Women’s T20 World Cup: ಮಂಧಾನ, ಘೋಷ್​ ಆಟ ವ್ಯರ್ಥ, ಇಂಗ್ಲೆಂಡ್ ವಿರುದ್ಧ 11 ರನ್​ಗಳ ರೋಚಕ ಸೋಲುಂಡ ಭಾರತ

ಮಹಿಳಾ ಟಿ20 ವಿಶ್ವಕಪ್​ನಲ್ಲಿ (T20 world Cup) ಸತತ ಎರಡು ಪಂದ್ಯಗಳಲ್ಲಿ ಗೆದ್ದು ಬೀಗಿದ್ದ ಭಾರತ (India) ತಂಡ ಶನಿವಾರ ನಡೆದ ಇಂಗ್ಲೆಂಡ್ ಮಹಿಳಾ ತಂಡದ ವಿರುದ್ಧದ ಪಂದ್ಯದಲ್ಲಿ 11 ರನ್​ಗಳ  ಸೋಲು ಕಂಡಿದೆ. ಯುವ ಬ್ಯಾಟರ್​ ರಿಚಾ ಘೋಷ್ (Richa Ghosh)​ ಅವರ ಸ್ಪೋಟಕ ಬ್ಯಾಟಿಂಗ್ ಹೊರತಾಗಿಯೂ ಹರ್ಮನ್​ ಪ್ರೀತ್​ ಕೌರ್ (Harmanpreet Kaur)​ ಬಳಗ ಇಂಗ್ಲೆಂಡ್ (England)​ ತಂಡ ನೀಡಿದ್ದ 152 ರನ್​ಗಳ ಗುರಿಯನ್ನು ತಲುಪಲು ಸಾಧ್ಯವಾಗದೇ ಸೋಲು ಕಂಡಿತು. ಇತ್ತ ಸತತ ಮೂರು ಪಂದ್ಯಗಳಲ್ಲಿ ಜಯ ಸಾಧಿಸಿದ ಇಂಗ್ಲೆಂಡ್ ಸೆಮಿಫೈನಲ್ ಪ್ರವೇಶವನ್ನು ಖಚಿತಪಡಿಸಿಕೊಂಡಿದೆ.

ಪೋರ್ಟ್ ಎಲಿಜಬೆತ್‌ನ ಸೇಂಟ್ ಜಾರ್ಜ್ ಪಾರ್ಕ್‌ನಲ್ಲಿ ನಡೆದ ಮಹಿಳಾ ಟಿ20 ವಿಶ್ವಕಪ್​ ಬಿ ಗುಂಪಿನ ಲೀಗ್​ ಪಂದ್ಯದಲ್ಲಿ ಟಾಸ್​ ಗೆದ್ದ ಭಾರತ ತಂಡ ಬೌಲಿಂಗ್ ಆಯ್ಕೆ ಮಾಡಿಕೊಂಡಿತ್ತು. ಪಾಕಿಸ್ತಾನ ಮತ್ತು ವೆಸ್ಟ್​ ಇಂಡೀಸ್​ ವಿರುದ್ಧ ಚೇಸಿಂಗ್ ಮಾಡಿ ಗೆಲುವು ಸಾಧಿಸಿದ್ದರಿಂದ ಈ ಪಂದ್ಯದಲ್ಲಿ ಟಾಸ್​ ಗೆದ್ದ ಕೂಡಲೇ ಹರ್ಮನ್​ ಪ್ರೀತ್ ಕೌರ್​ ಇಂಗ್ಲೆಂಡ್ ತಂಡಕ್ಕೆ ಬ್ಯಾಟಿಂಗ್ ನೀಡಿದರು.

ಇಂಗ್ಲೆಂಡ್ ತಂಡಕ್ಕೆ ಆರಂಭಿಕ ಆಘಾತ

ಟಾಸ್​ ಸೋತು ಬ್ಯಾಟಿಂಗ್ ಇಳಿದಿದ್ದ ಇಂಗ್ಲೆಂಡ್​ 10 ರನ್​ಗಳಾಗುವಷ್ಟರಲ್ಲಿ ಅನುಭವಿ ಡೇನಿಯಲ್ ವ್ಯಾಟ್​(0) ಮತ್ತು ಅಲಿಸ್​ ಕ್ಯಾಪ್ಸೆ(3) ವಿಕೆಟ್ ಕಳೆದುಕೊಂಡಿತು. 5ನೇ ಓವರ್​ನಲ್ಲಿ ಸೋಫಿಯಾ ಡಂಕ್ಲೆ(10) ಕೂಡ ಔಟಾದರು. ಈ ಮೂವರನ್ನು ರೇಣುಕಾ ಸಿಂಗ್​ ಪೆವಿಲಿಯನ್​ಗಟ್ಟಿದ್ದರು.

ಇದನ್ನೂ ಓದಿ: Rohit Sharma: ರೋಹಿತ್​ಗಿರೋದು ಇದೊಂದೇ ಕೆಟ್ಟ ಅಭ್ಯಾಸವಂತೆ, ಹಿಟ್​ಮ್ಯಾನ್ ತಪ್ಪನ್ನು ತಮಾಷೆ ಮಾಡಿದ್ರಂತೆ ಕೊಹ್ಲಿ

ನ್ಯಾಟ್​ ಸೀವರ್​ ಭರ್ಜರಿ ಬ್ಯಾಟಿಂಗ್

ಕೇವಲ 29 ರನ್​ಗಳಾಗುವಷ್ಟರಲ್ಲಿ 3 ವಿಕೆಟ್​ ಕಳೆದುಕೊಂಡಿದ್ದ ಇಂಗ್ಲೆಂಡ್ ತಂಡಕ್ಕೆ ಆಲ್​ರೌಂಡರ್​ ಹಾಗೂ ಐಪಿಎಲ್ ದುಭಾರಿ ವಿದೇಶಿ ಆಟಗಾರ್ತಿಯಾಗಿರುವ ನ್ಯಾಟ್​ ಸೀವರ್​ ಅರ್ಧಶತಕ ಸಿಡಿಸಿ ಇಂಗ್ಲಂಡ್ ತಂಡಕ್ಕೆ ನೆರವಾದರು. ಅವರು ನಾಯಕಿ ಹೀದರ್ ನೈಟ್(28)​ ಜೊತೆಗೂಡಿ 4 ವಿಕೆಟ್​ಗೆ 51 ರನ್​ ಸೇರಿಸಿದರು. ನಂತರ ವಿಕೆಟ್​ ಕೀಪರ್​ ಆ್ಯಮಿ ಜೋನ್ಸ್(40) ಜೊತೆಗೂ 40 ರನ್​ ಸೇರಿಸಿದರು. ಅವರು ಔಟಾಗುವ ಮುನ್ನ 42 ಎಸೆತಗಳಲ್ಲಿ 5 ಬೌಂಡರಿ ಸಹಿತ 50 ರನ್​ಗಳಿಸಿದ್ದರು. ಈ ಮೂವರ ಬ್ಯಾಟಿಂಗ್ ನೆರವಿನಿಂದ ಇಂಗ್ಲೆಂಡ್ ಭಾರತಕ್ಕೆ 152 ರನ್​ಗಳ ಸವಾಲಿನ ಗುರಿಯನ್ನು ನೀಡಿತ್ತು.

ಮಂಧಾನ- ಘೋಷ್​ ಆಟ ವ್ಯರ್ಥ

152 ರನ್​ಗಳ ಕಠಿಣ ಗುರಿ ಬೆನ್ನಟ್ಟಿದ ಭಾರತ ತಂಡ ಉತ್ತಮ ಆರಂಭ ಪಡೆದರೂ ಸ್ಮೃತಿ ಮಂಧಾನ ಅವರಿಗೆ ಸೂಕ್ತ ಬೆಂಬಲ ಸಿಗದ ಕಾರಣ ಹಿನ್ನಡೆ ಅನುಭವಿಸಿತು. ಮೊದಲೆರಡು ಪಂದ್ಯಗಳಲ್ಲಿ ತಂಡದ ಗೆಲುವಿಗೆ ಅಲ್ಪ ಕೊಡುಗೆ ನೀಡಿದ್ದ ಶೆಫಾಲಿ ವರ್ಮಾ ಕೇವಲ 8 ರನ್​ಗಳಿಗೆ ವಿಕೆಟ್​ ಒಪ್ಪಿಸಿದರು. ನಂತರ ಬಂದ ಜೆಮಿಮಾ ರೋಡ್ರಿಗಸ್​ 13, ನಾಯಕಿ ಹರ್ಮನ್​ ಪ್ರೀತ್ ಕೌರ್​ 4 ರನ್​ಗಳಿಗೆ ವಿಕೆಟ್​ ಒಪ್ಪಿಸಿ ನಿರಾಶೆ ಮೂಡಿಸಿದರು.

ಆದರೆ ಉಪನಾಯಕಿ ಮಂಧಾನ ಹಾಗೂ ವಿಕೆಟ್​ ಕೀಪರ್ ರಿಚಾ ಘೋಷ್​ 4ನೇ ವಿಕೆಟ್​ಗೆ 43 ರನ್​ ಸೇರಿಸಿ ಭಾರತಕ್ಕೆ ಗೆಲವಿನ ಆಸೆ ಮೂಡಿಸಿದ್ದರು. ಆದರೆ ಮಂಧಾನ ಔಟಾಗುವುದರೊಂದಿಗೆ ಟೀಮ್ ಇಂಡಿಯಾ ಗೆಲುವಿನ ಆಸೆ ಕೂಡ ಕಮರಿತು. 41 ಎಸೆತಗಳನ್ನು ಮಂಧಾನ 7 ಬೌಂಡರಿ ಹಾಗೂ 1 ಸಿಕ್ಸರ್ ಸಹಿತ 52 ರನ್​ಗಳಿಸಿದರು.

ಮಂಧಾನ ವಿಕೆಟ್ ಒಪ್ಪಿಸಿದಾಗ ಭಾರತದ ಗೆಲುವಿಗೆ 24 ಎಸೆತಗಳಲ್ಲಿ 47 ರನ್​ಗಳ ಅವಶ್ಯಕತೆಯಿತ್ತು. ಆದರೆ 35 ರನ್​ಗಳನ್ನಷ್ಟೇ ಗಳಿಸಲು ಶಕ್ತವಾಗಿ 11 ರನ್​ಗಳ ಸೋಲೊಪ್ಪಿಕೊಂಡಿತು. ರಿಚಾ 34 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 2 ಸಿಕ್ಸರ್​ಗಳ ಸಹಿತ 47 ರನ್​ಗಳಿಸಿ ಅಜೇಯರಾಗಿ ಉಳಿದುಕೊಂಡರು.

ಇಂಗ್ಲೆಂಡ್​ಗೆ ಸತತ 6ನೇ ಜಯ

ಭಾರತದ ವಿರುದ್ಧ ಟಿ20 ವಿಶ್ವಕಪ್​ನಲ್ಲಿ ಸತತ 6ನೇ ಜಯ ಸಾಧಿಸಿದ ಇಂಗ್ಲೆಂಡ್​ ತಂಡ ಬಿ ಗುಂಪಿನಲ್ಲಿ ಅಗ್ರಸ್ಥಾನ ಪಡೆದುಕೊಂಡಿದೆ. ಅಲ್ಲದೆ ಸತತ ಮೂರು ಪಂದ್ಯಗಳಲ್ಲಿ ಜಯ ಸಾಧಿಸಿರುವ ಆಂಗ್ಲ ಪಡೆ 2023ರ ಟಿ20 ವಿಶ್ವಕಪ್​ನಲ್ಲಿ ಸೆಮಿಫೈನಲ್ ಪ್ರವೇಶವನ್ನು ಖಚಿತಪಡಿಸಿಕೊಂಡಿದೆ.

ಹರ್ಮನ್ ಪ್ರೀತ್ ಕೌರ್ ಬಳಗ ತನ್ನ ಕೊನೆಯ ಪಂದ್ಯವನ್ನು ಮಾರ್ಚ್​ 18ರಂದು ಐರ್ಲೆಂಡ್​ ವಿರುದ್ಧ ಆಡಲಿದೆ. ಬಿ ಗುಂಪಿನಲ್ಲಿ ಉಪಾಂತ್ಯ ಪ್ರವೇಶಿಸಲು ಈ ಪಂದ್ಯವನ್ನು ಭಾರತ ತಂಡ ಗೆಲ್ಲಲೇಬೇಕಿದೆ.