂರಿನ HDD ಬ್ಯಾರೇಜ್, ಪ್ರವಾಸಿಗರ ಆಗಮನ

ಸಂಪ್ರದಾಯಗಳಲ್ಲೇ ತನ್ನ ಜೀವನಕ್ರಮಗಳನ್ನು ಅಳವಡಿಸಿಕೊಂಡು ಬಂದಿರುವ ತುಳುನಾಡಿನ ಜನ ಪ್ರಕೃತಿಯ ನಿಯಮದಂತೆಯೇ ಬದುಕಿಕೊಂಡು ಬರುತಿದ್ದಾರೆ. ಕೃಷಿ ಸಮಯದಲ್ಲಿ ಮನೋರಂಜನೆ ಅಥವಾ ಇತರ ಕಾರ್ಯಕ್ರಮಗಳಲ್ಲಿ ತೊಡಗಿಕೊಳ್ಳುವುದರಿಂದ ಕೃಷಿ ಚಟುವಟಿಕೆಗಳಿಗೆ ತೊಂದರೆಯಾಗುತ್ತದೆ ಎನ್ನುವ ದೂರದೃಷ್ಟಿಯೂ ಈ ಆಚರಣೆಯ ಹಿಂದಿದೆ.
Published by:Annappa Achari
First published: