PSL - ಪಾಕಿಸ್ತಾನ ಸೂಪರ್ ಲೀಗ್ ವಿಶ್ವದ ಅತ್ಯುತ್ತಮ ಕ್ರಿಕೆಟ್ ಲೀಗ್ ಎಂದ ಮಾಜಿ ಆಟಗಾರ

ಪಿಎಸ್ಎಲ್ ವಿಶ್ವದ ಅತ್ಯುತ್ತಮ ಕ್ರಿಕೆಟ್ ಲೀಗ್. ಇಲ್ಲಿರುವ ಅತ್ಯುತ್ತಮ ಗುಣಮಟ್ಟದ ಬೌಲರ್​ಗಳನ್ನ ಬೇರಾವ ಟೂರ್ನಿಯಲ್ಲೂ ನೋಡಲು ಸಾಧ್ಯವಿಲ್ಲ ಎಂದು ಮಾಜಿ ಪಾಕ್ ಕ್ರಿಕೆಟಿಗ ಮುಷ್ತಾಕ್ ಅಹ್ಮದ್ ಅಭಿಪ್ರಾಯಪಟ್ಟಿದ್ಧಾರೆ.

ಪಿಎಸ್​ಎಲ್-2021 ಗೆದ್ದ ಮುಲ್ತಾನ್ ಸುಲ್ತಾನ್ಸ್ ತಂಡ

ಪಿಎಸ್​ಎಲ್-2021 ಗೆದ್ದ ಮುಲ್ತಾನ್ ಸುಲ್ತಾನ್ಸ್ ತಂಡ

  • Share this:
ಇಸ್ಲಾಮಾಬಾದ್: ಭಾರತದ ಐಪಿಎಲ್ ಮಾದರಿಯಲ್ಲಿ ಪಾಕಿಸ್ತಾನದಲ್ಲಿ ನಡೆಯುತ್ತಿರುವ ಪಿ ಎಸ್ ​ಎಲ್ ಅನ್ನು ಮಾಜಿ ಪಾಕ್ ಕ್ರಿಕೆಟಿಗ ಮುಷ್ತಾಖ್ ಅಹ್ಮದ್ ವಿಶ್ವದ ಅತ್ಯುತ್ತಮ ಕ್ರಿಕೆಟ್ ಲೀಗ್ ಎಂದು ಬಣ್ಣಿಸಿದ್ದಾರೆ. ಕ್ರಿಕೆಟ್ ಪಾಕಿಸ್ತಾನ್ ವಾಹಿನಿ ಜೊತೆ ಸಂದರ್ಶನದಲ್ಲಿ ಮಾತನಾಡುತ್ತಿದ್ದ ನಿವೃತ್ತ ಲೆಗ್ ಸ್ಪಿನ್ನರ್ ಮುಷ್ತಾಕ್ ಅಹ್ಮದ್, ಪಾಕಿಸ್ತಾನ್ ಸೂಪರ್ ಲೀಗ್​ನಲ್ಲಿ ಪ್ರದರ್ಶನಗೊಳ್ಳುತ್ತಿರುವ ಕ್ರಿಕೆಟ್ ಗುಣಮಟ್ಟದ ಬಗ್ಗೆ ಶ್ಲಾಘನೆ ವ್ಯಕ್ತ ಪಡಿಸಿದ್ಧಾರೆ. ಈ ಟೂರ್ನಿಯಲ್ಲಿ ಉತ್ತಮ ಗುಣಮಟ್ಟದ ಬೌಲಿಂಗ್ ಎದುರು ಆಡಲು ಬಹಳ ಖುಷಿಯಾಗುತ್ತದೆ ಎಂದು ತನಗೆ ಟೂರ್ನಿಯ ಹಲವು ವಿದೇಶೀ ಆಟಗಾರರು ಹೇಳಿದರೆಂದು ಮುಷ್ತಾಕ್ ಈ ಸಂದರ್ಶನದಲ್ಲಿ ಉಲ್ಲೇಖಿಸಿದ್ದಾರೆ.

“ಪಿಎಸ್​ಎಲ್ ವಿಶ್ವದ ಅತ್ಯುತ್ತಮ ಲೀಗ್ ಆಗಿದೆ. ನಾನು ಅನೇಕ ವಿದೇಶೀ ಆಟಗಾರರೊಂದಿಗೆ ಮಾತನಾಡಿದ್ದೇನೆ. ಈ ಟೂರ್ನಿಯಲ್ಲಿ ಇರುವ ಕಠಿಣ ಬೌಲಿಂಗ್ ಅನ್ನು ತಾವು ಬೇರಾವ ಟೂರ್ನಿಯಲ್ಲೂ ಎದುರಿಸಿಲ್ಲ ಎಂದು ಅವರು ನನಗೆ ತಿಳಿಸಿದರು. ಐಪಿಎಲ್ ಇರಲಿ, ಬಿಗ್ ಬಾಷ್ ಅಥವಾ ಇಂಗ್ಲೆಂಡ್​ನ ಟಿ20 ಬ್ಲಾಸ್ಟ್ ಇರಲಿ ಅಲ್ಲೆಲ್ಲೂ ಪಿಎಸ್​ಎಲ್​ನಲ್ಲಿ ಇರುವಂತಹ ಬೌಲರ್​ಗಳು ಇಲ್ಲ. ಪಾಕಿಸ್ತಾನ್ ಸೂಪರ್ ಲೀಗ್​ನ ಪ್ರತಿಯೊಂದೂ ಫ್ರಾಂಚೈಸಿಯಲ್ಲೂ 135 ಕಿಮೀಗಿಂತ ಹೆಚ್ಚು ವೇಗದಲ್ಲಿ ಬೌಲ್ ಮಾಡಬಲ್ಲ 2-3 ಬೌಲರ್​ಗಳಾದರೂ ಇರುತ್ತಾರೆ. ಅಷ್ಟೇ ಅಲ್ಲ, ಹಲವಾರು ಮಿಸ್ಟರಿ ಸ್ಪಿನ್ನರ್​ಗಳೂ ವಿವಿಧ ತಂಡ ಗಳಲ್ಲಿದ್ದಾರೆ” ಎಂದು ಮುಷ್ತಾಕ್ ಅಹ್ಮದ್ ಹೇಳಿದ್ದಾರೆ.

ಇದನ್ನೂ ಓದಿ: R C B: ರಾಯಲ್ ಚಾಲೆಂಜರ್ಸ್​ ಬೆಂಗಳೂರಿಗೆ ನೂತನ ಸಾರಥಿ..!

“ನನ್ನೊಂದಿಗೆ ಮಾತನಾಡಿರುವ ವಿದೇಶೀ ಆಟಗಾರರು, ತಮಗೆ ಪಿಎಸ್​ಎಲ್​ನ ಕ್ಲಿಷ್ಟಕರ ಕ್ರಿಕೆಟ್​ನಲ್ಲಿ ಆಡುವುದರಿಂದ ತಮ್ಮ ಆಟದ ಗುಣಮಟ್ಟ ಹೆಚ್ಚಿಸಿಕೊಳ್ಳಲು ಸಹಕಾರಿಯಾಗುತ್ತದೆ. ವಿದೇಶೀ ಆಟಗಾರರನ್ನು ಸೆಳೆಯಬಲ್ಲ ಒಳ್ಳೆಯ ಗುಣಮಟ್ಟದ ಬೌಲರ್​ಗಳನ್ನ ಹೊಂದಿರುವುದು ಪಿಎಸ್​ಎಲ್​ನ ಅದೃಷ್ಟವಾಗಿದೆ. ಈ ಲೀಗ್​ನಲ್ಲಿ ಬಹಳಷ್ಟು ವೃತ್ತಿಪರತೆಯೂ ಇದೆ. ಈ ವಿಚಾರದಲ್ಲಿ ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿ ಹಾಗೂ ಪಿಎಸ್​ಎಲ್​ನ ಎಲ್ಲಾ ಫ್ರಾಂಚೈಸಿಗಳ ಪಾತ್ರ ಹೆಚ್ಚು. ಈ ಲೀಗ್​ ನಿಂದ ಪಾಕಿಸ್ತಾನ ಕ್ರಿಕೆಟ್​ಗೆ ಬಹಳಷ್ಟು ಅನುಕೂಲತೆ ಆಗುತ್ತಿದೆ. ಪಿಎಸ್​ಎಲ್​ನಿಂದ ಹೊರಹೊಮ್ಮುತ್ತಿರುವ ಬಹಳಷ್ಟು ಪ್ರತಿಭೆಗಳ ಆಯ್ಕೆ ರಾಷ್ಟ್ರೀಯ ತಂಡಕ್ಕೆ ಇದೆ. ಪಿಎಸ್​ಎಲ್​ನಿಂದ ಪಾಕಿಸ್ತಾನಕ್ಕೆ ಸೂಪರ್ ಸ್ಟಾರ್​ಗಳು ದೊರಕಬಹುದು” ಎಂದು ಮುಷ್ತಾಕ್ ಬಣ್ಣಿಸಿದ್ದಾರೆ.

ಪಾಕಿಸ್ತಾನ್ ಸೂಪರ್ ಲೀಗ್​ನಲ್ಲಿ ಒಟ್ಟು ಆರು ಫ್ರಾಂಚೈಸಿಗಳಿವೆ. ಇತ್ತೀಚೆಗೆ ಮುಕ್ತಾಯಗೊಂಡ ಈ ಬಾರಿಯ ಟೂರ್ನಿಯಲ್ಲಿ ಮೊಹಮ್ಮದ್ ರಿಜ್ವಾನ್ ನೇತೃತ್ವದ ಮುಲ್ತಾನ್ ಸುಲ್ತಾನ್ಸ್ ತಂಡವು ವಹಾಬ್ ರಿಯಾಜ್ ನೇತೃತ್ವದ ಪೇಶಾವರ್ ಝಾಲ್ಮಿ ತಂಡವನ್ನು ಫೈನಲ್​ನಲ್ಲಿ 47 ರನ್​ಗಳಿಂದ ಸೋಲಿಸಿ ಚಾಂಪಿಯನ್ ಎನಿಸಿದೆ.

ಇದನ್ನೂ ಓದಿ: Faf du plessis: ಗಂಭೀರವಾಗಿ ಗಾಯಗೊಂಡಿದ್ದ ಡುಪ್ಲೆಸಿಸ್​ ಈಗ ಹೇಗಿದ್ದಾರೆ..?

ಭಾರತದ ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ನಾವು ಪ್ರಮುಖವಾಗಿ ಆಸ್ಟ್ರೇಲಿಯಾ, ನ್ಯೂಜಿಲೆಂಡ್, ಇಂಗ್ಲೆಂಡ್, ವೆಸ್ಟ್ ಇಂಡೀಸ್, ಶ್ರೀಲಂಕಾ ದೇಶಗಳ ಆಟಗಾರರು ಪ್ರಮುಖವಾಗಿ ಕಾಣಸಿಗುತ್ತಾರೆ. ಪಾಕಿಸ್ತಾನ ಸೂಪರ್ ಲೀಗ್ ಟೂರ್ನಿಯಲ್ಲೂ ಈ ದೇಶಗಳ ಆಟಗಾರರು ಪಾಲ್ಗೊಳ್ಳುತ್ತಾರೆ. ಬಾಂಗ್ಲಾದೇಶ, ಆಫ್ಘಾನಿಸ್ತಾನದಿಂದಲೂ ಹಲವು ಆಟಗಾರರನ್ನು ಪಿಎಸ್​ಎಲ್​ನಲ್ಲಿ ನೋಡಬಹುದು.

(ನ್ಯೂಸ್​​​18 ಕನ್ನಡ ಕಳಕಳಿ: ಕೊರೋನಾ ಪಾಸಿಟಿವ್​ ಕೇಸ್​ಗಳ ಸಂಖ್ಯೆ ರಾಜ್ಯದಲ್ಲಿ ತಗ್ಗಿದೆಯಾದರೂ ಸೋಂಕಿನ ಅಪಾಯದಿಂದ ಸಂಪೂರ್ಣವಾಗಿ ಇನ್ನೂ ಯಾರೂ ಸುರಕ್ಷಿತರಲ್ಲ. ಹೀಗಾಗಿ ಪ್ರತಿಯೊಬ್ಬರು ಕೋವಿಡ್​​ ನಿಯಮಗಳಾದ ಮಾಸ್ಕ್​​ ಧರಿಸುವುದು, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದನ್ನು ಮರೆಯಬಾರದು. ಆದಷ್ಟು ಶೀಘ್ರವೇ ಲಸಿಕೆ ಪಡೆದು ಸೋಂಕಿನ ವಿರುದ್ಧದ ಯುದ್ಧದಲ್ಲಿ ಪ್ರತಿಯೊಬ್ಬರೂ ಕೈ ಜೋಡಿಸಬೇಕು.)
Published by:Vijayasarthy SN
First published: