IPL 2023: ಪಂಜಾಬ್​ ಕಿಂಗ್ಸ್ ವಿರುದ್ಧ ಡೆಲ್ಲಿಗೆ 15 ರನ್​ಗಳ ಜಯ! ಪ್ರೀತಿ ಪಡೆಯ ಪ್ಲೇ ಆಫ್​ ಕನಸು ನುಚ್ಚುನೂರು

ಧರ್ಮಶಾಲಾ: ಪ್ಲೇ ಆಫ್​ ರೇಸ್​ನಿಂದ (Playoff) ಹೊರಬಿದ್ದಿರುವ ಡೆಲ್ಲಿ ಕ್ಯಾಪಿಟಲ್ಸ್ (Delhi Capitals) ತಂಡ ಔಪಚಾರಿಕವಾದ ಐಪಿಎಲ್​ನ 64ನೇ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ (Punjab Kings) ​ ವಿರುದ್ಧ ಭರ್ಜರಿ ಪ್ರದರ್ಶನ ತೋರಿ 15 ರನ್​ಗಳ ಗೆಲುವು ಸಾಧಿಸಿದೆ. ಈ ಗೆಲುವಿನ ಮೂಲಕ ಡೆಲ್ಲಿ ತಂಡ, ಪಂಜಾಬ್​ ಕಿಂಗ್ಸ್ ತಂಡದ ಪ್ಲೇ ಆಫ್​ ಕನಸನ್ನು ನುಚ್ಚುನೂರು ಮಾಡಿದೆ. ದಶಕಗಳ ನಂತರ ನಡೆದ ಮೊದಲ ಐಪಿಎಲ್ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ತಂಡ ಬರೋಬ್ಬರಿ 213ರನ್​ಗಳಿಸಿತ್ತು. ಇದಕ್ಕುತ್ತರವಾಗಿ ಪಂಜಾಬ್ ತಂಡ 20 ಓವರ್​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 198 ರನ್​ಗಳಿಸಿ 15 ರನ್​ಗಳ ಸೋಲೊಪ್ಪಿಕೊಂಡಿತು.

ಟಾಸ್​ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಡೆಲ್ಲಿ ಕ್ಯಾಪಿಟಲ್ಸ್  ತಂಡಕ್ಕೆ  ನಾಯಕ ಡೇವಿಡ್ ವಾರ್ನರ್ ಮತ್ತು​​  ಪೃಥ್ವಿ ಶಾ ಉತ್ತಮ ಆರಂಭ ಒದಗಿಸಿಕೊಟ್ಟರು. ವಾರ್ನರ್​ 31 ಎಸೆತಗಳಲ್ಲಿ 46 ರನ್​ಗಳಿಸಿದರೆ, ಶಾ38 ಎಸೆತಗಳಲ್ಲಿ 7 ಬೌಂಡರಿ ಹಾಗೂ 1 ಸಿಕ್ಸರ್ ಸಹಿತ 54 ರನ್​ ಗಳಿಸಿದರು. 3ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದಿದ್ದ ರಿಲೀ ರೂಸೋ 37 ಎಸೆತಗಳಲ್ಲಿ ತಲಾ 6 ಬೌಂಡರಿ ಹಾಗೂ 6 ಸಿಕ್ಸರ್​ಗಳ ನೆರವಿನಿಂದ ಅಜೇಯ  82ರನ್​  ಹಾಗೂ ಪೀಟರ್ ಸಾಲ್ಟ್​  14 ಎಸೆತಗಳಲ್ಲಿ  26 ರನ್​ಗಳಿಸಿ  213 ರನ್​ಗಳ ಬೃಹತ್ ಮೊತ್ತಕ್ಕೆ ಕಾರಣರಾದರು.

ಪಂಜಾಬ್ ಕಿಂಗ್ಸ್ ಒರ ಸ್ಯಾಮ್ ಕರನ್​ ಮಾತ್ರ ವಿಕೆಟ್ ಪಡೆಯುವಲ್ಲಿ ಸಫಲರಾದರು. ಇವರು 4 ಓವರ್​ಗಳಲ್ಲಿ 36 ರನ್​ ನೀಡಿ 2 ವಿಕೆಟ್ ಪಡೆದರು. ಉಳಿದ ಬೌಲರ್​ಗಳು ವಿಕೆಟ್ ಪಡೆಯುವಲ್ಲಿ ವಿಫಲರಾಗಿದ್ದಲ್ಲದೆ, ರನ್​ಗಳಿಗಡೆ ಕಡಿವಾಡ ಹಾಕುವಲ್ಲಿಯೂ ವಿಫಲರಾದರು.

ಇದನ್ನೂ ಓದಿ: RCB vs SRH: ಇಂದು  ಆರ್​ಸಿಬಿ-ಹೈದರಾಬಾದ್​ ಮಹತ್ವದ ಪಂದ್ಯ, ಗೆದ್ದರಷ್ಟೇ ಪ್ಲೇಆಫ್​ ಕನಸು ಜೀವಂತ! ಸೋತ್ರೆ?

ಲಿವಿಂಗ್​ಸ್ಟೋನ್ ಆಟ ವ್ಯರ್ಥ

214 ರನ್​ಗಳ ಬೃಹತ್ ಮೊತ್ತಕ್ಕೆ ಉತ್ತರವಾಗಿ  ಪಂಜಾಬ್ ಕಿಂಗ್ಸ್ 20 ಓವರ್​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 198 ರನ್​ಗಳಿಸಲಷ್ಟೇ ಶಕ್ತವಾಯಿತು. ನಾಯಕ ಶಿಖರ್ ಧವನ್​ (0) ಕಳೆದ ಪಂದ್ಯದ ಶತಕವೀರ ಪ್ರಭಸಿಮ್ರಾನ್ ಸಿಂಗ್ (22) ಉತ್ತಮ ಆರಂಭ ನೀಡುವಲ್ಲಿ ವಿಫಲರಾದರು.

ಆದರೆ 3ನೇ ವಿಕೆಟ್​ಗೆ ಒಂದಾದ  ಲಿಯಾಮ್ ಲಿವಿಂಗ್​ಸ್ಟೋನ್ ಮತ್ತು ಅಥರ್ವ ತೈಡೆ  78 ರನ್​ಗಳ ಜೊತೆಯಾಟ ನೀಡಿದರು. ಲಿವಿಂಗ್​ಸ್ಟೋನ್ ​ 48 ಎಸೆತಗಳಲ್ಲಿ 5 ಬೌಂಡರಿ 9 ಸಿಕ್ಸರ್​ಗಳ ನೆರವಿನಿಂದ 94 ರನ್​ಗಳಿಸಿದರೆ ಅಥರ್ವ ತೈಡೆ 42 ಎಸೆತಗಳಲ್ಲಿ 55 ರನ್​ಗಳಿಸಿ ಗೆಲುವಿಗಾಗಿ ಪ್ರತಿರೋಧ ನಡೆಸಿದರೂ ತಂಡವನ್ನು ಗೆಲುವಿನ ಗಡಿ ದಾಟಿಸಲು ವಿಫಲರಾದರು.

ಮಧ್ಯಮ ಕ್ರಮಾಂಕ ವಿಫಲ

ಲಿವಿಂಗ್​ಸ್ಟೋನ್ ಒಂದು ಕಡೆ ಅಬ್ಬರ ಬ್ಯಾಟಿಂಗ್ ಮಾಡುತ್ತಿದ್ದರೆ, ಮಧ್ಯಮ ಕ್ರಮಾಂಕದ ಯಾವೊಬ್ಬ ಬ್ಯಾಟರ್​ ಇವರಿಗೆ ಸಾಥ್ ನೀಡುವಲ್ಲಿ ವಿಫಲರಾದರು. ಜಿತೇಶ್ ಶರ್ಮಾ(0), ಶಾರುಖ್ ಖಾನ್(6), ಸ್ಯಾಮ್ ಕರನ್​ (11), ಹರ್​ಪ್ರೀತ್ ಬ್ರಾರ್(0) ವಿಫಲರಾಗಿದ್ದು ತಂಡಕ್ಕೆ ಹಿನ್ನಡೆಯಾಯಿತು.

ಪಂಜಾಬ್ ಪ್ಲೇಆಫ್ ಕನಸು ಭಗ್ನ

ಪಂಜಾಬ್ ಕಿಂಗ್ಸ್ ಈ ಪಂದ್ಯದ ಸೋಲಿನೊಂದಿಗೆ 13 ಪಂದ್ಯಗಳಲ್ಲಿ 7 ಸೋಲು ಹಾಗೂ 6 ಗೆಲುವಿನೊಂದಿಗೆ 12 ಅಂಕ ಪಡೆದಿದ್ದು, ಅಂಕಪಟ್ಟಿಯಲ್ಲಿ 8ನೇ ಸ್ಥಾನದಲ್ಲಿದೆ. ಉಳಿದ ಒಂದು ಪಂದ್ಯ ಗೆದ್ದರೂ ಕೂಡ ಪ್ಲೇ ಆಫ್ ಪ್ರವೇಶಿಸುವ ಸಾಧ್ಯತೆ ಇಲ್ಲ. ಏಕೆಂದರೆ ಈಗಾಗಲೇ ಮೂರು ತಂಡಗಳು 15 ಕ್ಕೂ ಹೆಚ್ಚಿನ ಅಂಕವನ್ನು ಹೊಂದಿವೆ.  ಮುಂಬೈ 14 ಅಂಕ ಹೊಂದಿದೆ, ಇನ್ನೊಂದು ಪಂದ್ಯ ಗೆದ್ದರೆ, ಆ ತಂಡ ಪ್ಲೇ ಆಫ್​ ಪ್ರವೇಶಿಸುವ ಅವಕಾಶ ಇದೆ. ಇತ್ತ ಆರ್​ಸಿಬಿ ಕೂಡ 12 ಅಂಕ ಹೊಂದಿದ್ದರೂ, ಇನ್ನೂ 2 ಪಂದ್ಯಗಳು ಬಾಕಿ ಉಳಿದಿವೆ. ಇವೆರಡನ್ನು ಗೆದ್ದರೆ ಪ್ಲೇ ಆಫ್​ ಪ್ರವೇಶಿಸಲಿದೆ. ಹಾಗಾಗಿ ರನ್​​ರೇಟ್​ನಲ್ಲೂ ಋಣಾತ್ಮಕ ಅಂಕ ಹೊಂದಿರುವ ಪಂಜಾಬ್ ಟೂರ್ನಿಯಿಂದ ಹೊರ ಬಿದ್ದಂತಾಗಿದೆ.