HOME » NEWS » Sports » CRICKET THRILL EXCITEMENT JUBILATION EOINMORGAN AND HIS TEAM ARE WORLD CHAMPIONS CWC19FINAL WEAREENGLAND CWC19 PIC TWITTER COM8QBV446AEM CRICKET WORLD CUP CRICKET WORLD CUP

England vs New Zealand: ಸೂಪರ್ ಆಟದಲ್ಲಿ ಇಂಗ್ಲೆಂಡ್ ವಿಶ್ವ ಚಾಂಪಿಯನ್

#WeAreEngland : ಮತ್ತೊಂದೆಡೆ ಗಟ್ಟಿಯಾಗಿ ನೆಲೆಯೂರಿದ್ದ ಲಾಥಮ್ 43ನೇ ಓವರ್​ನಲ್ಲಿ ತಂಡದ ಮೊತ್ತವನ್ನು 202ರ ಗಡಿ ದಾಟಿಸಿದರು. ಕೆಲವೊತ್ತು ಸಾಥ್​ ನೀಡಿದ ಗ್ರ್ಯಾಂಡ್​ಹೋಮ್(16) ಸಹ ಹೆಚ್ಚು ಹೊತ್ತು ನಿಲ್ಲದೆ ಹಿಂತಿರುಗಿದರು.

zahir | news18
Updated:July 15, 2019, 2:59 PM IST
England vs New Zealand: ಸೂಪರ್ ಆಟದಲ್ಲಿ ಇಂಗ್ಲೆಂಡ್ ವಿಶ್ವ ಚಾಂಪಿಯನ್
ನೂತನ ಏಕದಿನ ರ‍್ಯಾಕಿಂಗ್ ಪಟ್ಟಿಯಲ್ಲಿ 38 ಪಂದ್ಯಗಳಿಂದ 4,820 ಪಾಯಿಂಟ್​ಗಳೊಂದಿಗೆ ವಿಶ್ವ ಚಾಂಪಿಯನ್ ಇಂಗ್ಲೆಂಡ್ ತಂಡ ಅಗ್ರಸ್ಥಾನದಲ್ಲಿದೆ.
  • News18
  • Last Updated: July 15, 2019, 2:59 PM IST
  • Share this:
ಕ್ರಿಕೆಟ್​ ಅಂಗಳದ ಹೊಸ ವಿಶ್ವ ಚಾಂಪಿಯನ್ ಇಂಗ್ಲೆಂಡ್.

ವಿಶ್ವಕಪ್ ಇತಿಹಾಸದಲ್ಲೇ ಅತ್ಯದ್ಭುತ ಫೈನಲ್ ಮೂಲಕ ಕ್ರಿಕೆಟ್ ಜನಕ ಇಂಗ್ಲೆಂಡ್ ಚೊಚ್ಚಲ ಬಾರಿ ವಿಶ್ವ ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಕ್ರಿಕೆಟ್ ಕಾಶಿ ಲಾರ್ಡ್ಸ್‌ ಮೈದಾನದಲ್ಲಿ ನಡೆದ ಇಂಗ್ಲೆಂಡ್-ನ್ಯೂಜಿಲೆಂಡ್​ ನಡುವಿನ ವಿಶ್ವಕಪ್​ ಮೆಗಾ ಫೈನಲ್ ಎರೆಡೆರಡು ಬಾರಿ ರೋಚಕ ಟೈನಲ್ಲಿ ಅಂತ್ಯಗೊಂಡು, ಬೌಂಡರಿ ಆಧಾರದಲ್ಲಿ ಇಂಗ್ಲೆಂಡ್ ನೂತನ ವಿಶ್ವ ಚಾಂಪಿಯನ್ ಆಗಿ ಹೊರ ಹೊಮ್ಮಿದೆ.





ನ್ಯೂಜಿಲೆಂಡ್ ನೀಡಿದ 241 ರನ್​ಗಳನ್ನು ಬೆನ್ನತ್ತಿದ ಇಂಗ್ಲೆಂಡ್ ತಂಡ ಅಷ್ಟೇ ರನ್​ಗೆ ಸರ್ವಪತನಗೊಳ್ಳುವ ಮೂಲಕ ಪಂದ್ಯವು ಟೈಯಲ್ಲಿ ಅಂತ್ಯಗೊಂಡಿತ್ತು. ಈ ಹಿನ್ನೆಲೆಯಲ್ಲಿ ಕ್ರಿಕೆಟ್ ಇತಿಹಾಸದಲ್ಲೇ ಏಕದಿನ ವಿಶ್ವಕಪ್​ ಫೈನಲ್​ ಸೂಪರ್ ಓವರ್​ಗೆ ಸಾಕ್ಷಿಯಾಯಿತು.

ಸೂಪರ್ ಓವರ್​ನಲ್ಲಿ ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ 16 ರನ್​​ಗಳನ್ನು ಗುರಿ ನೀಡಿತು. ಈ ಸವಾಲನ್ನು ಭರ್ಜರಿಯಾಗಿಯೇ ಚೇಸ್ ಮಾಡಿದ ನ್ಯೂಜಿಲೆಂಡ್​ಗೆ ಅಂತಿಮ ಎಸೆತದಲ್ಲಿ 2 ರನ್​ಗಳ ಅವಶ್ಯಕತೆಯಿತ್ತು. ಆದರೆ ಇಲ್ಲೂ ಅದೃಷ್ಟ ಲಕ್ಷ್ಮಿಯ ಕಣ್ಣಾ ಮುಚ್ಚಾಲೆ ಆಟ ಆಡಿತ್ತು. ಪರಿಣಾಮ ಮತ್ತೊಮ್ಮೆ ಸೂಪರ್ ಪಂದ್ಯ ಟೈಯಲ್ಲಿ ಅಂತ್ಯವಾಯಿತು. ಈ ಹಿನ್ನೆಲೆಯಲ್ಲಿ ಐಸಿಸಿ ನಿಯಮದ ಪ್ರಕಾರ ಅಧಿಕ ಬೌಂಡರಿ ಬಾರಿಸಿದ ಇಂಗ್ಲೆಂಡ್ ತಂಡವನ್ನು ವಿಜಯಿ ಎಂದು ಘೋಷಿಸಲಾಯಿತು. ಇದರೊಂದಿಗೆ ನ್ಯೂಜಿಲೆಂಡ್​ನ ಚೊಚ್ಚಲ ವಿಶ್ವಕಪ್ ಕನಸು ಭಗ್ನಗೊಂಡಿತು.



ಇದಕ್ಕೂ ಮುನ್ನ ಟಾಸ್ ಗೆದ್ದ ನ್ಯೂಜಿಲೆಂಡ್ ತಂಡ ಇಂಗ್ಲೆಂಡ್​ಗೆ 242 ರನ್​ಗಳ ಗುರಿ ನೀಡಿತು. ಆರಂಭಿಕ ನಿಕೋಲ್ಸ್ (55)​ ಹಾಗೂ ಮಧ್ಯಮ ಕ್ರಮಾಂಕದಲ್ಲಿ ಲಾಥಮ್ (47) ಅವರ ಉಪಯುಕ್ತ ಕಾಣಿಕೆಯಿಂದ ಕಿವೀಸ್ ಪಡೆ ನಿರ್ಣಾಯಕ ಪಂದ್ಯದಲ್ಲಿ ಸ್ಪರ್ಧಾತ್ಮಕ ಸವಾಲು ನೀಡುವಂತಾಯಿತು.

ಈ ಸಾಧಾರಣ ಸವಾಲನ್ನು ಬೆನ್ನತ್ತಿದ ಇಂಗ್ಲೆಂಡ್ ತಂಡವು ಆರಂಭಿಕ ಆಘಾತಕ್ಕೆ ಒಳಗಾಯಿತು. ತಂಡದ ಮೊತ್ತ 28 ಆಗಿದ್ದ ವೇಳೆ ಜೇಸನ್ ರಾಯ್(10)​ ವಿಕೆಟ್ ಒಪ್ಪಿಸಿದರು.  ಮ್ಯಾಟ್ ಹೆನ್ರಿ ಎಸೆತದಲ್ಲಿ ಕೀಪರ್​ಗೆ ಕ್ಯಾಚ್ ನೀಡಿ ರಾಯ್ ಹೊರ ನಡೆದರು.

ಇನ್ನು ಆರಂಭಿಕ ಆಘಾತದಿಂದ ತಂಡವನ್ನು ಪಾರು ಮಾಡಲು ಪಣತೊಟ್ಟ ಬೈರ್​ಸ್ಟೋ ಹಾಗೂ ರೂಟ್ ಕಿವೀಸ್ ವೇಗಿಗಳ ಎದುರು ರಕ್ಷಣಾತ್ಮಕ ಆಟಕ್ಕೆ ಮುಂದಾದರು. ನಿಧಾನಗತಿಯಲ್ಲಿ ಬ್ಯಾಟ್ ಬೀಸಿದ ಹೊಡಿಬಡಿ ದಾಂಡಿಗರು 15 ಓವರ್​ಗಳಲ್ಲಿ ತಂಡದ ಮೊತ್ತವನ್ನು 50ರ ಗಡಿದಾಟಿಸಿದರು.

ಆದರೆ 17ನೇ ಓವರ್​ನಲ್ಲಿ ಭರ್ಜರಿ ಹೊಡೆತಕ್ಕೆ ಯತ್ನಿಸಿದ ರೂಟ್ (7) ಗ್ರ್ಯಾಂಡ್​ಹೋಮ್ ಎಸೆತದಲ್ಲಿ ವಿಕೆಟ್ ಒಪ್ಪಿಸಿದರು. ರೂಟ್ ಬೆನ್ನಲ್ಲೇ ಬೈರ್​ಸ್ಟೋ(36) ಸಹ ಫೆರ್ಗುಸನ್ ಬೌಲಿಂಗ್​ನಲ್ಲಿ ಬೌಲ್ಡ್​ ಆಗುವ ಮೂಲಕ ಹೊರ ನಡೆದರು.

ಈ ಹಂತದಲ್ಲಿ ಜೊತೆಗೂಡಿ ನಾಯಕ ಮೋರ್ಗನ್ ಹಾಗೂ ಸ್ಟೋಕ್ಸ್ ತಂಡಕ್ಕೆ ಆಧಾರವಾಗುವ ಭರವಸೆ ಮೂಡಿಸಿದರು. ಅತ್ತ ಉತ್ತಮವಾಗಿಯೇ ದಾಳಿ ಮಾಡುತ್ತಿದ್ದ ಕಿವೀಸ್​ ವೇಗಿಗಳನ್ನು ರಕ್ಷಣಾತ್ಮಕವಾಗಿ ಎದುರಿಸಿದ ಈ ಜೋಡಿ ಒಂಟಿ ರನ್​ಗಳ ಮೂಲಕ ರನ್​ ಹೆಚ್ಚಿಸುವ ಕಾಯಕಕ್ಕೆ ಕೈ ಹಾಕಿದರು.

ಈ ವೇಳೆ ಬೌಲಿಂಗ್​​ನಲ್ಲಿ ಬದಲಾವಣೆ ತಂದ ವಿಲಿಯಮ್ಸನ್​ ನೀಶಮ್​ ಕೈಗೆ ಬಾಲ್​ಯಿತ್ತರು. ಮೀಡಿಯಂ ಪೇಸ್​ನಲ್ಲಿ ಮೂಡಿ ಬಂದ ಎಸೆತವನ್ನು ಬೌಂಡರಿ ದಾಟಿಸಲು ಯತ್ನಿಸಿದ ಮೋರ್ಗನ್ (9) ​ರನ್ನು ಅದ್ಭುತ ಕ್ಯಾಚ್​  ಮೂಲಕ ಪೆವಿಲಿಯನ್​ಗೆ ಕಳುಹಿಸುವಲ್ಲಿ ಫೆರ್ಗುಸನ್ ಯಶಸ್ವಿಯಾದರು.

5ನೇ ವಿಕೆಟ್​ಗೆ ಜೊತೆಗೂಡಿದ ಸ್ಟೋಕ್ಸ್​ ಹಾಗೂ ಬಟ್ಲರ್​ ಎಚ್ಚರಿಕೆಯ ಆಟದೊಂದಿಗೆ ನ್ಯೂಜಿಲೆಂಡ್ ವೇಗಿಗಳನ್ನು ಎದುರಿಸಿದರು. ಪರಿಣಾಮ ಶತಕದ ಜೊತೆಯಾಟ ಮೂಡಿದಲ್ಲದೆ, ಪಂದ್ಯವನ್ನು ಮತ್ತೊಮ್ಮೆ ಇಂಗ್ಲೆಂಡ್​ ಪರ ವಾಲುವಂತೆ ಮಾಡುವಲ್ಲಿ ಯಶಸ್ವಿಯಾದರು. ಇದರ ನಡುವೆ 55 ಎಸೆತಗಳಲ್ಲಿ ಬಟ್ಲರ್ ಅರ್ಧಶತಕ ಪೂರೈಸಿದರೆ, ಸ್ಟೋಕ್ಸ್ 80 ಎಸೆತಗಳಲ್ಲಿ ಹಾಫ್ ಸೆಂಚುರಿ ಬಾರಿಸಿದರು. ಅರ್ಧಶತಕದ ಬೆನ್ನಲ್ಲೇ ಭರ್ಜರಿ ಹೊಡೆತಕ್ಕೆ ಮುಂದಾದ ಬಟ್ಲರ್(59) ಟಿಮ್ ಸೌಥಿ ಹಿಡಿದ ಅದ್ಭುತ ಕ್ಯಾಚ್​ಗೆ ಬಲಿಯಾದರು.

ಫೆರ್ಗುಸನ್ ಅವರ 46ನೇ ಓವರ್​ನಲ್ಲಿ ವೋಕ್ಸ್​ (2) ಹೊರ ನಡೆಯುವುದರೊಂದಿಗೆ ನ್ಯೂಜಿಲೆಂಡ್ ಮತ್ತೊಂದು ಯಶಸ್ಸು ಪಡೆಯಿತು. ಇನ್ನು ಗೆಲುವಿಗೆ 9 ಎಸೆತಗಳಲ್ಲಿ 23 ರನ್​ಗಳು ಬೇಕಿದ್ದ ವೇಳೆ ಸ್ಟೋಕ್ಸ್​ ಭರ್ಜರಿ ಸಿಕ್ಸರ್  ಸಿಡಿಸುವ ಮೂಲಕ ಪಂದ್ಯದ ಗತಿಯನ್ನೇ ಬದಲಿಸಿದರು.

ಇನ್ನು ಕೊನೆಯ ಓವರ್​ನಲ್ಲಿ 15 ರನ್​ಗಳನ್ನು ಗುರಿ ಬೆನ್ನತ್ತಿದ ಸ್ಟೋಕ್ಸ್​ 3ನೇ ಎಸೆತದಲ್ಲಿ ಅಮೋಘ ಸಿಕ್ಸ್ ಬಾರಿಸಿದರು. ಇನ್ನು ಕೊನೆಯ ಎಸೆತದಲ್ಲಿ 2 ರನ್​ಗಳ ಗುರಿ ಪಡೆದ ಇಂಗ್ಲೆಂಡ್ ಕೇವಲ 1 ರನ್​ಗಳಷ್ಟೇ ಗಳಿಸಲು ಶಕ್ತರಾದರು. ರೋಚಕ ಟೈನಲ್ಲಿ ಅಂತ್ಯಗೊಂಡ ಪಂದ್ಯವು ಸೂಪರ್ ಓವರ್​ಗಳತ್ತ ಮುಖ ಮಾಡಿತು.

ಸೂಪರ್ ಓವರ್​ನಲ್ಲಿ ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ 16 ರನ್​ಗಳ ಗುರಿ ನೀಡಿತು. ಇದನ್ನು ಚೇಸ್ ಮಾಡಿದ ನ್ಯೂಜಿಲೆಂಡ್ ಸಹ ಅಷ್ಟೇ ರನ್​ಗಳಿಸಿ ಮತ್ತೊಮ್ಮೆ ಪಂದ್ಯವನ್ನು ಟೈನಲ್ಲಿ ಅಂತ್ಯಗೊಳಿಸಿದರು. ಈ ಹಿನ್ನೆಲೆಯಲ್ಲಿ ಇನಿಂಗ್ಸ್​ನಲ್ಲಿ ಅಧಿಕ ಬೌಂಡರಿ ಬಾರಿಸಿದ  ಇಂಗ್ಲೆಂಡ್ ತಂಡ ಚಾಂಪಿಯನ್ ಆಗಿ ಹೊರ ಹೊಮ್ಮಿತು. ಇನ್ನು ಬೆನ್ ಸ್ಟೋಕ್ಸ್ ಅವರ ಅಜೇಯ 84 ರನ್​ ಹಾಗೂ ಸೂಪರ್ ಓವರ್ ಆಟದಿಂದ ಇಂಗ್ಲೆಂಡ್ ಚೊಚ್ಚಲ ಬಾರಿ ವಿಶ್ವಕಪ್ ಕಿರೀಟವನ್ನು ಮುಡಿಗೇರಿಸಿಕೊಂಡಿತು.



ಇದಕ್ಕೂ ಮುನ್ನ  ಟಾಸ್ ಗೆದ್ದ ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು.ಅದರಂತೆ ಕಿವೀಸ್ ಆರಂಭಿಕರಾಗಿ ಕಣಕ್ಕಿಳಿದ ಮಾರ್ಟಿನ್ ಗಪ್ಟಿಲ್ ಹಾಗೂ ನಿಕೋಲ್ಸ್ 6 ಓವರುಗಳವರೆಗೂ ವಿಕೆಟ್ ಕಾಯ್ದುಕೊಳ್ಳುವ ಮೂಲಕ ನ್ಯೂಜಿಲೆಂಡ್ ತಂಡಕ್ಕೆ ಉತ್ತಮ ಆರಂಭ ಒದಗಿಸುವ ಸೂಚನೆ ನೀಡಿದ್ದರು. ಆದರೆ ತಂಡದ ಮೊತ್ತ 29 ಇದ್ದಾಗ ವೋಕ್ಸ್​ ಎಸೆತದಲ್ಲಿ ಎಲ್​​ಬಿಡಬ್ಲ್ಯೂ ಆಗಿ ಗಪ್ಟಿಲ್ ಹೊರ ನಡೆದರು.

ಆರಂಭಿಕ ಆಘಾತಕ್ಕೆ ಒಳಗಾದ ಕಿವೀಸ್ ತಂಡಕ್ಕೆ ಆಸರೆಯಾದ ನಾಯಕ ವಿಲಿಯಮ್ಸನ್ ನಿಧಾನಗತಿಯ ಆಟಕ್ಕೆ ಒತ್ತು ನೀಡಿದರು. ಮತ್ತೊಂದೆಡೆ ರಕ್ಷಣಾತ್ಮಕ ಆಟದೊಂದಿಗೆ ರನ್​ ಕಲೆ ಹಾಕುವಲ್ಲಿ ನಿಕೋಲ್ಸ್ ನಿರತರಾದರು. ಪರಿಣಾಮ 2ನೇ ವಿಕೆಟ್​ ಅರ್ಧಶತಕದ ಜೊತೆಯಾಟ ಆಡಿದ ಈ ಜೋಡಿ  20 ಓವರ್​ಗೆ ತಂಡದ ಮೊತ್ತವನ್ನು 90ರ ಗಡಿ ದಾಟಿಸಿದರು.

ಈ ಮೊತ್ತಕ್ಕೆ 13 ರನ್​ ಸೇರ್ಪಡೆಯಾಗುವಷ್ಟರಲ್ಲಿ ನಾಯಕ ವಿಲಿಯಮ್ಸನ್(30) ಪ್ಲಂಕೆಟ್ ಎಸೆತದಲ್ಲಿ ವಿಕೆಟ್ ಕೀಪರ್​ಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು. ಈ ಹಂತದಲ್ಲಿ 4 ಬೌಂಡರಿಗಳೊಂದಿಗೆ ನಿಕೋಲ್ಸ್ ಅರ್ಧಶತಕ ಪೂರೈಸಿದರು. ಆದರೆ ಪ್ಲಂಕೆಟ್ ಅವರ 27ನೇ ಓವರ್​ನ  ಕೊನೆಯ ಎಸೆತವನ್ನು ಗುರುತಿಸುವಲ್ಲಿ ಎಡವಿದ ಹೆನ್ರಿ ನಿಕೋಲ್ಸ್​(55) ಕ್ಲೀನ್ ಬೌಲ್ಡ್​ ಆದರು.

ಇನ್ನು ಭಾರತದ ವಿರುದ್ಧ ಸೆಮಿಫೈನಲ್​ನಲ್ಲಿ ಅರ್ಧಶತಕ ಬಾರಿಸಿದ್ದ ರಾಸ್ ಟೇಲರ್ ಈ ಬಾರಿ 15 ರನ್​ಗಳಿಸಿ ತಮ್ಮ ಇನಿಂಗ್ಸ್​ಗೆ ಅಂತ್ಯವಾಡಿದರು. 6ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಆಗಮಿಸಿದ ನೀಶಮ್ 3 ಬೌಂಡರಿಗಳೊಂದಿಗೆ ಭರವಸೆ ಮೂಡಿಸಿದರೂ ಪ್ಲಂಕೆಟ್ ಎಸೆತದಲ್ಲಿ ವಿಕೆಟ್ ಒಪ್ಪಿಸಿ ನಿರಾಸೆ ಮೂಡಿಸಿದರು.

ಮತ್ತೊಂದೆಡೆ ಗಟ್ಟಿಯಾಗಿ ನೆಲೆಯೂರಿದ್ದ ಲಾಥಮ್ 43ನೇ ಓವರ್​ನಲ್ಲಿ ತಂಡದ ಮೊತ್ತವನ್ನು 202ರ ಗಡಿ ದಾಟಿಸಿದರು. ಕೆಲವೊತ್ತು ಸಾಥ್​ ನೀಡಿದ ಗ್ರ್ಯಾಂಡ್​ಹೋಮ್(16) ಸಹ ಹೆಚ್ಚು ಹೊತ್ತು ನಿಲ್ಲದೆ ಹಿಂತಿರುಗಿದರು. ಇನ್ನು 49ನೇ ಓವರ್​ನಲ್ಲಿ  ಕೀಪರ್​ರನ್ನು ವಂಚಿಸಿದ ವೈಡ್ ಬಾಲ್ ಬೌಂಡರಿ ಗೆರೆ ದಾಟಿ ಅತಿರಕ್ತ 5 ರನ್​ನ್ನು ನ್ಯೂಜಿಲೆಂಡ್​ಗೆ ನೀಡಿತು.

ಬೋನಸ್ ರನ್ ಸಿಕ್ಕಿದ ಬೆನ್ನಲ್ಲೇ ವೋಕ್ಸ್​ ಎಸೆತದಲ್ಲಿ ಲಾಥಮ್(47) ಕ್ಯಾಚ್ ನೀಡಿ ಪೆವಿಲಿಯನ್ ಕಡೆ ಹೆಜ್ಜೆ ಹಾಕಿದರು. ಕೊನೆಯ ಓವರ್​ನಲ್ಲಿ ಹೆನ್ರಿಯನ್ನು ಬೌಲ್ಡ್​ ಮಾಡಿದ ಜೋಫ್ರಾ ಆರ್ಚರ್ ಕೇವಲ 3 ರನ್​ ನೀಡಿ ನ್ಯೂಜಿಲೆಂಡ್ ತಂಡವನ್ನು 8 ವಿಕೆಟ್​ ನಷ್ಟಕ್ಕೆ 241 ರನ್​ಗಳಿಗೆ ಕಟ್ಟಿ ಹಾಕಿದರು. ಇನ್ನು ಇಂಗ್ಲೆಂಡ್ ಪರ ಪ್ಲಂಕೆಟ್ ಹಾಗೂ ಕ್ರಿಸ್ ವೋಕ್ಸ್ ತಲಾ 3 ವಿಕೆಟ್​ ಉರುಳಿಸಿ ಯಶಸ್ವಿ ಬೌಲರುಗಳು ಎನಿಸಿಕೊಂಡರು.
First published: July 15, 2019, 1:30 AM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories