Guardians app: ಮಹಿಳೆಯರ ರಕ್ಷಣೆಗಾಗಿ ಬಂದಿದೆ ಗಾರ್ಡಿಯನ್ ಆ್ಯಪ್!; ಟ್ರೂಕಾಲರ್ ಸಂಸ್ಥೆ ಪರಿಚಯಿಸಿದ ಈ ನೂತನ ಆ್ಯಪ್ ವಿಶೇಷತೆ ಏನು ಗೊತ್ತಾ?

ಭಾರತೀಯರು ಟ್ರೂ ಕಾಲರ್​ ಆ್ಯಪ್​ ಬಳಸುತ್ತಿದ್ದಾರೆ. ಅದರ ಮೂಲಕ ಅಪರಿಚಿತ ನಂಬರ್​ನಿಂದ ಬಂದ ಕರೆಗಳನ್ನು ಪರಿಶೀಲಿಸಲು ಸಹಾಯಕವಾಗಿದೆ. ಇದೀಗ ಟ್ರೂ ಕಾಲರ್​ ಆ್ಯಪ್​​ ಅಭಿವೃದ್ಧಿ ಪಡಿಸಿದ್ದ ಸಂಸ್ಥೆಯು ಗಾರ್ಡಿಯನ್​ ಹೆಸರಿನ ಆ್ಯಪ್​​ವೊಂದನ್ನು ಸಿದ್ಧಪಡಿಸಿ ಪರಿಚಯಿಸಿದೆ.

ಮಹಿಳೆಯರ ಭದ್ರತೆಯನ್ನು ಮುಖ್ಯ ಉದ್ದೇಶವನ್ನಾಗಿ ಇಟ್ಟುಕೊಂಡು  ಗಾರ್ಡಿಯನ್​ ಆ್ಯಪ್​ ಅನ್ನು ವಿನ್ಯಾಸಗೊಳಿಸಲಾಗಿದೆ. ಯಾರೇ ಆದರು ಅಪಾಯದಲ್ಲಿರುವ ವೇಳೆ ಗಾರ್ಡಿಯನ್​ನಲ್ಲಿರುವ ಎಮರ್ಜೆನ್ಸಿ ಬಟನ್​ ಒತ್ತಿದರೆ ಸಾಕು ಅವರಿಗೆ ತಕ್ಷಣವೇ ಸುರಕ್ಷತೆಯನ್ನು ಒದಗಿಸುವಲ್ಲಿ ಈ ಆ್ಯಪ್​ ನೆರವು ನೀಡುತ್ತಿದೆ.

ಅಂದಹಾಗೆಯೇ ಗಾರ್ಡಿಯನ್​ ಆ್ಯಪ್​ನಲ್ಲಿ ಕುಟುಂಬದವರು, ಸ್ನೇಹಿತರು, ಸ್ಥಳೀಯ ಪೊಲೀಸ್​ ಸಹಾಯವಾಣಿ ನಂಬರ್​ಗಳನ್ನು ಗಾರ್ಡಿಯನ್​ ಆಗಿ ಸೇವ್​ ಮಾಡಿಕೊಳ್ಳಬಹುದು. ತುರ್ತು ಅಥವಾ ಅಪಾಯವಿದೆ ಎಂದು ತಿಳಿದಾಗ ಆ್ಯಪ್​ನಲ್ಲಿರುವ ಎಮರ್ಜೆನಿ ಬಟನ್​ ಒತ್ತಿದರೆ ತಕ್ಷಣವೇ ಗಾರ್ಡಿಯನ್​ಗಳಿಗೆ ಮಾಹಿತಿ ತಲುಪುತ್ತದೆ. ಮತ್ತು ಅಪಾಯದಲ್ಲಿದ್ದಾರೆ ಎಂಬುದನ್ನು ತಿಳಿಸುತ್ತದೆ.

ನಗರ ಪ್ರದೇಶಗಳಲ್ಲಿ ರಾತ್ರಿ ವೇಳೆ ಈ ಆ್ಯಪ್​ ಹೆಚ್ಚು ಉಪಯೋಗಕ್ಕೆ ಬರಲಿದೆ. ಜೊತೆಗೆ ಹೆಣ್ಣು ಮಕ್ಕಳ ಸುರಕ್ಷತೆಗಾಗಿ ನೆರವಾಗಲಿದೆ ಈ ಗಾರ್ಡಿಯನ್​ ಆ್ಯಪ್​.

ಈ ಆ್ಯಪ್​ನಲ್ಲಿ ಯಾರನ್ನು ಬೇಕಾದರು ಗಾರ್ಡಿಯನ್​ ಆಗಿ ಸೇರಿಸಿಕೊಳ್ಳಬಹುದು. ಮಾತ್ರವಲ್ಲದೆ ಎಲ್ಲಾ ನಂಬರ್​ಗಳಿಗೂ ಏಕಕಾಲದಲ್ಲಿ ತುರ್ತು ಸಂದೇಶ ಹೋಗುವ ಆಯ್ಕೆಯನ್ನು ಮಾಡಬಹುದಾಗಿದೆ.

ಟ್ರೂ ಕಾಲರ್​ ಸಿಇಒ ಅಲನ್​ ಮಾಮೆಡಿ ಈ ಬಗ್ಗೆ ಮಾತನಾಡಿ, ’ಗಾರ್ಡಿಯನ್​​ ಎಂದರೆ ರಕ್ಷಕರು ಎಂದು ಅರ್ಥ. ಅಪಾಯದಲ್ಲಿರುವ ಸಮಯದಲ್ಲಿ ಈ ಆ್ಯಪ್​ ನೆರವಿಗೆ ಬರಲಿದೆ. ಜನರ ರಕ್ಷಣೆಗೆ ಮೊದಲ ಆದತ್ಯೆಯನ್ನು ನೀಡುತ್ತಿದ್ದೇವೆ. ಹಣ ಗಳಿಸುವುದು ನಮ್ಮ ಉದ್ದೇಶವಲ್ಲ’ ಎಂದು ಹೇಳಿದ್ದಾರೆ.

ಗಾರ್ಡಿಯನ್​ ಆ್ಯಪ್​​ ಅನ್ನು ಭಾರತ ಮಾತ್ರವಲ್ಲದೆ ಬೇರೆ ದೇಶಗಳಲ್ಲಿಯೂ ಪರಿಚಯಿಸಲು ಮುಂದಾಗಿದೆ. ಅದಕ್ಕಾಗಿ ವಿವಿಧ ದೇಶಗಳ ಸರ್ಕಾರದ ಜೊತೆಗೆ ಮಾತನಾಡಿಕೊಂಡು ಮುಂದಿನ ಕ್ರಮದ ಬಗ್ಗೆ ಆಲೋಚನೆ ಮಾಡಿದೆ. ಆ್ಯಂಡ್ರಾಯ್ಡ್​ ಬಳಕೆದಾರರಿಗಾಗಿ ಗೂಗಲ್​ ಪ್ಲೇ ಸ್ಟೋರ್​ನಲ್ಲಿ ಮತ್ತು ಐಫೋನ್​ ಬಳಕೆದಾರರಿಗೆ ಆ್ಯಪಲ್​ ಸ್ಟೋರ್​ನಲ್ಲಿ ಬಿಡುಗಡೆ ಮಾಡಿದೆ.

Truecaller ಆ್ಯಪ್​:

ಟ್ರೂಕಾಲರ್​ ಅನ್ನು ಟ್ರೂ ಸಾಫ್ಟ್​ವೇರ್​ ಸ್ಕ್ಯಾಂಡಿನೇವಿಯಾ ಎಬಿ ಅಭಿವೃದ್ಧಿ ಪಡಿಸಿದೆ. ಇದರ ಪ್ರಧಾನ ಕಚೇರಿ ಸ್ಪೀಡನ್​ನ ಸ್ಟಾಕ್​ಹಾಮ್​ನಲ್ಲಿದೆ. ಅಂದಹಾಗೆಯೇ ಈ ಆ್ಯಪ್​​​ ಅನ್ನು ಅಲನ್​ ಮಾಮೆಡಿ ಮತ್ತು ನಾಮಿ ಜರಿಂಗ್​ಹಾಲಮ್​ ಅವರು 2009ರಲ್ಲಿ ಸ್ಥಾಫಿಸಿದರು. ಆದರೆ ಟ್ರೂಕಾಲರ್​ನಲ್ಲಿರುವ ಹೆಚ್ಚಿನ ಉದ್ಯೋಗಿಗಳು ಭಾರತೀಯರಾಗಿದ್ದಾರೆ.