Paolo Rossi: 1982ರ ಫುಟ್​ಬಾಲ್ ವಿಶ್ವಕಪ್ ಹೀರೋ ಪಾವೊಲೊ ರೊಸ್ಸಿ ನಿಧನ

1982ರಲ್ಲಿ ವಿಶ್ವಕಪ್ ಫುಟ್​ಬಾಲ್ ಚಾಂಪಿಯನ್ ತಂಡ ಇಟಲಿಯ ಸ್ಟಾರ್ ಆಟಗಾರ ಪಾವೊಲೊ ರೊಸ್ಸಿ ನಿಧನರಾಗಿದ್ದಾರೆ. 64 ವರ್ಷದ ರೊಸ್ಸಿ ಇಹಲೋಕ ತ್ಯಜಿಸಿರುವ ಸುದ್ದಿಯನ್ನು ಪತ್ನಿ ಫೆಡಿರಿಕಾ ಇನ್​ಸ್ಟಾಗ್ರಾಮ್​ ಮೂಲಕ ತಿಳಿಸಿದ್ದಾರೆ. ಕಳೆದ ಕಲೆ ವರ್ಷಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ರೊಸ್ಸಿ ಅವರ ಆರೋಗ್ಯ ಕಳೆದ ಕೆಲ ದಿನಗಳಿಂದ ಬಿಗಡಾಯಿಸಿತ್ತು ಎಂದು ಇಟಲಿ ಮಾಧ್ಯಮಗಳು ವರದಿ ಮಾಡಿವೆ.

ಇಟಲಿ ಫುಟ್​ಬಾಲ್​ ವಿಶ್ವಕಪ್ ತಂದುಕೊಡುವ ಮೂಲಕ ಹೊಸ ಸ್ಪರ್ಶ ನೀಡಿದ್ದ ಪಾವೊಲೊ ರೊಸ್ಸಿ ನಿಧನ ಈಗ ಇಟಲಿಯನ್ ಫುಟ್​ಬಾಲ್ ಪ್ರೇಮಿಗಳನ್ನು ದುಃಖಕ್ಕೆ ದೂಡಿದೆ. 1982 ರ ಸೆಮಿಫೈನಲ್ ಪಂದ್ಯದಲ್ಲಿ ಪೊಲೆಂಡ್ ವಿರುದ್ಧ 2 ಗೋಲು ಬಾರಿಸಿ ಇಟಲಿ ಫೈನಲ್ ಪ್ರವೇಶಿಸಲು ಕಾರಣರಾಗಿದ್ದರು. ಅಲ್ಲದೆ ಫೈನಲ್ ಪಂದ್ಯದಲ್ಲಿ ಬಲಿಷ್ಠ ಜರ್ಮನಿ ವಿರುದ್ಧ ಆರಂಭಿಕ ಗೋಲು ದಾಖಲಿಸಿ 3-1 ಅಂತರದಿಂದ ಇಟಲಿ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದರು. ಇನ್ನು ಇದೇ ವಿಶ್ವಕಪ್​ನಲ್ಲಿ ರೊಸ್ಸಿ 6 ಅದ್ಭುತ ಗೋಲುಗಳನ್ನು ದಾಖಲಿಸಿರುವುದು ವಿಶೇಷ.

ಇನ್ನು ಯುವೆಂಟಸ್ ಕ್ಲಬ್​ನ್ನು ಪ್ರತಿನಿಧಿಸಿದ್ದ ರೊಸ್ಸಿ, ಎರಡು ಬಾರಿ ಸಿರೀ ಎ ಪ್ರಶಸ್ತಿಯನ್ನು ತಂದುಕೊಟ್ಟಿದ್ದರು. ಹಾಗೆಯೇ ಯುರೋಪಿಯನ್ ಲೀಗ್ ಕಪ್​ ಹಾಗೂ ಕೋಪಾ ಕಪ್​ಗಳನ್ನು ಗೆಲ್ಲುವಲ್ಲಿಯೂ ಪ್ರಮುಖ ಪಾತ್ರವಹಿಸಿದ್ದರು. ಇಟಲಿ ಪರ 48 ಪಂದ್ಯಗಳಲ್ಲಿ 20 ಗೋಲುಗಳನ್ನು ದಾಖಲಿಸಿರುವ ಅವರು 1982 ರಲ್ಲಿ ವರ್ಷದ ಯುರೋಪಿಯನ್ ಫುಟ್ಬಾಲ್ ಆಟಗಾರರಾಗಿ ಆಯ್ಕೆಯಾಗಿದ್ದರು.

1986 ರ ವಿಶ್ವಕಪ್ ವಿಜೇತ ಅರ್ಜೆಂಟೀನಾ ಫುಟ್ಬಾಲ್ ದಂತಕಥೆ ಡಿಯಾಗೋ ಮರಡೋನಾ ಅವರ ಮರಣ ಅರ್ಜೆಂಟೀನಾ ಫುಟ್​ಬಾಲ್ ಪ್ರೇಮಿಗಳನ್ನು ನೋವಿನ ಕಡಲಿಗೆ ತಳ್ಳಿದರೆ, ಎರಡು ವಾರಗಳ ಬಳಿಕ ಪಾವೊಲೊ ರೊಸ್ಸಿ ಅವರ ನಿಧನ ಇಟಲಿಯನ್ ಫುಟ್​ಬಾಲ್ ಪ್ರೇಮಿಗಳ ದುಃಖಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ: ICC T20 Rankings: ನೂತನ ಟಿ20 ರ‍್ಯಾಕಿಂಗ್ ಪ್ರಕಟ: ಟಾಪ್ 10 ಪಟ್ಟಿಯಲ್ಲಿ ಇಬ್ಬರು ಭಾರತೀಯರು