SRH vs GT: ಹೈದರಾಬಾದ್​ ವಿರುದ್ಧ ಗುಜರಾತ್​ಗೆ ಭರ್ಜರಿ ಜಯ, ಪ್ಲೇಆಫ್​ಗೆ ಲಗ್ಗೆಯಿಟ್ಟ ಹಾರ್ದಿಕ್​ ಬಾಯ್ಸ್

ಈ ವರ್ಷ ಶತಕಗಳ ಮೇಲೆ ಶತಕ ಬಾರಿಸುತ್ತಿರುವ ಗಿಲ್ (Shubman Gill) ಚೊಚ್ಚಲ ಐಪಿಎಲ್​ ಶತಕವನ್ನೂ ಸಿಡಿಸಿ ಮಿಂಚಿದ್ದಾರೆ. ಹೌದು, ಐಪಿಎಲ್ 2023ರ ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧ ನಡೆಯುತ್ತಿರುವ ಪಂದ್ಯದಲ್ಲಿ ಗಿಲ್ ಶತಕ ಭರ್ಜರಿ ಶತಕ ಸಿಡಿಸಿ ಅಬ್ಬರಿಸಿದರು. ಮೊದಲು ಬ್ಯಾಟ್ ಮಾಡಿದ ಗುಜರಾತ್ ಟೈಟಾನ್ಸ್ (SRH vs GT) 20 ಓವರ್‌ಗಳಲ್ಲಿ 9 ವಿಕೆಟ್‌ಗೆ 188 ರನ್ ಗಳಿಸಿತು. ಈ ಮೊತ್ತ ಬೆನ್ನಟ್ಟಿದ ಹೈದರಾಬಾದ್​ ತಂಡ 20 ಓವರ್​ನಲ್ಲಿ 9 ವಿಕೆಟ್​ ನಷ್ಟಕ್ಕೆ 154 ರನ್​ ಗಳಿಸುವ ಮೂಲಕ  34 ರನ್​ ಗಳ ಹೀನಾಯ ಸೋಲನ್ನಪ್ಪಿತು. ಈ ಮೂಲಕ ಗುಜರಾತ್​ ತಂಡ ಐಪಿಎಲ್ 2023ರ (IPL 2023) ಮೊದಲ ತಂಡವಾಗಿ ಅಧಿಕೃತವಾಗಿ ಪ್ಲೇಆಫ್​ಗೆ ಪ್ರವೇಶಿಸಿದೆ.

ಕ್ಲಾಸೆನ್ ಕ್ಲಾಸಿಕ್​ ಆಟ:

ಗುಜರಾತ್​ ನೀಡಿದ ಟಾರ್ಗೆಟ್​ ಬೆನ್ನಟ್ಟಿದ ಹೈದರಾಬಾದ್​ ತಂಡ ಆರಂಭದಿಂದಲೇ ವಿಕೆಟ್​ ಕಳೆದುಕೊಳ್ಳಲಾರಂಭಿಸಿತು. ಹೈದರಾಬಾದ್​ ಪರ ಅಭಿಷೇಕ್ ಶರ್ಮಾ 5 ರನ್, ರಾಹುಲ್ ತ್ರಿಪಾಠಿ 1 ರನ್, ನಾಯಕ ಏಡೆನ್ ಮಾರ್ಕ್ರಾಮ್ 10 ರನ್, ಅಬ್ದುಲ್ ಸಮದ್ 4 ರನ್, ಅನ್​ಮೋಲ್​ಪ್ರೀತ್​ ಸಿಂಗ್​ 5 ರನ್, ಸನ್ವಿರ್ ಸಿಂಗ್ 7 ರನ್, ಮಾರ್ಕೊ ಜಾನ್ಸೆನ್ 3 ರನ್, ಹೆನ್ರಿಚ್ ಕ್ಲಾಸೆನ್ 44 ಎಸೆತ 3 ಸಿಕ್ಸ್ ಮತ್ತು 4 ಫೋರ್​ ಮೂಲಕ 64 ರನ್​ ಮತ್ತು ಭುವನೇಶ್ವರ್ ಕುಮಾರ್ 27 ರನ್​ ಗಳಿಸಿದರೂ ತಂಡಕ್ಕೆ ಗೆಲುವು ತಂದುಕೊಡುವಲ್ಲಿ ಯಶಸ್ವಿಯಾಗಲಿಲ್ಲ.

ಪ್ಲೇಆಫ್​ಗೆ ಲಗ್ಗೆಯಿಟ್ಟ ಗುಜರಾತ್​:

ಇನ್ನು, ಗುಜರಾತ್​ ಟೈಟನ್ಸ್ ತಂಡವು ಈ ಬಾರಿ ಐಪಿಎಲ್​ನ ಮೊದಲ ತಂಡವಾಗಿ ಪ್ಲೇಆಫ್​ಗೆ ಅಧಿಕೃತವಾಗಿ ಲಗ್ಗೆಯಿಟ್ಟಿದೆ. ಆದರೆ ಸನ್​ರೈಸರ್ಸ್​ ಹೈದರಾಬಾದ್​ ತಂಡ ಡೆಲ್ಲಿ ಬಳಿಕ ಇದೀಗ ಐಪಿಎಲ್​ 2023ರಿಂದ ಹೊರಬಿದ್ದಿದೆ. ಗುಜರಾತ್​ ತಂಡ ಆಡಿರುವ 13 ಪಂದ್ಯದಲ್ಲಿ 9ರಲ್ಲಿ ಗೆದ್ದು 4ರಲ್ಲಿ ಸೋಲುವ ಮೂಲಕ 18 ಅಂಕದೊಂದಿಗೆ ಪ್ಲೇಆಫ್​ ಪ್ರವೇಶಿಸಿದೆ. ಆದರೆ ಹೈದರಾಬಾದ್​ ತಂಡ ಆಡಿರುವ 12ರಲ್ಲಿ 4ರಲ್ಲಿ ಗೆದ್ದು 8ರಲ್ಲಿ ಸೋಲುವ ಮೂಲಕ ಕೇವಲ 8 ಅಂಕದೊಂದಿಗೆ ಪ್ಲೇಆಫ್​ ರೇಸ್​ನಿಂದ ಹೊರಬಿದ್ದಿದೆ.

ಇದನ್ನೂ ಓದಿ: Rcb Playoff Scenario: ಮುಂಬೈ ಕೈಯಲ್ಲಿದೆ ಆರ್​ಸಿಬಿ ಅಳಿವು ಉಳಿವಿನ ಪ್ರಶ್ನೆ, ರೋಹಿತ್​ ಗೆಲುವಿನ ಮೇಲೆ ನಿಂತಿದೆ ಫಾಫ್​ ಭವಿಷ್ಯ

ಗಿಲ್​-ಸಾಯಿ ಭರ್ಜರಿ ಜೊತೆಯಾಟ:

ಟಾಸ್ ಗೆದ್ದ ಸನ್ ಹೈದರಾಬಾದ್ ತಂಡವು ಗುಜರಾತ್ ಟೈಟಾನ್ಸ್ ತಂಡವನ್ನು ಬ್ಯಾಟಿಂಗ್ ಮಾಡಲು ಆಹ್ವಾನಿಸಲಾಯಿತು. ಗುಜರಾತ್​ ಪರ ಸಹಾ (0) ಖಾತೆ ತೆರೆಯದೆ ಪೆವಿಲಿಯನ್ ತಲುಪಿದರು. ಆದರೆ ಒಂದು ತಿಂಗಳ ವಿರಾಮದ ನಂತರ ಅಂತಿಮ ತಂಡಕ್ಕೆ ಮರಳಿದ ಸಾಯಿ ಸುದರ್ಶನ್ ಅವರೊಂದಿಗೆ ಶುಭಮನ್ ಗಿಲ್ ಉತ್ತಮ ಜೊತೆಯಾಟವಾಡಿದರು. ಇವರಿಬ್ಬರು ಎರಡನೇ ವಿಕೆಟ್‌ಗೆ 147 ರನ್ ಸೇರಿಸಿದರು. ಆದರೆ 90 ರನ್​ ಆಗುವವರೆಗೂ ಆಕ್ರಮಣಕಾರಿ ಆಟವಾಡಿದ ಶುಭಮನ್ ಗಿಲ್ ಆ ಬಳಿಕ ನಿಧಾನಕ್ಕೆ ಸಾಗಿದರು.

ಮತ್ತೊಂದೆಡೆ ಹಾರ್ದಿಕ್ ಪಾಂಡ್ಯ (8), ಮಿಲ್ಲರ್ (7), ರಾಹುಲ್ ತೆವಾಟಿಯಾ (3) ಮತ್ತು ರಶೀದ್ ಖಾನ್ (0) ತಕ್ಷಣವೇ ಔಟಾದರು. ಶತಕದ ಬಳಿಕ ಗಿಲ್ ಕೂಡ ಪೆವಿಲಿಯನ್ ತಲುಪಿದರು. ಒಂದು ಹಂತದಲ್ಲಿ 147/1 ಸ್ಕೋರ್ ಮಾಡಿದ್ದ ಗುಜರಾತ್ ಟೈಟಾನ್ಸ್ ಕೊನೆಯ 8 ವಿಕೆಟ್ ಗಳನ್ನು ಕೇವಲ 41 ರನ್ ಗಳಲ್ಲಿ ಕಳೆದುಕೊಂಡಿತು. ಕೊನೆಯ ಓವರ್ ಬೌಲ್ ಮಾಡಿದ ಭುವನೇಶ್ವರ್ ಕುಮಾರ್ ಕೇವಲ 2 ರನ್ ನೀಡಿ 4 ವಿಕೆಟ್ ಪಡೆದರು. ಅವರಲ್ಲಿ ಒಬ್ಬರು ರನ್ ಔಟ್ ಆಗಿದ್ದಾರೆ.

ಚೊಚ್ಚಲ ಶತಕ ಸಿಡಿಸಿದ ಶುಭ್​ಮನ್:

ಇನ್ನು, ಹೈದರಾಬಾದ್ ವಿರುದ್ಧ ಅಹಮದಾಬಾದ್ ನಲ್ಲಿ ಗಿಲ್ ಐಪಿಎಲ್​ನಲ್ಲಿ ತಮ್ಮ ಚೊಚ್ಚಲ ಶತಕವನ್ನು ಸಿಡಿಸಿದರು. ಕೇವಲ 56 ಎಸೆತಗಳಲ್ಲಿ 13 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ ಶತಕ ಪೂರೈಸಿದರು. ಈ ಶತಕದ ನಂತರ, ಗಿಲ್ ಆರೆಂಜ್ ಕ್ಯಾಪ್ ರೇಸ್‌ನಲ್ಲಿ ಯುವ ಶತಕ ಯಶಸ್ವಿ ಜೈಸ್ವಾಲ್ ಅವರನ್ನು ಹಿಂದಿಕ್ಕಿದ್ದಾರೆ. ಈ ಪಟ್ಟಿಯಲ್ಲಿ ಎರಡನೇ ಸ್ಥಾನ ಪಡೆದಿದ್ದಾರೆ. ಈ ವರ್ಷ ಟಿ20 ಮಾದರಿಯಲ್ಲಿ ಟೀಂ ಇಂಡಿಯಾ ಪರ ಶುಭಮನ್ ಗಿಲ್ ಶತಕ ಸಿಡಿಸಿದ್ದಾರೆ. ಆದರೆ ಇದೀಗ ಐಪಿಎಲ್‌ನಲ್ಲೂ ಶತಕ ಸಿಡಿಸಿದ್ದಾರೆ.