Prithvi Shaw: ಮಯಾಂಕ್ ಅಗರ್ವಾಲ್ ದಾಖಲೆ ಮುರಿದ ಪೃಥ್ವಿ ಶಾ..!

ವಿಜಯ್ ಹಜಾರೆ ಟೂರ್ನಿಯಲ್ಲಿ ಮುಂಬೈ ಆಟಗಾರ ಪೃಥ್ವಿ ಶಾ ಹೊಸ ಇತಿಹಾಸ ಬರೆದಿದ್ದಾರೆ. ಈ ಬಾರಿ ಟೂರ್ನಿಯಲ್ಲಿ 4 ಶತಕ ಸಿಡಿಸಿರುವ ಪೃಥ್ವಿ ಕರ್ನಾಟಕದ ಮಯಾಂಕ್ ಅಗರ್ವಾಲ್ ಹೆಸರಿನಲ್ಲಿದ್ದ ಸೀಸನ್​ನ ಅತ್ಯಧಿಕ ರನ್ ಸ್ಕೋರರ್ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡಿದ್ದಾರೆ. ಮೊದಲ ಪಂದ್ಯದಲ್ಲಿ ಅಜೇಯ 105 (89 ಎಸೆತ), 2ನೇ ಪಂದ್ಯದಲ್ಲಿ 34 (38), ಮೂರನೇ ಪಂದ್ಯದಲ್ಲಿ ಅಜೇಯ 227 (152 ಎಸೆತ), ನಾಲ್ಕನೇ ಪಂದ್ಯದಲ್ಲಿ 36 (30), 5ನೇ ಪಂದ್ಯದಲ್ಲಿ 2 (5), ಆರನೇ ಪಂದ್ಯದಲ್ಲಿ ಅಜೇಯ 185(123 ಎಸೆತ) ರನ್ ಬಾರಿಸಿದ್ದ ಪೃಥ್ವಿ ಶಾ, ಕರ್ನಾಟಕ ವಿರುದ್ಧದ ಸೆಮಿಫೈನಲ್​ನಲ್ಲಿ 165 ರನ್​ ಸಿಡಿಸಿದ್ದಾರೆ.

ಈ ಮೂಲಕ 754 ರನ್ ಕಲೆಹಾಕುವುದರೊಂದಿಗೆ ಈ ಬಾರಿ ಸೀಸನ್​ನಲ್ಲಿ ಟಾಪ್ ಸ್ಕೋರರ್ ಎನಿಸಿಕೊಂಡಿದ್ದಾರೆ. ಅಲ್ಲದೆ ವಿಜಯ್ ಹಜಾರೆ ಟೂರ್ನಿ ಇತಿಹಾಸದಲ್ಲೇ ಸೀಸನ್​ವೊಂದರಲ್ಲಿ ಅತ್ಯಧಿಕ ರನ್ ಬಾರಿಸಿದ ಆಟಗಾರ ಎಂಬ ದಾಖಲೆ ಬರೆದಿದ್ದಾರೆ. ಈ ಹಿಂದೆ 2018 ರಲ್ಲಿ ಮಯಾಂಕ್ ಅಗರ್ವಾಲ್ 723 ರನ್​ ಕಲೆಹಾಕಿದ್ದು ದಾಖಲೆಯಾಗಿತ್ತು.

ಇನ್ನು ಪೃಥ್ವಿ ಶಾ ಈ ದಾಖಲೆಯನ್ನು ಕೇವಲ 7 ಇನ್ನಿಂಗ್ಸ್‌ಗಳಲ್ಲಿ ಮಾಡಿರುವುದು ವಿಶೇಷ. ಮಯಾಂಕ್ ಅಗರ್ವಾಲ್ 8 ಇನ್ನಿಂಗ್ಸ್‌ಗಳ ಮೂಲಕ 723 ರನ್ ಕಲೆಹಾಕಿದ್ದರು. ಕರ್ನಾಟಕದ ವಿರುದ್ಧ ನಡೆದ ವಿಜಯ್ ಹಜಾರೆ ಟೂರ್ನಿಯ ಎರಡನೇ ಸೆಮಿಫೈನಲ್​ನಲ್ಲಿ ಪೃಥ್ವಿ ಶಾ ಅಬ್ಬರಿಸುವ ಮೂಲಕ ಹೊಸ ಇತಿಹಾಸ ನಿರ್ಮಿಸಿದರು. ಮುಂಬೈ ತಂಡದ ನಾಯಕನಾಗಿರುವ ಪೃಥ್ವಿ ಶಾ ತಮ್ಮ ಸ್ಪೋಟಕ ಬ್ಯಾಟಿಂಗ್​ ನೆರವಿನಿಂದ ತಂಡವನ್ನು ಫೈನಲ್​ಗೆ ತಲುಪಿಸಿದ್ದಾರೆ.