Virat Kohli: ಕಿಂಗ್ ಕೊಹ್ಲಿಯನ್ನು ಗುಣಗಾನ ಮಾಡಿದ RCB ತಂಡದ ಆಟಗಾರ..!

IPL 2021 ಸಿದ್ಧತೆಗಳು ಶುರುವಾಗಿವೆ. ಮುಂದಿನ ಸೀಸನ್ ಹರಾಜಿಗಾಗಿ ಎಲ್ಲಾ ಫ್ರಾಂಚೈಸಿಗಳು ತಯಾರಿಗಳನ್ನು ಆರಂಭಿಸಿವೆ. ಅದರಂತೆ ಯಾರನ್ನು ಉಳಿಸಿಕೊಳ್ಳುವುದು, ಯಾರನ್ನು ಕೈ ಬಿಡುವುದು ಎಂಬ ಲೆಕ್ಕಚಾರದಲ್ಲಿದೆ. ಅತ್ತ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಆಟಗಾರ ಇಸುರು ಉದಾನ ಕೂಡ ಮುಂಬರುವ ಐಪಿಎಲ್​ನ್ನು ಎದುರು ನೋಡುತ್ತಿರುವುದಾಗಿ ತಿಳಿಸಿದ್ದಾರೆ.

ಸದ್ಯ ದುಬೈನಲ್ಲಿ ನಡೆಯಲಿರುವ ಟಿ10 ಟೂರ್ನಿಯ ಸಿದ್ಧತೆಯಲ್ಲಿರುವ ಇಸುರು ಉದಾನ, ವೈಟ್ ಬಾಲ್ ಕ್ರಿಕೆಟ್‌ನ ಅತ್ಯುತ್ತಮ ಆಟಗಾರರ ಕುರಿತು ಮಾತನಾಡಿದ್ದಾರೆ. ನನ್ನ ಪ್ರಕಾರ ವೈಟ್ ಬಾಲ್ ಕ್ರಿಕೆಟ್​ನ ವಿಶ್ವ ಶ್ರೇಷ್ಠ ಬ್ಯಾಟ್ಸ್​ಮನ್ ವಿರಾಟ್ ಕೊಹ್ಲಿ ಎಂದು ಗುಣಗಾನ ಮಾಡಿದ್ದಾರೆ.

ವೈಟ್ ಬಾಲ್​ ಕ್ರಿಕೆಟ್​ನ ಅತ್ಯುತ್ತಮ ಆಟಗಾರರನ್ನು ಹೆಸರಿಸುವುದಾದರೆ ಕೊಹ್ಲಿ ಬೆಸ್ಟ್ ಬ್ಯಾಟ್ಸ್​ಮನ್. ಹಾಗೆಯೇ ಬೌಲರ್​​ನ್ನು ಆಯ್ಕೆ ಮಾಡುವುದಾದರೆ ಆಸ್ಟ್ರೇಲಿಯಾದ ಮಿಚೆಲ್ ಸ್ಟಾರ್ಕ್​ ಅವರನ್ನು ಆರಿಸಿಕೊಳ್ಳುವೆ. ಇನ್ನು ಆಲ್​ರೌಂಡರ್ ಪೈಕಿ ಟೀಮ್ ಇಂಡಿಯಾ ಆಟಗಾರ ರವೀಂದ್ರ ಜಡೇಜಾ ಅವರನ್ನು ಆಯ್ಕೆ ಮಾಡುವುದಾಗಿ ಇಸುರು ಉದಾನ ತಿಳಿಸಿದ್ದಾರೆ.

ಇದೇ ವೇಳೆ ಜನವರಿ 28 ರಿಂದ ಆರಂಭವಾಗಲಿರುವ  ಟಿ10 ಕ್ರಿಕೆಟ್​ ಲೀಗ್​ನ ಸಿದ್ಧತೆಯಲ್ಲಿರುವುದಾಗಿ ತಿಳಿಸಿದ ಇಸುರು ಉದಾನ, ನಮ್ಮದು ಅತ್ಯುತ್ತಮ ತಂಡ. ನಮ್ಮ ತಂಡದಲ್ಲಿ ವೆಸ್ಟ್‌ ಇಂಡೀಸ್‌ನ ಆಂಡ್ರೆ ಫ್ಲೆಚರ್‌ ಕೂಡ ಇದ್ದಾರೆ. ಅವರ ಜೊತೆಗೆ ಟಿ10 ಲೀಗ್‌ ಆಡುವುದನ್ನು ನಾನು ಎದುರು ನೋಡುತ್ತಿರುವೆ. ಏಕೆಂದರೆ ಬಿಗ್‌ ಬ್ಯಾಷ್‌ ಲೀಗ್‌ನಲ್ಲಿ ಫ್ಲೆಚರ್‌ ಅದ್ಭುತವಾಗಿ ಆಡಿದ್ದಾರೆ. ಎಲ್ಲಾ ರೀತಿಯಲ್ಲೂ ನಮ್ಮ ತಂಡ ಬಾಂಗ್ಲಾ ಟೈಗರ್ಸ್​ ಬಲಿಷ್ಠವಾಗಿದ್ದು, ಈ ಟೂರ್ನಿ ಕೂಡ ಅದ್ಭುತವಾಗಿ ಮೂಡಿಬರುವ ವಿಶ್ವಾಸವಿದೆ ಎಂದು ಉದಾನ ತಿಳಿಸಿದರು.