IND vs WI: ಮುಂಬೈನಲ್ಲಿ ರೋಹಿತ್ ರಾಹುಲ್ ವಿರಾಟ ಪ್ರದರ್ಶನ; ಸರಣಿ ಗೆದ್ದು ಬೀಗಿದ ಭಾರತ

ಓಪನರ್​ಗಳಾದ ರೋಹಿತ್ ಶರ್ಮಾ ಹಾಗೂ ಕೆ ಎಲ್ ರಾಹುಲ್ ಬಿರುಸಿನ ಬ್ಯಾಟಿಂಗ್ ನಡೆಸಿ ಚೆಂಡನ್ನು ಬೌಂಡರಿ- ಸಿಕ್ಸರ್​ಗೆ ಅಟ್ಟಿದರು. ಈ ಜೋಡಿ ಮೊದಲ 5 ಓವರ್​ಗೆನೆ ತಂಡದ ಮೊತ್ತವನ್ನು 58ಕ್ಕೆ ತಂದಿಟ್ಟರು.

Vinay Bhat | news18-kannada
Updated:December 11, 2019, 10:52 PM IST
IND vs WI: ಮುಂಬೈನಲ್ಲಿ ರೋಹಿತ್ ರಾಹುಲ್ ವಿರಾಟ ಪ್ರದರ್ಶನ; ಸರಣಿ ಗೆದ್ದು ಬೀಗಿದ ಭಾರತ
ಟೀಂ ಇಂಡಿಯಾ
  • Share this:
ಮುಂಬೈ (ಡಿ. 11): ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆದ ವೆಸ್ಟ್​ ಇಂಡೀಸ್ ವಿರುದ್ಧದ ಅಂತಿಮ ಟಿ-20 ಪಂದ್ಯದಲ್ಲಿ ಭಾರತ ಭರ್ಜರಿ ಗೆಲುವು ಸಾಧಿಸಿದೆ. ಕೆ ಎಲ್ ರಾಹುಲ್, ರೋಹಿತ್ ಶರ್ಮಾ ಹಾಗೂ ವಿರಾಟ್ ಕೊಹ್ಲಿ ಸ್ಪೋಟಕ ಅರ್ಧಶತಕ ಹಾಗೂ ಬೌಲರ್​ಗಳ ಸಂಘಟಿತ ಹೋರಾಟದ ಫಲವಾಗಿ ಟೀಂ ಇಂಡಿಯಾ 67 ರನ್​ಗಳ ಜಯ ಸಾಧಿಸಿದ್ದು, ಸರಣಿ ವಶಪಡಿಸಿಕೊಂಡಿದೆ.

ಭಾರತ ನೀಡಿದ್ದ 241 ರನ್​ಗಳ ಬೃಹತ್ ಟಾರ್ಗೆಟ್ ಬೆನ್ನಟ್ಟುವಲ್ಲಿ ಎಡವಿದ ವಿಂಡೀಸ್ 20 ಓವರ್​ನಲ್ಲಿ 8 ವಿಕೆಟ್​ಕಳೆದುಕೊಂಡು 173 ರನ್ ಗಳಿಸಲಷ್ಟೆ ಶಕ್ತವಾಗಿ ಸೋಲೊಪ್ಪಿಗೊಂಡಿತು. ಈ ಮೂಲಕ ಮೂರು ಪಂದ್ಯಗಳ ಟಿ-20 ಸರಣಿಯಲ್ಲಿ 2-1 ಮುನ್ನಡೆಯೊಂದಿಗೆ ಭಾರತ ಸರಣಿ ವಶಪಡಿಸಿಕೊಂಡಿದೆ.

 



ರೋಹಿತ್ ಸಿಕ್ಸರ್ ದಾಖಲೆ; ವಿರಾಟ್ 100ನೇ 50; ಭಾರತದ ಮೂರನೇ ಅತಿ ದೊಡ್ಡ ಮೊತ್ತ!

ಟಾಸ್ ಗೆದ್ದ ವೆಸ್ಟ್​ ಇಂಡೀಸ್ ತಂಡದ ನಾಯಕ ಕೀರೊನ್ ಪೊಲಾರ್ಡ್​​ ಬೌಲಿಂಗ್ ಆಯ್ಕೆ ಮಾಡಿಕೊಂಡರು. ಅದರಂತೆ ಬ್ಯಾಟಿಂಗ್​ಗೆ ಇಳಿದ ಟೀಂ ಇಂಡಿಯಾ ಸ್ಫೋಟಕ ಬ್ಯಾಟಿಂಗ್ ಪ್ರದರ್ಶಿಸಿತು.

ಓಪನರ್​ಗಳಾದ ರೋಹಿತ್ ಶರ್ಮಾ ಹಾಗೂ ಕೆ ಎಲ್ ರಾಹುಲ್ ಬಿರುಸಿನ ಬ್ಯಾಟಿಂಗ್ ನಡೆಸಿ ಚೆಂಡನ್ನು ಬೌಂಡರಿ- ಸಿಕ್ಸರ್​ಗೆ ಅಟ್ಟಿದರು. ಈ ಜೋಡಿ ಮೊದಲ 5 ಓವರ್​ಗೆನೆ ತಂಡದ ಮೊತ್ತವನ್ನು 58ಕ್ಕೆ ತಂದಿಟ್ಟರು.

ಈ ನಡುವೆ ರೋಹಿತ್ ಶರ್ಮಾ ಕೇವಲ 23 ಎಸೆತಗಳಲ್ಲಿ 4 ಬೌಂಡರಿ, 4 ಸಿಕ್ಸರ್ ಚಚ್ಚಿ ಅರ್ಧಶತಕ ಪೂರೈಸಿದರು. ಇದರ ಬೆನ್ನಲ್ಲೆ ರಾಹುಲ್ ಕೂಡ 29 ಎಸೆತಗಳಲ್ಲಿ 6 ಬೌಂಡರಿ, 2 ಸಿಕ್ಸರ್ ಸಿಡಿಸಿ 50 ರನ್ ಪೂರ್ಣಗೊಳಿಸಿದರು.

ಅರ್ಧಶತಕದ ಬಳಿಕವೂ ಹೊಡಿಬಡಿ ಆಟವಾಡಿದ ಹಿಟ್​ಮ್ಯಾನ್ ಅಂತಿಮವಾಗಿ 34 ಎಸೆತಗಳಲ್ಲಿ 6 ಬೌಂಡರಿ, 5 ಸಿಕ್ಸರ್ ಸಿಡಿಸಿ 71 ರನ್​ಗೆ ಔಟ್ ಆದರು. ಈ ಮೂಲಕ ರೋಹಿತ್-ರಾಹುಲ್ 135 ರನ್​ಗಳ ಅಮೋಘ ಜೊತೆಯಾಟ ಅಂತ್ಯವಾಯಿತು. ರಿಷಭ್ ಪಂತ್ ಸೊನ್ನೆ ಸುತ್ತಿದರು.

13ನೇ ಓವರ್ ಹೊತ್ತಿಗೆ ನಾಯಕ ವಿರಾಟ್ ಕೊಹ್ಲಿ ಜೊತೆಯಾದ ರಾಹುಲ್ ಮನಬಂದಂತೆ ಬ್ಯಾಟ್ ಬೀಸಿದರು. ವಿಂಡೀಸ್ ಬೌಲರ್​ಗಳ ಬೆಂಡೆತ್ತಿದರು. ಅದರಲ್ಲು ಕೊನೆಯ 4 ಓವರ್​​ನಲ್ಲಿ 64 ರನ್ ಹರಿದುಬಂತು.

ಕೊಹ್ಲಿ ಕೇವಲ 29 ಬಾಲ್​ಗಳಲ್ಲಿ 4 ಬೌಂಡರಿ, 7 ಅಮೋಘ ಸಿಕ್ಸ್​ ಸಿಡಿಸಿ ಅಜೇಯ 70 ರನ್ ಕಲೆಹಾಕಿದರು. ಇತ್ತ ರಾಹುಲ್ ಶತಕ ವಂಚಿತರಾಗಿ 56 ಎಸೆತಗಳಲ್ಲಿ 9 ಬೌಂಡರಿ, 4 ಸಿಕ್ಸರ್​ನೊಂದಿಗೆ 91 ರನ್ ಗಳಿಸಿದರು. ಈ ಜೋಡಿ 95 ರನ್​ಗಳ ಜೊತೆಯಾಟ ಆಡಿತು. ಅಂತಿಮವಾಗಿ ಭಾರತ 20 ಓವರ್​ನಲ್ಲಿ 3 ವಿಕೆಟ್ ನಷ್ಟಕ್ಕೆ 240 ರನ್ ಬಾರಿಸಿತು.

241 ರನ್​ಗಳ ಟಾರ್ಗೆಟ್ ಬೆನ್ನಟ್ಟಿದ ವೆಸ್ಟ್​ ಇಂಡೀಸ್ ಆರಂಭದಲ್ಲೇ ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಲೆಂಡ್ಲ್ ಸೈಮನ್ಸ್​(7), ಬ್ರಾಂಡನ್ ಕಿಂಗ್(5) ಹಾಗೂ ನಿಕೋಲಸ್ ಪೂರನ್(0) ಬೇಗನೆ ನಿರ್ಗಮಿಸಿದರು.

ಶಿಮ್ರೋನ್ ಹೆಟ್ಮೇರ್ ಸ್ಫೋಟಕ ಆಟ 24 ಎಸೆತಗಳಲ್ಲಿ 5 ಬೌಂಡರಿ ಸಿಡಿಸಿ 41 ರನ್​ಗೆ ಅಂತ್ಯವಾಯಿತು. ಇತ್ತ ಪೊಲಾರ್ಡ್​ ಅರ್ಧಶತಕ ಸಿಡಿಸಿ ಏಕಾಂಗಿ ಹೋರಾಟ ನಡೆಸಿದರು. ಆದರೆ, ಪೊಲಾರ್ಡ್​ 39 ಎಸೆತಗಳಲ್ಲಿ 5 ಬೌಂಡರಿ, 6 ಸಿಕ್ಸರ್ ಬಾರಿಸಿ 68 ರನ್​ಗೆ ಔಟ್ ಆದರು. ಈ ನಡುವೆ ಜೇಸನ್ ಹೋಲ್ಡರ್ ಕೂಡ 8 ರನ್​ಗೆ ಸುಸ್ತಾದರು.

ಅಂತಿಮವಾಗಿ ವಿಂಡೀಸ್ 20 ಓವರ್​ನಲ್ಲಿ 8 ವಿಕೆಟ್​ಕಳೆದುಕೊಂಡು 173 ರನ್ ಗಳಿಸಲಷ್ಟೆ ಶಕ್ತವಾಗಿ ಸೋಲಿಗೆ ಶರಣಾಯಿತು. ಭಾರತ ಪರ ದೀಪಕ್ ಚಹಾರ್, ಭುವನೇಶ್ವರ್, ಶಮಿ ಹಾಗೂ ಕುಲ್ದೀಪ್ ತಲಾ 2 ವಿಕೆಟ್ ಕಿತ್ತು ಮಿಂಚಿದರು.
First published:December 11, 2019
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ