ಮಂಗಳೂರಿನಲ್ಲಿ ಸಮುದ್ರಕ್ಕೆ ಉರುಳಿ ಬಿದ್ದ ಟ್ರಕ್​; ಚಾಲಕ-ಕ್ಲೀನರ್​ ಇಬ್ಬರೂ ಸಮುದ್ರಪಾಲು..!

ಮಂಗಳೂರು(ಜೂ.21): ಚಾಲಕನ ನಿಯಂತ್ರಣ ತಪ್ಪಿದ ಟ್ರಕ್​ ಸಮುದ್ರಕ್ಕೆ ಉರುಳಿ ಬಿದ್ದಿರುವ ಘಟನೆ ನವಮಂಗಳೂರು ಬಂದರಿನ 14ನೇ ಬರ್ತ್​​ನಲ್ಲಿ ನಡೆದಿದೆ.  ಟ್ರಕ್​ನಲ್ಲಿದ್ದ ಚಾಲಕ ಮತ್ತು ಕ್ಲೀನರ್ ಇಬ್ಬರೂ ಸಮುದ್ರದ ಪಾಲಾಗಿದ್ದಾರೆ. ಟ್ರಕ್ ಡ್ರೈವರ್​ ರಾಜೇಸಾಬ(26) ಮೃತದೇಹ ಪತ್ತೆಯಾಗಿದೆ. ಆದರೆ ಕ್ಲೀನರ್​​ ಭೀಮಪ್ಪನ(22) ಮೃತದೇಹ ಇನ್ನೂ ಸಿಕಿಲ್ಲ. ಭೀಮಪ್ಪನ ಶವಕ್ಕಾಗಿ ಶೋಧ ಕಾರ್ಯ ಮುಂದುವರೆದಿದೆ.

ಟ್ರಕ್​ ಸಮುದ್ರಕ್ಕೆ ಉರುಳಿ ಬಿದ್ದಾಗ ಖಾಲಿ ಇತ್ತು ಎಂದು ತಿಳಿದು ಬಂದಿದೆ. ಕಬ್ಬಿಣದ ಅದಿರನ್ನು ಹಡಗಿನಿಂದ ಸ್ಥಳಾಂತರಿಸಲು ಟ್ರಕ್​ ಸಮುದ್ರದ ಬಳಿ ಬರುತ್ತಿತ್ತು ಎನ್ನಲಾಗಿದೆ. ಈ ವೇಳೆ ಚಾಲಕನ ನಿಯಂತ್ರಣ ತಪ್ಪಿ ಈ ದುರಂತ ನಡೆದಿದೆ. KA- 22 C 8257 ನಂಬರ್‌ ನ ಡೆಲ್ಟಾ ಕಂಪನಿಯ ಟ್ರಕ್ ಇದಾಗಿದೆ. ಸಿ.ಐ.ಎಸ್​.ಎಫ್‌ ಮತ್ತು ಗಸ್ತು ದೋಣಿಗಳಿಂದ ಭೀಮಪ್ಪನಿಗಾಗಿ  ಶೋಧ ಕಾರ್ಯ ನಡೆಯುತ್ತಿದೆ.

ಇದನ್ನೂ ಓದಿ:Karnataka Unlock 2.O: ಬೆಂಗಳೂರಲ್ಲಿ ಬೆಳಗ್ಗೆ ಬಸ್​ ಬಂದಿದ್ದೇ ಲೇಟು;​ ಮೆಟ್ರೋ ಕಡೆ ಸುಳಿಯದ ಜನ; ಉಳಿದ ಜಿಲ್ಲೆಗಳಲ್ಲಿ ಉತ್ತಮ ಸಂಚಾರ

ಟ್ರಕ್​ ಸಮುದ್ರಕ್ಕೆ ಉರುಳಿ ಬಿದ್ದಾಗ, ಅಲ್ಲೇ ಹಾದು ಹೋಗುತ್ತಿದ್ದ ಗಸ್ತು ದೋಣಿ​ಯ​ ನಾವಿಕ​ ವಿಟಿಎಂಎಸ್​​ಗೆ ಮಾಹಿತಿ ನೀಡಿದರು. ಕೂಡಲೇ ವಿಟಿಎಂಎಸ್​ ಸಿಸ್ಪ್​ ಕಂಟ್ರೋಲ್​ ರೂಂಗೆ ಮಾಹಿತಿ ನೀಡಿತು. ಸಿಐಎಸ್​ಎಫ್​ ಮತ್ತು ಗಸ್ತು ದೋಣಿಯ ಸಹಾಯದಿಂದ ರಕ್ಷಣಾ ಕಾರ್ಯಾಚರಣೆ ಪ್ರಾರಂಭಿಸಲಾಯಿತು. ಆಗ ಟ್ರಕ್​​ನ ಡ್ರೈವರ್​ ರಾಜೇಸಾಬ ಅವರು ಪತ್ತೆಯಾಗಿದ್ದಾರೆ. ಕೂಡಲೇ ಅವರನ್ನು ರಕ್ಷಿಸಿ ಆಸ್ಪತ್ರೆಗೆ ಸಾಗಿಸಲಾಯಿತು. ಆದರೆ ಅಷ್ಟರಲ್ಲಾಗಲೇ ರಾಜೇಸಾಬ ಮೃತಪಟ್ಟಿದ್ದರು.

ಇನ್ನೂ ಸಹ ಕ್ಲೀನರ್​ ಮೃತದೇಹ ಸಿಕ್ಕಿಲ್ಲ. ಹೀಗಾಗಿ ರಕ್ಷಣಾ ಸಿಬ್ಬಂದಿ ಮೃತದೇಹಕ್ಕಾಗಿ ಹುಡುಕಾಟ ನಡೆಸಿದ್ದಾರೆ.