Virender Sehwag: ಇದು ಹೊಸ ಭಾರತ...ಮನೆಗೆ ನುಗ್ಗಿ ಹೊಡ್ತೀವಿ..!

ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾ ಐತಿಹಾಸಿಕ ಜಯ ಸಾಧಿಸಿದೆ. ಅನಾನುಭವಿ ಆಟಗಾರರ ಕೆಚ್ಚೆದೆಯ ಪ್ರದರ್ಶನದ ಮುಂದೆ ಅಂತಿಮ ಟೆಸ್ಟ್​ನಲ್ಲಿ ಆಸೀಸ್ ಪಡೆ ಮಂಡಿಯೂರಿದೆ. ಇದರೊಂದಿಗೆ ಬಾರ್ಡರ್​-ಗವಾಸ್ಕರ್ ಸರಣಿಯನ್ನು ಭಾರತ 2-1 ಅಂತರದಿಂದ ತನ್ನದಾಗಿಸಿಕೊಂಡಿದೆ.

ಬ್ರಿಸ್ಬೇನ್​ನ ಗಬ್ಬಾ ಮೈದಾನದಲ್ಲಿ ನಡೆದ 4ನೇ ಟೆಸ್ಟ್ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ 369 ರನ್​ಗಳಿಸಿತ್ತು. ಇದಕ್ಕೆ ಉತ್ತರವಾಗಿ ಟೀಮ್ ಇಂಡಿಯಾ 336 ರನ್​ಗಳಿಸಲಷ್ಟೇ ಶಕ್ತರಾಗಿದ್ದರು. 2ನೇ ಇನಿಂಗ್ಸ್​ನಲ್ಲಿ ಆಸೀಸ್​ ಬ್ಯಾಟ್ಸ್​ಮನ್​ಗಳನ್ನು ಮೊಹಮ್ಮದ್ ಸಿರಾಜ್ (5 ವಿಕೆಟ್) ಹಾಗೂ ಶಾರ್ದುಲ್ ಠಾಕೂರ್ (4 ವಿಕೆಟ್​) 294 ರನ್​ಗೆ ಆಲೌಟ್​ ಮಾಡುವಲ್ಲಿ ಯಶಸ್ವಿಯಾಗಿತ್ತು.

ಮೊದಲ ಇನಿಂಗ್ಸ್​ ಹಿನ್ನಡೆಯೊಂದಿಗೆ 328 ರನ್​ಗಳ ಗುರಿ ಬೆನ್ನಟ್ಟಿದ ಭಾರತ ನಾಲ್ಕನೇ ದಿನದಾಟದ ಅಂತ್ಯಕ್ಕೆ ವಿಕೆಟ್ ನಷ್ಟವಿಲ್ಲದೆ 4 ರನ್ ಗಳಿಸಿತ್ತು. ಕೊನೆಯ ದಿನ ಭಾರತಕ್ಕೆ ಗೆಲ್ಲಲು 325 ರನ್​ಗಳ ಅವಶ್ಯಕತೆಯಿತ್ತು. ಆರಂಭಿಕ ಆಟಗಾರ ಶುಭ್​ಮನ್ ಗಿಲ್ ಅವರ ಮನಮೋಹಕ 91 ರನ್ ಹಾಗೂ ಮಧ್ಯಮ ಕ್ರಮಾಂಕದಲ್ಲಿ ರಿಷಭ್ ಪಂತ್ ಅವರ ಬಿರುಸಿನ 89 ರನ್​ಗಳ ಸಹಾಯದಿಂದ ಟೀಮ್ ಇಂಡಿಯಾ 3 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿ ಇತಿಹಾಸ ಬರೆಯಿತು.

ಈ ಐತಿಹಾಸಿಕ ಗೆಲುವಿಗೆ ಟೀಮ್ ಇಂಡಿಯಾವನ್ನು ಭಾರತ ತಂಡದ ಮಾಜಿ ಆರಂಭಿಕ ಆಟಗಾರ ವೀರೇಂದ್ರ ಸೆಹ್ವಾಗ್ ಅಭಿನಂದಿಸಿದ್ದಾರೆ. ಅದು ಕೂಡ ಪಂಚಿಂಗ್ ಡೈಲಾಗ್ ಮೂಲಕ ಎಂಬುದು ವಿಶೇಷ. ಈ ಬಗ್ಗೆ ಟ್ವೀಟ್ ಮಾಡಿರುವ ವೀರು, ಇದು ಹೊಸ ಭಾರತ. ಮನೆಗೆ ನುಗ್ಗಿ ಹೊಡಿತೀವಿ. ಅಡಿಲೇಡ್​ ಟೆಸ್ಟ್​ ಪಂದ್ಯದಲ್ಲಿ ಏನಾಯಿತು ಎಂಬುದರಿಂದ ಹಿಡಿದು, ಯುವ ಆಟಗಾರರು ಇಲ್ಲಿಯವರೆಗೂ ಜೀವಮಾನಕ್ಕೆ ಸಾಕಾಗುವುಷ್ಟು ಸಂತೋಷ ನೀಡಿದ್ದಾರೆ. ಇದು ವಿಶ್ವಕಪ್ ಗೆಲುವುಗಿಂತಲೂ ತುಂಬಾ ವಿಶೇಷವಾಗಿದೆ.ಇದಕ್ಕೆಲ್ಲಾ ಕಾರಣ ಪಂತ್ ಎಂಬುದೇ ಮತ್ತೊಂದು ವಿಶೇಷ ಎಂದು ಸೆಹ್ವಾಗ್ ಹೇಳಿದ್ದಾರೆ.



ಇನ್ನು ಈ ಗೆಲುವಿನ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ, "ಇದೊಂದು ಅವಿಸ್ಮರಣೀಯ ಗೆಲುವು. ಆಸ್ಟ್ರೇಲಿಯಾದಲ್ಲಿ ಟೆಸ್ಟ್​ ಸರಣಿ ಗೆದ್ದಿರುವುದು ನಿಜಕ್ಕೂ ಅದ್ಭುತ. ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಈ ಗೆಲುವು ಎಂದೆಂದಿಗೂ ನೆನಪಿನಲ್ಲಿ ಇರಲಿದೆ. ಇದೇ ಖುಷಿಯಲ್ಲಿ ತಂಡಕ್ಕೆ ಬಿಸಿಸಿಐ 5 ಕೋಟಿ ರೂ. ಬೋನಸ್ ನೀಡುತ್ತಿರುವುದಾಗಿ ಘೋಷಿಸಿದ್ದಾರೆ.