ಫೋಟೋ ಫ್ರೇಮ್​, ಆಲ್ಬಂ ಮೂಲಕ 13 ಕೋಟಿ ಮೌಲ್ಯದ ಮಾದಕ ದ್ರವ್ಯ ಕಳ್ಳಸಾಗಣೆ

ಬೆಂಗಳೂರು (ಅ.19):  ಪೋಟೊ ಫ್ರೇಮ್, ಪೋಟೊ ಅಲ್ಬಮ್‌ ಮತ್ತು ಬಳೆಗಳ ಮೂಲಕ ಸುಮಾರು 13 ಕೋಟಿ ಮೌಲ್ಯದ ಡ್ರಗ್ಸ್​ನ್ನು ಕಳ್ಳಸಾಗಣೆ ಮಾಡಲಾಗುತ್ತಿದ್ದು, ಇದನ್ನು ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಕಂದಾಯ ಗುಪ್ತಚರ ನಿರ್ದೇಶನಾಲಯದ (ಡಿಆರ್​ಐ) ಅಧಿಕಾರಿಗಳು ಪತ್ತೆ ಹಚ್ಚಿದ್ದಾರೆ. ಕಳೆದ ವಾರ ಚೈನ್ನೈನಿಂದ ಬೆಂಗಳೂರು ಮಾರ್ಗದ ಮೂಲಕ ಈಗಾಗಲೇ ಸಿಂಗಾಪುರಕ್ಕೆ ಈ ಡ್ರಗ್ಸ್​ ಸಾಗಟ ಮಾಡಲಾಗಿತ್ತು. ಇದಾದ ಬಳಿಕ ವಿಮಾನದಲ್ಲಿ ಡ್ರಗ್ಸ್​ ಸಾಗಣೆ ಮಾಡಿರುವ ಬಗ್ಗೆ ಆಧಿಕಾರಿಗಳಿಗೆ ಮಾಹಿತಿ ಲಭ್ಯವಾಗಿದ್ದು, ಅದನ್ನು ಇದೀಗ ವಾಪಸ್​ ತರಿಸಿಕೊಳ್ಳಲಾಗಿದೆ.

ಈ ಕುರಿತು ಮಾತನಾಡಿರುವ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಅಧಿಕಾರಿಗಳು, ಸೊಡೊಫೆಡ್ರಿನ್​ ಎಂಬ ಮಾದಕ ದ್ರವ್ಯವನ್ನು ಕಳ್ಳಸಾಗಣೆ ಮಾಡುತ್ತಿರುವ ಬಗ್ಗೆ ನಮಗ ಮಾಹಿತಿ ಬಂದಿತು. ಈ ಹೊತ್ತಿಗೆ ಈ ಮಾದಕದ್ರವ್ಯ ಸಿಂಗಾಪೂರ ತಲುಪಿದ್ದವು. ಈಗ ಅವನ್ನು ವಾಪಸ್​ ತರಿಸಿಕೊಳ್ಳಲಾಗಿದೆ ಎಂದರು. ಸುಮಾರು 13.2 ಕೋಟಿ ಮೌಲ್ಯದ ಈ ಮಾದಕ ದ್ರವ್ಯಗಳನ್ನು  ಮೆಥಾಂಫೆಟಮೈನ್​ ಸೇರಿದಂತೆ ಹಲವಾರು ಮಾದಕ ವಸ್ತುಗಳ ಉತ್ಪಾದನೆಗೆ ಬಳಸಿಕೊಳ್ಳಲಾಗುತ್ತದೆ. ಈ ಸೊಡೊಫೆಡ್ರಿನ್ ಎನ್​ಡಿಪಿಎಸ್​ ಕಾಯ್ದೆ ಪ್ರಕಾರ ನಿಯಂತ್ರಿತ ವಸ್ತುವಾಗಿದೆ.

ಫೋಟೋ ಫ್ರೇಮ್​ನಲ್ಲಿ ಕಳ್ಳಸಾಗಣೆಯಾಗುತ್ತಿದ್ದ ಡ್ರಗ್ಸ್​

ಫೋಟೋ ಫ್ರೇಮ್​, ಬಳೆ ಸೇರಿದಂತೆ ಹಲವು ವೈಯಕ್ತಿಕ ವಸ್ತುಗಳಲ್ಲಿ ಈ ಮಾದಕ ದ್ರವ್ಯಗಳನ್ನು ಅಡಗಿಸಿಡಲಾಗಿದೆ. ಇದನ್ನು ನೋಡಿದಾಕ್ಷಣ ಯಾವುದೋ ಕುಟುಂಬದ ವಸ್ತುಗಳಂತೆ ಇದ್ದು ಅನುಮಾನ ಬಾರದಂತೆ ನೋಡಿಕೊಳ್ಳಲಾಗಿದೆ. ಇವುಗಳನ್ನು ಸೂಕ್ಷ್ಮವಾಗಿ ಗಮನಿಸಿದಾಗ ಫೋಟೋ ಆಲ್ಬಮ್​ನ ಕವರ್​, ಹಾಗೂ ಫ್ರೇಮ್​ಗಳು ದಪ್ಪ ಇರುವುದು ಕಂಡು ಬಂದಿದೆ. ಅದರ ಮೂಲಕ ಇದನ್ನು ಸಾಗಣೆ ಮಾಡಲಾಗಿದೆ,

ಇನ್ನು ಈ ಸೊಡೊಫೆಡ್ರಿನ್​ ಎಂಬ ವಸ್ತುವು ಮಾರುಕಟ್ಟೆಯಲ್ಲಿ ಕೆ.ಜಿಗೆ 1 ಕೋಟಿ ಮೌಲ್ಯವುಳ್ಳದ್ದಾಗಿದೆ. ಇವನ್ನು ಆಸ್ಟೇಲಿಯಾದಲ್ಲಿ ಮಾದಕ ದ್ರವ್ಯಗಳ ಬಳಕೆಗೆ ಉಪಯೋಗಿಸಿಕೊಳ್ಳಲಾಗುತ್ತಿತ್ತು.

ನಿಷೇಧಿತ ವಸ್ತುಗಳನ್ನು ವಶಕ್ಕೆ ಪಡೆದ ಪ್ರಕರಣದಲ್ಲಿ ಇದು ದೊಡ್ಡದಾಗಿದೆ, ಲಾಕ್​ಡೌನ್​ ವಿಧಿಸಲಾಗಿದ್ದರೂ ವಿಮಾನಗಳ ಮೂಲಕ ಡ್ರಗ್ಸ್​ ಸಾಗಾಣೆ ಪ್ರಕರಣಗಳು ಕಂಡು ಬರುತ್ತಲೇ ಇದೆ, ಈ ಹಿಂದೆ ಮದುವೆ ಆಮಂತ್ರಣ ಪತ್ರಿಕೆಯಲ್ಲಿ ಈ ಡ್ರಗ್ಸ್​ಗಳನ್ನು ಸಾಗಾಟ ಮಾಡುವ ಪ್ರಯತ್ನ ನಡೆದಿತ್ತು. ಮೂರು ವಾರಗಳ ಹಿಂದಷ್ಟೇ 25ಕೆಜಿಯ ಸಿಡಿಫೆಡ್ರಿನ್​ ಅನ್ನು ಚೆನ್ನೈನ ಅಧಿಕಾರಿಗಳು ವಶಕ್ಕೆ ಪಡೆದಿದ್ದರು. ಆ ಘಟನೆ ಬೆನ್ನಲ್ಲೇ ಈಗ ಬೆಂಗಳೂರು ವಿಮಾನ ನಿಲ್ದಾಣದ ಅಧಿಕಾರಿಗಳು ಈ ಕಾರ್ಯಾಚರಣೆ ನಡೆಸಿದ್ದಾರೆ.