WPL 2023: ಮಿಂಚಿದ ಹರ್ಮನ್​, ಕೆರ್​; ಮುಂಬೈ ಇಂಡಿಯನ್ಸ್ ದಾಳಿಗೆ ಧೂಳೀಪಟವಾದ ಗುಜರಾತ್

ಮುಂಬೈ: ಚೊಚ್ಚಲ ವುಮೆನ್ಸ್ ಪ್ರೀಮಿಯರ್ ಲೀಗ್​ನ (Women's Premier League)  ಉದ್ಘಾಟನಾ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ (Mumbai Indians) ತಂಡ ಭರ್ಜರಿ ಜಯ ಸಾಧಿಸುವ ಮೂಲಕ ಶುಭಾರಂಭ ಮಾಡಿದೆ. ಡಿ ವೈ ಪಾಟೀಲ್ ಸ್ಟೇಡಿಯಂನಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ಹರ್ಮನ್​ ಪ್ರೀತ್ ಕೌರ್​ ಬಳಗ ಗುಜರಾತ್ ಜೇಂಟ್ಸ್​ (Gujarat Giants) ವಿರುದ್ಧ 143 ರನ್​ಗಳ ಬೃಹತ್​ ಅಂತರದ ಜಯ ಸಾಧಿಸಿದೆ. ಟಾಸ್​ ಸೋತರು ಮೊದಲು ಬ್ಯಾಟಿಂಗ್ ಮಾಡಿದ್ದ ಮುಂಬೈ ಇಂಡಿಯನ್ಸ್ 20 ಓವರ್​ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 207 ರನ್​ಗಳಿಸಿತ್ತು, ಇದಕ್ಕೆ ಉತ್ತರವಾಗಿ ಗುಜರಾತ್ ಜೇಂಟ್ಸ್ ಕೇವಲ 64 ರನ್​ಗಳಿಗೆ ಆಲೌಟ್ ಆಗುವ ಮೂಲಕ ಹೀನಾಯ ಸೋಲು ಕಂಡಿತು.

ಟಾಸ್​ ಸೋತರೂ ಬ್ಯಾಟಿಂಗ್ ಇಳಿದ ಮುಂಬೈ ಇಂಡಿಯನ್ಸ್​ ಭರ್ಜರಿ ಬ್ಯಾಟಿಂಗ್ ಪ್ರದರ್ಶನ ತೋರಿತು, ಗುಜರಾತ್‌ ಜೈಂಟ್ಸ್‌ ಬೌಲರ್​ಗಳನ್ನು ಬೆಂಡೆತ್ತಿದ ಮುಂಬೈ ಬ್ಯಾಟರ್ಸ್​ ಚೊಚ್ಚಲ ಪಂದ್ಯದಲ್ಲಿ 200ರ ಗಡಿ ದಾಟಿತು. ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಅವರ ಅರ್ಧಶತಕದ ನೆರವಿನಿಂದ 5 ವಿಕೆಟ್‌ ನಷ್ಟಕ್ಕೆ 207 ರನ್‌ ಗಳಿಸಿತು.

ಮಿಂಚಿದ ಮ್ಯಾಥ್ಯೂಸ್​

ಆರಂಭದಲ್ಲೇ ಯಸ್ತಿಕಾ ಭಾಟಿಯ ವಿಕೆಟ್‌ ಕಳೆದುಕೊಂಡರೂ ಉತ್ತಮವಾಗಿ ಬ್ಯಾಟಿಂಗ್ ಮಾಡಿದ ಉಳಿದ ಬ್ಯಾಟರ್​ಗಳು ತಂಡದ ಬೃಹತ್​ ಮೊತ್ತಕ್ಕೆ ಕಾರಣರಾದರು. ವಿಂಡೀಸ್ ಸ್ಟಾರ್ ಹೇಲಿ ಮ್ಯಾಥ್ಯೂಸ್​ ಸ್ಫೋಟಕ ಬ್ಯಾಟಿಂಗ್‌ ನಡೆಸಿದರು. ಅವರು ಡಬ್ಲ್ಯೂಪಿಎಲ್‌ ಟೂರ್ನಿಯಲ್ಲೇ ಮೊದಲ ಸಿಕ್ಸರ್‌ ಹಾಗೂ ಮೊದಲ ಬೌಂಡರಿ ಸಿಡಿಸಿದ ಖ್ಯಾತಿಗೆ ಇವರು ಪಾತ್ರರಾದರು. ಕೇವಲ 31 ಎಸೆತಗಳಲ್ಲಿ 3 ಬೌಂಡರಿ ಹಾಗೂ 4 ಭರ್ಜರಿ ಸಿಕ್ಸರ್‌ಗಳೊಂದಿಗೆ 47 ರನ್‌ ಗಳಿಸಿದರು. ಇಂಗ್ಲೆಂಡ್ ಸ್ಟಾರ್ ಬ್ಯಾಟರ್ ನ್ಯಾಟ್‌ ಸೀವರ್‌ ಬ್ರಂಟ್‌ 23 ರನ್‌ ಸಿಡಿಸಿದರು.

ಇದನ್ನೂ ಓದಿ: WPL 2023: ಐಪಿಎಲ್​ ನೋಡೋಕೆ ಮಹಿಳೆಯರಿಗೆ ಸಿಗುತ್ತೆ ಫ್ರೀ ಟಿಕೆಟ್​, ಗಂಡು ಹೈಕ್ಳಿಗೂ ಐತೆ ಡಿಸ್ಕೌಂಟ್!

ಕೌರ್​-ಅಮೆಲಿಯಾ ಕೆರ್ ಅಬ್ಬರ

ಆ ಬಳಿಕ ಬಂದ ನಾಯಕಿ ಕೌರ್‌ ಬರೋಬ್ಬರಿ ಕಿವೀಸ್​ನ ಯುವ ಬ್ಯಾಟರ್​ ಅಮೆಲಿಯಾ ಕೆರ್ ಜೊತೆಗೂಡಿ 89 ರನ್​ಗಳ ಜೊತೆಯಾಟ ನೀಡಿದರು. ಹರ್ಮನ್​ 30 ಎಸೆತಗಳಲ್ಲಿ 14 ಬೌಂಡರಿಗಳೊಂದಿಗೆ 65 ರನ್‌ ಸಿಡಿಸಿದರು. ಆ ಮೂಲಕ ಮಹಿಳಾ ಪ್ರೀಮಿಯರ್‌ ಲೀಗ್‌ನಲ್ಲಿ ಮೊದಲ ಅರ್ಧಶತಕ ಸಿಡಿಸಿದ ಖ್ಯಾತಿಗೆ ಮುಂಬೈ ನಾಯಕಿ ಪಾತ್ರರಾದರು. ಇವರಿಗೆ ಸಾಥ್ ನೀಡಿದ ಕೆರ್​ 24 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 1 ಸಿಕ್ಸರ್ ಸಹಿತ 45 ರನ್​ಗಳಿಸಿ ಅಜೇಯರಾಗಿ ಉಳಿದುಕೊಂಡರು.

64ಕ್ಕೆ ಆಲೌಟ್​ ಆಲೌಟ್​

ಮುಂಬೈ ನೀಡಿದ 208 ರನ್​ಗಳ ಗುರಿಯನ್ನು ಬೆನ್ನಟ್ಟಿದ ಗುಜರಾತ್ ಯಾವುದೇ ಅಂತದಲ್ಲಿ ಪ್ರತಿರೋಧ ತೋರದೆ 15.1 ಓವರ್​ಗಳಲ್ಲಿ ಕೇವಲ 64 ರನ್​ಗಳಿಗೆ ಸರ್ವಪತನ ಕಂಡು 143 ರನ್​ಗಳ ಸೋಲು ಕಂಡಿತು. ಸೈಕಾ ಇಶಾಕ್ 11ಕ್ಕೆ 4, ಅಮೆಲಿಯಾ ಕೆರ್ 12ಕ್ಕೆ 2, ಸೀವರ್​ 5ಕ್ಕೆ2 ಹಾಗೂ ಇಸ್ಸಿ ವಾಂಗ್ 7ಕ್ಕೆ 1 ವಿಕೆಟ್ ಪಡೆದುಕೊಂಡು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಸೊನ್ನೆ ಸುತ್ತಿದ ನಾಲ್ವರು, 20 ಗಡಿ ದಾಟಿದ್ದು ಒಬ್ಬರು ಮಾತ್ರ

208 ರನ್​​ಗಳ ಬೃಹತ್ ಮೊತ್ತ ಬೆನ್ನಟ್ಟಿದ ಗುಜರಾತ್ ಜೇಂಟ್ಸ್ ಆರಂಭದಿಂದಲೇ ಮುಂಬೈ ದಾಳಿಗೆ ಪರದಾಡಿತು. ನಾಯಕಿ ಬೆತ್​ ಮೂನಿ ಗಾಯಗೊಂಡು ರಿಟೈರ್ಡ್​ ಔಟ್​ ಆದರು. ಇವರನ್ನು ಸೇರಿ ಒಟ್ಟ ನಾಲ್ವರು ಬ್ಯಾಟರ್​ ಖಾತೆ ತೆರೆಯದೆ ಪೆವಿಲಿಯನ್ ಸೇರಿಕೊಂಡರು. ಆಸೀಸ್​ ಆಲ್​ರೌಂಡರ್​ ಹಾಗೂ ಲೀಗ್​ ದುಬಾರಿ ವಿದೇಶಿ ಆಟಗಾರ್ತಿ ಗಾರ್ಡ್ನರ್​, ಹರ್ಲೀನ್ ಡಿಯೋಲ್ ಹಾಗೂ ತನುಜಾ ಕನ್ವರ್ ಸೊನ್ನೆಗೆ ವಿಕೆಟ್ ಒಪ್ಪಿಸಿ ನಿರಾಶೆ ಮೂಡಿಸಿದರು.

ದಯಾಳನ್ ಹೇಮಲತಾ23 ಎಸೆತಗಳಲ್ಲಿ 29 ರನ್​ಗಳಿಸಿ ತಂಡದ ಗರಿಷ್ಠ ಸ್ಕೋರರ್​ ಎನಿಸಿಕೊಂಡರು.

ಪುರುಷರ ಐಪಿಎಲ್ ಉದ್ಘಾಟನಾ ಪಂದ್ಯ ನೆನಪಿಸಿದ WPL  ಮೊದಲ ಪಂದ್ಯ

2008ರಲ್ಲಿ ಇಂಡಿಯನ್​ ಪ್ರೀಮಿಯರ್​ ಲೀಗ್​ನ ಮೊದಲ ಪಂದ್ಯ ಕೂಡ ಇದೇ ರೀತಿ ಸಂಪೂರ್ಣ ಏಕಪಕ್ಷೀಯ ಫಲಿತಾಂಶ ಕಂಡಿತ್ತು. ಆರ್​ಸಿಬಿ ಮತ್ತು ಕೆಕೆಆರ್ ನಡುವಿನ ಆ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ್ದ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡ 222 ರನ್​ಗಳಿಸಿದರೆ, ಇದಕ್ಕೆ ಉತ್ತರವಾಗಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಕೇವಲ 82 ರನ್​ಗಳಿಗೆ ಆಲೌಟ್ ಆಗುವ ಮೂಲಕ 140 ರನ್​ಗಳ ಹೀನಾಯ ಸೋಲು ಕಂಡಿತ್ತು. ವಿಶೇಷವೆಂದರೆ ಆ ಪಂದ್ಯದಲ್ಲಿ ಚೇಸಿಂಗ್ ತಂಡ 15.1 ಓವರ್​ಗಳಲ್ಲಿ ಆಲೌಟ್ ಆಗಿತ್ತು. ಇಂದು ಕೂಡ ಗುಜರಾತ್ ಜೇಂಟ್ಸ್ 15.1 ಓವರ್​ಗಳಲ್ಲೇ ಆಲೌಟ್ ಆಗಿದೆ.