WPL 2023: ಚೊಚ್ಚಲ ಮಹಿಳಾ ಐಪಿಎಲ್‌ ಕಪ್‌ಗೆ ಮುತ್ತಿಟ್ಟ ಮುಂಬೈ ಇಂಡಿಯನ್ಸ್ ತಂಡ, ಡೆಲ್ಲಿ ವಿರುದ್ಧ ಗೆದ್ದು ಬೀಗಿದ ಹರ್ಮನ್ ಬಳಗ

ಮುಂಬೈ: ಚೊಚ್ಚಲ ಆವೃ​ತ್ತಿಯ ವುಮೆನ್ಸ್‌ ಪ್ರೀಮಿ​ಯರ್‌ ಲೀಗ್​ನ ( Womens Premier League) ಫೈನಲ್​ನಲ್ಲಿ ಮುಂಬೈ ಇಂಡಿಯನ್ಸ್ ಮಹಿಳಾ (Mumbai Indians Women) ತಂಡ ರೋಚಕ  ಗೆಲುವು  ಸಾಧಿಸುವ ಮೂಲಕ ಚಾಂಪಿಯನ್ (Champion)​ ಪಟ್ಟ ಅಲಂಕರಿಸಿದೆ. ಭಾನುವಾರ ಬ್ರಬೌರ್ನ್​ ಸ್ಟೇಡಿಯಂ ನಲ್ಲಿ ನಡೆದ ಫೈನಲ್‌ ಹಣಾಹಣಿಯಲ್ಲಿ ಹರ್ಮನ್​ಪ್ರೀತ್ ಕೌರ್ (Harmanpreet Kaur) ಬಳಗ ಡೆಲ್ಲಿ ಕ್ಯಾಪಿಟಲ್ಸ್ ( Delhi Capitals Women ) ತಂಡವನ್ನು  7 ವಿಕೆಟ್​​ಗಳಿಂದ ಮಣಿಸುವ ಮೂಲಕ ಚೊಚ್ಚಲ ಡಬ್ಲ್ಯೂಪಿಎಲ್ (WPL)  ಟ್ರೋಫಿ ಎತ್ತಿ ಹಿಡಿದಿದೆ. ಫೈನಲ್​ ಪಂದ್ಯದಲ್ಲಿ ಟಾಸ್​ ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮುಂಬೈ ಬೌಲರ್​ಗಳ ದಾಳಿಗೆ ಕುಸಿದು 131 ರನ್​ಗಳ ಸಾಧಾರಣ ಮೊತ್ತ ದಾಖಲಿಸಿತ್ತು. 132 ರನ್​ಗಳ ಸುಲಭ ಗುರಿಯನ್ನು ಬೆನ್ನಟ್ಟಿದ ಮುಂಬೈ ಮಹಿಳಾ ತಂಡ   19.3 ಓವರ್​ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಗುರಿ ತಲುಪಿತು.

ಟಾಸ್​ ಗೆದ್ದು ಬ್ಯಾಟಿಂಗ್​ಗೆ ಇಳಿದಿದ್ದ ಡೆಲ್ಲಿ ಕ್ಯಾಪಿಟಲ್ಸ್​ಗೆ ಕಳೆದ ಪಂದ್ಯದಲ್ಲಿ ಯುಪಿ ವಾರಿಯರ್ಸ್ ವಿರುದ್ಧ ಹ್ಯಾಟ್ರಿಕ್ ಪಡೆದು ಮಿಂಚಿದ್ದ ಇಸ್ಸೆ ವಾಂಗ್ ಆರಂಭಿಕ ಆಘಾತ ನೀಡಿದರು. ಅವರು ಶೆಫಾಲಿ ವರ್ಮಾ, ಅಲಿಸ್​ ಕ್ಯಾಪ್ಸೆ ಹಾಗೂ ಜೆಮೈಮಾ ರೋಡ್ರಿಗಸ್​ ವಿಕೆಟ್​ ಪಡೆದು ಆರಂಭಿಕ ಆಘಾತ ನೀಡಿದರು. ಒಂದು ಹಂತದಲ್ಲಿ ಡೆಲ್ಲಿ ತಂಡ 79ಕ್ಕೆ 9 ವಿಕೆಟ್ ಕಳೆದುಕೊಂಡು 100 ರನ್​ಗಳಿಸುವುದು ಕಷ್ಟ ಎನ್ನುವ ಸ್ಥಿತಿ ತಲುಪಿತ್ತು. ನಾಯಕಿ ಮೆಗ್ ಲ್ಯಾನಿಂಗ್ 35, ಶಿಕಾ ಪಾಂಡೆ 27 ರನ್ ಹಾಗೂ ರಾಧಾ ಯಾದವ್​ ಅಜೇಯ 27 ರನ್​​ಗಳಿಸಿ ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು.

ವಾಂಗ್​ ಆರಂಭಿಕರನ್ನು ಪೆವಿಲಿಯನ್​ಗೆ ಕಳುಹಿಸಿದರೆ, ಹೇಲಿ ಮ್ಯಾಥ್ಯೂಸ್ 5ಕ್ಕೆ3 ಹಾಗೂ ಮೆಲಿ ಕೆರ್​ 18ಕ್ಕೆ 2 ವಿಕೆಟ್ ಪಡೆದು ಮಧ್ಯಮ ಕ್ರಮಾಂಕದ ಬೆನ್ನೆಲುಬು ಮುರಿದರು. ಕೊನೆಯ ವಿಕೆಟ್​ಗೆ ರಾಧಾ ಯಾದವ್​ ಹಾಗೂ ಶಿಖಾ 52 ರನ್​ಗಳ ಜೊತೆಯಾಟ ನಡೆಸಿದ್ದರಿಂದ ಅಂತಿಮವಾಗಿ ಡೆಲ್ಲಿ ಕ್ಯಾಪಿಟಲ್ಸ್ 20 ಓವರ್​ಗಳಲ್ಲಿ 9 ವಿಕೆಟ್​ ಕಳೆದುಕೊಂಡು 131 ರನ್​ಗಳ ಗೌರವಯುತ ಮೊತ್ತ ದಾಖಲಿಸಿತು.​

ಇದನ್ನೂ ಓದಿ: SA vs WI: ಟಿ20 ಕ್ರಿಕೆಟ್​ ಇತಿಹಾಸದಲ್ಲಿ ಗರಿಷ್ಠ ರನ್​ ಚೇಸ್ ಮಾಡಿದ ದಕ್ಷಿಣ ಆಫ್ರಿಕಾ! ಚುಟುಕು ಕ್ರಿಕೆಟ್​ನಲ್ಲಿ ಹರಿಣ ಪಡೆ ವಿಶ್ವದಾಖಲೆ

ಮುಂಬೈ ಇಂಡಿಯನ್ಸ್​ಗೆ ಆರಂಭಿಕ ಆಘಾತ

132 ರನ್​ಗಳ ಸಾಧಾರಣ ಗುರಿ ಬೆನ್ನಟ್ಟಿದ ಮುಂಬೈ ಇಂಡಿಯನ್ಸ್ ತಂಡ ಕೇವಲ 23 ರನ್​ಗಳಿಸುವಷ್ಟರಲ್ಲಿ ಯಸ್ತಿಕಾ ಭಾಟಿಯಾ(4 ) ಹಾಗೂ ಹೇಲಿ ಮ್ಯಾಥ್ಯೂಸ್ (13) ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತ್ತು. ರಾಧಾ ಯಾದವ್​ ಯಸ್ತಿಕಾ ವಿಕೆಟ್ ಪಡೆದರೆ, ಜೊನಾಸೆನ್​ 13 ರನ್​ಗಳಿಸಿದ್ದ ಸ್ಫೋಟಕ ಬ್ಯಾಟರ್ ಮ್ಯಾಥ್ಯೂಸ್ ವಿಕೆಟ್ ಪಡದಿದ್ದರು.​

ಗೆಲುವಿನ ಗಡಿ ದಾಟಿಸಿದ ಸೀವರ್-ಕೌರ್​

23ಕ್ಕೆ 2 ವಿಕೆಟ್ ಕಳೆದುಕೊಂಡಿದ್ದ ಸಂದರ್ಭದಲ್ಲಿ ಒಂದಾದ ನಾಯಕಿ ಹರ್ಮನ್​ಪ್ರೀತ್ ಕೌರ್ ಹಾಗೂ ಆಲ್​ರೌಂಡರ್ ನ್ಯಾಟ್​ ಸೀವ್​-ಬ್ರಂಟ್​ 3ನೇ ವಿಕೆಟ್​ಗೆ 72 ರನ್​ಗಳ ಜೊತೆಯಾಟ ನಡೆಸಿದರು. ಹರ್ಮನ್​ ಪ್ರೀತ್ ಕೌರ್​ 39 ಎಸೆತಗಳಲ್ಲಿ 5 ಬೌಂಡರಿ ಸಹಿತ 37 ರನ್​ಗಳಿಸಿ ರನ್​ಔಟ್ ಆದರು. ಆದರೆ ಕೊನೆಯವರೆಗೂ ಎಚ್ಚರಿಕೆಯಿಂದ ಆಡಿದ ಸೀವರ್​ 55 ಎಸೆತಗಳಲ್ಲಿ 7 ಬೌಂಡರಿ ಸಹಿತ ಅಜೇಯ 60 ರನ್​ಗಳಿಸಿ ತಂಡವನ್ನು ಗೆಲುವಿನ ಗಡಿ ದಾಟಿಸಿದ್ದಲ್ಲದೆ, ಚೊಚ್ಚಲ ಪ್ರಶಸ್ತಿ ತಂದುಕೊಟ್ಟರು.

ಟೂರ್ನಿಯುದ್ದಕ್ಕೂ ಭರ್ಜರಿ ಪ್ರದರ್ಶನ ತೋರಿದ್ದ ಡೆಲ್ಲಿ- ಮುಂಬೈ

ಮುಂಬೈ ಇಂಡಿಯನ್ಸ್ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡಗಳು ಟೂರ್ನಿ​ಯು​ದ್ದಕ್ಕೂ ಪ್ರಾಬಲ್ಯ ಸಾಧಿ​ಸಿದ್ದು, ಲೀಗ್‌ ಹಂತ​ದಲ್ಲಿ ಆಡಿದ 8 ಪಂದ್ಯ​ಗ​ಳಲ್ಲಿ ತಲಾ 6 ಗೆಲುವು ಸಾಧಿ​ಸಿ​ದ್ದವು.​ ಆ​ದರೆ ನೆಟ್‌ ರನ್‌ರೇಟ್‌ ಆಧಾ​ರ​ದಲ್ಲಿ ಡೆಲ್ಲಿ ಗುಂಪಿ​ನಲ್ಲಿ ಅಗ್ರ​ಸ್ಥಾ​ನಿ​ಯಾಗಿ ನೇರ​ವಾಗಿ ಫೈನಲ್‌ ಪ್ರವೇ​ಶಿ​ಸಿ​ದರೆ, 2ನೇ ಸ್ಥಾನ ಪಡೆದ ಮುಂಬೈ ಎಲಿ​ಮಿ​ನೇ​ಟ​ರ್‌ನಲ್ಲಿ ಯು.ಪಿ.​ವಾ​ರಿ​ಯರ್ಸ್‌ ತಂಡವನ್ನು ಮಣಿಸಿ ಪ್ರಶಸ್ತಿ ಸುತ್ತಿ​ಗೇ​ರಿತ್ತು. ಲೀಗ್‌​ನಲ್ಲಿ ಡೆಲ್ಲಿ-ಮುಂಬೈ ಎರಡು ಬಾರಿ ಮುಖಾ​ಮುಖಿ​ಯಾ​ಗಿದ್ದು, ಇತ್ತಂಡ​ಗಳು ತಲಾ ಒಂದೊಂದು ಗೆಲುವು ಕಂಡಿದ್ದವು.