ವಾರ್ಮ್ ಅಪ್ ಪಂದ್ಯದಲ್ಲೇ ಅಫ್ಘಾನ್ ವಾರ್ನಿಂಗ್; ಬಲಿಷ್ಠ ಪಾಕ್​ಗೆ ಮಣ್ಣು ಮುಕ್ಕಿಸಿದ ಕ್ರಿಕೆಟ್ ಶಿಶುಗಳು

ಬೆಂಗಳೂರು (ಮೇ. 24): ಇಂಗ್ಲೆಂಡ್​ನ ಬ್ರಿಸ್ಟಾಲ್​​ನಲ್ಲಿ ನಡೆದ ಐಸಿಸಿ ವಿಶ್ವಕಪ್ ಅಭ್ಯಾಸ ಪಂದ್ಯದಲ್ಲಿ ಬಲಿಷ್ಠ ಪಾಕಿಸ್ತಾನಕ್ಕೆ ಕ್ರಿಕೆಟ್ ಶಿಶು ಅಫ್ಘಾನಿಸ್ತಾನ್ ಶಾಕ್ ನೀಡಿದೆ. 3 ವಿಕೆಟ್​ಗಳ ಭರ್ಜರಿ ಗೆಲುವು ಸಾಧಿಸಿರುವ ಅಫ್ಘಾನ್ ತಂಡ ವಾರ್ಮ್​​ ಅಪ್ ಪಂದ್ಯದಲ್ಲೇ ವಾರ್ನಿಂಗ್ ನೀಡಿದೆ. ಈ ಮೂಲಕ ಈ ಬಾರಿಯ ವಿಶ್ವಕಪ್​​ ಗೆಲ್ಲುವ ರೇಸ್​​ನಲ್ಲಿ ನಾವೂ ಇದ್ದೇವೆ ಎಂಬ ಖಡಕ್ ಸಂದೇಶ ರವಾನಿಸಿದೆ.

ಮೊದಲ ಅಭ್ಯಾಸ ಪಂದ್ಯದಲ್ಲಿ ಟಾಸ್ ಗೆದ್ದ ಪಾಕಿಸ್ತಾನ್ ಬ್ಯಾಟಿಂಗ್ ಆಯ್ಕೆ ಮಾಡಿತು. ಆದರೆ, ಉತ್ತಮ ಆರಂಭ ಪಡೆದುಕೊಳ್ಳುವಲ್ಲಿ ಎಡವಿದ ಪಾಕ್ 100 ರನ್ ಆಗುವ ಹೊತ್ತಿಗೆನೆ ಪ್ರಮುಖ 4 ವಿಕೆಟ್ ಕಳೆದುಕೊಂಡಿತು. ಭರವಸೆಯ ಆಟಗಾರ ಇಮಾಮ್ ಉಲ್ ಹಖ್ 32 ರನ್ ಗಳಿಸಿರುವಾಗ ಹಮೀದ್ ಎಸೆತದಲ್ಲಿ ಬೌಲ್ಡ್​ ಆದರೆ, ಫಾರುಖ್ ಜಮಾನ್ 19 ರನ್​ಗೆ ನಬಿಗೆ ವಿಕೆಟ್ ಒಪ್ಪಿಸಿದರು. ಬಂದ ಬೆನ್ನಲ್ಲೆ ಸೊಹೇಲ್ ಕೇವಲ 1 ರನ್​ಗೆ ನಿರ್ಗಮಿಸಿದರೆ, ಮೊಹ್ಮದ್ ಹಫೀಜ್ 12 ರನ್​ಗೆ ಸುಸ್ತಾದರು.

ಹೀಗೆ ಒಂದು ಕಡೆ ವಿಕೆಟ್ ಉರುಳುತ್ತಿದ್ದರೆ ಬಾಬರ್ ಅಜಮ್ ಮಾತ್ರ ಕ್ರೀಸ್ ಕಚ್ಚಿ ಆಡಿದರು. ಜೊತೆಗೆ ಅರ್ಧಶತಕ ಬಾರಿಸಿದರು. ಹೀಗೆ ಸತತ ವಿಕೆಟ್ ಕಳೆದುಕೊಂಡು ಸಾಗುತ್ತಿದ್ದ ತಂಡಕ್ಕೆ 5ನೇ ವಿಕೆಟ್​ಗೆ ಬಾಬರ್ ಜೊತೆಯಾದ ಅನುಭವಿ ಶೋಯೆಬ್ ಮಲ್ಲಿಕ್ ಉತ್ತಮ ಆಟ ಪ್ರದರ್ಶಿಸಿದರು. ಕುಸಿಯುವ ಹಂತದಲ್ಲಿದ್ದ ತಂಡವನ್ನು ಮೇಲೆಕ್ಕೆತ್ತುವಲ್ಲಿ ಈ ಜೋಡಿ ಯಶಸ್ವಿಯಾಯಿತು. ಆದರೆ, ಮಲಿಕ್ 44 ರನ್ ಗಳಿಸಿರುವಾಗ ನಬಿ ಅವರು ತಮ್ಮ ಸ್ಪಿನ್ ಜಾದುವಿನಿಂದ ಇವರ 103 ರನ್​ಗಳ ಜೊತೆಯಾಕ್ಕೆ ಬ್ರೇಕ್ ಹಾಕಿದರು. ನಾಯಕ ಸರ್ಫರಾಜ್ ಅಹ್ಮದ್ ಆಟ 13 ರನ್​ಗೆ ಅಂತ್ಯವಾಯಿತು.

ಇದನ್ನೂ ಓದಿ: ICC World Cup 2019 | ನಾಳೆ ಭಾರತ vs ನ್ಯೂಜಿಲೆಂಡ್ ಅಭ್ಯಾಸ ಪಂದ್ಯ; ಕೊಹ್ಲಿಗೆ 4ನೇ ಸ್ಥಾನದ್ದೇ ಸಮಸ್ಯೆ!

ಇದರ ನಡುವೆ ಬಾಬರ್ ಭರ್ಜರಿ ಶತಕ ಸಿಡಿಸಿ ಸಂಭ್ರಮಿಸಿದರು. ಸೆಂಚುರಿ ಬಾರಿಸಿ ಬಾಬರ್ ಕೂಡ ಹೆಚ್ಚುಹೊತ್ತು ಕ್ರೀಸ್​ನಲ್ಲಿ ನಿಲ್ಲಲಿಲ್ಲ. 108 ಎಸೆತಗಳಲ್ಲಿ 112 ರನ್ ಬಾರಿಸಿ ಬಾಬರ್ ಕೂಡ ಔಟ್ ಆದರು. ಅಂತಿಮವಾಗಿ ಪಾಕಿಸ್ತಾನ್ 47.5 ಓವರ್​ನಲ್ಲಿ 262 ರನ್​​ಗೆ ಆಲೌಟ್ ಆಯಿತು. ಅಫ್ಘಾನ್ ಪರ ಮೊಹಮ್ಮದ್ ನಬಿ 3 ವಿಕೆಟ್ ಕಿತ್ತರೆ, ರಶೀದ್ ಖಾನ್ ಹಾಗೂ ದವ್ಲತ್ ಜದ್ರನ್ ತಲಾ 2 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಎನಿಸಿಕೊಂಡರು.

ಇತ್ತ 263 ರನ್​ಗಳ ಸವಾಲಿನ ಮೊತ್ತ ಬೆನ್ನಟ್ಟಿದ ಅಫ್ಘಾನಿಸ್ತಾನ್ ಬೊಂಬಾಟ್ ಆರಂಭ ಪಡೆದುಕೊಂಡಿತು. ಮೊಹಮ್ಮದ್ ಶಹ್ಜಾದ್ ಹಾಗೂ ಹಜ್ರತುಲ್ಲಾ ಜ್ಹಜ್ಹಯ್ ಸ್ಫೋಟಕ ಆಟ ಪ್ರದರ್ಶಿಸಿ ಮೊದಲ ವಿಕೆಟ್​ಗೆ 11 ಓವರ್ ಆಗುವ ಹೊತ್ತಿಗೆನೆ 80 ರನ್ ಪೂರೈಸಿದರು. 28 ಎಸೆತಗಳಲ್ಲಿ 8 ಬೌಂಡರಿ, 2 ಸಿಕ್ಸರ್ ಚಚ್ಚಿದ ಹಜ್ರತುಲ್ಲಾ 49 ರನ್​ಗೆ ಔಟ್ ಆದರು. ಬಳಿಕ ಶಹ್ಜಾದ್ ಜೊತೆಯಾದ ರೆಹ್ಮತ್ ಶಾ 32 ರನ್ ಗಳಿಸಿದರೆ, ಶಹ್ಜಾದ್ 23 ರನ್ ಗಳಿಸಿರುವಾಗ ಅನಾರೋಗ್ಯದಿಂದ ಮೈದಾನ ತೊರೆದರು. ಬಳಿಕ ಬಂದ ಶೆನ್ವಾರು 22 ಹಾಗೂ ಅಸ್ಗರ್ ಅಫ್ಘನ್ 7 ರನ್​ಗೆ ಬ್ಯಾಟ್ ಕೆಳಗಿಟ್ಟರು.

ಈ ಸಂದರ್ಭ ಹಶ್ಮತುಲ್ಲಾ ಶಾಹಿದಿ ಹಾಗೂ ಮೊಹಮ್ಮದ್ ನಬಿ ತಂಡಕ್ಕೆ ಆಸರೆಯಾಗಿ ನಿಂತರು. ಎಚ್ಚರಿಯೆ ಆಟ ಪ್ರದರ್ಶಿಸಿದ ಈ ಜೋಡಿ ತಂಡದ ಗೆಲುವಿಗೆ ಹೋರಾಟ ನಡೆಸಿದರು. ಅದರಂತೆ ಈ ಜೋಡಿಯ ಖಾತೆಯಿಂದ 66 ರನ್​ಗಳ ಕಾಣಿಕೆ ಬಂತು. ಚೆನ್ನಾಗಿಯೆ ಆಡುತ್ತಿದ್ದ ನಬಿ 34 ರನ್​ಗೆ ಬಲಿಯಾದರು. ಬಂದ ಬೆನ್ನಲ್ಲೆ ನಾಯಕ ಗುಲ್ಬದಿನ್ ನೈಬ್(2) ಹಾಗೂ ನಜಿಬುಲ್ಲ(1) ಪೆವಿಲಿಯನ್ ಸೇರಿಕೊಂಡಿದ್ದು ತಂಡ ಸೋಲಿನ ಸುಳಿಗೆ ಸಿಲುಕಿತು.ಇದನ್ನೂ ಓದಿ: VIDEO: ಆಂಡ್ರೆ ರಸೆಲ್​ ಭಯಂಕರ ಬೌನ್ಸರ್: ವಿಶ್ವಕಪ್​ನಿಂದ ಉಸ್ಮಾನ್ ಖ್ವಾಜಾ ಔಟ್?

ಪರಿಣಾಮ ಕೊನೆಯ ಓವರ್​ನಲ್ಲಿ ಅಫ್ಘಾನ್ ಗೆಲುವಿಗೆ 4 ರನ್​ಗಳ ಅವಶ್ಯಕತೆಯಿತ್ತು. ಅರ್ಧಶತಕ ಸಿಡಿಸಿದ್ದ ಶಾಹಿದಿ ವಿನ್ನಿಂಗ್ ಶಾಟ್ ಹೊಡೆಯುವ ಮೂಲಕ ಇನ್ನೂ 2 ಎಸೆತ ಬಾಕಿ ಇರುವಂತೆಯೆ ಅಫ್ಘಾನ್ 3 ವಿಕೆಟ್​ಗಳ ಗೆಲುವು ಸಾಧಿಸಿತು. ಪಾಕ್ ಪರ ವಹಾಬ್ ರಿಯಾಜ್ 3 ಹಾಗೂ ಇಮಾದ್ ವಾಸಿಮ್ 2 ವಿಕೆಟ್ ಪಡೆದರು. ಅಮೋಘ ಆಟ ಪ್ರದರ್ಶಿಸಿದ ಶಾಹಿದಿ 102 ಎಸೆತಗಳಲ್ಲಿ 74 ರನ್ ಗಳಿಸಿ ಅಜೇಯರಾಗಿ ಉಳಿದರು.

ಈ ಮೂಲಕ 3 ವಿಕೆಟ್​ಗಳ ಗೆಲುವಿನೊಂದಿಗೆ ಅಫ್ಘಾನಿಸ್ಥಾನ್ ತಂಡ ವಿಶ್ವಕಪ್​​ನ ಅಭ್ಯಾಸ ಪಂದ್ಯದಲ್ಲೇ ಉತ್ತಮ ಆರಂಭ ಪಡೆದುಕೊಂಡಿದೆ. ಹಿಂದಿಗಿಂತ ಅಫ್ಘಾನ್ ಸದ್ಯ ಸಾಕಷ್ಟು ಬಲಿಷ್ಠವಾಗಿದ್ದು, ಈ ಬಾರಿಯ ವಿಶ್ವಕಪ್​ನಲ್ಲಿ ಎದುರಾಳಿಗರನ್ನು ಕಾಡುವುದಂತು ಸುಳ್ಳಲ್ಲ.

 

Afghanistan win by three wickets!

Fittingly, it's Hashmatullah Shahidi who scores the winning runs. He top-scored with a superb 74* – an excellent win for Afghanistan 👏 pic.twitter.com/wlWmJRmABH

— Cricket World Cup (@cricketworldcup) May 24, 2019