Vijay Hazare Trophy: ಇಂದು ಕರ್ನಾಟಕ- ಛತ್ತೀಸ್‌ಗಢ ನಡುವೆ ಸೆಮೀಸ್ ಫೈಟ್; ರಾಜ್ಯಕ್ಕೆ ಮಯಾಂಕ್ ಬಲ

ಬೆಂಗಳೂರು (ಅ. 23): ವಿಜಯ್ ಹಜಾರೆ ಟ್ರೋಫಿ ಅಂತಿಮ ಹಂತಕ್ಕೆ ಬಂದುತಲುಪಿದೆ. ಇಂದು ಇಲ್ಲಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಮೊದಲ ಸೆಮಿಫೈನಲ್‌ನಲ್ಲಿ ಆತಿಥೇಯ ಕರ್ನಾಟಕ ತಂಡ ಛತ್ತೀಸ್‌ಗಢವನ್ನು ಎದುರಿಸಲಿದೆ. ಇನ್ನೊಂದು ಸೆಮೀಸ್​ನಲ್ಲಿ ಗುಜರಾತ್‌ ಹಾಗೂ ತಮಿಳುನಾಡು ನಡುವೆ ಜೆಸಿಎ ಕ್ರೀಡಾಂಗಣದಲ್ಲಿ ಫೈಟ್ ನಡೆಯಲಿದೆ.

ತವರಿನಲ್ಲಿ ಕರ್ನಾಟಕ ಎಲ್ಲರಿಗಿಂತಲೂ ಬಲಿಷ್ಠವಾಗಿದೆ. ಲೀಗ್‌ನಲ್ಲಿ ಕರ್ನಾಟಕ ಅದ್ಭುತ ಪ್ರದರ್ಶನ ನೀಡಿದೆ. ಕ್ವಾರ್ಟರ್‌ ಫೈನಲ್ ಪಂದ್ಯದಲ್ಲಿ ವಿನಯ್‌ ಕುಮಾರ್‌ ನೇತೃತ್ವದ ಪುದುಚೇರಿ ತಂಡವನ್ನು ಸೋಲಿಸಿ ಸೆಮೀಸ್​ಗೆ ಮಗ್ಗೆಯಿಟ್ಟಿತ್ತು. ಇದೀಗ ಫೈನಲ್​ಗೇರಲು ಛತ್ತೀಸ್‌ಗಢವನ್ನು ಎದುರಿಸಲು ಪಾಂಡೆ ಪಡೆ ತಯಾರಿ ನಡೆಸಿದೆ.

ಇನ್ನು ಕರ್ನಾಟಕ ತಂಡಕ್ಕೆ ಮಯಾಂಕ್ ಅಗರ್ವಾಲ್ ಸೇರ್ಪಡೆಯಾಗಿರುವುದು ಆನೆಬಲ ಬಂದಂತಾಗಿದೆ. ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್​ ಸರಣಿ ನಿನ್ನೆಗೆ ಮುಕ್ತಾಯಗೊಂಡ ಹಿನ್ನಲೆ ಮಯಾಂಕ್ ಇಂದು ರಾಜ್ಯ ತಂಡ ಸೇರಿಕೊಳ್ಳಲಿದ್ದಾರೆ. ಟೆಸ್ಟ್​ನಲ್ಲಿ ದ್ವಿಶತಕ ಸಿಡಿಸಿ ಭರ್ಜರಿ ಫಾರ್ಮ್​ನಲ್ಲಿರುವ ಅಗರ್ವಾಲ್ ಮೇಲೆ ಹೆಚ್ಚಿನ ನಿರೀಕ್ಷೆ ಇಡಲಾಗಿದೆ.

ಕರ್ನಾಟಕ ಲೀಗ್​ನಲ್ಲಿ ಈವರೆಗೆ ಕೇವಲ ಒಂದು ಪಂದ್ಯದಲ್ಲಿ ಮಾತ್ರ ಸೋಲುಂಡಿದೆ. ಬ್ಯಾಟಿಂಗ್ ವಿಭಾಗದಲ್ಲಿ ಓಪನರ್​ಗಳಾದ ಕೆ ಎಲ್ ರಾಹುಲ್ ಹಾಗೂ ದೇವದತ್ ಪಡಿಕ್ಕಲ್ ಪ್ರತಿ ಪಂದ್ಯದಲ್ಲಿ ಅತ್ಯುತ್ತಮ ಆರಂಭ ಒದಗಿಸುತ್ತಿದ್ದಾರೆ. ನಾಯಕ ಮನೀಶ್ ಪಾಂಡೆ, ರೋಹನ್ ಕದಮ್ ಕೂಡ ಉತ್ತಮ ಫಾರ್ಮ್​ನಲ್ಲಿದ್ದಾರೆ.

ಇತ್ತ ಬೌಲಿಂಗ್​ನಲ್ಲೂ ರಾಜ್ಯ ತಂಡ ಬಲಿಷ್ಠವಾಗಿದೆ. ರೋನಿತ್ ಮೋರೆ, ಕೃಷ್ಣಪ್ಪ ಗೌತಮ್, ಅಭಿಮನ್ಯು ಮಿಥುನ್, ಶ್ರೇಯಸ್ ಗೋಪಾಲ್​ರಂತಹ ಅನುಭವಿ ಆಟಗಾರರನ್ನು ಹೊಂದಿದೆ.

ಎರಡನೇ ಸೆಮಿ ಫೈನಲ್​ನಲ್ಲಿ ಗುಜರಾತ್ ಹಾಗೂ ತಮಿಳುನಾಡು ಮುಖಾಮುಖಿ ಆಗುತ್ತಿದೆ. ತಮಿಳುನಾಡು ಪರ ಆರ್​ ಅಶ್ವಿನ್​ ಸೆಮಿಫೈನಲ್​​ನಲ್ಲಿ ಕಣಕ್ಕಿಳಿಯುತ್ತಿದ್ದಾರೆ. ಸೆಮೀಸ್​ನಲ್ಲಿ ಗೆದ್ದ ತಂಡ ಅಕ್ಟೋಬರ್ 25 ರಂದು ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಫೈನಲ್ ಹೋರಾಟ ನಡೆಸಲಿದೆ.