ಕರಾವಳಿಯಿಂದ ವಿದೇಶಗಳಿಗೆ ಮೀನು ರಪ್ತು ಸ್ಥಗಿತ; ಸಂಕಷ್ಟದಲ್ಲಿ ಮತ್ಸ್ಯ ಉದ್ಯಮ

ಚೀನಾ ಸಹಿತ ವಿದೇಶಗಳಿಗೆ ಕರ್ನಾಟಕದಿಂದ ಕಳೆದ ವರ್ಷ ಒಟ್ಟು 1,600 ಕೋಟಿ ರೂ. ಮೌಲ್ಯದ ಮೀನು ರಫ್ತಾಗಿತ್ತು. ಆದರೆ ಮಾರ್ಚ್ ಬಳಿಕ ರಫ್ತು ಸಂಪೂರ್ಣ ಸ್ಥಗಿತಗೊಂಡಿದೆ. ಸದ್ಯ ಕರಾವಳಿಯಲ್ಲಿ ಮೀನುಗಾರಿಕೆ ಆರಂಭವಾಗಿದ್ದರೂ ರಫ್ತು ಆರಂಭವಾಗಿಲ್ಲ.

ಸಾಂದರ್ಭಿಕ ಚಿತ್ರ

ಸಾಂದರ್ಭಿಕ ಚಿತ್ರ

  • Share this:
ಮಂಗಳೂರು (ಅ. 10): ಕರಾವಳಿಯ ಪ್ರಮುಖ ಆದಾಯದ ಮೂಲಗಳಲ್ಲಿ ಮೀನುಗಾರಿಕೆ ಕೂಡ ಒಂದು. ಆದರೆ, ಕೊರೋನಾ ಕಾರಣದಿಂದ ಕರಾವಳಿಯ ಮತ್ಸ್ಯ ಉದ್ಯಮ ಇದೀಗ ಸಂಕಷ್ಟದಲ್ಲಿದೆ. ಕೊರೋನಾ ಲಾಕ್​ಡೌನ್ ಬಳಿಕ ವಿದೇಶಗಳಿಂದ ಬೇಡಿಕೆ ಕುಸಿತವಾಗಿದ್ದು, ಕಟ್ಟುನಿಟ್ಟಿನ ನಿಯಮಗಳಿಂದ ಮೀನು ರಫ್ತಿಗೆ ಹೊಡೆತ ಬಿದ್ದಿದೆ. ಮೀನುಗಾರಿಕೆ ಕರಾವಳಿಗೆ ಅತಿ ಹೆಚ್ಚು ಆದಾಯವನ್ನು ತಂದುಕೊಡುವ ಉದ್ಯಮ. ಆದರೆ, ಈ ಉದ್ಯಮವೀಗ ಸಂಕಷ್ಟದಲ್ಲಿದೆ. ಕಠಿಣ ನಿಯಮಾವಳಿಯಿಂದ ರಫ್ತು ಕುಸಿತವಾಗಿದೆ. ಕೊರೋನಾ ಕಾರಣದಿಂದ ತಡವಾಗಿ ಮೀನುಗಾರಿಕೆ ಆರಂಭವಾದರೂ ಪೂರ್ಣ ಪ್ರಮಾಣದ ರಫ್ತು ಇನ್ನೂ ಶುರುವಾಗಿಲ್ಲ. ಚೀನಾ ಸಹಿತ ವಿದೇಶಗಳಿಗೆ ಕರ್ನಾಟಕದಿಂದ ಕಳೆದ ವರ್ಷ ಒಟ್ಟು 1,600 ಕೋಟಿ ರೂ. ಮೌಲ್ಯದ ಮೀನು ರಫ್ತಾಗಿತ್ತು. ಆದರೆ ಮಾರ್ಚ್ ಬಳಿಕ ರಫ್ತು ಸಂಪೂರ್ಣ ಸ್ಥಗಿತಗೊಂಡಿದೆ. ಸದ್ಯ ಕರಾವಳಿಯಲ್ಲಿ ಮೀನುಗಾರಿಕೆ ಆರಂಭವಾಗಿದ್ದರೂ ರಫ್ತು ಇನ್ನೂ ಆರಂಭವಾಗಿಲ್ಲ.

ರಾಜ್ಯದಿಂದ ಐರೋಪ್ಯ ದೇಶಗಳು, ಬ್ಯಾಂಕಾಕ್, ಥೈಲ್ಯಾಂಡ್, ಮಲೇಷ್ಯಾ, ಕೊರಿಯಾ ಮತ್ತಿತರ ದೇಶಗಳಿಗೆ ಮೀನು ರಫ್ತಾಗುತ್ತಿತ್ತು. ಪ್ರತಿವರ್ಷ ಸುಮಾರು 1 ಸಾವಿರ ಕಂಟೈನರ್‌ಗಳ ಮೂಲಕ ಚೀನಾಗೆ ಮೀನು ರಫ್ತು ಆಗುತ್ತದೆ. ಒಂದು ಕಂಟೈನರ್‌ನಲ್ಲಿ 25 ಟನ್ ಮೀನು ಇರುತ್ತದೆ. ಕಪ್ಪೆ ಬೊಂಡಾಸ್ ಮತ್ತು ಪಾಂಬೋಲು ಮೀನು ಯಥೇಚ್ಛವಾಗಿ ಚೀನಾಗೆ ರಫ್ತಾಗುತ್ತದೆ. ಆದರೆ, ಇದೀಗ ಕೊರೋನಾ ಕಾರಣದಿಂದ ವಿದೇಶಗಳಿಂದ ಬೇಡಿಕೆ ಕುಸಿತವಾಗಿದೆ.  ಸದ್ಯ ಮೀನಿನ ಸಾಗಾಟಕ್ಕೂ ತೊಂದರೆಯುಂಟಾಗಿದೆ. ಏರ್‌ಕಾರ್ಗೋ ಮಾತ್ರ ನಿರ್ವಹಣೆಯಾಗುತ್ತಿದ್ದು ಸಾಗಾಟದ ದರವೂ ಏರಿಕೆಯಾಗಿದೆ.

ಇದನ್ನೂ ಓದಿ: Karnataka Weather: ಕರಾವಳಿ ಸೇರಿ ಕರ್ನಾಟಕದ ಹಲವೆಡೆ 4 ದಿನ ಭಾರೀ ಮಳೆ; ಹವಾಮಾನ ಇಲಾಖೆ ಮುನ್ಸೂಚನೆ

ಸದ್ಯದ ಮಾಹಿತಿಯಂತೆ ಚೀನಾ ಮಾರುಕಟ್ಟೆಯಲ್ಲಿ ಮೀನಿಗೆ ಬೇಡಿಕೆ ಕಡಿಮೆಯಿದೆ. ಮೀನು ರಫ್ತಾಗುವ ಕಂಟೈನರ್‌ಗಳನ್ನು ಸ್ಯಾನಿಟೈಸ್ ಮಾಡಬೇಕು ಎನ್ನುವುದರ ಸಹಿತ ಕಠಿಣ ನಿಯಾಮಾವಳಿ ರೂಪಿಸಿದ್ದರಿಂದ ಮುಂದಿನ ಸ್ಥಿತಿಗತಿಯ ಬಗ್ಗೆಯೂ ಆತಂಕವಿದೆ. ಶೇಖರಿಸಿಟ್ಟ ಮೀನು ರಫ್ತಾಗದ ನಷ್ಟ ಒಂದೆಡೆಯಾದರೆ ಲಾಕ್‌ಡೌನ್‌ ಅವಧಿಯಲ್ಲಿ ಕಾರ್ಮಿಕರಿಗೆ ಸಂಬಳ ಸಹಿತ ಇತರ ವ್ಯವಸ್ಥೆ ಕಲ್ಪಿಸಿದ್ದರಿಂದಲೂ ನಷ್ಟವಾಗಿದೆ ಮಂಗಳೂರಿನ್ಲಲಿ 12, ಉಡುಪಿಯಲ್ಲಿ 10, ಉತ್ತರ ಕನ್ನಡದಲ್ಲಿ 3 ಮೀನು ರಫ್ತು ಮಾಡುವ ಕಾರ್ಖಾನೆಗಳಿವೆ. ಸದ್ಯ ಕರಾವಳಿಯಲ್ಲಿ ಮೀನುಗಾರಿಕೆ ಆರಂಭವಾಗಿದ್ದರೂ ರಫ್ತು ಇನ್ನೂ ಆರಂಭವಾಗಿಲ್ಲ.
Published by:Sushma Chakre
First published: