6 Balls 6 Sixes - ಆರು ಬಾಲ್​ಗೆ 6 ಸಿಕ್ಸರ್ ಸಿಡಿಸಿದ ವಿಂಡೀಸ್ ದೈತ್ಯ; ಬೆಚ್ಚಿಬಿದ್ದ ಸಿಂಹಳೀಯರು

ಶ್ರೀಲಂಕಾ ವಿರುದ್ಧದ ಟಿ20 ಪಂದ್ಯದಲ್ಲಿ ವೆಸ್ಟ್ ಇಂಡೀಸ್​ನ ಕೀರಾನ್ ಪೊಲಾರ್ಡ್ ಒಂದೇ ಓವರ್​ನಲ್ಲಿ 6 ಸಿಕ್ಸರ್ ಚಚ್ಚಿದ್ದಾರೆ. ಈ ಓವರ್ ಬೌಲ್ ಮಾಡಿದ್ದ ದನಂಜಯ್ ತಮ್ಮ ಹಿಂದಿನ ಓವರ್​ನಲ್ಲಿ ಹ್ಯಾಟ್ರಿಕ್ ಪಡೆದ ಖುಷಿಯಲ್ಲಿದ್ದರು.

ಕೀರಾನ್ ಪೊಲಾರ್ಡ್

ಕೀರಾನ್ ಪೊಲಾರ್ಡ್

  • Share this:
    ಕೊಲಂಬೋ: ವೆಸ್ಟ್ ಇಂಡೀಸ್ ಕ್ರಿಕೆಟ್ ತಂಡದ ನಾಯಕ ಕೀರಾನ್ ಪೊಲಾರ್ಡ್ ನಿನ್ನೆ ಶ್ರೀಲಂಕಾ ವಿರುದ್ಧದ ಟಿ20 ಪಂದ್ಯದಲ್ಲಿ ಒಂದೇ ಓವರ್​ನಲ್ಲಿ ದಾಖಲೆಯ ಆರು ಸಿಕ್ಸರ್ ಸಿಡಿಸಿದ್ದಾರೆ. ಶ್ರೀಲಂಕಾ ವೆಸ್ಟ್ ಇಂಡೀಸ್ ಟಿ20 ಸರಣಿಯ ಮೊದಲ ಪಂದ್ಯದಲ್ಲಿ ಈ ದಾಖಲೆ ಸೃಷ್ಟಿಯಾಯಿತು. ಗೆಲ್ಲಲು ಶ್ರೀಲಂಕಾ ಒಡ್ಡಿದ 132 ರನ್ ಗುರಿಯನ್ನ ಬೆನ್ನತ್ತುವ ವೇಳೆ ಪೊಲಾರ್ಡ್ ಸಿಡಿಲಬ್ಬರದ ಬ್ಯಾಟಿಂಗ್ ನಡೆಸಿದರು. ಅಕಿಲಾ ದನಂಜಯ ಅವರ ಕೊನೆಯ ಓವರ್​ನಲ್ಲಿ ಅವರು ಆರೂ ಎಸೆತವನ್ನು ಬೌಂಡರಿ ಆಚೆ ಕಳುಹಿಸಿದರು. ಕುತೂಹಲದ ವಿಷಯ ಎಂದರೆ, ಅಕಿಲಾ ದನಂಜಯ ಅವರು ತಮ್ಮ ಹಿಂದಿನ ಓವರ್​ನಲ್ಲಿ, ಅಂದರೆ ಅವರ ಮೂರನೇ ಓವರ್​ನಲ್ಲಿ ಕ್ರಿಸ್ ಗೇಲ್ ವಿಕೆಟ್ ಸೇರಿದಂತೆ ಹ್ಯಾಟ್ರಿಕ್ ಪಡೆದು ತಂಡದ ಗೆಲುವಿನ ಆಸೆ ಚಿಗುರಿಸಿದ್ದರು.

    ಆದರೆ, ಕೀರಾನ್ ಪೊಲಾರ್ಡ್ ದನಂಜಯ ಅವರನ್ನೇ ಟಾರ್ಗೆಟ್ ಮಾಡಿ ಆರಕ್ಕೆ ಆರು ಸಿಕ್ಸರ್ ಸಿಡಿಸಿದರು. ಅಂತರರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಆರು ಬಾಲ್​ಗೆ ಆರು ಸಿಕ್ಸರ್ ಸಿಡಿಸಿದ ಮೊದಲ ವೆಸ್ಟ್ ಇಂಡೀಸ್ ಕ್ರಿಕೆಟಿಗ ಅವರಾಗಿದ್ದಾರೆ. ಆ ಸಾಧನೆ ಮಾಡಿದ ಮೂರನೇ ಕ್ರಿಕೆಟಿಗ ಅವರು. ಈ ಹಿಂದೆ ದಕ್ಷಿಣ ಆಫ್ರಿಕಾದ ಹರ್ಷೆಲ್ ಗಿಬ್ಸ್ ಮತ್ತು ಭಾರತದ ಯುವರಾಜ್ ಸಿಂಗ್ ಅವರು ಈ ಸಾಧನೆ ಮಾಡಿದ್ದಾರೆ. ಟಿ20 ಕ್ರಿಕೆಟ್​ನಲ್ಲಿ ಯುವರಾಜ್ ಸಿಂಗ್ ನಂತರ ಪೊಲಾರ್ಡ್ ಈ ದಾಖಲೆ ಸರಿಗಟ್ಟಿದ್ದಾರೆ.

    ಇದನ್ನೂ ಓದಿ: ದುಬಾರಿ ದುನಿಯಾದಲ್ಲಿ ಬದಲಾದ ಅವಾರ್ಡ್: ಮ್ಯಾನ್ ಆಫ್ ದ ಮ್ಯಾಚ್ ಪ್ರಶಸ್ತಿ 5 ಲೀಟರ್ ಪೆಟ್ರೋಲ್..!

    ಶ್ರೀಲಂಕಾ ವೆಸ್ಟ್ ಇಂಡೀಸ್ ನಡುವಿನ ಈ ಟಿ20 ಕ್ರಿಕೆಟ್ ಸರಣಿಯ ಉಳಿದೆರಡು ಪಂದ್ಯಗಳು ಮಾರ್ಚ್ 5 ಮತ್ತು 7ರಂದು ನಡೆಯಲಿದೆ. ಈ ಸರಣಿ ಬಳಿಕ ಈ ತಂಡಗಳು ಮೂರು ಏಕದಿನ ಹಾಗೂ ಎರಡು ಟೆಸ್ಟ್ ಪಂದ್ಯಗಳನ್ನ ಆಡಲಿವೆ.

    ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 6 ಬಾಲ್​ಗೆ 6 ಸಿಕ್ಸರ್ ಸಿಡಿಸಿದವರು:

    1) ಹರ್ಷಲ್ ಗಿಬ್ಸ್ – 2007ರಲ್ಲಿ (ಏಕದಿನ ಕ್ರಿಕೆಟ್)
    2) ಯುವರಾಜ್ ಸಿಂಗ್ – 2007ರಲ್ಲಿ (ಟಿ20 ಕ್ರಿಕೆಟ್)
    3) ಕೇರಾನ್ ಪೊಲಾರ್ಡ್ – 2021ರಲ್ಲಿ (ಟಿ20 ಕ್ರಿಕೆಟ್)
    Published by:Vijayasarthy SN
    First published: