Ugadi 2022: ಯುಗಾದಿ ಹಬ್ಬದಂದೇ ಕೃಷಿ ಚಟುವಟಿಕೆಗೆ ಮುನ್ನುಡಿ, ಚಾಮರಾಜನಗರದಲ್ಲಿ 'ಹೊನ್ನೇರು' ಸಂಭ್ರಮ

ಹೊನ್ನೇರುಗಳ  ಮೆರವಣಿಗೆ ಸಾಗುತ್ತಿದ್ದಾಗ ಮುತ್ತೈದೆಯರು ಹೊನ್ನೇರಿಗೆ ಪೂಜೆ ಸಲ್ಲಿಸುತ್ತಾರೆ. ಅನಂತರ ರೈತರು ತಮ್ಮ ಜಮೀನುಗಳಲ್ಲಿ ಗೊಬ್ಬರ ಸುರಿದು, ಸಾಂಕೇತಿಕವಾಗಿ ಉಳುಮೆ ಮಾಡುತ್ತಾರೆ.

ಯುಗಾದಿಯಂದು 'ಹೊನ್ನೇರು' ಸಂಭ್ರಮ

ಯುಗಾದಿಯಂದು 'ಹೊನ್ನೇರು' ಸಂಭ್ರಮ

  • Share this:
ಚಾಮರಾಜನಗರ: ನಾಗರಿಕತೆ (Civilization) ಬೆಳೆದಂತೆ ಗ್ರಾಮೀಣ ಪ್ರದೇಶಗಳಲ್ಲಿನ (Rural Area) ಅದೆಷ್ಟೋ ಸಂಪ್ರದಾಯಗಳು (Tradition) ಕಣ್ಮರೆಯಾಗಿವೆ. ಅದರಲ್ಲೂ ದೇಶಕ್ಕೆ ಅನ್ನ ನೀಡುವ ರೈತರು (Farmer) ನಡೆಸುವ ರಾಶಿಪೂಜೆ, ಭೂಮಿ  ಪೂಜೆ, ಯುಗಾದಿ ಹಬ್ಬದ (Ugadi Festival) ದಿನದಂದು ಕಟ್ಟುವ ‘ಹೊನ್ನೇರಿ’ನಂತಹ ಪದ್ದತಿಗಳು ನಶಿಸಿ ಹೋಗಿವೆ. ಅದರೆ ಚಾಮರಾಜನಗರ (Chamarajnagar) ಜಿಲ್ಲೆ  ಹಲವಾರು ಹಳ್ಳಿಗಳಲ್ಲಿ ಯುಗಾದಿ ಹಬ್ಬವನ್ನ ಹೊಸ ವರ್ಷದ ಜೊತೆಗೆ ಕೃಷಿ ಚಟುವಟಿಕೆಗೆ (Agriculture Activities) ಮುನ್ನುಡಿ ಬರೆಯುವ ದಿನ   ಭಾವಿಸಿ ಹೊನ್ನೇರು  ಕಟ್ಟುವ ಪ್ರದಾಯವನ್ನು  ಇಂದಿಗೂ ಆಚರಿಸಿಕೊಂಡು ಬರಲಾಗುತ್ತಿದೆ. ಇಂದಿಗೂ ಯುಗಾದಿ ಹಬ್ಬದ ದಿನ ಹೊನ್ನೇರಿನ ಸಂಭ್ರಮ ಜಿಲ್ಲೆಯಾದ್ಯಂತ ಕಾಣಿಸಿಕೊಳ್ಳುತ್ತದೆ.

 ರೈತರ ಕೃಷಿ ಚಟುವಟಿಕೆಗಳಿಗೆ ಇಂದೇ ಮುನ್ನುಡಿ

ಯುಗಾದಿ ಬಂತೆಂದರೆ ರೈತರ ಕೃಷಿ ಚಟುವಟಿಕೆಗಳಿಗೆ ಜೀವ ಬಂತು ಎಂದೇ ಅರ್ಥ. ಹೀಗಾಗಿಯೇ ಚಾಮರಾಜನಗರ ಜಿಲ್ಲೆಯ ಹಂಗಳ ಹೆಬ್ಬಸೂರು, ಜ್ಯೋತಿಗೌಡನಪುರ, ಹೊನ್ನೂರು ಮೊದಲಾದ ಗ್ರಾಮಗಳಲ್ಲಿ ಹೊನ್ನೇರು ಕಟ್ಟುವ ಸಂಪ್ರದಾಯ ಇಂದಿಗೂ ಆಚರಿಸಿಕೊಂಡು ಬರಲಾಗುತ್ತಿದೆ.

ಮುಂಜಾನೆಯಿಂದಲೇ ಹೊನ್ನೇರಿನ ಸಂಭ್ರಮ

ಹೊನ್ನೇರಿನ ವಿಶೇಷತೆ  ಎಂದರೆ  ಸೂರ್ಯೋದಯಕ್ಕು ಮುನ್ನ ರೈತರು ತಮ್ಮ ಎತ್ತು,  ಗಾಡಿ ಹಾಗು ಕೃಷಿ ಪರಿಕರಗಳನ್ನು ನೀರಿನಿಂದ ತೊಳೆದು ಸ್ವಚ್ಚಗೊಳಿಸುತ್ತಾರೆ.  ಬಳಿಕ ಎತ್ತುಗಳ ಕೊಂಬುಗಳಿಗೆ ಬಣ್ಣ ಹಾಕಿ ಹೊಂಬಾಳೆ ಕಟ್ಟುತ್ತಾರೆ , ಬಿಳಿ ಗಣಗಲೇ ಹೂವಿನಿಂದ ಅಲಂಕರಿಸುತ್ತಾರೆ.

ಇದನ್ನೂ ಓದಿ: ಹಸುವಿನ ಸಗಣಿಯಿಂದ Eco Friendly ಇಟ್ಟಿಗೆ, ಪ್ಲಾಸ್ಟರ್‌ ತಯಾರಿಸಬಹುದಂತೆ! ಇದರಲ್ಲಿ ಕಟ್ಟಿದ ಮನೆಯಲ್ಲಿ ಬದುಕು ಸುಂದರ ಅಂತಾರೆ ಇವರು

ಎತ್ತಿನಗಾಡಿಗಳಿಗೂ ಸಿಂಗಾರ

ಎತ್ತಿನ ಗಾಡಿಗಳನ್ನು ಸಹ ಬಣ್ಣಬಣ್ಣದ ಗಳಿಂದ  ಶೃಂಗರಿಸಿ,  ಮಾವಿನ ಎಲೆ, ಬಾಳೆ ಕಂದು, ಹೊಂಬಾಳೆಗಳನ್ನು ಕಟ್ಟಿ  ಶೃಂಗರಿಸಿದ ಎತ್ತಿನ ಗಾಡಿಗಳಿಗೆ ಸಾಂಕೇತಿಕವಾಗಿ ಒಂದಿಷ್ಟು ಕೊಟ್ಟಿಗೆ  ಗೊಬ್ಬರ ತುಂಬುತ್ತಾರೆ. ಬಳಿಕ ನೊಗ ಹೂಡಿದ ಎತ್ತುಗಳು ಹಾಗು ಎತ್ತಿನ ಗಾಡಿಗಳನ್ನು ಮಂಗಳ ವಾದ್ಯಗಳೊಂದಿಗೆ ಗ್ರಾಮಗಳ ಪ್ರಮುಖ ಬೀದಿಗಳಲ್ಲಿ  ಮೆರವಣಿಗೆ ನಡೆಸಲಾಗುತ್ತದೆ.

ಹೊನ್ನೇರಿನ ಮೆರವಣಿಗೆಗೆ ಮುತ್ತೈದೆಯರಿಂದ ಪೂಜೆ

ಹೊನ್ನೇರುಗಳ  ಮೆರವಣಿಗೆ ಸಾಗುತ್ತಿದ್ದಾಗ ಮುತ್ತೈದೆಯರು ಹೊನ್ನೇರಿಗೆ ಪೂಜೆ ಸಲ್ಲಿಸುತ್ತಾರೆ. ಅನಂತರ ರೈತರು ತಮ್ಮ ಜಮೀನುಗಳಲ್ಲಿ ಗೊಬ್ಬರ ಸುರಿದು, ಸಾಂಕೇತಿಕವಾಗಿ ಉಳುಮೆ ಮಾಡುತ್ತಾರೆ.

ಎತ್ತುಗಳು ದೇವರ ಸಮಾನ

" ನಮ್ಮ ಸಂಸ್ಕೃತಿಯ ಪ್ರಕಾರ ಹೊಸ ವರ್ಷ ಆರಂಭವಾಗುವುದೇ ಯುಗಾದಿಯಿಂದ. ಹಾಗಾಗಿ ಯುಗಾದಿ ದಿನದಿಂದು ಹೊನ್ನೇರಿನ ಮೂಲಕ ಕೊಟ್ಟಿಗೆ ಗೊಬ್ಬರ ತೆಗೆದುಕೊಂಡು ಹೋಗಿ ಹೊಲಕ್ಕೆ ಸುರಿದು ಸಾಂಕೇತಿಕವಾಗಿ ಕೃಷಿ ಚಟುವಟಿಕೆಗಳನ್ನು  ಆರಂಭಿಸುತ್ತೇವೆ. ಕೃಷಿ ಚಟುವಟಿಕೆಯ ಅವಿಭಾಜ್ಯ ಅಂಗವಾದ ಎತ್ತುಗಳು ನಮಗೆ ದೇವರ ಸಮಾನ. ಹಾಗಾಗಿ ಅವುಗಳಿಗೆ ಇಂದು ಪೂಜೆ ಸಲ್ಲಿಸಿ ಹೊನ್ನೇರು ಕಟ್ಟಿ ಒಳ್ಳೆಯ ಮಳೆ ಬೆಳೆ ಆಗಲಿ ಎಂದು ಪ್ರಾರ್ಥಿಸುತ್ತೇವೆ"  ಎಂದು ಹೆಬ್ಬಸೂರು ಗ್ರಾಮದ ರೈತ ಬಸವಣ್ಣ ತಿಳಿಸಿದರು

ತಲೆತಲಾಂತರದಿಂದ ನಡೆದುಕೊಂಡು ಬಂದ ಸಂಪ್ರದಾಯ

"ತಲೆ ತಲಾಂತರಗಳಿಂದ ಹೊನ್ನೇರು ಕಟ್ಟುವ ಸಂಪ್ರದಾಯವಿದೆ. ನಾವೂ ಸಹ ಅದೇ ಸಂಪ್ರದಾಯ ಮುಂದುವರಿಸಿಕೊಂಡು ಹೋಗುತ್ತಿದ್ದೇವೆ. ಬೆಳಿಗ್ಗೆ ಮನೆ ಮುಂದೆ  ಬಣ್ಣ ಬಣ್ಣದ ರಂಗೋಲಿ ಬಿಡಿಸುತ್ತೇವೆ, ಎತ್ತುಗಾಡಿಗಳನ್ನು ಅಲಂಕರಿಸುತ್ತೇವೆ. ಹೊನ್ನೇರಿನ ಮೆರವಣಿಗೆ ಮುಗಿದ ನಂತರ ಸಿಹಿಯೂಟ ತಯಾರಿಸಿ ಹಬ್ಬ ಆಚರಿಸುತ್ತೇವೆ ಎನ್ನುತ್ತಾರೆ ಹೆಬ್ಬಸೂರಿನ ಗೃಹಿಣಿ ಅನುಪಮ

ಇದನ್ನೂ ಓದಿ: Non-Veg Recipe: ಯುಗಾದಿ ಹೊಸತೊಡಕಿಗೆ ಸುಲಭವಾಗಿ ಮಾಡಿ ಮಟನ್ ಮಸಾಲ

ಒಟ್ಟಾರೆ ಯುಗಾದಿ ದಿನದಂದು ಗ್ರಾಮೀಣ ಭಾಗದಲ್ಲಿ ಆಚರಿಸುವ ಹೊನ್ನೇರಿನ ಸಂಪ್ರದಾಯ ವಿಶಿಷ್ಟ ಹಾಗೂ ಅರ್ಥಪೂರ್ಣವಾಗಿರುತ್ತದೆ. ಸಂಪದಾಯದ ಹೆಸರಿನಲ್ಲಿ ರೈತ ತನ್ನ ಕೃಷಿ ಚಟುವಟಿಕೆಗೆ  ಮುನ್ನುಡಿ ಬರೆಯುವುದೇ ಹೊನ್ನೇರು ಕಟ್ಟುವುದರ  ಉದ್ದೇಶ ಎಂಬುದು ಇಲ್ಲಿ ಸ್ಪಷ್ಟವಾಗಿದೆ
Published by:Annappa Achari
First published: