PAK vs ZIM: ರೋಚಕ ಟೈ ಆದ ಪಾಕಿಸ್ತಾನ–ಜಿಂಬಾಬ್ವೆ ಏಕದಿನ ಪಂದ್ಯ: ಸೂಪರ್ ಓವರ್​ನಲ್ಲಿ ಏನಾಯ್ತು?

ಪಾಕ್​ಗೆ ಕೊನೆಯ 6 ಎಸೆತಗಳಲ್ಲಿ ಗೆಲ್ಲಲು 13 ರನ್​ಗಳು ಬೇಕಾಗಿತ್ತು. ಕೊನೆಯ ಒಂದು ಎಸೆತದಲ್ಲಿ 5 ರನ್ ಬೇಕಾಗಿತ್ತು.

PAK vs ZIM

PAK vs ZIM

  • Share this:
    ರಾವಲ್​ಪಿಂಡಿ (ನ. 03): ಪಾಕಿಸ್ತಾನ ಪ್ರವಾಸದಲ್ಲಿರುವ ಜಿಂಬಾಬ್ವೆ ತಂಡ ಏಕದಿನ ಸರಣಿ ಆಡುತ್ತಿದೆ. ಮಂಗಳವಾರ ರಾವಲ್​ಪಿಂಡಿಯಲ್ಲಿ ನಡೆದ ಅಂತಿಮ ಮೂರನೇ ಏಕದಿನ ಪಂದ್ಯದಲ್ಲಿ ಬಲಿಷ್ಠ ಪಾಕ್ ವಿರುದ್ಧ ಜಿಂಬಾಬ್ವೆ ತಂಡ ಸೂಪರ್ ಓವರ್​ನಲ್ಲಿ ರೋಚಕ ಜಯ ಸಾಧಿಸಿತು. ಈ ಮೂಲಕ ಜಿಂಬಾಬ್ವೆ ಅಂತಿಮ ಏಕದಿನ ಪಂದ್ಯ ಗೆದ್ದು ಬೀಗಿದರೆ, ಪಾಕ್ 2-1 ಅಂತರದಿಂದ ಸರಣಿ ವಶಪಡಿಸಿಕೊಂಡಿದೆ.

    ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಜಿಂಬಾಬ್ವೆ ಉತ್ತಮ ಆರಂಭ ಪಡೆದುಕೊಂಡಿಲ್ಲವಾದರೂ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​ಮನ್​ಗಳ ನೆರವಿನಿಂದ ಕಮ್​ಬ್ಯಾಕ್ ಮಾಡಿತು. 22 ರನ್​ಗೆ 3 ವಿಕೆಟ್ ಕಳೆದುಕೊಂಡಾಗ ಜೊತೆಯಾದ ವಿಕೆಟ್ ಕೀಪರ್ ಬ್ರೆಂಡನ್ ಟೇಲರ್ ಹಾಗೂ ಸಿಯಾನ್ ವಿಲಿಯಮ್ಸ್ ತಂಡಕ್ಕೆ ಆಸರೆಯಾಗಿ ನಿಂತು 84 ರನ್​ಗಳ ಕಾಣಿಕೆ ನೀಡಿದರು. ಟೇಲರ್ 56 ರನ್ ಗಳಿಸಿ ಔಟ್ ಆದರು.





    ಬಳಿಕ ವಿಲಿಯಮ್ಸ್ ಜೊತೆಯಾದ ಮಧೆವ್ರೆ(33) ಹಾಗೂ ರಾಜಾ(45) ಭರ್ಜರಿ ಜೊತೆಯಾಟ ಆಡಿದರು. ಅದರಲ್ಲೂ ವಿಲಿಯಮ್ಸ್ 135 ಎಸೆತಗಳಲ್ಲಿ 13 ಬೌಂಡರಿ, 1 ಸಿಕ್ಸರ್ ಬಾರಿಸಿ ಅಜೇಯ 118 ರನ್ ಗಳಿಸಿದರು. ಪರಿಣಾಮ ಜಿಂಬಾಬ್ವೆ ನಿಗದಿತ 50 ಓವರ್​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 278 ರನ್ ಕಲೆಹಾಕಿತು.

    ಸವಾಲಿನ ಮೊತ್ತ ಬೆನ್ನಟ್ಟಿದ ಪಾಕ್ ಕೂಡ 100 ರನ್​ಗೂ ಮೊದಲೇ 5 ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಆದರೆ, ಕ್ರೀಸ್ ಕಚ್ಚಿ ನಿಂತ ನಾಯಕ ಬಾಬರ್ ಅಜಾಂ ತಂಡದ ಗೆಲುವಿಗೆ ಹೋರಾಟ ನಡೆಸಿದರು. ಮಧ್ಯಮ ಕ್ರಮಾಂಕದಲ್ಲಿ ಇವರಿಗೆ ಖುಷ್​ದಿಲ್(33) ಹಾಗೂ ವಹಾಬ್ ರಿಜಾಜ್(52) ಸಾತ್ ನೀಡಿದರು.

    ಅಂತಿಮ ಹಂತದವರೆಗೆ ಬ್ಯಾಟ್ ಬೀಸಿದ ಬಾಬರ್ ಆಕರ್ಷಕ ಶತಕ ಸಿಡಿಸಿ ಮಿಂಚಿದರು. ಆದರೆ, ವಿನ್ನಿಂಗ್ ಶಾಟ್ ಹೊಡೆಯುವ ತನಕ ಕ್ರೀಸ್​ನಲ್ಲಿ ನಿಲ್ಲಲಿಲ್ಲ. 125 ಎಸೆತಗಳಲ್ಲಿ 13 ಬೌಂಡರಿ, 1 ಸಿಕ್ಸರ್ ಬಾರಿಸಿ 125 ರನ್​ಗೆ 49ನೇ ಓವರ್​ನ ಕೊನೆಯ ಎಸೆತದಲ್ಲಿ ಔಟ್ ಆದರು. ಪರಿಣಾಮ ಪಾಕ್​ಗೆ ಕೊನೆಯ 6 ಎಸೆತಗಳಲ್ಲಿ ಗೆಲ್ಲಲು 13 ರನ್​ಗಳು ಬೇಕಾಗಿತ್ತು. ಕೊನೆಯ ಒಂದು ಎಸೆತದಲ್ಲಿ 5 ರನ್ ಬೇಕಾಗಿತ್ತು. ಈ ಸಂದರ್ಭ ಮೊಹಮ್ಮದ್ ಮೂಸಾ ಚೆಂಡನ್ನು ಬೌಂಡರಿಗೆ ಅಟ್ಟಿದ ಪರಿಣಾಮ ಪಂದ್ಯ ಟೈ ಆಯಿತು.

    ಪಾಕಿಸ್ತಾನ 50 ಓವರ್​ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 278 ರನ್ ಗಳಿಸಿತು. ಜಿಂಬಾಬ್ವೆ ಪರ ಬ್ಲೆಸಿಂಗ್ ಮುಜರಬನಿ 5 ವಿಕೆಟ್ ಕಿತ್ತು ಮಿಂಚಿದರು.

    ಸೂಪರ್ ಓವರ್:

    ಸೂಪರ್ ಓವರ್​ನಲ್ಲಿ ಮೊದಲು ಬ್ಯಾಟ್ ಮಾಡಿದ ಪಾಕಿಸ್ತಾನ ಕೇವಲ 2 ರನ್​ಗೆ 2 ವಿಕೆಟ್ ಕಳೆದುಕೊಂಡು ಆಲೌಟ್ ಆಯಿತು. ಜಿಂಬಾಬ್ವೆ ಮೊದಲ 3 ಎಸೆತಗಳಲ್ಲಿ ಗುರಿ ಮುಟ್ಟಿ ಸೂಪರ್ ಓವರ್​ನಲ್ಲಿ ಗೆಲುವು ಸಾಧಿಸಿತು. ಈ ಮೂಲಕ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಜಿಂಬಾಬ್ವೆ ಒಂದು ಗೆಲುವು ಸಾಧಿಸಿದರೆ, ಪಾಕ್ 2 ಜಯದೊಂದಿಗೆ ಸರಣಿ ವಶಪಡಿಸಿಕೊಂಡಿತು.
    Published by:Vinay Bhat
    First published: