• Home
  • »
  • News
  • »
  • sports
  • »
  • Kevin O'Brien: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಅಬ್ಬರಿಸಿ ಬೊಬ್ಬಿರಿದ ಕೆವಿನ್ ವಿದಾಯ..!

Kevin O'Brien: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಅಬ್ಬರಿಸಿ ಬೊಬ್ಬಿರಿದ ಕೆವಿನ್ ವಿದಾಯ..!

Kevin OBrien

Kevin OBrien

ಆದರೆ ಎಲ್ಲರ ಲೆಕ್ಕಚಾರವನ್ನು ತಲೆಕೆಳಗಾಗಿಸುವಂತೆ 6ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಬ್ಯಾಟ್ಸ್​ಮನ್ ಅಬ್ಬರಿಸಿದರು. ಹೀಗೆ ಚಿನ್ನಸ್ವಾಮಿ ಕ್ರೀಡಾಂಗಣದ ಮೂಲೆ ಮೂಲೆಗೆ ಬೌಂಡರಿ ಸಿಕ್ಸರ್​ಗಳು ಸುರಿಮಳೆಗೈದು ಕೇವಲ 63 ಎಸೆತಗಳಲ್ಲಿ 113 ರನ್​ ಚಚ್ಚಿದರು.

  • Share this:

    ಅದು 2011ರ ವಿಶ್ವಕಪ್ ಟೂರ್ನಿ. ಭಾರತದಲ್ಲಿ ನಡೆದಿದ್ದ ಐಸಿಸಿ ಟೂರ್ನಿಯ 15ನೇ ಪಂದ್ಯ. ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಬಲಿಷ್ಠ ಇಂಗ್ಲೆಂಡ್ ಹಾಗೂ ಕ್ರಿಕೆಟ್ ಕೂಸು ಐರ್ಲೆಂಡ್ ಮುಖಾಮುಖಿಯಾಗಿತ್ತು. ಟಾಸ್ ಗೆದ್ದ ಇಂಗ್ಲೆಂಡ್ ನಾಯಕ ಆ್ಯಂಡ್ರೊ ಸ್ಟ್ರಾಸ್ ಬ್ಯಾಟಿಂಗ್ ಆಯ್ದುಕೊಂಡರು. ನಾಯಕನ ನಿರ್ಧಾರವನ್ನು ಸಮರ್ಥಿಸುವಂತೆ ಇಂಗ್ಲೆಂಡ್ ಬ್ಯಾಟ್ಸ್​ಮನ್​ಗಳು ಐರ್ಲೆಂಡ್ ಬೌಲರುಗಳ ಬೆಂಡೆತ್ತಿದರು. ಪರಿಣಾಮ ನಿಗದಿತ 50 ಓವರ್​ಗಳಲ್ಲಿ ಇಂಗ್ಲೆಂಡ್ 8 ವಿಕೆಟ್ ನಷ್ಟಕ್ಕೆ 327 ರನ್ ಪೇರಿಸಿತು.


    ಈ ಬೃಹತ್ ಮೊತ್ತ ನೋಡಿದ ಬಹುತೇಕರು ಇಂಗ್ಲೆಂಡ್​ಗೆ ಜಯ ಎಂದು ಷರಾ ಬರೆದಿದ್ದರು. ಬೆಟ್ಟಿಂಗ್ ಲೋಕದಲ್ಲಂತು ಒನ್​ಸೈಡ್​ಗೆ ಹಣ ಹರಿದು ಹೋಗಿತ್ತು. ಆದರೆ ಎಲ್ಲರ ಲೆಕ್ಕಚಾರವನ್ನು ತಲೆಕೆಳಗಾಗಿಸುವಂತೆ 6ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಬ್ಯಾಟ್ಸ್​ಮನ್ ಅಬ್ಬರಿಸಿದರು. ಹೀಗೆ ಚಿನ್ನಸ್ವಾಮಿ ಕ್ರೀಡಾಂಗಣದ ಮೂಲೆ ಮೂಲೆಗೆ ಬೌಂಡರಿ ಸಿಕ್ಸರ್​ಗಳು ಸುರಿಮಳೆಗೈದು ಕೇವಲ 63 ಎಸೆತಗಳಲ್ಲಿ 113 ರನ್​ ಚಚ್ಚಿದರು. ಪರಿಣಾಮ 5 ಎಸೆತಗಳು ಬಾಕಿ ಇರುವಂತೆಯೇ ಐರ್ಲೆಂಡ್ ತಂಡ 3 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು. ಹೀಗೆ ಐರ್ಲೆಂಡ್ ತಂಡದ ಪರ ಶತಕ ಸಿಡಿಸಿ ಐತಿಹಾಸಿಕ ಗೆಲುವು ತಂದುಕೊಟ್ಟ ಬ್ಯಾಟ್ಸ್​ಮನ್ ಕೆವಿನ್ ಓಬ್ರಿಯೆನ್.


    ಬೆಂಗಳೂರಿನ ಪಿಚ್​ನಲ್ಲಿ 13 ಬೌಂಡರಿ 6 ಭರ್ಜರಿ ಸಿಕ್ಸರ್ ಸಿಡಿಸಿ ಮನೆಮಾತಾಗಿದ್ದ ಐರ್ಲೆಂಡ್ ಆಲ್​ರೌಂಡರ್ ಕೆವಿನ್ ಓಬ್ರಿಯೆನ್ ಇದೀಗ ಏಕದಿನ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಹೇಳಿದ್ದಾರೆ. ಕಳೆದ 15 ವರ್ಷಗಳ ಕಾಲ ಐರ್ಲೆಂಡ್ ಪರ ಬ್ಯಾಟ್ ಬೀಸಿರುವ ಓಬ್ರಿಯೆನ್ 153 ಏಕದಿನ ಪಂದ್ಯಗಳಿಂದ 3,618 ರನ್ ಬಾರಿಸಿದ್ದಾರೆ. ಅಲ್ಲದೆ 114 ವಿಕೆಟ್‌ಗಳನ್ನು ಉರುಳಿಸಿ ಮಿಂಚಿದ್ದಾರೆ. ಇದರ ಜೊತೆ 68 ಕ್ಯಾಚ್‌ಗಳನ್ನು ಹಿಡಿಯುವ ಮೂಲಕ ಐರ್ಲೆಂಡ್ ಪರ ಏಕದಿನ ಕ್ರಿಕೆಟ್‌ನಲ್ಲಿ ಅತ್ಯಧಿಕ ಕ್ಯಾಚ್ ಹಿಡಿದ ಫೀಲ್ಡರ್ ಎನಿಸಿಕೊಂಡಿದ್ದಾರೆ.




    ಸದ್ಯ 37 ವರ್ಷದ ಕೆವಿನ್ ಓಬ್ರಿಯೆನ್ ಏಕದಿನ ಕ್ರಿಕೆಟ್​ಗೆ ವಿದಾಯ ಹೇಳುವ ನಿರ್ಧಾರ ಮಾಡಿದ್ದು, ಇದಾಗ್ಯೂ ಟೆಸ್ಟ್ ಕ್ರಿಕೆಟ್ ಹಾಗೂ ಟಿ20 ಕ್ರಿಕೆಟ್​ನಲ್ಲಿ ಮುಂದುವರೆಯುವುದಾಗಿ ತಿಳಿಸಿದ್ದಾರೆ. ಅಲ್ಲದೆ ಮುಂದಿನ ಟಿ20 ವಿಶ್ವಕಪ್​ನಲ್ಲೂ ಭಾಗವಹಿಸುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

    Published by:zahir
    First published: