Ishan Kishan: ಇಶಾನ್ ಕಿಶನ್ ಸಿಡಿಲಬ್ಬರ: ದೇಶೀಯ ಕ್ರಿಕೆಟ್​ನಲ್ಲಿ ಹೊಸ ದಾಖಲೆ ಬರೆದ ಜಾರ್ಖಂಡ್

ವಿಜಯ ಹಝಾರೆ ಕ್ರಿಕೆಟ್​ನಲ್ಲಿ ಟೂರ್ನಿಯಲ್ಲಿ ಜಾರ್ಖಂಡ್ ತಂಡವು ಹೊಸ ಇತಿಹಾಸ ನಿರ್ಮಿಸಿದೆ. ಶನಿವಾರ ಮಧ್ಯಪ್ರದೇಶದ ವಿರುದ್ಧದ ಪಂದ್ಯದಲ್ಲಿ ಮೊಲದು ಬ್ಯಾಟಿಂಗ್ ಮಾಡಿದ ಜಾರ್ಖಂಡ್​​ 422 ರನ್​ ಪೇರಿಸುವ ಮೂಲಕ ದೇಶೀಯ ಏಕದಿನ ಟೂರ್ನಿಯಲ್ಲಿ ಅತೀ ಹೆಚ್ಚು ರನ್ ಕಲೆಹಾಕಿದ ದಾಖಲೆ ಬರೆಯಿತು.

ಇದಕ್ಕೂ ಮುನ್ನ ಟಾಸ್ ಗೆದ್ದ ಮಧ್ಯಪ್ರದೇಶ ಬೌಲಿಂಗ್ ಆಯ್ದುಕೊಂಡಿತು. ಅದರಂತೆ ಆರಂಭಿಕರಾಗಿ ಕಣಕ್ಕಿಳಿದ ಜಾರ್ಖಂಡ್ ನಾಯಕ ಇಶಾನ್ ಕಿಶನ್ ಮೊದಲ ಓವರ್​ನಿಂದಲೇ ಅಬ್ಬರಿಸಲಾರಂಭಿಸಿದರು. ಮಧ್ಯ ಪ್ರದೇಶದ ಬೌಲರುಗಳನ್ನು ಮನಸೋ ಇಚ್ಛೆ ದಂಡಿಸಿದ ಕಿಶನ್, ಕೇವಲ 74 ಎಸೆತಗಳಲ್ಲಿ 5 ಸಿಕ್ಸರ್ ಹಾಗೂ 12 ಬೌಂಡರಿಗಳ ನೆರವಿನಿಂದ ಶತಕವನ್ನು ಪೂರೈಸಿದರು. ಅಲ್ಲದೆ 26ನೇ ಓವರ್​ನಲ್ಲೇ ತಂಡದ ಮೊತ್ತವನ್ನು 200ರ ಗಡಿದಾಟಿಸಿದರು. ಅಂತಿಮವಾಗಿ 94 ಎಸೆತಗಳಲ್ಲಿ 19 ಬೌಂಡರಿ, 11 ಸಿಕ್ಸರ್‌ಗಳೊಂದಿಗೆ 173 ರನ್ ಸಿಡಿಸಿ ಅಬ್ಬರಿಸಿದರು.

ಇನ್ನು ನಾಯಕನ ಈ ಸ್ಪೋಟಕ ಇನಿಂಗ್ಸ್​ಗೆ ಸಾಥ್ ನೀಡಿದ ಅನ್ಕುಲ್ ರಾಯ್ 72 ರನ್, ವಿರಾಟ್ ಸಿಂಗ್ (68) ಹಾಗೂ ಸುಮಿತ್ ಕುಮಾರ್ 52 ರನ್ ಅರ್ಧಶತಕಗಳ ಕಾಣಿಕೆ ನೀಡಿದರು. ಅಲ್ಲದೆ ಜಾರ್ಖಂಡ್ ತಂಡದ ಮೊತ್ತವನ್ನು ನಿಗದಿತ 50 ಓವರ್‌ಗಳಲ್ಲಿ 9 ವಿಕೆಟ್‌ಗಳ ನಷ್ಟಕ್ಕೆ 422 ರನ್​ಗೆ ತಂದು ನಿಲ್ಲಿಸಿದರು. ಇದು ವಿಜಯ ಹಝಾರೆ ಟೂರ್ನಿಯ ಅತ್ಯಧಿಕ ಮೊತ್ತವಾಗಿದೆ.

ಇದಕ್ಕೂ ಮುನ್ನ 2010ರಲ್ಲಿ ರೈಲ್ವೇಸ್ ವಿರುದ್ಧ ಮಧ್ಯಪ್ರದೇಶ ತಂಡ 6 ವಿಕೆಟ್ ನಷ್ಟಕ್ಕೆ 412 ರನ್ ಗಳಿಸಿರುವುದು ದಾಖಲೆಯಾಗಿತ್ತು. ಇದೀಗ ಮಧ್ಯಪ್ರದೇಶದ ವಿರುದ್ಧವೇ ಜಾರ್ಖಂಡ್ ಹೊಸ ದಾಖಲೆ ಬರೆದಿರುವುದು ವಿಶೇಷ.

ಇನ್ನು ಗೆಲ್ಲಲು 423 ರನ್ ಗುರಿ ಬೆನ್ನಟ್ಟಿದ ಮಧ್ಯಪ್ರದೇಶ 18.4 ಓವರ್‌ಗಳಲ್ಲಿ ಕೇವಲ 98 ರನ್‌ಗೆ ಸರ್ವಪತನ ಕಂಡಿತು. ಜಾರ್ಖಂಡ್ ವೇಗಿ ವರುಣ್ ಆರೊನ್ 37 ರನ್​ಗೆ 6 ವಿಕೆಟ್ ಉರುಳಿಸಿ ಮಿಂಚಿದರು. ಅಲ್ಲದೆ 324 ರನ್​ಗಳ ಬೃಹತ್ ಅಂತರದೊಂದಿಗೆ ಜಾರ್ಖಂಡ್ ತಂಡವು ಗೆಲುವು ದಾಖಲಿಸಿತು.