ರಾಜ್ಯ ರೈತರಿಂದ ರಿಲಾಯನ್ಸ್​ಗೆ ಅಕ್ಕಿ ನೇರ ಮಾರಾಟ; ಎಂಎಸ್​ಪಿಗಿಂತ ಹೆಚ್ಚು ಬೆಲೆ

ಕ್ವಿಂಟಾಲ್​ಗೆ 1,850 ರೂ ಎಂಎಸ್​ಪಿ ದರ ಇರುವ ಅಕ್ಕಿಯನ್ನು ರಿಲಾಯನ್ಸ್ ರೀಟೇಲ್ ಸಂಸ್ಥೆ 1,950 ರೂನಂತೆ ಖರೀದಿಸಲು ರಾಯಚೂರಿನ 1,100 ರೈತರೊಂದಿಗೆ ಒಪ್ಪಂದ ಮಾಡಿಕೊಂಡಿದೆ.

ರಿಲಯನ್ಸ್

ರಿಲಯನ್ಸ್

  • News18
  • Last Updated :
  • Share this:
    ಬೆಂಗಳೂರು(ಜ. 11): ಕೃಷಿ ಮಾರುಕಟ್ಟೆಯನ್ನ ಖಾಸಗಿಯವರ ಸುಪರ್ದಿಗೆ ನೀಡಿ ನಿರ್ನಾಮ ಮಾಡಲಾಗುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿ ಕೆಲ ರೈತರು ಪ್ರತಿಭಟನೆ ನಡೆಸುತ್ತಿರುವ ಹೊತ್ತಲ್ಲೇ ನೂತನ ಕೃಷಿ ಕಾಯ್ದೆ ತನ್ನ ಫಲ ಕೊಡುತ್ತಿರುವ ನಿದರ್ಶನಗಳು ಅಲ್ಲಲ್ಲಿ ಕಾಣಸಿಗುತ್ತಿದೆ. ಎಪಿಎಂಸಿ ಬದಲು ರಿಲಾಯನ್ಸ್ ಸಂಸ್ಥೆಗೆ ಭತ್ತವನ್ನು ನೇರ ಮಾರಾಟ ಮಾಡಲು ಕರ್ನಾಟಕದ 1,100 ರೈತರು ಒಪ್ಪಂದಕ್ಕೆ ಸಹಿಹಾಕಿದ್ದಾರೆ. ರಾಯಚೂರಿನ ಸಿಂಧನೂರಿನ ಸ್ವಾಸ್ಥ್ಯ ಎಂಬ ಕಂಪನಿ ಮೂಲಕ ಕನಿಷ್ಠ ಬೆಂಬಲ ಬೆಲೆ (ಎಂಎಸ್​ಪಿ)ಗಿಂತ ಹೆಚ್ಚಿನ ದರದಲ್ಲಿ ಈ ರೈತರು ತಮ್ಮ ಭತ್ತ ಬೆಳೆಯನ್ನು ರಿಲಾಯನ್ಸ್ ರೀಟೇಲ್​ಗೆ ಮಾರಲಿದ್ದಾರೆ ಎಂದು ಐಎಎನ್​ಎಸ್ ಸುದ್ದಿಸಂಸ್ಥೆಯ ವರದಿಯೊಂದು ತಿಳಿಸಿದೆ.

    “ನಮ್ಮ ಕಂಪನಿಯ ಪಾಲುದಾರರಾಗಿರುವ 1,100 ರೈತರ ಪರವಾಗಿ ರಿಲಾಯನ್ಸ್ ರೀಟೇಲ್ ಜೊತೆ ಜನವರಿ 6ಕ್ಕೆ ಒಪ್ಪಂದ ಮಾಡಿಕೊಂಡಿದ್ದೇವೆ. ಕ್ವಿಂಟಾಲ್​ಗೆ 1,850 ರೂ ಎಂಎಸ್​ಪಿ ದರ ಇರುವ ಸೋನಾ ಮಸೂರಿ ಅಕ್ಕಿಯನ್ನು ರಿಲಾಯನ್ಸ್ 1,950 ರೂಗೆ ಖರೀದಿಸುತ್ತಿದೆ. ಎಂಎಸ್​ಪಿಗಿಂತ 100 ರೂ ಹೆಚ್ಚಿನ ದರದಲ್ಲಿ ರಿಲಾಯನ್ಸ್​ಗೆ ಮಾರುತ್ತಿದ್ದೇವೆ” ಎಂದು ಸ್ವಾಸ್ಥ್ಯ ರೈತರ ಬೆಳೆ ಸಂಸ್ಥೆ (ಎಸ್​ಎಫ್​ಪಿಸಿ) ನಿರ್ವಾಹಕ ನಿರ್ದೇಶಕ ವಿ ಮಲ್ಲಿಕಾರ್ಜುನ್ ಹೇಳಿದ್ದಾರೆ.

    ಎಪಿಎಂಸಿ ಮಾರುಕಟ್ಟೆಯ ಆಚೆ ತಮ್ಮ ಉತ್ಪನ್ನಗಳನ್ನ ನೇರವಾಗಿ ರೈತರು ಮಾರಲು ಅನುವು ಮಾಡಿಕೊಡುವಂತೆ ಎಪಿಎಂಸಿ ಕಾಯ್ದೆಗೆ ರಾಜ್ಯ ಸರ್ಕಾರ ತಿದ್ದುಪಡಿ ತಂದಿದೆ. ಈ ಕಾಯ್ದೆಯ ಅಡಿಯಲ್ಲೇ ಸ್ವಾಸ್ಥ್ಯ ಸಂಸ್ಥೆ ರಿಲಾಯನ್ಸ್ ಜೊತೆ ಈ ಒಪ್ಪಂದ ಮಾಡಿಕೊಂಡಿದೆ.

    ಇದನ್ನೂ ಓದಿ: ಆರೇಳು ಮಂದಿ ಸಂಪುಟ ಸೇರ್ಪಡೆ ನಿಶ್ಚಿತ: ದೆಹಲಿಯಿಂದ ಮರಳಿದ ಬಳಿಕ ಸಿಎಂ ಹೇಳಿಕೆ

    ”ಒಪ್ಪಂದ ಮಾಡಿಕೊಂಡ ನಂತರ (ಜ. 6) ಶನಿವಾರದವರೆಗೂ (ಜ. 9) ನಮ್ಮ ರೈತರು ನೂರು ಟನ್ ಭತ್ತವನ್ನು ರಾಯಚೂರಿನಲ್ಲಿರುವ ರಿಲಾಯನ್ಸ್ ರೀಟೇಲ್ ಸಂಸ್ಥೆಗೆ ಮಾರಿದ್ದಾರೆ. ದಿನಕ್ಕೆ ನೂರು ಟನ್​ನಂತೆ ಇನ್ನು ಕೆಲವೇ ದಿನಗಳಲ್ಲಿ ಒಪ್ಪಂದದನ್ವಯ ಉಳಿದ 900 ಟನ್ ಭತ್ತವನ್ನು ರಿಲಾಯನ್ಸ್ ರೀಟೇಲ್​ನ ಉಗ್ರಾಣಕ್ಕೆ ರೈತರು ಕಳುಹಿಸಿಕೊಡಲಿದ್ದಾರೆ” ಎಂದು ಮಲ್ಲಿಕಾರ್ಜುನ ಅವರು ತಿಳಿಸಿದ್ದಾರೆ.

    ಆದರೆ, ಎಂಎಸ್​ಪಿಗಿಂತ 100 ರೂ ಹೆಚ್ಚು ಬೆಲೆ ಸಿಗುತ್ತದಾದರೂ ರೈತರು ಸಾರಿಗೆ, ಲೋಡಿಂಗ್, ಅನ್​ಲೋಡಿಂಗ್ ಇತ್ಯಾದಿ ವೆಚ್ಚವನ್ನು ತಾವೇ ಭರಿಸಬೇಕಾಗುತ್ತದೆ. ರಿಲಾಯನ್ಸ್ ಸಂಸ್ಥೆಯಿಂದ ಬಂದ ಹಣವನ್ನು ನೇರವಾಗಿ ರೈತರ ಖಾತೆಗೆ ವರ್ಗಾವಣೆ ಮಾಡುತ್ತೇವೆ ಎಂದಿದ್ಧಾರೆ.

    ನಬಾರ್ಡ್​ನ ಸಹಾಯದಿಂದ ಸ್ವಾಸ್ಥ್ಯ ಸಂಸ್ಥೆಯು ರೈತರಿಗೆ ಹಣಕಾಸು ಇತ್ಯಾದಿ ನೆರವನ್ನು ಒದಗಿಸುತ್ತಿದೆ. ರೈತರ ಬೆಳೆಗಳಿಗೆ ಹೆಚ್ಚಿನ ಬೆಲೆ ಕೊಡಿಸುವ ಕೆಲಸವನ್ನೂ ಅದು ಮಾಡುತ್ತದೆ.

    ವರದಿ ಕೃಪೆ: ಐಎಎನ್​ಎಸ್ ಸುದ್ದಿಸಂಸ್ಥೆ
    Published by:Vijayasarthy SN
    First published: