ಆಸ್ಟ್ರೇಲಿಯಾದಲ್ಲಿ ಏಕದಿನ ಹಾಗೂ ಟಿ20 ಪಂದ್ಯಗಳಿಂದ ಹೊರಗುಳಿದಿದ್ದೇಕೆ?; ಅಸಲಿ ಕಾರಣ ಬಿಚ್ಚಿಟ್ಟ ರೋಹಿತ್ ಶರ್ಮಾ

ಹಿಟ್​ಮ್ಯಾನ್​ ರೋಹಿತ್​ ಶರ್ಮಾ ಮುಂಬೈ ಇಂಡಿಯನ್ಸ್​ ಪರ ಆಡುವಾಗ ಇಂಜುರಿ ಸಮಸ್ಯೆಗೆ ತುತ್ತಾಗಿದ್ದರು. ಇದೇ ಕಾರಣಕ್ಕೆ ಅವರನ್ನು ಆಸ್ಟ್ರೇಲಿಯಾ ಟೂರ್​ನಿಂದ ಹೊರಗಿಡಲಾಗಿದೆ ಎನ್ನಲಾಗಿತ್ತು. ಈ ಮಧ್ಯೆ ಅವರು ಮುಂಬೈ ಪರ ಆಡಿದ್ದು ಸಾಕಷ್ಟು ಪ್ರಶ್ನೆಗಳಿಗೆ ಎಡೆಮಾಡಿಕೊಟ್ಟಿತ್ತು. ಈಗ ಈ ಎಲ್ಲ ಪ್ರಶ್ನೆಗಳಿಗೆ ರೋಹಿತ್​ ಶರ್ಮಾ ಉತ್ತರ ನೀಡಿದ್ದಾರೆ.

ಪಿಟಿಐ ಜೊತೆ ನಡೆಸಿದ ವಿಸ್ತೃತ ಸಂದರ್ಶನದಲ್ಲಿ ಅವರು ಈ ಬಗ್ಗೆ ಮಾತನಾಡಿದ್ದಾರೆ. ನನಗೆ ಬೇರೆಯವರು ಏನು ಹೇಳುತ್ತಾರೆ ಎನ್ನುವ ವಿಚಾರ ಬೇಡ. ನಾನು ಅದನ್ನು ಕೇಳಿಸಿಕೊಳ್ಳುವುದೂ ಇಲ್ಲ ಎಂದಿದ್ದಾರೆ. ಈ ಮೂಲಕ ಟೀಕಾಕಾರರಿಗೆ ಉತ್ತರ ನೀಡಿದ್ದಾರೆ.

ಇನ್ನು, ಇಂಜುರಿ ವಿಚಾರದ ಬಗ್ಗೆ ಮಾತನಾಡಿರುವ ಅವರು, ನನ್ನ ಗಾಯದ ಸಮಸ್ಯೆ ಸಂಪೂರ್ಣವಾಗಿ ವಾಸಿ ಆಗಿಲ್ಲ. ಟಿ20 ಅನ್ನೋದು ಕಡಿಮೆ ಅವಧಿಯ ಗೇಮ್​​. ಹೀಗಾಗಿ ಅದನ್ನು ಸುಲಭವಾಗಿ ಆಡಬಹುದು. ಆದರೆ, ಏಕದಿನ ಪಂದ್ಯಗಳನ್ನಾಡುವಾಗ ಅದಕ್ಕೆ ಹೆಚ್ಚಿನ ಸಿದ್ಧತೆ ಬೇಕು. ಹೀಗಾಗಿ, ನಾನು ಐಪಿಎಲ್​​ನಲ್ಲಿ ಆಡಿದ್ದೆ ಮತ್ತು ಏಕದಿನ ಪಂದ್ಯಗಳನ್ನಾಡಲಿಲ್ಲ. ನನಗೆ ಈ ಗಾಯದ ಸಮಸ್ಯೆಯಿಂದ ಹೊರ ಬರಲು ಕನಿಷ್ಠ 25 ದಿನಗಳ ಅವಶ್ಯಕತೆ ಬೇಕೆನ್ನಿಸಿತು. ಹೀಗಾಗಿ, ನಾನು ಏಕದಿನ ಪಂದ್ಯ ಹಾಗೂ ಟಿ20 ಆಡಲು ಒಪ್ಪಿಲ್ಲ ಎಂದಿದ್ದಾರೆ ರೋಹಿತ್​ ಶರ್ಮಾ.

ಆಸ್ಟ್ರೇಲಿಯಾ ಪ್ರವಾಸಕ್ಕೆ ಟೀಂ ಇಂಡಿಯಾದಿಂದ ರೋಹಿತ್​ ಶರ್ಮಾ ಅವರನ್ನು ಕೈಬಿಟ್ಟಿರುವುದು ಸಾಕಷ್ಟು ಚರ್ಚೆಗೆ ಕಾರಣವಾಗಿತ್ತು. ಅವರು ಫಿಟ್​ ಆಗಿಲ್ಲ ಎಂದು ಹೇಳಿಕೆಕೊಟ್ಟ ಬೆನ್ನಲ್ಲೇ ಮುಂಬೈ ತಂಡಕ್ಕೆ ರೋಹಿತ್​ ವಾಪಾಸಾಗಿದ್ದರು. ನಂತರ ರೋಹಿತ್ ಶರ್ಮಾ ಏಕದಿನ ಹಾಗೂ ಟಿ20ಗೆ ಲಭ್ಯವಿರದಿದ್ದರೂ, ಟೆಸ್ಟ್ ಮ್ಯಾಚ್​ಗೆ ಭಾರತದ ಪರವಾಗಿ ರೋಹಿತ್ ಬ್ಯಾಟ್ ಬೀಸಲಿದ್ದಾರೆ ಎಂದು ಬಿಸಿಸಿಐ ಹೇಳಿತ್ತು.