• Home
  • »
  • News
  • »
  • sports
  • »
  • Mithali Raj - ಮಿಥಾಲಿ ರಾಜ್ 10 ಸಾವಿರ ರನ್ ಮೈಲಿಗಲ್ಲು; ವಿಶ್ವದಾಖಲೆಗೆ ಕೆಲವೇ ರನ್ ಬಾಕಿ

Mithali Raj - ಮಿಥಾಲಿ ರಾಜ್ 10 ಸಾವಿರ ರನ್ ಮೈಲಿಗಲ್ಲು; ವಿಶ್ವದಾಖಲೆಗೆ ಕೆಲವೇ ರನ್ ಬಾಕಿ

ಮಿಥಾಲಿ ರಾಜ್

ಮಿಥಾಲಿ ರಾಜ್

ಭಾರತದ 38 ವರ್ಷದ ಮಹಿಳಾ ಕ್ರಿಕೆಟರ್ ಮಿಥಾಲಿ ರಾಜ್ ಅವರು ಅಂತರರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 10 ಸಾವಿರ ರನ್ ಗಳಿಸಿದ ಮೊದಲ ಭಾರತೀಯೆ ಎಂಬ ದಾಖಲೆ ಸ್ಥಾಪಿಸಿದ್ದಾರೆ. ಈ ಸಾಧನೆ ಮಾಡಿದ ವಿಶ್ವದ ಎರಡನೇ ಆಟಗಾರ್ತಿಯಾಗಿದ್ದಾರೆ.

  • Share this:

    ಲಕ್ನೋ(ಮಾ. 12): ಭಾರತದ ಕ್ರಿಕೆಟ್ ದಂತಕಥೆ ಮಿಥಾಲಿ ರಾಜ್ ಇಂದು ತಮ್ಮ ಕ್ರಿಕೆಟ್ ವೃತ್ತಿಜೀವನದಲ್ಲಿ ಮಹತ್ವದ ಮೈಲಿಗಲ್ಲು ಮುಟ್ಟಿದರು. ಅಂತರರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 10,000 ರನ್ ಗಡಿ ದಾಟಿದ್ದಾರೆ. ಈ ಸಾಧನೆ ಮಾಡಿದ ಭಾರತದ ಮೊದಲ ಆಟಗಾರ್ತಿ ಹಾಗೂ ವಿಶ್ವದ ಎರಡನೇ ಆಟಗಾರ್ತಿ ಎನಿಸಿದ್ದಾರೆ. ದಕ್ಷಿಣ ಆಫ್ರಿಕಾ ವನಿತೆಯರ ತಂಡದ ವಿರುದ್ಧ ನಡೆಯುತ್ತಿರುವ ಏಕದಿನ ಕ್ರಿಕೆಟ್ ಸರಣಿಯ ಮೂರನೇ ಪಂದ್ಯದಲ್ಲಿ ಮಿಥಾಲಿ ರಾಜ್ ಈ ಸಾಧನೆ ಮಾಡಿದ್ದಾರೆ. ಇಂದಿನ ಪಂದ್ಯದಲ್ಲಿ ಅವರು 36 ರನ್ ಗಳಿಸಿ ಈ ಮೈಲಿಗಲ್ಲು ತಲುಪಿದ್ಧಾರೆ.


    ಮಹಿಳಾ ಟೆಸ್ಟ್ ಕ್ರಿಕೆಟ್, ಏಕದಿನ ಮತ್ತು ಟಿ20 ಈ ಮೂರು ಮಾದರಿಯ ಕ್ರಿಕೆಟ್​ನಲ್ಲಿ ಒಟ್ಟು ಸೇರಿ ಅವರು 10 ಸಾವಿರ ರನ್ ಕಲೆಹಾಕಿದ್ದಾರೆ. ಟೆಸ್ಟ್ ಕ್ರಿಕೆಟ್​ನಲ್ಲಿ 10, ಏಕದಿನ ಕ್ರಿಕೆಟ್​ನಲ್ಲಿ 212 ಮತ್ತು ಟಿ20 ಕ್ರಿಕೆಟ್​ನಲ್ಲಿ 89 ಪಂದ್ಯಗಳನ್ನ ಅವರು ಆಡಿ ಒಟ್ಟು 10,001 ರನ್ ಗಳಿಸಿದ್ದಾರೆ. ಒಟ್ಟು 311 ಪಂದ್ಯಗಳಲ್ಲಿ ಈ ಸಾಧನೆ ಬಂದಿದೆ. ಇಂಗ್ಲೆಂಡ್ ಮಹಿಳಾ ಕ್ರಿಕೆಟ್ ದಂತಕಥೆ ಚಾರ್ಲೆಟ್ ಎಡ್ವರ್ಡ್ಸ್ ಅವರು ಒಟ್ಟು 309 ಅಂತರರಾಷ್ಟ್ರೀಯ ಪಂದ್ಯಗಳಿಂದ 10,273 ರನ್ ಗಳಿಸಿ ತಮ್ಮ ವೃತ್ತಿಜೀವನ ಅಂತ್ಯಗೊಳಿಸಿದ್ದಾರೆ.


    ಇದನ್ನೂ ಓದಿ: IPL 2021: RCB ತಂಡದಿಂದ ಹೊರಗುಳಿದ ಜೋಶ್ ಫಿಲಿಪೆ: 21 ವರ್ಷದ ಯುವ ಬ್ಯಾಟ್ಸ್​ಮನ್​ಗೆ ಸಿಕ್ತು ಚಾನ್ಸ್​..!


    ಅಂತರಾಷ್ಟ್ರೀಯ ಮಹಿಳಾ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ರನ್ ಗಳಿಸಿರುವ ದಾಖಲೆ ಸದ್ಯ ಎಡ್ವರ್ಡ್ಸ್ ಅವರ ಹೆಸರಲ್ಲಿದೆ. 38 ವರ್ಷದ ಮಿಥಾಲಿ ರಾಜ್ ಅವರಿಗೆ ಈ ದಾಖಲೆ ಮುರಿಯುವ ಅವಕಾಶ ಇದೆ. ದಕ್ಷಿಣ ಆಫ್ರಿಕಾ ವಿರುದ್ಧದ ಇದೇ ಸರಣಿಯಲ್ಲಿ ಮಿಥಾಲಿ ತಮ್ಮ ದಾಖಲೆ ಓಟ ಮುಂದುವರಿಸುವ ನಿರೀಕ್ಷೆ ಇದೆ. ಈ ಸರಣಿಯಲ್ಲಿ ಇನ್ನೂ 2 ಏಕದಿನ ಪಂದ್ಯಗಳು ಹಾಗೂ 3 ಟಿ20 ಪಂದ್ಯಗಳು ನಡೆಯಬೇಕಿವೆ. ಮಿಥಾಲಿ ಅವರು ಇನ್ನೂ 273 ರನ್ ಗಳಿಸಿದರೆ ವಿಶ್ವದಾಖಲೆಗೆ ಬಾಜನರಾಗಲಿದ್ದಾರೆ.


    ಮಿಥಾಲಿ ರಾಜ್ ವೃತ್ತಿಜೀವನದ ಸಾಧನೆ:
    ಟೆಸ್ಟ್ ಕ್ರಿಕೆಟ್: 10 ಪಂದ್ಯ 663 ರನ್
    ಏಕದಿನ ಕ್ರಿಕೆಟ್: 212 ಪಂದ್ಯ 6974 ರನ್
    ಟಿ20 ಕ್ರಿಕೆಟ್: 89 ಪಂದ್ಯ 2364 ರನ್​


    ಮಿಥಾಲಿ ರಾಜ್ ಅವರು ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್​ನಲ್ಲಿ ರನ್ ಗಳಿಸಿರುವ ಸರಾಸರಿ 50 ಕ್ಕಿಂತ ಹೆಚ್ಚಿದೆ. ಟಿ20 ಕ್ರಿಕೆಟ್​ನಲ್ಲೂ ಅವರು 37 ರನ್​ ಗಿಂತ ಹೆಚ್ಚಿನ ಸರಾಸರಿ ಹೊಂದಿದ್ದಾರೆ.

    Published by:Vijayasarthy SN
    First published: