PBKS vs LSG: ಪಂಜಾಬ್​ ವಿರುದ್ಧ ಲಕ್ನೋಗೆ ಭರ್ಜರಿ ಗೆಲುವು, ಸೋಲಿನ ಸೇಡು ತೀರಿಸಿಕೊಂಡ ರಾಹುಲ್​ ಪಡೆ

ಮೊಹಾಲಿಯಲ್ಲಿ ರನ್‌ಗಳ ಮಹಾಪೂರವೇ ಹರಿಯಿತು. ಲಕ್ನೋ ಬ್ಯಾಟರ್‌ಗಳು ಒಬ್ಬರ ನಂತರ ಒಬ್ಬರಂತೆ ಪಂಜಾಬ್ ಬೌಲರ್‌ಗಳ ಮೇಲೆ ದಾಳಿ ನಡೆಸಿದರು. ಟಾಸ್ ಸೋತು ಬ್ಯಾಟಿಂಗ್ ಮಾಡಿದ ಲಕ್ನೋ ಸೂಪರ್ ಜೈಂಟ್ಸ್ (PBKS vs LSG) ನಿಗದಿತ 20 ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 257 ರನ್ ಗಳಿಸಿತು. ಈ ಮೂಲಕ ಲಕ್ನೋ ತಂಡ ಐಪಿಎಲ್​ನಲ್ಲಿ (IPL) ಅತಿ ಹೆಚ್ಚು ರನ್​ ಸಿಡಿಸಿದ 2ನೇ ತಂಡ ಎಂಬ ಖ್ಯಾತಿಗೆ ಪಾತ್ರವಾಯಿತು. ಈ ದಾಖಲೆಯ ಮೊತ್ತ ಬೆನ್ನಟ್ಟಿದ ಪಂಜಾಬ್​ ಕಿಂಗ್ಸ್ ತಂಡವು ನಿಗದಿತ 19.5 ಓವರ್​ಗಳಲ್ಲಿ 10 ವಿಕೆಟ್​ ನಷ್ಟಕ್ಕೆ 201 ರನ್​ ಗಳಿಸುವ ಮೂಲಕ 56 ರನ್​ ಗಳಿಂದ ಸೋಲನ್ನಪ್ಪಿತು. 

ಭರ್ಜರಿ ಫೈಪೋಟಿ ನೀಡಿದ ಪಂಜಾಬ್​:

ಇನ್ನು, ಲಕ್ನೋ ನೀಡಿದ ಬೃಹತ್ ಮೊತ್ತ ಬೆನ್ನಟ್ಟಿದ ಪಂಜಾಬ್​ ಪಡೆ ಸರಿಯಾದ ಉತ್ತರವನ್ನೇ ನೀಡಿತು. ಆದರೆ ಕೊನೆಯಲ್ಲಿ ಎಡವಿತು. ಪಂಜಾಬ್​ ಅಂತಿಮವಾಗಿ  19.5 ಓವರ್​ಗಳಲ್ಲಿ 10 ವಿಕೆಟ್​ ನಷ್ಟಕ್ಕೆ 201 ರನ್​ ಗಳಿಸಿತು. ಪಂಜಾಬ್​ ಪರ ಸಿಂಗ್​ 9 ರನ್, ಶಿಖರ್ ಧವನ್ 1 ರನ್, ಸಿಕಂದರ್ ರಜಾ 36 ರನ್, ಲಿಯಾಮ್ ಲಿವಿಂಗ್‌ಸ್ಟೋನ್ 23 ರನ್, ಸ್ಯಾಮ್ ಕರನ್​ 21 ರನ್, ಅಥರ್ವಾ 66 ರನ್,  ಜಿತೇಶ್ ಶರ್ಮಾ 24 ರನ್, ಶಾರುಖ್ ಖಾನ್ 6 ರನ್, ಕಗಿಸೊ ರಬಾಡ ಶೂನ್ಯ, ಅರ್ಶ್‌ದೀಪ್ ಸಿಂಗ್ 2 ರನ್ ಗಳಿಸಿದರು.

Match 38. Lucknow Super Giants Won by 56 Run(s) https://t.co/cS0dBLmzWT #TATAIPL #PBKSvLSG #IPL2023

— IndianPremierLeague (@IPL) April 28, 2023

ಇನ್ನು, ವಿಚಿತ್ರ ಎಂಬಂತೆ ಇಂದು ಲಕ್ನೋ ಪರ ಬರೋಬ್ಬರಿ 9 ಆಟಗಾರರು ಬೌಲಿಂಗ್​ ಮಾಡಿದರು. ಕೀಪರ್​, ನಾಯಕ ಕೆಎಲ್ ರಾಹುಲ್​ ಹೊರತುಪಡಿಸಿ ಉಳಿದವರೆಲ್ಲರೂ ಬೌಲಿಂಗ್​ ಮಾಡಿದ್ದಾರೆ. ಲಕ್ನೋ ಪರ ಕೈಲ್ ಮೇಯರ್ಸ್ 1 ಓವರ್​ 4 ರನ್, ಮಾರ್ಕಸ್ ಸ್ಟೊಯಿನಿಸ್ 1.5 ಓವರ್​ಗೆ 21 ರನ್ 1 ವಿಕೆಟ್ , ಕೃನಾಲ್ ಪಾಂಡ್ಯ 1 ಓವರ್​ 13 ರನ್, ನವೀನ್-ಉಲ್-ಹಕ್ 4 ಓವರ್​ಗೆ 30 ರನ್ 3 ವಿಕೆಟ್​, ರವಿ ಬಿಷ್ಣೋಯ್ 4 ಓವರ್​ಗೆ 41 ರನ್​ 2 ವಿಕೆಟ್​, ಅವೇಶ್ ಖಾನ್ 2 ಓವರ್​ಗೆ 28 ರನ್, ಅಮಿತ್​ ಮಿಶ್ರಾ 2 ಓವರ್​ 234 ರನ್ ಮತ್ತು ಯಶ್ ಠಾಕೂರ್ 3.4 ಓವರ್​ಗೆ 4 ವಿಕೆಟ್​ ಪಡೆದರು.

ಇದನ್ನೂ ಓದಿ: LSG vs PBKS: ಐಪಿಎಲ್​ನಲ್ಲಿ ಇತಿಹಾಸ ನಿರ್ಮಿಸಿದ ಲಕ್ನೋ ತಂಡ, ಸ್ವಲ್ಪದರಲ್ಲಿಯೇ RCB ದಾಖಲೆ ಸೇಫ್​!

ಪಂಜಾಬ್​ ಬೌಲರ್​ಗಳ ಬೆಂಡೆತ್ತಿದ ಲಕ್ನೋ:

ಮೊಹಾಲಿಯಲ್ಲಿ ಅಬ್ಬರಿಸಿದ ಲಕ್ನೋ ಬ್ಯಾಟರ್​ಗಳು ಇತಿಹಾಸ ನಿರ್ಮಿಸಿದರು. ಲಕ್ನೋ ಬ್ಯಾಟ್ಸ್‌ಮನ್‌ಗಳ ಪೈಕಿ ಸ್ಟೊಯಿನಿಸ್ (40 ಎಸೆತಗಳಲ್ಲಿ 72; 6 ಬೌಂಡರಿ, 5 ಸಿಕ್ಸರ್) ಮತ್ತು ಕೈಲ್ ಮೇಯರ್ಸ್ (24 ಎಸೆತಗಳಲ್ಲಿ 54; 7 ಬೌಂಡರಿ, 4 ಸಿಕ್ಸರ್) ಅರ್ಧಶತಕದೊಂದಿಗೆ ಧೂಳೆಬ್ಬಿಸಿದರು. ಆಯುಷ್ ಬಡೋನಿ (24 ಎಸೆತಗಳಲ್ಲಿ 43 ರನ್; 3 ಬೌಂಡರಿ, 3 ಸಿಕ್ಸರ್) ಮತ್ತು ನಿಕೋಲಸ್ ಪೂರನ್ (19 ಎಸೆತಗಳಲ್ಲಿ 45 ರನ್; 7 ಬೌಂಡರಿ, 1 ಸಿಕ್ಸರ್) ಮಿಂಚಿದರು. ಲಕ್ನೋ ಆರಂಭಿಕ ಆಟಗಾರ ಕೈಲ್ ಮೇಯರ್ಸ್ ವಿಧ್ವಂಸಕರಾದರು.

ಆದರೆ ಓಪನರ್ ಕೆಎಲ್ ರಾಹುಲ್ ಕೇವಲ 12 ರನ್ ಗಳಿಸಿ ಕಗಿಸೊ ರಬಾಡ ಬೌಲಿಂಗ್ ನಲ್ಲಿ ಔಟಾದರು. ಆದರೆ ಇತ್ತ ಮೇಯರ್ಸ್​ ಕೇವಲ 20 ಎಸೆತಗಳಲ್ಲಿ ಅರ್ಧಶತಕ ದಾಖಲಿಸಿದರು. ಬಳಿಕ ಜೊತೆಗೂಡಿದ ಬಡೋನಿ ಮತ್ತು ಕೈಲ್ ಮೇಯರ್ಸ್ ಮೂರನೇ ವಿಕೆಟ್‌ಗೆ 89 ರನ್‌ಗಳ ಜೊತೆಯಾಟವಾಡಿದರು. ಆ ಬಳಿಕ ಸ್ಟೊಯಿನಿಸ್ ಜತೆಗೂಡಿದ ನಿಕೋಲಸ್ ಪೂರನ್ ಕೂಡ ಅಬ್ಬರಿಸಿದರು. ಸ್ಟೊಯಿನಿಸ್ ಕೂಡ ಅರ್ಧಶತಕ ಪೂರೈಸಿದರು. ಅವರು 40 ಎಸೆತಗಳಲ್ಲಿ 73 ರನ್ ಗಳಿಸಿದರು. ಅವರ ಇನ್ನಿಂಗ್ಸ್‌ನಲ್ಲಿ 6 ಬೌಂಡರಿ ಮತ್ತು 5 ಸಿಕ್ಸರ್‌ ಸಿಡಿದವು.