India Vs England Test: ಇಂಗ್ಲೆಂಡ್​ ವಿರುದ್ಧ ಭಾರತಕ್ಕೆ ಭರ್ಜರಿ ಗೆಲುವು: ಓವಲ್​ನಲ್ಲಿ 157 ರನ್​ಗಳ ಜಯ

ಭಾರತ ಮತ್ತು ಇಂಗ್ಲೆಂಡ್​ ನಡುವಿನ ಐದು ಪಂದ್ಯಗಳ ಟೆಸ್ಟ್​​ ಸರಣಿಯ (India Vs England Test Series) ಪ್ರತಿಯೊಂದು ಪಂದ್ಯವೂ ಸಾಕಷ್ಟು ಕುತೂಹಲದಿಂದ ಕೂಡಿದೆ. ಮೊದಲ ಇನ್ನಿಂಗ್ಸ್​ನಲ್ಲಿ ಕಳಪೆ ಪ್ರದರ್ಶನ ನೀಡಿದ್ದ ನಾಯಕ ವಿರಾಟ್​ ಕೊಹ್ಲಿ (Virat Kohli) ಪಡೆ, ಎರಡನೇ ಇನ್ನಿಂಗ್ಸ್​ನಲ್ಲಿ ಉತ್ತಮ ಕಮ್​ ಬ್ಯಾಕ್​ ಮಾಡುವ ಮೂಲಕ, ಸರಣಿಯಲ್ಲಿ 2-1 (India Leads Series vs England) ಮುನ್ನಡೆ ಸಾಧಿಸಿದೆ. ನಾಲ್ಕನೇ ಟೆಸ್ಟ್​ನ ಐದನೇ ದಿನವಾದ ಇಂದು ಇಂಗ್ಲೆಂಡ್​ ತಂಡವನ್ನು ಆಲ್​ ಔಟ್​ ಮಾಡುವಲ್ಲಿ ಯಶಸ್ವಿಯಾದ ಭಾರತದ ಬೌಲಿಂಗ್​ ಪಡೆ, 157 ರನ್​​ಗಳ ಅಮೋಘ ಗೆಲುವನ್ನು ತಂದುಕೊಟ್ಟರು.

ಮೊದಲ ಇನ್ನಿಂಗ್ಸ್​ನಲ್ಲಿ ಕೇವಲ 191 ರನ್​ಗಳಿಗೆ ಆಲ್​ ಔಟ್​ ಆಗುವ ಮೂಲಕ ಭಾರತ ತಂಡ ತೀವ್ರ ಮುಖಭಂಗ ಎದುರಿಸಿತ್ತು. ಆಲ್​ರೌಂಡರ್​ ಶಾರ್ದುಲ್​ ಠಾಕೂರ್​ (Shardul Thakur Special Knock) ಹೊರತುಪಡಿಸಿ ಮಿಕ್ಕೆಲ್ಲಾ ಸ್ಪೆಷಲಿಸ್ಟ್​ ಬ್ಯಾಟ್ಸ್​ಮನ್​ಗಳ ಆಟ ಇಂಗ್ಲೆಂಡ್​ ತಂಡದ ವಿರುದ್ಧ ನಡೆಯಲಿಲ್ಲ. ಆದರೆ ಉತ್ತಮವಾಗಿ ಬೌಲಿಂಗ್​ ಪ್ರದರ್ಶಿಸಿದ ಬುಮ್ರಾ ನೇತೃತ್ವದ ವೇಗಿಗಳು 290 ರನ್​ಗಳಿಗೆ ಇಂಗ್ಲೆಂಡ್​ ಆಟಗಾರರನ್ನು ಕಟ್ಟಿಹಾಕಿದರು. ಪಿಚ್​ ಕೇವಲ ಬೌಲರ್​ಗಳಿಗೆ ಸಹಾಯ ಮಾಡುತ್ತಿದೆ ಎಂಬತ್ತಿದ್ದಾಗ, ಎರಡನೇ ಇನ್ನಿಂಗ್ಸ್​ ಆರಂಭಿಸಿದ ಭಾರತ ತಂಡದ ಓಪನರ್ಸ್​ಗಳಾದ ರೋಹಿತ್​ ಶರ್ಮಾ (Rohit Sharma) ಮತ್ತು ಕೆ.ಎಲ್​. ರಾಹುಲ್​ (KL Rahul) ಉತ್ತಮ ಆರಂಭ ಒದಗಿಸಿದರು. ಇಬ್ಬರೂ ಶತಕದ ಜತೆಯಾಟವಾಡಿದರು. ಅರ್ಧ ಶತಕದ ಅಂಚಿನಲ್ಲಿದ್ದ ಕೆ.ಎಲ್​. ರಾಹುಲ್​ ವಿಕೆಟ್​ ಒಪ್ಪಿಸಿದರೆ, ರೋಹಿತ್​ ಅಮೋಘ ಶತಕ ಸಿಡಿಸಿದರು.

ಇದನ್ನೂ ಓದಿ: ಇಂಗ್ಲೆಂಡ್ ಪಿಚ್​ಗಳಲ್ಲಿ ರೋಹಿತ್ ಶರ್ಮಾ ಬ್ಯಾಟಿಂಗ್ ಸಾಧನೆ ಮತ್ತು ದಾಖಲೆ

ಎರಡನೇ ಇನ್ನಿಂಗ್ಸ್​ನಲ್ಲಿ ಉತ್ತಮ ಆಟವಾಡಿ ಇಂಗ್ಲೆಂಡ್​ಗೆ 366 ರನ್​ಗಳ ಟಾರ್ಗೆಟ್​ ನೀಡಿದರು. ಇದನ್ನು ಬೆನ್ನತ್ತಿದ್ದ ಇಂಗ್ಲೆಂಡ್​ ತಂಡದ ಆರಂಭಿಕ ದಾಂಡಿಗರಾದ ರೋರಿ (Rory Burns) ಬರ್ನ್ಸ್​ ಮತ್ತು (Haseeb Hameed) ಹಸೀಬ್​ ಹಮೀದ್​ ಒಳ್ಳೆಯ ಪ್ರದರ್ಶನ ನೀಡಿ ಶತಕದ ಜತೆಯಾಟವಾಡಿದರಾದರೂ ಬರ್ನ್ಸ್​ 50 ಮತ್ತು ಹಮೀದ್​ 63 ರನ್​ಗಳಿಗೆ ಹೋರಾಟ ನಿಲ್ಲಿಸಿದರು.ನಂತರ ಬಂದ ಡೇವಿಡ್​ ಮಲನ್ (David Malan)​ ಮತ್ತು ಜೋ ರೂಟ್ (Joe Root)​ ಇಬ್ಬರೂ ಉತ್ತಮ ಪ್ರದರ್ಶನ ನೀಡಲಿಲ್ಲ. ಅವರ ನಂತರ ಬಂದ ಯಾರೂ ಭಾರತದ ದಾಳಿಗೆ ಸರಿಯಾದ ಉತ್ತರ ನೀಡಲೇ ಇಲ್ಲ. ನಾಲ್ಕು ಟೆಸ್ಟ್​​ಗಳಲ್ಲಿ ಕಳಪೆ ಪ್ರದರ್ಶನ ನೀಡಿ ಆಯ್ಕೆಯ ಬಗ್ಗೆ ಪ್ರಶ್ನೆ ಏಳುವಂತೆ ಮಾಡಿದ್ದ ರವೀಂದ್ರ ಜಡೇಜಾ 5 ವಿಕೆಟ್​ ಪಡೆದು ಮಿಂಚಿದರು. ಇನ್ನೂ ಜಸ್ಪ್ರೀತ್​ ಬುಮ್ರಾ (Jaspreet Bumrah) 2 ಮತ್ತು ಉಮೇಶ್​ ಯಾದವ್ (Umesh Yadav)​ 3 ವಿಕೆಟ್​ ಪಡೆದು ಮಿಂಚಿದರು.

ಇದನ್ನೂ ಓದಿ: ಆರ್‌ಸಿಬಿ ತಂಡ ಸೇರಿದ ಎಬಿ ಡಿವಿಲಿಯರ್ಸ್; ಸನ್ ರೈಸರ್ಸ್ ತಂಡ ಸೇರಿದ ಕೇನ್ ವಿಲಿಯಮ್ಸನ್

ಶಾರ್ದುಲ್​ ಠಾಕೂರ್​ (Shardul Thakur) ಎರಡು ವಿಕೆಟ್​ ಪಡೆದರೆ, ಮೊಹಮ್ಮದ್​ ಸಿರಾಜ್​ (Mohammed Siraj) ಯಾವುದೇ ವಿಕೆಟ್​ ಪಡೆಯಲಿಲ್ಲ. ಒಟ್ಟಿನಲ್ಲಿ ಐದು ಪಂದ್ಯಗಳ ಸರಣಿಯಲ್ಲಿ 2 ಪಂದ್ಯಗಳನ್ನು ಗೆದ್ದು ಸರಣಿಯಲ್ಲಿ ಭಾರತ ಮುಂದಿದೆ. ಒಂದು ಪಂದ್ಯ ಗೆದ್ದಿರುವ ಇಂಗ್ಲೆಂಡ್​ಗೆ ಮುಂದಿನ ಮತ್ತು ಕಡೆಯ ಪಂದ್ಯದಲ್ಲಿ ಗೆಲ್ಲಲೇಬೇಕಾದ ಅನಿವಾರ್ಯತೆಯಿದೆ.